Va'Atəŋ 7
7
Nuwe tay ətoŋ addəv bəlay
1Yawe aɓsən Nuwe na: «Ade atoŋ də gəla nok pak addəv bəlay, vi is takərguk nəwəl təstəs səddəv sayit ɗiyəŋki. 2Kəndəgən sə weleŋgit zəgeɗ memeyẽɗ en salala pak mizilin də mugolun təptəp buhulu, en məs salalaŋgə ɓa tamə, mizilin də mugolun mətəpet taka, mizilin dət muguluŋguta, 3vaski yi, biŋgeɗ na disiŋgi'e, təp mizilin də mugolun gap buhulu, mizilin də mugolun, vi zeŋvit dəsangən madaran aka dəlvafuŋ. 4Vi addəv pay buhul aŋna, wanəziy buwən, kapay də dəfəɗ gap əvoŋ kaklaw poɗo, wanəzan zəga an dəsan pak faffaɗə səka dəlvafuŋ.» 5Nuwe aɗɗak va Yawe aɗi sən wən nan kpekpe'i.
Iŋkile metiŋgit dəbulyumun təkiya
6Wəzva na Nuwe agəɗək, səkat sləre, pay buwən məvekeveke agəɗ aka dəlvafuŋ. 7#MAT 24:38,39; LUK 17:27Nuwe pay toŋ addəv bəlay dit kirtini, goni, gil net kirtin vi buwən məvekeveke. 8Zəgeɗ memeyẽɗ nawzəma dit en nawmə' pakə, biŋgeɗ dit zəgeɗ məzudawaŋ naka dəlvafuŋ, 9təp mizilin də mugolun, mizilin də mugolun azzoŋ aza Nuwe addəv bəlay va Maŋgəlva aɗi sən wən nan sən Nuwe. 10Pay buhul nak atoŋko, iŋkile na buwən məvekeveke abulyumənək dəlvafuŋ.
11 #
2PI 3:6
Aka wəzva na Nuwe, səkat sləre, aka təla masulani, də wəvoŋ makəlaw kiyən buhul na təla nani, heret iŋkile nafuŋ pak aɓəhaŋka, met en na disiŋ akoluk viŋgi. 12Buwən aparək aka dəlvafuŋ, pay kaklaw poɗo dəfəɗ kaklaw poɗo. 13Pay dəpaski, Nuwe atoŋ addəv bəlay dit kirtini, Sem, Kam gəm Yafet, gəm ga Nuwe, dit gil net kirtin hoku, 14Ndəɗaŋ də zeŋvit zəgeɗ memeyẽɗ temtemi, wasliɗe dit gilewi məzudawaŋ aka dəlvafuŋ, vẽvẽɗe, zeŋvit biŋgeɗ na disiŋ temtemi, wãwyẽkeɗ dit zəgeɗ mukroket dəwən neti. 15Atoŋgoŋguk addəv bəlay aza Nuwe, təp məzilin də mugolun, zeŋvit zəgeɗ mederet məs də əmpəs addivit pakə. 16Mizilin də mugolun, zəga an də slu zən pak dədawtoŋgo. Atoŋgoŋguk va Maŋgəlva aɗi sən wən nan sən Nuwe. Yaŋ Yawe ampan maddamba akani.
17Buwən məvekeveke, agəɗək pay kaklaw poɗo aka dəlvafuŋ. Iŋkilet asəkəkaŋka, aslanənək bəlay səka dəlvafuŋ koŋgoŋgu. 18Iŋkile asəkəkaŋgək diyɗa aka dəlvafuŋ, bəlay tay koŋgoŋgo aketi. 19Iŋkile asəkəkaŋgək diyɗa aka dəlvafuŋ, asərətinik mossorgoɗe məɓehit nammba təki a disiŋ pakə, 20Iŋkile asəkəkaŋka asərətinik mossorgoɗe, kpukpum net gap metir buhul aketi. 21Zəgeɗ məzəɓlaŋ naka dəlvafuŋ, biŋgeɗi, zəgeɗ memeyẽɗi, zəgeɗ nawra gəm zəgeɗ mukroket məslilɓiɓ slilɓiɓ naka dəlvafuŋ, ɗəf titir nakan pak amtaŋka. 22Məzəmpəsaŋ dəmpəs aka dəlvafuŋ pakə, zəgeɗ mederet dəwənnet pak amtaŋka. 23Yas azan zəga an dəsan aka dəlvafuŋ pak faffaɗə, ɗiyi, zəgeɗ memeyẽɗi, vẽvẽɗe dit biŋgeɗ na disiŋ daydayə. Azetik kakãh pakə, Nuwe dit en naddəv bəlay azan dəppaŋ kaka'ə.
Nuwe tay igilyen səddəv bəlay
24Əsəkək net iŋkile anziyək aka dəlvafuŋ, pay səkat də kaklaw sle'i.
Currently Selected:
Va'Atəŋ 7: GBD
Highlight
Share
Copy
Want to have your highlights saved across all your devices? Sign up or sign in
All right reserved
