Va'Atəŋ 6
6
Nuwe dit iŋkile məs dəbulyumun təkiya
(6:1—10:32)
Maŋgəlva aynanək wən nagrakən dit ɗiyi
1 #
YOB 1:6; 2:1 Adan ɗiy atəŋgaŋ ənzləraŋ aka dəlva, awaŋgək kirin muguluŋgiti, 2yaŋ kirtin Maŋgəlva awlenin kirtit ɗiy muguluŋgit lelewɗe areti, agəmaŋgək gil məs aweleŋgi. 3Yawe, amna: «Əmpəs naw adawsan addəv ɗəf faɗ ɓa vi gəɓa zən namtayi, wəzva nan dəsangən səkat də kaklaw sula.» 4#ƏŊƊ 13:33Dogomɗe tahəŋ aka dəlvafuŋ, aka pay nani, sədərɓagan na, gala pay kirtin Maŋgəlva mezeŋgleket azzoŋ azet kirtit ɗiy Məguluŋgiti, awaŋgək dənɗaŋgə. Ndəɗaŋgə badawayɗe lahəŋka, ɗiy net sləmet agilke.
5 #
MAT 24:37; LUK 17:26; 1PI 3:20 Yawe awla na, mambray na ɗəf titir adayək aka dəlvafuŋ: əɗɗum na makran aka mbərayən adawbay zən pay pak kaka'ə, 6Yawe man nzokiy, də wəzəməɗ ɗəf aka dəlvafuŋ. Makran assanəka, 7Yawe amna: «Wanəvvuyet ɗiy nəzəməɗ aka dəlvəŋki, ɗəf titire hã gap azet zəgeɗ memeyẽɗ gugriɗe, gap azet vẽvẽɗe dit biŋgeɗ na disiŋ pakə, nəsawək maw nzok vi nəzəmiɗe.» 8Nuwe arahək mbəlembəle a mahara Yawe.
Maŋgəlva armak a makran nawtəwər Nuwe
9 #
2PI 2:5
Uwa na Nuwe yaŋka: Nuwe, ɗəf təstəs-gəraki aka pay sayit ɗiy nani, məziw aka wəni, gala pay nani. Nuwe adawək də Maŋgəlva, 10Nuwe awək kirin mezeŋgleket hoku: Sem, Kam, gəm Yafet.
11Dəlvafuŋ arayək aba Maŋgəlva, aknahək də gagay. 12Yaŋ Maŋgəlva awla dəlvafuŋ arayka, vi ɗəf naka dələv pak araygənək tive nani. 13Maŋgəlva anah sən Nuwe na: «Naw na, nəzuwginik pay nagrak zəgeɗ pak! Vi gagay aknahək dəlvafuŋ, aka batemit ɗiyi, wanəzet pak də dəlvafuŋ.» 14Azaɓ bəlay va akoti na wəlaŋga ɓəɓəla. Kətawangən gədəv bəlay vani. Kəkkəɗ səngən makarɓaɓay dəddəvən gəm dəka gəɓani. 15Kəzaɓgən bəlay van zezek nan metir səkat də kaklaw sle', slosloprok nan metir kaklaw sula kiyən sle', əɓay nan metir kəlaw kiyən sle'i. 16Kərəmgən biyna, kəɗupgən akani, weleŋgit dəsangən va ɗəf du' taka. Kəɗigən maddamba na bəlay van aka təkzləmən, sissiŋ kətawangən gədəvən nadda də disiŋ, is gəɗe' masulani, gəɗe' mohokoni. 17Naw, in yakəŋ əɗɗa buwən məvekeveke dəzzoŋgə aka dəlvafuŋ pakə, vi kawzet zəgeɗ mederet məzəmpəsaŋ nammba dələv pakə; zəgeɗ mederet nammba dələv dəmtaŋgən kakãhə̃. 18Waniynan wən də isi. «Kətoŋgən addəv bəlay, is dit kirtuko, ɗak noko, gəm gil net kirtuko. 19Zəga madaran pakə, zəga məs slu zən pak, kəkiygən mizilin də muguluŋguni, dəsoŋgə mederet də is addəv bəlay! 20Zev bəŋga pakə, zev zəga mamayãn pakə, vẽvẽɗe naka dəlvafuŋ pakə, mizilin də muguluŋgun dəzzoŋgən azok ka dəsoŋgən medereti. 21Is sən kiyuk akay zev zəga nawzəm nok temtem akkalan azoko, wasan sukum ka zəga nawzəma.» 22#IBR 11:7Nuwe aɗak va Maŋgəlva aɗiy sən dekdek naɗɗa.
Currently Selected:
Va'Atəŋ 6: GBD
Highlight
Share
Copy
Want to have your highlights saved across all your devices? Sign up or sign in
All right reserved
