Yuhana 21
21
Botɔnsun yɛrinŋ pa bi ki
1Niŋ kɔɔtɛ, Yesu i a yɛri ji awɔ kalindaŋ kiri wu Tiberiyadi baa ki tɔnŋ na. Ntiŋ a yɛri ji-i ka ɲaan ka tɛ.
2Simɔŋ Pyɛɛri niŋ fa Toma wɔ̀ wuru dɔri-ra tu « Fili ki », niŋ fa Natanayɛli wɔ̀ po-i Kana Galile sɔɔta ki ru, fa Nsebede danshuru fuuli ki niŋ fa kalindaŋ fuuli tɔri, nini fɔn wuru arìmaŋ fan.
3Simɔŋ Pyɛɛri tu kí tɛ : « Míŋ a ta yɛrinŋ pamaŋ nu. »
Kí tu niŋ tɛ : « Yibɛɛ yɛrima kiri ra ta miŋ fan. »
Kí i jɔrɔkɔ, kí i ta de buŋ ki ru. Kí i niŋ cii ki bataa ma, nka kí yɛrinŋ kila kì.
4Si ki sari-i waarinŋ wɔ̀ ru, kalindaŋ kiri i Yesu ja baa ki tɔnŋ na, nka kí ntiŋ tɔ-ri kì. 5Yesu i ǹʼbi kí tɛ tu : « Tiraŋ ni, ábɛɛ yɛrinŋ kila-i wa? »
Kí i ntiŋ nupwulu tu : « Aayi, yibɛɛ finŋ tɔri tenŋ pa kì. »
6Yesu tu kí tɛ : « Á jɔ ki kee buŋ ki pantɛmaŋ ki ru, ábɛɛ ra ǹʼbɛɛ kila. »
Niŋ ɲaan ki tɛ, kí i jɔ ki kee niŋ mani ki ru, kí i waa-ri ǹʼcɛɛn po san-i ju ki ru, ǹʼnu yɛrinŋ ki mwɔka jɛ ki gbɛɛra.
7Niŋ ma-i, kalindaŋ wɔ̀ bidi wuru Yesu tɛ, niŋ i ǹʼbi Simɔŋ Pyɛɛri tɛ tu : « Ŋuntiŋ ki yɛ. »
Simɔŋ Pyɛɛri ǹʼnama-i waarinŋ wɔ̀ ru, tu ŋuntiŋ ki i, ntiŋ i awɔ jɛrɛbi sinaŋ ki shi bo a sun, ntiŋ i a rukɔli, sabu ntiŋ yìrì san bo wuru-i. Ntiŋ a kee ju ki ra. 8Kalindaŋ pyɛ kiri i tu buŋ ki ru, kí i jɔ yɛrinŋ faa ki cɛɛn ta-ri tankpiŋ ki tɛ, sabu kí fa niŋ faninmwuŋ ki wuru fwuu-ra mɛtɛri yaataanŋ (100) bishi sun kili kì. 9Kí so-i tankpiŋ ki ra waarinŋ wɔ̀ ru, kí i tuuɲɛŋ ja niŋ mani nu, yɛrinŋ bili-i ji niŋ tuu ki sun, niŋ fa bwuru bo-i ji nmaŋ. 10Yesu i ǹʼbi kí tɛ : « Ábɛɛ yɛrinŋ wɔ̀ri pa-i dɔnsaŋ kaa, á na nini bɛɛ ri wu. »
11Simɔŋ Pyɛɛri i a pwulu de buŋ ki ru, kí i yɛrinŋ jɔ faa ki cɛɛn po tankpiŋ ki ra. Jɔ ki faa wuru yɛrinŋ ŋununsinaŋ yaajɔnpɔni fa bwununbyaŋ na (153). Yɛrinŋ ki fa a mwɔbi ki sun, jɔ ki dumiŋ gbɛri kì. 12Yesu tu kí tɛ : « Á na nufinŋ ki nu. » Kalindaŋ ki tɔri jɛɛn kí i ntiŋ nanɔri tu : « Miŋ nkɛnŋ » i kì, sabu kí ǹʼtɔ wuru tu Ŋuntiŋ ki i. 13Yesu i a kpari, ntiŋ i bwuru ki shi lu kí tɛ, ntiŋ i yɛrinŋ ki lu kí tɛ mìŋ ɲaan tenŋ ki tɛ sɛbɛ.
14Ka wuru Yesu yɛri ji kaan byantɔnŋ ki i awɔ kalindaŋ kiri wu, ntiŋ ŋmɛni po sanmaan ki konkwuu kiri kanfɛ.
Yesu fa Pyɛɛri bi ki
15Kí nufinŋ ki nu kɔ-i waarinŋ wɔ̀ ru, Yesu i Simɔŋ Pyɛɛri ranɔri tu : « Yuhana danshuru Simɔŋ, míŋ bidi-i miŋ tɛ, ŋì i fwuu kari bataa sun wa? »
Pyɛɛri tu : « Aawe Ŋuntiŋ, ábɛɛ yɛrima kiri ǹʼtɔ-i tu ábɛɛ bidi míŋ tɛ. »
Yesu tu : « Nʼɲakili tu ńʼwɔ saanaŋ kiri ra. »
16Yesu i Simɔŋ nanɔri kaan fuluntɔnŋ tan, tu : « Yuhana danshuru Simɔŋ, míŋ bidi-i miŋ tɛ wa? »
Pyɛɛri i ǹʼnupwulu tu : « Aawe Ŋuntiŋ, ábɛɛ yɛrima kiri ǹʼtɔ-i tu ábɛɛ bidi míŋ tɛ. » Yesu tu ntiŋ tɛ : « Ńʼwɔ saa kiri nee-ri. »
17Yesu i ntiŋ nanɔri kaan byantɔnŋ tan tu : « Yuhana danshuru Simɔŋ, míŋ bidi-i miŋ tɛ wa? »
Yesu Pyɛɛri ranɔri wɔ̀ tan wuru-i, fɔ ŋì i ta so kaan byaŋ sun, niŋ i Pyɛɛri yɛli a ciiru, niŋ tu : « Ŋuntiŋ ki, ábɛɛ i finŋ bataa tɔ-a, ábɛɛ i ǹʼtɔ-a tu ábɛɛ bidi míŋ tɛ. »
Yesu tu ntiŋ tɛ : « Nufinŋ wɔri ńʼwɔ saa kiri tɛ. »
18Yesu tu Simɔŋ tɛ tu : « Sɛli ki ra, míŋ a ǹʼbi miŋ tɛ ńʼtu miŋ wuru faa ɲɔrɔkɔ waarinŋ wɔ̀ ru, ńʼtu miŋ wuru nʼnukɔli-la nʼyɛrɛtɛ, mani wɔ̀ di nʼtɛ, ŋi i ta niŋ mani ki ru. Nka, a miŋ na bwuubi so, miŋ a na nʼgbɛ ki fɛshi, koŋ tɔri i nʼnukɔli, miŋ i ǹʼtɛ ŋi i ta mani wɔ̀ ru kì, kí i tiri nʼwu niŋ mani ki ru. »
19Pyɛɛri wuru-ra na beeni ɲaan wɔ̀ tɛ, nɔɔri i bili Kirinŋ sun, Yesu wuru ninki ɲaanbi-a niŋ wulu kiri ru. Niŋ kɔɔtɛ Yesu i ǹʼbi Pyɛɛri tɛ tu : « Ǹʼpa míŋ cɛfan! »
20Pyɛɛri i a ɲaannupwulu, kalindaŋ wɔ̀ bidi wuru Yesu tɛ, ntiŋ i niŋ ja tiri na-a arì cɛfan. Mìŋ kalindaŋ ki a tɔnŋ sunda wuru Yesu tɛ ciiku numaŋ ki ru, ntiŋ i Yesu ranɔri tu : « Ŋuntiŋ ki, nkɛnŋ na ábɛɛ janfa? »
21Pyɛɛri niŋ kalindaŋ ki ja-i waarinŋ wɔ̀ ru, ntiŋ i Yesu ranɔri tu : « Ka kalindaŋ kaa ji, Ŋuntiŋ ki, nfɛnŋ a na ma niŋ wu? »
22Yesu tu ntiŋ tɛ tu : « Hali míŋ ji ǹʼtɛ niŋ i tu a ɲaanna fɔ míŋ pwulu na shikaŋ, mɔɔn nfɛnŋ niŋ na? Miŋ kɔniŋ ǹʼpa míŋ cɛfan. »
23Niŋ bimaan ki sun, tindaŋ kiri i ǹʼbi wɔri ta-ri arìmaŋ tɛ, tu niŋ kalindaŋ ki a beeni kili kì.
Nka Yesu ǹʼbi-ri tu ntiŋ a tu beenibali kì dɛ! Ntiŋ ǹʼbi bantenŋ tan wuru-i tu : « A míŋ ji ǹʼtɛ niŋ i tu a ɲaanna, fɔ míŋ pwulu na shikaŋ, mɔɔn nfɛnŋ niŋ na? »
24Mìŋ kalindaŋ tenŋ ki i ka wulu kari bi-a ábɛɛ tɛ, mìntiŋ ki yɛrima ki yìrì sɛbɛ-i. Yibɛɛ yɛrima kiri ǹʼtɔ-i tu ntiŋ wɔ wulu kiri sɛli i. 25Yesu bi mwɔɔnna tɔri ri ma-i, a niŋ bataa ji wuru sɛbɛ-ri, míŋ ǹʼbi-a ńʼtu yìrì sɛbɛmaan ki bomaŋ wuru-ra kila juniɲa nu kì.
Currently Selected:
Yuhana 21: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
