Va'Atəŋ 27
27
Yakob amõhuk wəzaɓ miynan napsən Esaw
1Isak agalka, haran addaka, awla ɓa. Ayak Esaw, wətən an daya, aɓsən na: «Wətuwa!» Azlan amna: «In yakəŋkə.» 2Yaŋ amna: «Awle ɗa nəgalka, nəsən pay namta naw ɓa. 3Yaŋ na, agəm gulom nok də bəle noko; abbal awra kəhũsugən sluwa. 4Kədə sugən peŋ an dəgəm mawa, kəkiy sugəni, nəzəmgən kawɗi əzaɓ naw in sən kiyu akok tak nədamta.»
5Rebeka təprəmək gala Isak adawpel sən Esaw, wətəni. Esaw ambatək awra vi kawbay slu kawkiyəni. 6Yaŋ Rebeka tənah sən Yakob, wətəta: «Awle, nəprəmək afuk ənah sən Esaw məlmuko; aɓsən na: 7“Akiy su slu nawra, kəda sugən nəzəmgəni. Nədamta na, nəɓuh sukuk ma aba Yawe.” 8Kakaŋ na wətuwa, aprəm wən an nədawɗi suko: 9Dok azet gilewi, arəm su porsokɗe mogget sula, nəda səngən peŋ an dəgəm ma afuko. 10Kəka səngən afuko, dəzəmgən adamta na aɓuh sukuk ma.»
11Yakob aɓsət Rebeka, man na: «Esaw, məlmuw məsdogozo yi, yaŋ naw porslokoy nani. 12Kuzuŋ əbba wattəman zuwa, waɗiyu ka məkes hara. Wəray wade akaw ɗar məza wəzaɓ ɓa.»
13Man təɓsən na: «Wətuwa, wəray nakok dəkkpaŋ akawa. Azban su an naw kaka'ə, dok arəm su an nənah suko.»
14Ambatək ərma porsokɗe neki, akisitək mani, tədak peŋ nak va na makra afəni. 15Yaŋ Rebeka təgəm lukutɗe na sləma na Esaw, daya nata, məs təzaɓet eŋgil anatda, təgul sən Yakob, wətət an sawã.
16Təvaɗ gəba na porsok nak aka vani, gəm aza wəlan məkəkləɗni. 17Ndət ta' əpsən teɓ də peŋ an tədə nak ava Yakob wətəta. 18Atoŋ aza afəni, aɓsən na: «Əbba!» Azlan na: «In yakəŋkə; nawa kənan di wətuwa?» 19Yakob aɓsən afən na: «Intə Esaw, daya na uwa noko. Nəɗɗak an kənah su naka. Asil kamə, asok ɗewi azəm slu nawra naka, is sən kiyuk kəɓuh sugən ma.» 20Isak azlan sən wətən na: «Mbar kərah go' ləŋ di, wətuwa?» Amna: «Yawe Maŋgəlva nok akiy suwək gbisl abawa.» 21Yaŋ Isak anah sən Yakob na: «Azar azaw aŋ go'o ɗa, wətuwa, nəppayokgəni. Wətu Esaw kənan sa ndəni yi ɓa?» 22Yakob azar aza Isak afəni, appayani, amna: «Wəlan, wəla Yakob iyi; van sulagəni, va Esaw iyi.» 23Dəɓap əsənən ɓa, vi van zlifsik zlifsiki yi va na Esaw məlməni; aɓuh sənək ma.
24Aɓsən na: «Istə Esaw gesiŋ sa wətuwa?» Azlan sən na: «Intə».
25Yaŋ amna: «Akiy suwa, nəzəmgən slu nawra səvoko wətuwa, nəɓuh sukgən ma in sən kiywa.» Yakob aki səni, ndən namnamə; ndən mah sən mbazla ndən rəhə. 26Siske Isak afən anah sən na: «Ade go'o azaw ɗa, armuw təwəɗə, wətuwa.» 27#IBR 11:20Ndən zar azani, kãw ərman təwəɗə. Isak affokuk məŋgən lukutɗe nani, aɓuh sənək ma, amna: «Ə̃h! Məŋgən wətuwəŋ va məŋgən muyã məs Yawe azaɓani.
28Maŋgəlva dəpsuk mənɗe na disiŋ dit dəlveŋge də mẽl azeti,
hay də mbazla genegene təki pakə!
29 #
VAA 12:3
Ɗiy meɓɓet dəɗɗaŋ sukun wəza,
vandayɗe net ɗiy dəppu'oŋ aboko!
Asok məlĩ aket milmiŋgiɗko,
kirtət mok dəppu'oŋ aboko!
Wəray dəsan aka məzurayguko,
əzaɓ dəsan aka məzuzoɓoko!»
30Isak əgrak əɓuh sən ma sən Yakob, Yakob əzar səza afən ləŋgə, Esaw, məlmən ade sura sə təki ətəvəla. 31Yaŋ ada slu nawra nak tam akiy sən afəni. Sissiŋ anah sən afən na: «Asil əbba, kəzəmgən slu nawra na va wətuk naka; vi is sən kiyuk kəɓuh sugən ma.» 32Ya Isak azlan səni: «Nawa kənan di?» Aɓsən na: «Intə Esaw, wətuk an daya.»
33Isak təŋ əkker zloŋzloŋgu, amna: «Ya mbara naway dəmbat ətəvəl, dəkiy slu nawraŋ di? Kəde na akiy suwək nəzəmək səkayə. Nəɓuh sənək ma, wəzaɓ wasan akani.»
34Adan Esaw aprəm əpel na afəni, aŋgəslək vaŋvəl hã disiŋ, makran agəɗək ɓəros ɓəros diyɗa, aɓsən afən na: «Aɓuh su ma van tamə əbba!» 35Amna: «Məlmuk adek guluhguluh, agəmək wəzaɓ noko.» 36#VAA 25:29-34Esaw azlan sən na: «Vi məlvan na Yakob əŋkiy, ataf gəlaw təl sulaŋ sa? Amõhuk daya nawzəmgəla səvawa, yaŋ amõh wəzaɓ naw əmpa'e. Kəpəl su wəzaɓ taka dayday ɓa sa?» 37Isak azlan sən Esaw na: «Awle! Nəɗiyək ka daya akoko, Milmiŋgiɗin pak, nipsinik ka belemɗe nani. Nəpsənək haykəmari də mbazla na meketepe. Miy nədawɓap napsuk kandi wətuwa?» 38#IBR 12:17Esaw azlan sən afəni: «Əzaɓ van takay avok kaka' sa əbba? Aɓuh su ma van tamə!» Esaw aslanək wəlan, ahəmka. 39#IBR 11:20Isak azlan sən amna:
«Awle! Aka dələv məmtən kədawsok də gəla
minɗe na disiŋ assoŋ na aka dələv nok ɓa.
40 #
VAA 36:8; 2MI 8:20 Aka hara masalam noki kədawsoko,
wakəgəɗ wəza aba məlmuko
addəv yokyok noko,
wakəŋzlu zuk nan
an aklak suk awloko.»
Yakob tay ənzan ana Laban gəmsən da
41Esaw aɗiyək Yakob ka məzuzel nan aka wən na əzaɓ məs afən azaɓanənka. Tay ənah də makran na: «Pay na gəlabay əbba tay əgapa, wanəbay Yakob daska.» 42Məprəman səti Rebeka wən na daya nata. Təyak Yakob, wətət an sawã, tənah sən na: «Awle Esaw məlmuk man aka əmpəlkiya də wəbayko. 43Kakaŋ kan na wətuwa, aprəm suwa; Asili! Anzok ana məlmu Laban da, a Haran. 44Kəsokgən ananda adak gap makra məlmuk fefeti. 45Pay ədagədəv na məlmuk agrak səkoko, an azgətək ki an kəgəɗ səni, wanəslən əkiyuk sədaka. Vimi kawzet kirtu sulegit pay taka vas ləŋ di?»
46Rebeka tənah sən Isak na: «Ənziya egge tay nek azaw ɓa aka wən net atiŋgiɗu, kirtin Hettiŋki. An Yakob wagəm waŋ səka dəlvəŋ zeŋvit eŋkiŋki, miy ətər nassa naw egge di!»
Currently Selected:
Va'Atəŋ 27: GBD
Highlight
Share
Copy
Want to have your highlights saved across all your devices? Sign up or sign in
All right reserved
