Va'Atəŋ 25
25
Wəmta na Abraham: kirtin meɓɓeti
1Abraham agəmək guluk maɓɓat əmpa; iya nat na, Ketura. 2Tuwe sənək: Zimran, Yoksan, Medan, Madiyan, Yisbak gəm Suwa. 3Yoksan awek may Saba də Dedan. Kirtin Dedan na, mə Asiriɗe, mə Letusiɗe, gəm mə Le'ummiɗe. 4Madiyan duwe may Efa, Efer, Hanok, Abida, gəm Elda'a. Eskiskiŋ kirtət Ketura.
5Abraham apsənək arya nan pak sən Isak. 6Sit kirtət gəran na, Abraham əvəl avəl sit ɗarə. Gala asan daran hara na, azargitik səza Isak, wətən dəka dələv nammba pay nampum. 7Wəzva na Abraham azəv yaŋka: səkat də kaklaw buhul kiyən sle'i. 8Yaŋ Abraham amtə; agalək əgal an təstəsə, azəmək haya. Asapək azet ɗiy nani. 9Isak də Ismayel kirtin andəkənək a bətəŋ na Makpela, addəv guli na Efron wətən Sohar, mə Hitti, məs haran sek aka Mamre. 10#VAA 23:3-16Addəv guli Abraham albah səvet kirtin Het. Adaki məndik may Abraham dət gon Sara. 11Dərɓaga əmta na Abraham, Maŋgəlva azaɓanək Isak, wətəni. Amaŋgava vov net iŋkile na Lahay-Ro'yi asan də gəla.
12Kirtin Ismayel, wətət Hagar, mə Eziptək, balamək nat Sara tuwə sən Abraham yəŋki. 13Iya net kirtin Ismayel, yaŋ də daya neti: Nebayot, Tiz na Ismayel, Kedar, Adbe'el, Mibsam, 14Misma, Duma də Masa, 15Hadad, Tema, Yetur, Nafis gəm Kedma. 16Ndəɗaŋgə kirtin Ismayel, vaski iya net də walaŋgəla neti gəm də dibirgidik neti, ɗiy gugriɗ net tahəŋ kəlaw kiyit sula, va ŋgbimŋgbim net asani. 17Wəzva na Ismayel yaŋka: səkat də kaklaw hoku kiyən buhulu; ndən zamə. Asap azet ɗiy nani. 18Mə Ismayelɗe assoŋ təŋ sə Hawila gap a Sur, səket meŋge na Eziptə, gap a Asiri, asanək faraɗa səzet milmiŋgiɗni.
Yakob
(25:19—35:29)
Esaw də Yakob
19Aŋki uwa na Isak, wətən Abraham.
Abraham bok uwa Isak, 20Isak agəɗək əzva kaklaw poɗo, gala agəmət Rebeka, wətən Betuwel ka goni, mə Aram na təki məpəlayya na Paddan-Aram, məlmən Laban mə Aram məguluŋguta. 21Isak akkamanək Yawe ambat ɗak nani, vi ndarzlayəktə. Yawe awlak sasãhən, Rebeka guluk nan təgəmək daway, 22yaŋ kirtət adaslkəranən zit addəvta, yaŋ təmna: «Ya an vaski na, vimi zev aŋ arəhu di?» Təmbatək əssohõn Yawe, 23#ROM 9:12Yawe aɓsət na:
«Ɗiy na dələv sulaŋ addəvko,
gabbet ɗiy temtem sula dədawɗakaŋ səddəvko.
Taka wasan gboŋgboŋ dayki mbərən,
daya wagəɗ wəza aba an sawã.»
24Pay nawwa nat agapə, meseŋɗeŋ addəvta. 25Məs digil daabəŋ na, zən liwliwi pakə, də deɓeke silipsilip va lukut na deɓeke: alvanən na, Esaw. 26Sissiŋ məlmən agili, van kawwã aza motokpotokpo təl Esaw: məlvan na, Yakob. Gala muwet na, Isak tay də wəzva kaklaw sləre.
27Kirin nek aɓayaŋka. Esaw mətəvəla məs van awbəta afuŋ ɓa yi, ɗəf na muyãy; Yakob, nan ɗəf də maɗɗulan məsan a gizlirke yi. 28Isak, ana Esaw aŋgələ, vi slu nawra neki amani; Rebeka na, Yakob təŋgələ.
29Pay mbərən Yakob akkoɓuk mige, Esaw amil sura. Ayək diyɗa, 30yaŋ Esaw anah sən Yakob na: «Kamə appaw nəhoɓ mige pepreŋɗeŋ ɗa, vi nəyək diyɗa sawɓa.» Vini miyan na Edom, va wənəh na liwliwi. 31Yakob azlan na: «Avəl su fəksa daya nok dəpaŋka.» 32Esaw, amna: «In yakəŋ əmta na, daya van miy adawtər su di?» 33#IBR 12:16Yakob amna: «Dəpaŋ kədasway suwa.» Esaw asway sənəka, avəl sənək daya nan sən Yakob, 34yaŋ Yakob apsən peŋ gəm mige na hĩyna net zeli. Aptuwik peŋ, ndən mige nek hoɓhoɓu, le' mbat zəga nani. Esaw azelenik daya nani.
Currently Selected:
Va'Atəŋ 25: GBD
Highlight
Share
Copy
Want to have your highlights saved across all your devices? Sign up or sign in
All right reserved
