Va'Atəŋ 26
26
Isak də Abimelek
1May agəɗək aka dəlva, temme də an dəgəɗ aka pay na Abraham. Isak ambatək a Gerar, ana Abimelek, məlĩ net mə Filistiɗe da. 2Yawe arbanək zən azani, aɓsən na: «Kəprik a Eziptə ɓa, asok aka dələv məs nədarbə suko. 3#VAA 22:16-18Asok aka dələv nani, wanəsaw də isi, wanəzaɓoko. Suko, gəm sən mazlalwõk nədapsukum dəlveŋgeŋki, wanəzban əsway naw nəsway sən Abraham afukəŋka. 4Wanuwan zeŋvuk va gərzleɗ na disiŋ, wanəpsin dəlveŋgəŋ pakə, səzani ɗiy naka dələv pak adawrahaŋ əzaɓa, 5vi Abraham aprəmək mawa, armak an nəɗi sən naɗɗa, əpel na ənziya nawa, wəzga' nawa, də mahenziŋ nawa.»
6Isak asanək a Gerar də gəla. 7#VAA 12:13; 20:2Ɗiy nadak assohõnən aka wən nat ɗak nani. Azlan sit na, «Məlmuwtə». Ageslne'ik dawnəh na, ɗak nantə, vi ɗiy nadak adawbaynən aka wən nat Rebeka vi lalawəktə aza ula.
8Agəɗək əvoŋ diyɗa adaka. Yaŋ Abimelek, məlĩ net mə Filistiɗe dawla kəla təkifoŋgo məppan naza gəla na, awla Isak tay əsmay dət guluk nan Rebeka. 9Abimelek ayak Isak, aɓsən na: «Sessel guluk noktə! Vimi kənah na: “Məlmuwtə di?”» Yaŋ Isak azlan sən na: «Nənah vasna, vi geslne dəduwa, azaw na, kawbaywi yi ammbata.» 10Abimelek anah sən əmpa: «Miy kəgəɗ səməŋka! Siɗikke ɓa na kəta ɗəf maɓɓan wavoŋgət guluk noko, is kakkpaŋgan wəray nan akam kəta.»
11Abimelek aɗi wən nan sit ɗiy dəwən neti: «Ɗəf an dərəŋgən ɗəfəŋ dət goni, kawbayni yi.»
12Isak azləgək aka dələvəska, arahək zəga na mabardaw əzva nan ndoɗoɗ ndoɗoɗu. Yawe aɗɗak əzaɓ akani, 13Yaŋ akkpaŋ ɗəf metiŋgini; tay əmbat abe abe, hã ndən kpaŋ məsarya diyɗa. 14Akkpaŋgək afit gazlaŋɗe net wasliɗe, net gəlew dit timeŋgiɗi gəm məɗɗaŋ wəza eŋgil diyɗa.
Isak aɗiyək wənmiyna də Abimelek
Mə Filistiɗe aɗɗaŋgək kotorok nani, 15andəktinik vovɗe net iŋkile məs gewleɗ na Abraham afən, aso'oŋ gala asan daran pakə, mə Filistiɗe aknihinik də dələv səɗal səɗalə. 16Abimelek anah sən Isak na: «Dok səzam, vi kəkkpaŋgək məzuɓap diyɗa day kiymə.»
17Isak ambatək sədak ama məlpa na Gerar, asan də gəla adaka. 18Isak aso'etik vovɗe məso'it gala afən asan, məs mə Filistiɗe andəkaŋ dərɓaga əmta na abraham naka. Ayek də iya va afən alvet lahəŋka.
19Gewleɗ na Isak aso'inik a məlpa, yaŋ arahaŋ vov net iŋkile məzva. 20Məzuteɗeŋɗe na Gerar aŋgarzlahaŋgək dit məzuteɗeŋɗe na Isak, tahəŋ ənahaŋ sitin na: «Iŋkəleŋ naməŋgə.» Aya vov net iŋkile vanəs na, wəŋgarzlahã, vi aŋgarzlahaŋgək dəndəni. 21Aso'oŋguk vov net iŋkile maɓɓan, məseɓi akani'e; ayak na Sitna «Wəseɓe.» 22Yaŋ azar sədaka, aso' vov maɓɓan məgarzlãhĩ akan ɓa, aya na, Rehobot «Təki məwəl sahã» dawnəh na: «Kakaŋ na Yawe appan səmək təki dəmani, wamərah zəga səka dələv vani.»
23Sədak ambat a Ber-Seba. 24Yawe arbanək zən azan dəfəɗ nani, aɓsən na: «Intə Maŋgəlva na afuk Abraham; kəgeslne' ɓa, vi in tat də isi. Wanəzaɓoko, wanuwan zeŋvuk diyɗa ammba məgəɗ wəza naw Abraham.» 25Yaŋ arkək təki nawzaɓ-Maŋgəlva adaka, akkaman Yawe də iya nani. Aherik gizlirke nan adaka, gewleɗ na Isak aso'oŋguk vov net iŋkile adaka.
26 #
VAA 21:22
Abimelek alək sə Gerar də baynan Ahuzat gəm Pikol daya nalpa nani. 27Isak aɓsit na: «Vimi kəzzoŋ azaw di? Mənokum tat əzelewa, kərɓahawənək sənokum da.» 28Aɓɗaŋ na: «Ula mula Yawe tay də isi, yaŋ mənah na: Əsway dəsan aka walaŋgəm də isi; məɗi səm wənmiyna aka walaŋgəm də isi! 29Asway səm na kəgəɗ səm na mbərayən ɓa, nam pak mərəŋguk na ɓa, adan moggon kaka' məgəɗ suko, məppok əmbat məzəzayko, is məs kakaŋ Yawe azaɓokəŋka.» 30Agəɗ sitik waynabaya; azəmaŋka, asaŋka, 31alvəɗaŋ pumu, aswayaŋ aza ziti. Isak ataw sit tive, appanənək də zazaya.
32Dəpas vani, gewleɗ na Isak azzoŋ ənahaŋ sənən wən na vov net iŋkile aso'oŋgu. Aɓsənən na: «Mərihik iŋkile.» 33Aya vov van na Sibe'a; vini yi, walaŋgəla van adawyanən na Ber-Seba, hã dəpaŋka'e, va wənəh na vov net iŋkile na Əswaya.
Əɗi guluk na Esaw
34Esaw tay də wəzva kaklaw poɗo, agim gil mə Hittiɗe sula, may: Yehudit, wətən Be'eri gəm Basmat, wətən Elon. 35Zəga naɗɗa net adannək gidivit may Isak dət Rebeka.
Currently Selected:
Va'Atəŋ 26: GBD
Highlight
Share
Copy
Want to have your highlights saved across all your devices? Sign up or sign in
All right reserved
