Marcos 15

Ema lori Nai Jesus ba hasoru Governador Pilatus

(Mateus 27:1-2,11-14; Lucas 23:1-5; João 18:28-38)

1Dadeer-san rai-huun mutin, ema hotu iha tribunal nee, kombina atu oho Jesus. Depois sira kesi tiha Jesus, i lori ba governador Pilatus. 2Bainhira sira too iha governador, nia husu ba Jesus, “Oinsaa? Loos ka, O mak ema Judeu sira nia liurai duni?”

Jesus hataan, “Loos. Senhor Governador dehan nee, loos duni.”

3Depois nai lulik Judeu nia xefi sira koalia ho governador Pilatus, dehan, “Ema ida nee halo sala barak ona.” I sira foo sai Nia sala ida-idak.

4Depois governador Pilatus husu dala ida tan ba Jesus, “O la rona sira nia koalia nee? Sira foo sala barak ba o. Nusaa mak o la defende aan?”

5Maibee Jesus la hataan liafuan ida, too halo governador nee admira.

Governador Pilatus foo kastigu mate ba Jesus

(Mateus 27:15-26; Lucas 23:13-25; João 18:39-19:16)

6Tinan-tinan, bainhira ema Judeu sira halo festa Paskua, tuir sira nia kostumi, povu sira bele husu ba governador atu hasai ema ida hosi kadeia. 7Iha loron nee, iha ema kastigu ida iha kadeia, naran Barabás. Uluk ema kaer nia, ho nia kolega sira, tanba nia kontra estadu Roma, i nia mos oho ema. 8Tanba festa Paskua besik ona, ema barak baa iha governador Pilatus. Sira husu ho lian makaas dehan, “Senhor governador, loron Paskua too ona. Se bele, senhor governador hasai ema ida hosi kadeia hanesan baibain.”

9I Governador hataan fali dehan, “Hau atu hasai see? Imi hakarak hau hasai mak ema Judeu sira nia liurai nee? Imi hataan ka lae?” 10Governador koalia nunee, tanba nia hatene ona katak nai lulik Judeu nia xefi sira lori Jesus ba aprezenta ba nia, tanba sira odi teb-tebes Jesus.

11Maibee nai lulik nia xefi sira, tau lia ba ema barak nee, atu sira husu ba governador, “Ami lakohi simu Nia. Hasai mak Barabás.”

12Rona nunee, governador husu tan fali, “Se nunee, hau tenki halo saida ba Jesus, nebee imi bolu Nia ‘Ema Judeu nia Liurai’?”

13Sira hotu-hotu hakilar hodi dehan, “Oho tiha Nia! Hedi tiha Nia ba krus!”

14Depois governador husu tan, “Maibee Nia sala saida? Hau investiga ona Nia, maibee hau la hetan Nia sala ida.”

Maibee sira hotu-hotu hakilar makaas liu tan dehan, “Oho tiha Nia! Hedi tiha Nia ba krus!”

15Tanba governador hakarak halo ema barak kontenti, nia hasai Barabás hosi kadeia, tuir sira nia hakarak. Depois nia foo orden ba soldadu sira baku Jesus ho sikoti.#15:15:Tropas Roma sira halo sikoti hosi animal nia kulit. Sira tesi halo saren-saren, depois iha nia tutun ida-idak sira kesi buat kroat. Bainhira sira baku ema bebeik ho sikoti nee, ema nia kulit sei sai naklees hotu. Baku tiha hotu, soldadu sira lori Jesus ba prega iha krus too mate.

Soldadu sira halo trosa ba Nai Jesus

(Mateus 27:27-31; João 19:2-3)

16Nee liu tiha, soldadu sira lori Jesus ba iha sira nia akampamentu.#15:16:Soldadu sira nia fatin nee, ema bolu hodi lian Latin dehan praetorium. Depois sira bolu sira nia kolega hosi batalhaun tomak mai hamutuk. 17Sira foo batina kor uvas ida ba Jesus hatais. Batina hanesan nee, liurai sira mak hatais. I sira halo mos koroa ida hanesan liurai sira mak tau. Maibee koroa ida atu tau ba Jesus nee, sira halo hosi ai tarak. I sira hanehan koroa nee ba Nia ulun. Nunee, sira halo Jesus hodi halimar hanesan atu foti Nia sai liurai.

18Tuir mai sira hakruuk ba Nia, hodi halo trosa, i hatete, “Ita Boot, mak ema Judeu sira nia liurai.” 19Sira mos finji hakneak ho hakruuk iha Jesus nia oin. I sira tafui kabeen fila-fila ba Nia oin. I sira baku Nia ulun bebeik ho ai. 20Sira trata tiha hotu Nia, sira hasai tiha batina, i foo hatais fali ho Nia hena rasik. Tuir mai, sira lori Jesus sai hosi sidade Jerusalém atu baa prega iha krus too mate.

Ema hedi Nai Jesus iha krus

(Mateus 27:32-44; Lucas 23:26-43; João 19:17-27)

21Bainhira sira sai hosi Jerusalém, iha dalan klaran sira hasoru ema ida hosi sidade Sirene. Nia naran Simão, Alexandre ho Rufo sira nia aman. Nia atu tama ba Jerusalém, soldadu sira kaer nia i obriga nia hasaan Jesus Nia krus.#Roma 16:13 22Sira lori Jesus baa iha fatin ida naran Golgota. Nee katak, ‘fatin ulun ruin nian’. 23Too iha fatin nee, sira atu foo tua siin nebee kahur ona ho ai moruk ba Jesus hemu, para Nia bele aguenta terus. Maibee Nia lakohi hemu. 24-25Depois soldadu sira latan Jesus iha ai krus hodi hedi Nia. Depois sira harii tiha ai krus nee, mais-ou-menus iha tuku sia dadeer-saan. I soldadu sira halo rifa para hatene see mak bele hetan Jesus nia hena.#Salmu sira 22:19 26Depois sira hakerek iha ai kabelak ida, i prega iha Jesus Nia ulun leten dehan,

“Ema ida nee Judeu sira nia liurai”

Sira hakerek nunee, hodi hatudu katak sira iha razaun para oho Jesus. 27Iha fatin nee, sira prega mos ema naok-teen boot nain rua. Ida iha Jesus nia sorin kuana, ida iha Nia sorin karuk. 28[Nunee tuir Nai Maromak nia Liafuan nebee hakerek ona: “Ema sei halo Nia hanesan ema nebee sempre halo krimi.”]#15:28:Versikulu ida nee la hakerek iha dokumentu Gregu nebee antigu liu. #Isaías 53:12

29Ema sira nebee liu hosi fatin nee, haree Jesus prega hela iha krus. Sira doko ulun, hodi hamoe Nia, “He! O mak dehan atu halo rahun tiha Nai Maromak nia Uma Kreda Boot, i depois O atu harii fali iha loron tolu, ka?#15:29:Liafuan Gregu antigu dehan, “iha loron tolu”, maibee sira konta komesa hosi ohin loron (ida), aban (rua), bain rua (tolu), loron tolu (haat). Ema Timor konta seluk, komesa hosi aban (ida), bain rua (rua), loron tolu (tolu). Nunee, liafuan Gregu “iha loron tolu”, nee dehan katak, iha bain rua. Nunee mos, Nai Jesus mate iha Sesta Feira Santa (konta ida). Aban, loron Sabadu (konta rua). Depois, Nai Jesus moris fali ona iha Domingu Paskua (konta tolu, tuir sira nia maneira konta). #Salmu sira 22:8; 109:25; Marcos 14:58; João 2:19 30O tuun took hosi krus nee. Salva O nia aan rasik. Se nunee, foin ami fiar katak O nee Nai Maromak nia Oan duni.”

31Ulun relijiaun Judeu nia ulun boot sira ho mestri relijiaun sira mos hatete aat Jesus dehan, “Nia salva ona ema seluk. Maibee Nia la bele salva Nia aan rasik. 32Uluk Nia hatete ona, Nia mak Kristu, ema ida nebee Nai Maromak promete ona hori uluk. Ema seluk mos dehan, Nia nee ema Judeu sira nia liurai. Se nunee duni, husik Nia mesak tuun hosi krus nee para ita haree rasik ho ita nia matan, foin ita fiar ba Nia.”

Sira nain rua nebee hedi iha Nia sorin-sorin, sira mos trata Nia.

Nai Jesus mate

(Mateus 27:45-56; Lucas 23:44-49; João 19:28-30)

33Nee liu tiha, fatin nee hotu nakukun tiha, komesa meudia too tuku tolu lokraik. 34Natoon iha tuku tolu, Jesus hakilar ho lian Aramaiku, “Eloi! Eloi! Lema sabaktani!” Nee dehan katak, “Hau nia Nai! Hau nia Maromak! Nusaa mak Ita Boot husik hela Hau nunee?”#15:34:Jesus nia lian nee, lian Aramaiku. #Salmu sira 22:2

35Ema balu besik krus nee, rona Jesus nia lian. I sira dehan ba malu, “Imi rona took. Nia bolu Elias, Nai Maromak nia profeta uluk.” 36I iha ema ida halai baa foti esponza, halo bokon ho tua siin. Depois nia tuu iha ai naruk ida, i halolo ba Jesus nia ibun, para Nia hemu. I ema nee dehan, “Mai ita haree took! Karik Elias mai hatuun Nia hosi krus.”#Salmu sira 69:22

37Depois Jesus hakilar dala ida tan, i Nia mate.

38Iha kortina ida iha Uma Kreda Boot hodi haketak Nai Maromak nia fatin nebee santu liu. Natoon loos Jesus iis kotu, kortina nee naklees ba rua, hosi leten too kraik.#Ezodu 26:31-33

39Iha Golgota, iha komandante ida hamriik besik Jesus nia krus. Bainhira nia haree Jesus nia mate, nia admira hodi hatete, “Tebes duni! Ema ida nee Nai Maromak nia Oan.”

40-41Iha mos feto barak mak haree Jesus nia mate hosi dook deit. Sira mos tuir Jesus. Uluk sira serbii Jesus iha Galileia, depois sira mai iha Jerusalém hamutuk ho Nia. Entre feto sira nee, iha Salome, Maria hosi rai Madala, ho Maria ida tan (Tiago kiik ho José sira nia inan).#Lucas 8:2-3

Ema hakoi Nai Jesus iha rate

(Mateus 27:57-61; Lucas 23:50-56; João 19:38-42)

42-43Liu tiha nee, iha ema ida buka dalan atu hatuun Jesus nia mate isin hosi krus. Ema nee naran José, hosi sidade Arimateia. Nia mos membru hosi Tribunal Relijiaun Judeu nian. Nia laran diak. I nia sempre hein Nai Maromak atu mai ukun.

Jesus mate iha loron Sesta. Aban fali, ema Judeu sira nia loron hodi harohan. Tanba nee mak iha loron sesta, José hakarak hatuun Jesus Nia mate isin. Nia foo brani ba nia aan, hodi baa husu lisensa iha governador Pilatus atu hatuun Jesus nia mate isin. 44Bainhira governador rona José husu nunee, nia hakfodak hodi dehan, “Nusaa mak ema nee mate lalais nunee?! Hau hanoin katak, Nia seidauk mate.”

Nunee nia haruka ema baa bolu komandante mai, hodi husu, “Oinsaa? Jesus mate tiha ona ka seidauk?”

45Komandante nee hataan, “Nia mate tiha ona, senhor.” Governador rona nunee, nia foo lisensa ba José para bele baa hatuun Jesus nia mate isin.

46Depois José sosa hena naruk ida nebee karu teb-tebes. Tuir mai, nia baa iha Golgota, i baa hatuun Jesus nia mate isin hosi krus. Nia falun didiak mate isin nee ho hena foun nee. Iha rate ida, ema foin bahat hotu iha fatuk lolon. José sira lori Jesus nia mate isin baa hatama iha fatuk kuak nee. Depois sira duir fatuk boot ida, hodi taka tiha fatuk kuak nee. Hotu tiha, José sira fila ona.

47Iha tempu nee, Maria hosi rai Madala, ho Maria ida seluk (José nia inan), sira nain rua haree José sira hatama Jesus nia mate isin ba fatuk kuak nee. I sira haree didiak hodi hatene dalan ba fatin nee.

Currently Selected:

Marcos 15: BTDT

Highlight

Copy