Marcos 14

Ema boot sira buka dalan atu kaer nonook Nai Jesus

(Mateus 26:1-5; Lucas 22:1-2; João 11:45-53)

1-2Nee liu tiha, nai lulik Judeu nia xefi sira ho mestri relijiaun sira buka tempu diak hodi kaer subar Jesus para oho Nia. Maibee sira dehan, “Hein lai. Ita la bele kaer lai Nia, tanba loron boot besik ona. Keta halo be ema barak halo rungu-ranga.”

Sira koalia nunee, tanba loron rua tan, ema Judeu sira nia loron boot, ida nebee sira bolu loron ‘Paskua’, ho ‘Festa Paun la Tau Fermentu’. Iha loron festa nee, sira hanoin fali tempu uluk, nebee sira nia bei-ala sira sai hosi Rai Ejiptu.#Ezodu 12:1-27

Feto ida fui mina morin karu ba Nai Jesus

(Mateus 26:6-13; João 12:1-8)

3Iha aldeia Betánia, iha ema ida naran Simão. Uluk ema hakribit nia, tanba nia hetan moras lepra. Maibee agora nia diak tiha ona.

Molok loron boot nee too, Jesus baa haan iha Simão nia uma. Momentu sira haan hela, iha feto ida mai hasoru Jesus. Nia lori mina morin botir ida. Mina morin nee folin karu teb-tebes.#14:3:Lian Gregu dehan, mina nee folin ‘denari’ 300. Mina nee nia naran ‘nardos’. Uluk ema halo mina nee hosi ai abut morin ida. Botir mina nian nee, ema bahat hosi fatuk. Botir nee nia folin mos karu. Lian Gregu dehan, botir nee halo hosi fatuk ida naran ‘alabastros’. Lucas 7:37-38. Depois nia baku rahun tiha botir nia ibun, i fui mina morin nee ba Jesus nia ulun. Nee hatudu katak nia respeita Jesus hanesan ema boot.

4Maibee iha mos ema balu nebee haan iha fatin nee. Bainhira sira haree nia halo nunee, sira hirus nia. I sira koalia ba malu ho foti aan, dehan, “See mak feto ida nee? Nusaa mak nia bele fui saugati tiha mina morin ida karu teb-tebes nee?! 5Diak liu nia faan deit mina morin nee. I nia osan hodi baa foo ba ema kiak sira. Tanba mina morin nee folin karu, hanesan badaen ida manaan osan iha tinan ida nia laran.” I sira siak makaas nia.

6Maibee Jesus hataan, “Imi keta hirus feto nee. Husik baa. Hau kontenti, tanba nia tau ona mina morin nee ba Hau nia isin. 7Ema kiak sira sei hamutuk ho imi nafatin. Nunee imi bele ajuda sira iha loron nebee deit. Maibee la kleur tan, Hau la hamutuk ho imi ona.#Deuteronomio 15:11 8Hau nia moris la kleur tan ona. I feto nebee fui mina morin mai Hau ohin nee, nia prepara kedas Hau nia isin, hanesan nia tau mina morin ba Hau nia mate isin. 9Hanoin didiak! Bainhira ema foo sai Nai Maromak nia Liafuan iha mundu tomak, sira mos sei konta kona ba feto nee nia hahalok diak nee. Nunee, ema hotu bele hanoin kona ba nia.”

Judas hanoin aat atu faan Jesus

(Mateus 26:14-16; Lucas 22:3-6)

10Nee liu tiha, Jesus nia eskolanti ida hosi sira nain sanulu resin rua nee, naran Judas Iscariotes baa buka nai-lulik nia ulun sira, atu faan Jesus ba sira. Too iha nebaa, Judas hatoo nia hanoin ba sira. 11Bainhira nai lulik nia ulun sira rona tiha Judas koalia nunee, sira haksolok teb-tebes. Sira mos promete dehan “Se o hakarak faan Jesus mai ami, konserteza ami sei selu” Depois Judas sai baa buka dalan hodi entrega Jesus ba sira.

Nai Jesus haan hamutuk ho Nia eskolanti sira iha festa Paskua

(Mateus 26:17-25; Lucas 22:7-14,21-23; João 13:21-30)

12Iha loron nee, monu iha loron primeiru Judeu sira nia loron boot. Iha loron nee, sira tunu paun nebee la tau fermentu. I sira mos oho bibi malae hodi halo festa. Nunee Jesus nia eskolanti sira mai husu ba Nia, “Nai, loron ohin, ita nia loron boot Paskua. Entaun, Ita hakarak ami baa prepara festa Paskua iha nebee?”

13Jesus haruka Nia eskolanti nain rua dehan, “Imi baa uluk iha sidade. Imi sei hetan mane ida lori hela bee iha sanan rai ida. Imi tuir deit nia. 14Nia tama ba uma nebee, imi tuir deit nia. Depois imi hatete ba uma nain nunee, ‘Nai, ami nia Mestri husu fatin ida, para nia uza hodi halo festa Paskua ho Nia eskolanti sira.’ 15Depois ema nee sei hatudu kuartu boot ida iha uma andar leten. Nia prepara kompletu tiha fatin nee ona. Hela deit imi nain rua baa prepara hahaan iha nebaa.”

16Nunee sira nain rua baa ona iha sidade. Iha nebaa sira hetan buat hotu-hotu tuir Jesus hatete ona ba sira. I sira prepara hahaan festa Paskua nian iha nebaa. Depois sira baa bolu Jesus.

17Lokraik ona, Jesus ho Nia eskolanti nain sanulu resin rua baa iha nebaa. 18Sira tuur hodi haan hamutuk. Bainhira sira haan hela, Jesus komesa koalia, “Imi rona mai! Iha ema ida hosi imi mak sei faan Hau ba ema seluk.”#Salmu sira 41:10

19Rona nunee, sira laran susar teb-tebes. I sira ida-idak husu ba Jesus dehan, “Nai, ema ida nebee Nai temi nee laos hau, to?”

20Jesus hataan, “Ema nebee hoban nia paun hamutuk ho Hau iha manko nee, nia mak sei faan Hau. 21Rona didiak! Hau, Ema Oan. Hau tenki mate duni tuir saida mak sira hakerek ona iha Nai Maromak nia Liafuan Santu. Maibee imi tenki kuidadu! Ema nebee faan Hau nee, nia rasik sei lori nia todan. Diak liu nia inan la foo hahoris nia iha mundu nee.”

Nai Jesus foo hatene katak paun ho tua hanesan sinal hodi hanoin Nia

(Mateus 26:26-30; Lucas 22:14-20; 1 Korintu 11:23-25)

22Bainhira sira haan hela, Jesus foti paun fuan ida, hodi foo agradese ba Nai Maromak. Depois nia silu paun nee i fahe ba Nia eskolanti sira. Nia hatete, “Paun nee Hau nia isin. Simu hodi haan baa.”

23Depois Nia foti fali tua kopu ida. Nia foo tan agradese ba Nai Maromak. Depois Nia foo tua kopu nee ba Nia eskolanti sira hotu hemu. 24I Nia hatete, “Tua nee Hau nia raan. Raan nee, sei fakar hodi salva ema barak. Raan nee hanesan prova ida hodi hatudu katak buat nebee mak Nai Maromak promete ona, agora kumpri tiha ona. Simu hodi hemu baa.#Ezodu 24:8; Jeremias 31:31-34

25Rona didiak! Komesa kalan nee, Hau la hemu tan rezultadu hosi ai uvas ona. Too Hau tuur hodi ukun hamutuk ho Hau nia Aman iha lalehan, foin Hau hemu fali.”

26Nee hotu tiha, sira kanta hamutuk hodi hahii Nai Maromak. Depois sira sai, hodi baa iha foho Oliveira.

Nai Jesus foo sai uluk katak Pedro sei nega Nia

(Mateus 26:31-35; Lucas 22:31-34; João 13:36-38)

27Bainhira sira lao hela, Jesus hatete kedas ba sira, “Orsida kalan, imi hotu-hotu sei halai husik hela Hau mesak. Nee tuir Nai Maromak nia Liafuan Santu nebee ema hakerek tiha ona:

‘Hau sei oho tiha bibi atan.

Nunee nia bibi sira sei halai namkari.’#Zacarias 13:7

28Hau sei mate duni. Maibee bainhira Hau moris fali, Hau baa uluk imi iha provinsia Galileia.”#Mateus 28:16

29Rona nunee, Pedro protesta kedas Jesus hodi dehan, “Nai, bele ema hotu halai husik hela Ita Boot, maibee hau mak lae duni. Hau sei la husik hela Ita Boot mesak.”

30Jesus hataan, “Pedro, hanoin didiak! Orsida kalan, molok manu kokoreek dala rua, o sei nega Hau dala tolu, dehan, o la konhese Hau.”

31Pedro hataan makaas, dehan “Lae, Nai! Se ema oho Ita Boot, hau prontu mate hamutuk. Hau sei la halai husik hela Ita Boot, no sei la nega Ita Boot!”

Pedro nia kolega sira mos hatete nunee.

Nai Jesus halo orasaun iha Getsemani

(Mateus 26:36-46; Lucas 22:39-46)

32Nee liu tiha, Jesus ho Nia eskolanti sira lao nafatin too iha toos ida iha foho Oliveira. Fatin nee naran Getsemani. Jesus hatete ba Nia eskolanti sira, dehan “Imi tuur lai iha nee. Hau sei baa halo orasaun iha nebaa.”

33Nia lori deit Pedro, Tiago ho João hamutuk ho Nia. Hahuu hosi momentu nee, Nia laran komesa susar i tristi teb-tebes. 34Nia hatete ba sira, “Hau nia laran susar liu! Too Hau senti atu mate deit. Imi tuur hein lai iha nee.”

35-36Depois Jesus hakat ituan ba oin. Nia hakneak ba rai, i halo orasaun ho laran susar. Nia dehan nunee, “Apaa doben. Se Apaa hataan, Hau lalika simu terus too mate hanesan nee. Hau hatene nanis ona katak Apaa bele halo buat hotu-hotu. Nunee, se bele, Apaa hasai tiha terus nee hosi Hau. Maibee la bele tuir Hau nia hakarak. Tuir deit Apaa nia hakarak.”

37Liu tiha, Nia fila ba Nia eskolanti nain tolu nee, maibee sira toba dukur hela. I Nia fanu sira, hodi dehan ba Pedro, “Pedro,#14:37:Liafuan Gregu dehan ‘Simão’. Nee Pedro nia naran seluk. o toba ka?! Hau iha nebaa oras ida deit. Nusaa mak imi la bele hein ituan?! 38Hadeer ona! Imi nia laran hakarak duni halo buat diak, maibee imi nia isin mak fraku. Tanba nee, imi tenki harohan, para bainhira hetan tentasaun ruma, imi la monu.”#1 Korintu 10:13

39Depois Jesus baa halo orasaun dala ida tan. Nia husu fali ba Nai Maromak para Nia la bele simu terus boot nee. 40Depois Nia mai, haree Nia eskolanti nain tolu nee. Maibee sira toba dukur hela, tanba sira matan dukur atu mate. I Nia fanu fali sira, maibee sira la hatene saida mak sira atu hataan ba Nia.

41Nee liu tiha, Jesus husik hela sira, hodi baa halo orasaun ba dala tolu. Liu tiha, Nia mai fanu sira. Nia dehan, “Imi sei toba tan ka?! Too ona! Hau Ema Oan. Agora, ema mai kaer Hau, hodi entrega ba ema aat sira nia liman. 42Hadeer ona! Loke imi nia matan hodi haree took. Ema ida atu faan Hau nee, mai ona. Mai ita baa hasoru sira.”

Ema kaer Nai Jesus

(Mateus 26:47-56; Lucas 22:47-53; João 18:3-12)

43Jesus sei koalia hela, Judas mai ho ema barak. Sira mai lori ai dona ho punhal hodi kaer Jesus. Sira halo nunee, tuir orden hosi ulun Judeu sira nia. Sira nee mak nai lulik nia xefi sira, mestri relijiaun sira, ho katuas sira. 44Molok sira mai, Judas foo sinal kedas dehan, “Imi haree didiak! Ema ida hau baa rei nee, Nia mak nee. Imi kaer kedas Nia i lori baa. Nia mak imi buka nee.”

45Nunee, bainhira Judas too iha fatin nee, nia baa kedas Jesus hodi hatete, “Mestri!” I nia mos rei Jesus. 46Haree Judas nia sinal, ema barak mai kaer Jesus. 47Maibee Jesus nia eskolanti ida losu nia surik, hodi tesi tiha ema ida nia tilun. Ema nebee kanek nee, nai lulik Judeu nia xefi nia atan.

48Jesus koalia ba ema sira nebee mai kaer Nia, dehan, “Nusaa! Imi hanoin Hau ema naok-teen ka? Nee mak imi mai atu kaer Hau lori ai dona ho punhal! 49Loro-loron Hau hanorin hela imi iha Nai Maromak nia Uma Kreda Boot laran, maibee la iha ema ida atu kaer Hau. Agora, mai kaer Hau ona baa! Tanba nee, hakerek tiha ona iha Eskritura Sagrada.”#Lucas 19:47; 21:37

50Jesus nia eskolanti sira tauk atu mate. I sira hotu halai namkari soe hela Jesus mesak deit.

51Iha nee mos, iha ema klosan ida tuir iha Jesus nia kotuk. Nia falun aan ho deit hena rohan ida. Ema sira nee atu kaer mos nia, 52maibee sira kaer deit mak nia hena, i nia halai ho isin molik deit, tanba nia tauk atu mate.

Sira lori Nai Jesus ba iha tribunal relijiaun nian

(Mateus 26:57-68; Lucas 22:54-55,63-71; João 18:13-14,19-24)

53Liu tiha nee, sira lori Jesus ba iha relijiaun Judeu nia xefi boot nia uma. Iha uma nee, ema boot sira halibur malu ona. Sira nee mak nai lulik Judeu nia xefi sira, mestri relijiaun sira, ho katuas lia nain sira. 54Bainhira ema kaer ona Jesus hodi baa, Pedro mos tuir sub-subar hosi kotuk, too iha relijiaun Judeu nia xefi boot nia uma. Nia mos tama ba iha kintal laran, i baa haneruk ahi hamutuk ho ema sira iha nebaa.

55Iha uma laran, nai lulik Judeu nia xefi sira koalia ho membru sira hosi Tribunal Relijiaun Judeu nian. Sira hotu buka Jesus nia sala atu hamonu Nia, para bele kastigu mate Nia. Maibee sira buka Jesus nia sala, la hetan. 56Sira bolu ema barak mai foo sasin. Maibee ema sira foo sasin nee, liafuan la haan malu.

57Iha ema balu hamriik foo sasin falsu, dehan, 58“Ami rona ema nee dehan, ‘Hau sei halo rahun tiha Nai Maromak nia uma kreda boot, nebee ema halo ho liman. Depois, iha loron tolu,#14:58:Liafuan Gregu antigu dehan, “iha loron tolu”, maibee sira konta komesa hosi ohin loron (ida), aban (rua), bain rua (tolu), loron tolu (haat). Ema Timor konta seluk, komesa hosi aban (ida), bain rua (rua), loron tolu (tolu). Nunee, liafuan Gregu “iha loron tolu”, nee dehan katak, iha bain rua. Nunee mos, Nai Jesus mate iha Sesta Feira Santa (konta ida). Aban, loron Sabadu (konta rua). Depois, Nai Jesus moris fali ona iha Domingu Paskua (konta tolu, tuir sira nia maneira konta). Hau sei harii fila fali uma nee, maibee la uza ona ema nia liman.’ ”#João 2:19 59Maibee sira nia liafuan nee mos la haan malu.

60Depois relijiaun Judeu nia xefi boot hamriik iha ema barak nia oin, hodi husu ba Jesus, “Ema barak foo sala ba o. Nusaa mak o nonook deit?”

61Maibee Jesus la hataan liafuan ida. Ulun relijiaun Judeu nia xefi boot husu dala ida tan ba Nia, “O hatete lai! O mak Kristu duni, Nai Maromak Nia Oan, nebee nia promete ona hori uluk nee, ka lae? “

62Jesus hataan, “Loos duni! Hau mak Kristu. Imi sei haree Hau, Ema Oan, tuur iha Nai Maromak nia liman loos. Nia kbiit makaas teb-tebes. Tuir mai, Hau sei tuun hosi lalehan ho kalohan.”#Daniel 7:13

63Rona Jesus koalia nunee, relijiaun Judeu nia xefi boot hirus teb-tebes, too nia lees tiha nia hena. Depois nia hatete ba ema barak nee, “Ita la presiza tan sasin ona. 64Imi rona ona ho tilun rasik, Nia rasik dehan, Nia mak Nai Maromak nia Oan rasik. Hanesan nee, Nia hatete aat Nai Maromak. Tuir ita nia lei relijiaun, see mak foti aan hanesan ho Nai Maromak, ema nee tenki oho tiha. Agora, imi tesi Nia lia oinsaa?”

Sira hotu-hotu tesi nunee, “Ema ida nee sala duni. Nia tenki mate!”#Levitiku 24:16

65Depois ema balu tafui kabeen ba Jesus. Sira taka tiha Nia matan, i tuku Nia hodi husu, “Se O Nai nia profeta duni, O siik took. See mak tuku O nee?” Depois sira foo orden ba ema seguransa sira hosi Uma Kreda Boot atu mai lori Jesus. I ema seguransa sira mos baku Nia.

Pedro nega dala tolu katak nia la konhese Nai Jesus

(Mateus 26:69-75; Lucas 22:56-62; João 18:15-18,25-27)

66-67Iha momentu nebaa, Pedro sei tuur hela iha kintal laran hodi haneruk ahi. Ulun relijiaun Judeu nia ulun boot nia atan ida, baa fihir didiak Pedro nia oin, hodi hatete, “Ohin o mos hamutuk ho Jesus, ema Nazaré nee. Loos ka lae?”

68Pedro hataan, “Lae! Nusaa mak o husu nunee?! Hau la konhese Nia.” Depois Pedro hamriik, baa tiha iha portaun oin. [Iha momentu nee duni, manu mos kokoreek.]#14:68:Dokumentu Gregu balu hakerek, balu la hakerek liafuan nee.

69Depois atan nee haree tan Pedro. Feto nee komesa hatete ba ema hotu-hotu iha kintal laran, “Nia nee hosi sira nia ema.”

70Pedro protesta makaas, “O bulak karik! Ema ida nee, hau la konhese duni.”

La kleur, ema ida tan hatete ba Pedro nunee, “He! Nusaa mak o fila lia tuun-sae, dehan o la konhese ema nee?! Hau hatene imi hotu ema Galileia.”

71Maibee Pedro nega tan, dehan, “Hau jura! Hau la konhese ema nee.”

72Nia foin koalia nunee, manu mos kokoreek dala ida tan. Pedro hanoin too Jesus nia liafuan nebee dehan, “Molok manu kokoreek dala rua, o sei nega Hau dala tolu.”

Hanoin fali liafuan nee, Pedro tanis ho laran susar.

Currently Selected:

Marcos 14: BTDT

Highlight

Copy