Lucas 3
3
Juan apkellavkeskama iemmen aniapom akieto iokhalhma metkelha temma
115 iantelhkapa lhnak ngvaiakmok aptema apveske neten apankek Tiberio Cesar m'a iokhalhma Roma. Poncio Pilato lhnoka gobernador iokhalhma Judea, Herodes Antipas noka m'a apto gobernador iokhalhma Galilea. Filipo Herodes apialheng koka gobernador hanet iokhalhma alvesai'a Iturea kakpota nhan Traconitide. Lisanias koka gobernador iokhalhma Abilene. 2Anas kakpota nhan Caifas apkellelto apkelanma apmaniaie' sacerdotes Judios ma'a.
Apnengkek nak na Juan, Zacarias apketka m'a iokhalhma metkelha temma, apkapaskamo lhnak Eniapom Neten kakpota epaiaksek ania'a aktaqmanma apieseksek enenlhet'avok. 3Apmeiekho lhnak Juan iokhalhma aktakha nengaqtek alvata Jordán, apkeleltennaseiangka lhnak aplhamakho enenlhet eliaqmongkasekhak mo'ok apvalho'ok, ngkolhek na allavkesangkok konne iemmen kakpota ngkolhek aktemeskesangka nkek meleliehekhok apkellaskamakha Eniapom Neten. 4Ka aktemo nak aktalhesammalhka vakkahak apkeltennasemmap ania'a Isaias annenga, lhna aptemak:
«Lhema enenlhet nak apkelpalhemaikama iokhalhma metkelha temma, lhna aptemak:
¡Elpeneso ta amai kakpota evak Apveske, elpeiveso ta nhan! 5Nkolhek hata allapakho alvaiventa nak lhepop, ngkolhek hata nhan akvaivesantamo lhepop akhaiam la'a kakpota nhan metaimong akhaiam kakpota nkolhnekhok mo'ok ma'a. Nkolhek hata nhan alpeivesakho amai la altakhaikamok, metka aliekvatekamok hata nhan ngkotnek amai aknaiangkolha lhta aliekvatekamok. 6Netamen hata m'a nkotalhkak hata nenvongkasemmalhka tep aniem'o m'a Eniapom Neten», lhnak na nek aptemak.
7Man na ntek enenlhet'avok apkelmeiekha apnakha Juan kakpota ellavkesangkok konne iemmen ma'a, lhna aptemak apkellanemo:
—¡Menasma ketlhengkap! ¡Have niapak ankek nkovak hata nema aliaqmongkaskesekha apkeltemakha ketlhengkap, mangkolenketek hata m'a! 8¡Eltaqmelkasakpo koka kakpota elvetakpok apkeliaqmongkasekha mo'ok apvalho'ok! ¡Mellakpo koka atlheianma apvalho'ok aptaikamok Abraham aptavana'ak neptamen ketlhengkap! Koka have neten ankek akiaspommalhka m'a. Eniapom Neten apvanke niekhe etneskasekhak Abraham aptavana'ak neptamen metaimong anak apkelto la'a.
9Mpenesalhkek tava kakpota ngkolhek aliaqtemeno aikapmen'ok iamet mankoielhno la altaqmanma akielhna, nkolhe ta nhan alho natelh —lhna aptemak Juan apkellanemo enenlhet'avok ma'a.
10Ka apkelelmalhneiangka lhnak enenlhet'avok ma'a, lhna aptaiangkok:
—¿Ko la aktaqmelakha antangkok ennengko'o m'a, he? —lhna aptaiangkok.
11Ka apkellatemmoiangka lhnak mokhom Juan, lhna aptemak:
—Apietnek hata nkek apqanet apkelaqlammap ketlhengkap, eniamok hata lhema po'ok metka la apkaqlammap. Nietnek hata nkek aptekamok ketlhengkap, eniamok hata nhan po'ok metko la aptoma —lhna aptemak apkellatemmoiangka Juan ma'a.
12Ka apkelvai'o lhnak na moklhem'a apkenmakmekama apkenmaikamok patakkom impuesto ankok, apkeleltemo lhnak ngkolhek allavkeso konne iemmen ma'a, ka apkelelmalhneiangka lhnak Juan, lhna aptaiangkok:
—Hengetlhekmoskama, ¿ko la aktaqmelakha nhan antangkok ennengko'o m'a, he? —lhna aptaiangkok.
13Apkatemmoikama lhnak Juan ma'a, lhna aptemak:
—Meliekaskamho nkek apkenmaikamok patakkom —lhna aptemak ma'a.
14Ka apkelelmalhneiangka lhnak na moklhem'a soldados ma'a, lhna aptaiangkok:
—¿Ko la nhan aktaqmelakha antangkok ennengko'o m'a, he? —lhna aptaiangkok.
—¡Mel·hatsoskasekhankek qaselha apanko'ok po'ok akieplomo apkenmahai'a elentepkesek apkelvesai'a m'a! ¡Metlheianvomankek apkelvesai'a po'ok apkenmopvanka ania'a la'a, kolleko ta nhan apvalho'ok aktakha la akianmoma apkenmakmekama! —lhna aptemak Juan.
15Avanhek ankek nak apketlheianma enenlhet'avok alpeivekha lhnoka m'a aptemakha Juan, apkellanemo lhnak Cristo. 16Koka lhnak aptemak Juan apkellanemo enenlhet:
—Askellavkaskek ko niekhe iemmen ketlhengkap, koka lhema enenlhet hata elhemak netamen ko'o. Neten apankek aknema apmopvana, molhnok ko'o, ngvannalhkek ko'o evalhok al·hatsoskesek alhato'ok apnakteto apmankok ma'a enenlhet anak. Hato ka etnek malha la apkellavkeskama la Espíritu Santo kakpota nhan talha ketlhengkap. 17Esantak hata nopheiok kakpota eniemposkak trigo apaktek apnaklhema apielhna apiemaskama, elhpankesek hata apaktek kakpota nhan apiempeiok. Altaqmanma apaktek elhatmok hata konne galpon, netamen apiempeiok eklho'ok hata natelh kakpota elvanlhekha metka aksepanei'akha lhnak talha m'a —lhna aptemak Juan.
18Koka hengka nlhaniek nak aktemakha apietkeskama Juan apketlhekmoskama ania'a aktaqmanma enenlhet'avok ma'a. 19Apiamenaiangka lhnak na Herodes Antipas ma'a, ngkanek apmekho lhnak apiamelhko ngkelvana, apialheng Filipo aptava, Herodias nak akvesai'a m'a. 20Koka Herodes apiangveskaiakmek nak apkelanai'a ngkolatsekama, ka apkaklhengkeskamo lhnak Juan nengaqlhengkasemmalhkelha m'a.
Juan aplavkeskama konne iemmen Jesús
21Apkellavkesaiangko lhnak iemmen Juan aplhamakho enenlhet'avok ma'a, ka apvaiakmo lhnak na Jesús, aplavkeskamo lhnak na iemmen ma'a. Neksa apkenmalhnonkoma lhnak Jesús ma'a, akmaihekho lhnak neten, 22apvaiventamo lhnak Espíritu Santo takhaplhet ma'a. Malha konemmaktek na ntemak, aklengammalhko lhnak nema aliatekama neten, lhna ntemak heng:
—Lheiap eietka askamelaiam, apaiesakhek evalhok lheiap —lhna ntemak nema aliatekama.
Apkelieihengka Jesús
23Ampai'akhasekha lhnak apketlhekmoskama Jesús ma'a, malha treinta iantelhkapa apankok kelhaha, José apketka lhnak ma'a.
José apiapom nak Eli.
24Eli apiapom nak Matat.
Matat apiapom nak Levi.
Levi apiapom nak Melqui.
Melqui apiapom nak Janai.
Janai apiapom nak José.
25José apiapom nak Matatias.
Matatias apiapom nak Amos.
Amos apiapom nak Nahum.
Nahum apiapom nak Esli.
Esli apiapom nak Nagai.
26Nagai apiapom nak Mahat.
Mahat apiapom nak Matatias.
Matatias apiapom nak Semei.
Semei apiapom nak Josec.
Josec apiapom nak Joiada.
27Joiada apiapom nak Johanan.
Johanan apiapom nak Resa.
Resa apiapom nak Zorobabel.
Zorobabel apiapom nak Salatiel.
Salatiel apiapom nak Neri.
28Neri apiapom nak Melqui.
Melqui apiapom nak Adi.
Adi apiapom nak Cosam.
Cosam apiapom nak Elmadam.
Elmadam apiapom nak Er.
29Er apiapom nak Josue.
Josue apiapom nak Eliezer.
Eliezer apiapom nak Jorim.
Jorim apiapom nak Matat.
30Matat apiapom nak Levi.
Levi apiapom nak Simeon.
Simeon apiapom nak Juda.
Juda apiapom nak José.
José apiapom nak Jonam.
Jonam apiapom nak Eliaquim.
31Eliaquim apiapom nak Melea.
Melea apiapom nak Mena.
Mena apiapom nak Matata.
Matata apiapom nak Natan.
32Natan apiapom nak David.
David apiapom nak Jesé.
Jesé apiapom nak Obed.
Obed apiapom nak Booz.
Booz apiapom nak Selah.
Selah apiapom nak Nahasón.
33Nahasón apiapom nak Aminadab.
Aminadab apiapom nak Admin.
Admin apiapom nak Arni.
Arni apiapom nak Hesrón.
Hesrón apiapom nak Fares.
Fares apiapom nak Juda.
34Juda apiapom nak Jacob.
Jacob apiapom nak Isaak.
Isaak apiapom nak Abraham.
Abraham apiapom nak Terah.
Terah apiapom nak Nahor.
35Nahor apiapom nak Serug.
Serug apiapom nak Ragau.
Ragau apiapom nak Peleg.
Peleg apiapom nak Eber.
Eber apiapom nak Selah.
36Selah apiapom nak Cainan.
Cainan apiapom nak Arfaxad.
Arfaxad apiapom nak Sem.
Sem apiapom nak Noé.
Noé apiapom nak Lamec.
37Lamec apiapom nak Matusalen.
Matusalen apiapom nak Henoc.
Henoc apiapom nak Jered.
Jered apiapom nak Mahalaleel.
Mahalaleel apiapom nak Cainan.
38Cainan apiapom nak Enos.
Enos apiapom nak Set.
Set apiapom nak Adan.
Adan apiapom nak Eniapom Neten. Lhnak apkelvesai'a Jesús apkelieihengka lhamakho nak.
Currently Selected:
Lucas 3: TMF
Highlight
Share
Copy
Want to have your highlights saved across all your devices? Sign up or sign in
©2023 LETRA Paraguay
