Mabikiri 1

Kirinŋ wɔ tɔnwɔri ki Ɲiniwɔlinŋ ki bira

1-2Ńʼwɔ wɔshuru byii Tewofili, Yesu bi wɔ̀ri ma-i, niŋ fa ntiŋ konaŋ kiri kali-i bi wɔ̀ri ra kabi awɔ baara ki cɛtu waari ki ru, fɔ ŋì i ta so ntiŋ tunpa ki sun kirinpɔlila, míŋ nini bataa bi-i miŋ tɛ ńʼwɔ sɛbɛ jɔnɔ ki ru kɔ. Sana ntiŋ i tunpa kirinpɔli ki ra, ntiŋ wɔ cindaŋ ɲaannashimaan kiri wuru-ra na bi wɔ̀ri ma, ntiŋ nini bi-i nini tɛ Ɲiniwɔlinŋ ki baraka ra. 3Yesu beenimaan ki kɔɔtɛ, ntiŋ ŋmɛnimaan ki a yɛri ji-i kalindaŋ kiri wu ɲaan ki bataa tɛ tu afinŋ ɲaninkulutɔnŋ i. Ntiŋ i sunŋ yaafuuli ma kí fan, ntiŋ i Kirinŋ wɔ Masabi ki ɲaanbi-ri kí tɛ. 4Jibi bɛɛ, ŋì i ntiŋ fa awɔ kalindaŋ kiri tu nufinŋ nu-a, ntiŋ i ǹʼbi furu kí tɛ : « Á fa ámaŋ nanari Yerusalɛmu na kì. Míŋ Tiŋ ki a tɔnŋ wɔri-i ábɛɛ tɛ Ɲiniwɔlinŋ wɔ̀ bira, a yɛrima ki tɔnŋ ki ra, á niŋ sunsuu. » 5Ntiŋ tu sɛbɛ : « Yuhana konaŋ kiri wu-i ju ra, nka jibi dama ciiru, ábɛɛ ra wu Ɲiniwɔlinŋ ki ra. »

Yesu tunpa ki kirinpɔlila

6Ŋì i Yesu fa awɔ kalindaŋ kiri rakɔlimaan ki tu, kí i ntiŋ nanɔri : « Ŋuntiŋ, ábɛɛ fa ji-a masabi ki pwulu wɔri Isirayɛli tɛ mìŋ dɔnsaŋ kì dɛ? » 7Ntiŋ i ǹʼbi kí tɛ : « Nwɔ̀ i niŋ jibi ki i, niŋ fa niŋ bi kiri ra na ma ɲaan wɔ̀ tɛ, míŋ Tiŋ ki niŋ kubili-i awɔ so ki wu. Niŋ tɔ ŋuŋ kɔ ábɛɛ gbɛ kì. 8Nka ábɛɛ kakan-i á i nwɔ̀ tɔ, niŋ i kaa : Ɲiniwɔlinŋ ki a na jɛri ábɛɛ sun, niŋ na, ábɛɛ ra na sotinbi kila, á i ji míŋ shɛɛri kiri i. Á i míŋ wulu ki bi mani ki bataa ru, ŋì i tɔnpa Yerusalɛmu, Yude, fa Samari, ŋì i ta so juniɲa ki daŋ ki ra. »

9Yesu kɔ-i niŋ wulu kiri ra, ŋì i kalindaŋ kiri tu ntiŋ shɛɛli-la, ntiŋ i fɛshi san kí ra. Ntiŋ i de loŋ ki ru, kí ntiŋ ja kili kì. 10Kalindaŋ kiri tu-i kirinpɔli ki rashɛɛli-la, shuru jɛrɛbifɔtiŋ fuuli i na tu kí tɔntɛ. 11Niŋ shuru kiri tu : « Galiletiiri, nfɛnŋ na ábɛɛ tu-i ji faa kwumaŋ, á i kirinpɔlila shɛɛli-li? Yesu wɔ̀ fɛshi san-i ábɛɛ ra kaa, ntiŋ a a pwulu na jibi bɛɛ mìŋ ɲaan tenŋ ki tɛ, miŋ tu ábɛɛ ntiŋ tirira ki ja-i kirinpɔli ki ra ɲaan wɔ̀ tɛ. »

Matiyasi ɲaannashi bi ki, ŋì i bo cindaŋ kiri sun

12Niŋ na, cindaŋ kiri i po san niŋ mani nu, tɔnŋ ki ru, ninwɔ̀ i dɔri-ra tu Olinfyetɔnŋ, kí i na Yerusalɛmu. Niŋ tɔnŋ ki fa Yerusalɛmu faninmwuŋ ki wuru fwuu-ra kilo tenŋ sun kì. 13Kí so-i waarinŋ wɔ̀ ru, kí i tunpa ta sankasoŋ ki sun, kí wuru dali-la kí i sɔɔ-ri ninwɔ̀ ru.

Koŋ wɔ̀ri wuru nmaŋ, nini wuru kari i : Pyɛɛri, Yuhana, Yakuba, Andire, Filipu, Toma, Baritelemi, Matiyu, Alife danshuru Yakuba, Simɔŋ wɔ̀ wuru yawutubi ki ŋununu kari tan-a, niŋ fa Yakuba danshuru Yudasi. 14Kí bataa wuru dɛbɛ-a, kí i Kirinŋ nafɛ-ri cunadibi wu. Mari dama wuru kí fan, ŋì i bo Yesu ɲiŋ Mariyamu fa Yesu tindaŋ kiri sun.

15Jibi bɛɛ bilinatɔnŋ kiri rakɔlimaan ki so wuru koŋ yaataanmani sun. Pyɛɛri i jɔrɔkɔ tu tindaŋ kiri faninmwuŋ, ntiŋ tu kí tɛ : 16« Ńʼtindaŋ ni, Ɲiniwɔlinŋ ki nwɔ̀ bi-i Masa Dawuda tɔnŋ na Kirinŋ wɔ wulu ki ru, niŋ kakan wuru-i niŋ i ma. Ntiŋ wuru Yudasi wulu bi-a. Ninki na-i a bo Yesu patɔnŋ kiri jɛŋ. 17Yudasi wuru yibɛɛ bɛɛ ɛ. Yi wuru baara tenŋ ma-a. 18Wú wari wɔ̀ kila-i awɔ sali ki i awɔ bi kulinŋ mamaan ki ra, wú i ji sa niŋ wu. Niŋ kɔɔtɛ, wú i ta yaa bo a yɛɛra, wú i a yɛri kilɛn niŋ ji ki ru. Wú kwuu ki i na fɛɛn, wú cii ki i gwu, wú ciiru wula ki bataa i po taanna. 19Yerusalɛmutɔnŋ kiri bataa i niŋ bi ki tɔ, fɔ kí i niŋ ji ki tɔ ki ye arɔɔ wulu ki ru tu ‹ Hakɛlidama ›, niŋ kɔri ki i tu ‹ cunŋ ji. › 20Ǹʼsɛbɛ-i Nsaburu ki ru Yudasi bi ki sun tu :

‹ Wúwɔ kɛlitɔnŋ ki rala,

koŋ tenŋ fa tu ǹʼnu kì. ›

Niŋ fa ǹʼsɛbɛ-i Nsaburu ki ru sɛbɛ tu :

‹ Koŋ tɔri wú ma baara ki shi. ›#Shu kiri 69.26; 109.8.

21-22Niŋ ki ra, koŋ tenŋ kakan-i ntiŋ i bo yibɛɛ sun, nwɔ̀ a ji Ŋuntiŋ Yesu ŋmɛnibi ki shɛɛri i yibɛɛ fan. Nintiŋ kakan-i niŋ i ji koŋ i, nwɔ̀tiŋ wuru yibɛɛ fan, kabi Yesu wu waari ki ru Yuhana gbɛ, fɔ ŋì i na so ntiŋ tunpa shikaŋ ki sun kirinpɔli ki ra. »

23Kí i koŋ fuuli ji, Matiyasi niŋ fa Yusufu wɔ̀ tɔ wuru tu Barisabasi, kí i ntiŋ dɔri-ri sɛbɛ tu Yusitusi. 24Niŋ kɔɔtɛ, kí bataa i Kirinŋ nafɛ ka ɲaan ka tɛ tu : « Ŋuntiŋ, ábɛɛ kiri i koŋ bataa ciiru ki tɔ-a, ka koŋ fuuli ka ru, á á ɲaanna koŋ ki ji yi wu 25ntiŋ i ji áwɔ cindaŋ i Yudasi ta ru, sabu niŋ po san-i cindanbi ki ra, wú i ta a yɛri kilɛn, niŋ ɲaan ki tɛ, wú wuru nwɔ̀ ceeli-la, wú niŋ kila-i. » 26Kí i baalinŋ bili, Matiyasi wɔ baalinŋ ki i shi. Niŋ i bo Yesu wɔ cindaŋ bwununtenŋ ki sun.

Currently Selected:

Mabikiri 1: JOB

Highlight

Copy