Lucas 4

Nema akiepkonma Jesús

1Aplanei'avek nak apvalhok Jesús Espíritu Santo, apmaiangka lhnak ma'a kakpota emhangkok iokhalhma metkelha temma. 2Apnaiakmek nak 40 aknem ma'a metka aptoma aptoma. Mek nak ngkaqhemak ma'a, 3ka akvai'o lhnak aveske keliaqhameio' lhna ntemak anemo m'a:

—Have ta nke niapak lheiap apto Eniapom Neten apketka, ¡ngva', etneskasekha no pan metaimong anak! —lhna ntemak anemo m'a.

4Ka apkatemmoiangka lhnak Jesús, lhnak aptemak:

—Nietnek aktalhesammalhka vakkahak Eniapom Neten apaivoma hengke'e: «Have vanlha pan aliennakteskama aplhamakho enenlhet'avok kakpota ellokaha#4:4 Deuteronomio 8:3», lhna aptemak ma'a.

5Ka akiantamo lhnak aveske keliaqhameio Jesús anetkeskaiakmo lhnak netnek ankek metaimong akhaiam ma'a, alvetaskeskamo lhnak apkellavakha lhma nkek ham, 6lhna ntemak anemo:

—Elanhono ha'e, lhamakho apkellavakha nak kakpota nhan qaselha apanko'ok akmennave ngkeskama nak alhevai'a lhta ko'o, evankek angvangkok asmak'akha la angvangkok. 7Aptenio la nhan lheiap angvangkok, koka amanie askeltavek elteklheiok aptapno'ok enialhentamok nahan nehaqte kakpota heiaho' —lhna ntemak anemo m'a.

8Ka apkatemmoiangka lhnak Jesús ma'a, lhna aptemak:

—¡Mma'! Ka ntak Eniapom Neten apaivoma: «Vanlha ntasek elteklheiok aptapno'ok napaqtek Eniapom Neten aniem'o apkai'o, kakpota nhan eniasennama m'a» —lhna aptemak Jesús.

9Ka akiantemekho lhnak aveske keliaqhameiok Jesús apiav'akha temma Jerusalen, anetkeskekho lhnak Eniapom Neten apnemakha aietseksek ankek pa'at, lhna ntemak anemo:

—Have ta nkek niapak apto lheiap Eniapom Neten apketka, ¡enelhtenta noho! 10Ngkanek nietnek aktalhesammalhka vakkahak Eniapom Neten apaivoma hengke'e: «Eniapom Neten hata ellapaksek ángeles kakpota eltaqmelkesek, 11enmok takha lheiap kakpota mankotlapongkesek metaimong la'a»#4:11 Salmos 91:11-12 —lhna ntemak ma'a.

12Ka apkatemmoiangka lhnak mokhom Jesús, lhna aptemak:

—Ka ntemak na mokhom aktalhesammalhka vakkahak Eniapom Neten apaivoma hengke'e: «Meiepkon Apveske Eniapom Neten»#4:12 Deuteronomio 6:16 —lhna aptemak.

13Ntemengvekhek na lhma niekhe alanei'o Jesús akmahai'a nkoiepkonek aveske keliaqhameio' m'a, ka akieniekho lhnak sekhek akiakvatakho m'a.

Ampai'akhasekha apketlhekmoskama Jesús

14Aptaqhemo lhnak neptamen Jesús iokhalhma Galilea, nlanei'avek nak apvalhok apmopvana Espíritu Santo m'a, apvetammakpek nak Jesús iokho iempek ma'a. 15Apketlhekmoskamo lhna mota aklhamakho apkaqnekhelha mota judios ma'a, lhamakho enenlhet'avok nak apkeltemeskeskama akiavai'a apvesai'a Jesús ma'a.

Apmeiekha Jesús Nazaret

16Apmeiekho lhnak Jesús na natemma Nazaret, apvanekanlha lhnak ma'a. Ka akvaiakmo lhnak aknem sabado nennekhelha m'a, apmeiekho lhnak apkaqnekhelha mota judios aptemakha apankek nak ma'a. Apkenmekho lhnak neten Jesús ma'a kakpota elietsetek vakkahak Eniapom Neten apaivoma, 17ka aknemo lhnak aiangko vakkahak aptalheskama apkeltennasemmap ania'a Isaias annenga, lhna aptemak apkelietsatemo m'a:

18«Espíritu apankok Apveske apnak tekhelhet ko'o, apiangkenkek aceite ankok#4:18 Apkeltemakha lhnak Judios apkeliekiesangko la lhema enenlhet kakpota emakmama qaselha altaqmelo, apkemhama apmanie, apkeltennasemmap ania'a, kanhan anmaska apiempeiok apkeletelhnaiangko aceite ankok akmaska eniempehek. epatek ko'o heliekieskama kakpota atsavkesek ma'a ania'a aktaqmanma metka nak apkeletsekama. Heiapaskek na kakpota altaqmelkeskamok apkellelto nak aknaqtevasekha nkek apvalho'ok. Kanhan aleltennaksek ania'a aktemakha nema alpaqnemekha apkellelto nak apkenmammap, altaqmelkasekhak na metka nak apaqto'ok, al·hatsoskakhak na apkellengaiangko nak akientalhnema. 19Aleltennasangkok na akvai'a aknem ankok apkeltaqmelkeskama ta Apveske», lhna aptemak.

20Ka apeneskamo lhnak apkelietsatema Jesús vakkahak ma'a, apkeliaqsasekho lhnak na, apkaikokho lhnak apto nema asennaikama nemaqnekhelha m'a, ka apnemo lhna na m'a. Apkeltaqmelkeskamavek nak apkellanei'o aplhamakho m'a, 21lhnak aptemak ma'a:

—Ngva'ak aknem anak aktakha aklheianma aktalhesammalhka nak —lhna aptemak.

22Nkeliemaskangkek nak na apvalho'ok enenlhet ma'a, ntasek nak na apketlheianma aptemakha aktaqmanma qaselha aplheianma Jesús ma'a. Ka apkelpaqmetkesammakpo lhnak mok apankavek ma'a, lhna aptaiangkok:

—¿Have nlho José apketka ham, he? —lhna aptaiangkok ma'a.

23Lhna aptemak Jesús apkellanemo enenlhet'avok ma'a:

—Hatelha eltehek hellana ketlhengkap aktemakha na mota apketlheianma enenlhet: "Ponha niapom, etaqmelkaskesekho apankek lheiap apiempek".

Hatelha nhan etnangkok hellana ketlhengkap hengke'e: "Elana ta qaselha mongvetai'o apkavakha apanke nak, ka aptemo nak apkelanei'o m'a akieto Capernaum", hatelha etnangkok hellana. 24Nkanek memakpek takha lhema apkeltennasemmap ania'a apkavakha apankek la'a, have niapak nkek ma'a. 25Koka kotlheianvakho no apvalho'ok lhennenga taiep aploma lhnak nanek Elias annenga. Mang nak nanek nkonmai'ak ma'a tres iantelhkapa kakpota nhan 6 pelten, mek nak nanek nkennapmak enenlhet'avok ma'a Israel, man nak nanek na ntek lhentampak'a m'a. 26Koka mang nak emhaiangkok Elias ma'a kakpota elpasmok lhentampak'a m'a, apmaiangkek noka m'a mo'ok nekha akvesai'a Sarepta, nkatepelha lhnak akieto natemma Sidón kakpota epasmok lhema lhentampe m'a. 27Mang nak nanek na ntemak nemmaskema lepra ato'ok akieto israel neksa apkaniemhaikama m'a apkeltennasemmap ania'a Eliseo. Mang noka elalhnaskeskaiakmok apiempeiok ma'a, vanlha lhnoka m'a apkalhnaskesekho apiempek lhema enenlhet mo'ok apkellavakha Siria, Naaman nak apvesai'a m'a —lhna aptemak Jesús ma'a.

28Mang na ngkeskamak apkellomo enenlhet'avok apkakhaikamok ma'a konne nemaqnekhelha. 29Ka apkeliengeikokho lhnak neten metaimong akhaiam akieto apkakhaiangkolha takhalhet, kakpota eliong aniekhe koneng ma'a. 30Apiaiesekhek noka Jesús apieseksek enenlhet'avok ma'a, apkempekho mokhom aplhengama m'a.

Enenlhet akmaikama kasekapok av'alhok akpaiseiam

31Ka apmeiekho lhnak Jesús natemma Capernaum iokhalhma akieto Galilea, koka m'a lhamakho sabado nennekhelha lhnak apketlhekmoskekha mota m'a. 32Nkeliemaskangkek nak apvalho'ok ma'a aniem'o aktemakha akientalhnema apketlhekmoskama. 33Apnengkek nak na m'a enenlhet aktevaskama kasekapok av'alhok, nlho ka la nhan kasekapok av'alhok akpaiseiam konne apkaqnekhelha mota judios. Apvenekama lhnak ma'a, lhna aptemak:

34—¡Jesús ko Nazaret, manghengeliasamolhma! ¿Apmak'a nlho hennaqtevaksek lheiap, he? Asiavek ko'o lheiap apto apokkanma Eniapom Neten —lhna ntemak ma'a.

35Koka lhna aptemak Jesús apkelpalhengkaseiangka m'a:

—¡Kovanma', kotiep ham enenlhet anak! —lhna aptemak.

Apkelelhpokhaikama lhnak nalhepop enenlhet nak ma'a aniem'o kasekapok av'alhok, ka akteiapmo lhnak na metka aktevasekha mokhom ma'a. 36Nkeliemaskangkek nak apvalho'ok apkelvetai'o m'a, lhnak aptaiangkok:

—¡Akmovana na nnak, akientalhnemo nhan mok apaivoma enenlhet anak. Avanke nak nkoiaqmaksek kasekapok av'alhok akpaiseiam! —lhna aptaiangkok ma'a.

37Mpaihenkek nak ania'a lhamakho apkellavakha m'a aktemakha apkelanai'a Jesús.

Jesús aptaqmelkasekha apepiamong Pedro

38Apteiapmek nak Jesús ma'a apkaqnekhelha mota judios, apmeiekho lhnak Simon apnemakha. Nemo lhnak na altennaskektamo apkeltammap etaqmelkeskamo Simon apepiamong ma'a, akhema nemmaskema akmelhanma eniempek ma'a. 39Ka aphalhentamo lhnak Jesús takhalhet ma'a, apiamenaiangka lhnak akmelhanma eniempek. Kolhvave ankek nak ntaqmelekhak ma'a. Ka anmekho lhnak neten, allanei'o nhan ma'a.

Apkeltaqmelkeskaiam Jesús apentalhema enenlhet

40Apienakteskangkek nak ma'a, apkelletsakheskamo lhnak anmaska apiempeiok apnakha Jesús. Ka apnengkanmo lhnak apmeiok takhaplhet'ok moklhem'a anmaska apiempeiok ma'a, apkeltaqmelekho lhnak na. 41Nkelpaihekama lhnak atno'ok kasekapok av'alho'ok allenteiapmo apvalho'ok moklhem'a enenlhet'avok ma'a, lhna ntaiangkok:

—¡Eniapom Neten Apketka lheiap! —lhna antaiangkok ma'a.

Ka apkeliamenaiangka lhnak Jesús kasekapok av'alho'ok, mang nak na eltemok nkolpaiesama apvesai'a m'a nkanek nkeliavek na songkek apto Cristo.

Apaieskama ania'a Jesús akieto iokhalhma Galilea

42Mmopeiakmek na lhma' m'a, ka apteiapmo lhnak Jesús apiav'akha temma, apmeiekho metkelha akiennoma lhma'. Koka apkelketansengkek nak enenlhet'avok ma'a, apkeleltemengkek nak memhangkek po'ok temma. 43Koka Jesús lhnak aptemak apkellanemo:

—Nkaimelhkek na ko amhangkok apaiaksek ania'a aktaqmanma aktemakha aptema apveske Eniapom Neten mo'ok apkellavakha nak, ka askanemmalhka ko'o atnek askapasammalhko nak ma'a —lhna aptemak.

44Ka apmeiekho lhnak lhamakho apkaqnekhelha judios akieto iokhalhma Galilea, apkeleltennaseiangka lhnak na ania'a aktaqmanma m'a.

Currently Selected:

Lucas 4: TMF

Highlight

Copy