Lucas 7
7
Aptaqmelkeskaiam Jesús apkennengkasekama capitan romano
1Apeneskangkek nak apketlhekmoskama Jesús ma'a, ka apmeiekho lhnak natemma Capernaum. 2Aplomaka lhnak ma'a lhema capitan romano, nemmaskema lhnak ngkaqhemak apkennengkasekama m'a, nkaikama lhnak apketsepma m'a. Avanhek ankek nak apkamelaiam apkennengkasekama capitan ma'a. 3Aplengai'ak nak aplhenammap Jesús ma'a, ka apkellapaskamo lhnak moklhem'a metno apketkok judios kakpota eliantengvakhak etaqmelkasekha apkennengkasekama. 4Apkelvekho lhnak apnakha Jesús ma'a, apkellapioseiangka lhnak apkelpaqmetkeskaiakmo m'a, lhna aptaiangkok:
—Epasengvakha lhnak lhek lheiap capitan romano. Nietavek epasmok lheiap ma'a ngkanek 5hengellasekhai'avek ennengko'o m'a nengelelto nak judios, hengellaneskeskangkek na nengaqnekhelha ennengko'o m'a —lhna aptaiangkok.
6Ka apmeiekho lhnak Jesús apketlhelhma'ak nak aptaikokhak ma'a metno apketko'ok, apkellanketkeskangkek nak apnemakha capitan ma'a. Apkellangielhaiankek nak na m'a apkeltaiangkolha apketlhelhma'ak capitan, lhna aptaiangkok:
—Apveske', mang nak lhe niekhe nkoietok capitan emok takha lheiap ma'a, 7mang nak lhek na nkoietok evak hengke'e napaqtek lheiap. Vanlha lhnak lhoka ntasek etnek mok apaivoma lheiap kakpota etaqmelekha apkennengkasekama m'a. 8Aplhengkek lhek na apnema apveske apankok ma'a, apkasekhai'o mota, kakpota nhan apnema soldado apankok, lhnak lhek apto la mota apkellano hengke'e: "¡Enmeiakha m'a, elelhiem hengke'e!" Apkeleliehekhavek nak lhe mota m'a.
Lhna lhta nhan apto la hengke'e: "¡Ellanamok hata hengke'e!" Apkelleliehekhavek na lhta mota m'a.
9Niemaskangkek nak apvalhok Jesús aplengai'o m'a, lhna aptemak apkellanemo apketlhelhma'ak ma'a:
—Avanhek anke nak mei'askeiam enenlhet anak ma'a, motai'ak ko aptonak ma'a ko Israel —lhna aptemak.
10Ka apkeltaqhemo lhnak apkeltaiangkolha apketlhelhma'ak capitan romano m'a, apkelvetangvekho lhnak aptaqmelekha apkennengkasekama m'a.
Aplhatekhaskeiam Jesús lhentampe atka
11Netamen nak ma'a aktemakha akvetammalhka, apkenmeiekho lhnak Jesús kakpota nhan apkeltamesaikamok natemma Nain, mang nantek enenlhet'avok apkelieploma m'a. 12Ka apkellanketkeskaiakmo lhnak akieto nentalhnemakha atong apiav'akha temma, apkelvetai'o lhnak apkelletsoma apkenmahai'a elkatonnek lhema apketkok apketsepma' m'a. Lhentampe lhnak atka m'a, vanlha lhnak lhema phapak, aplhaniek nak enenlhet'avok apkelieploma m'a. 13Apietnai'avek nak na'at Apveske lhentampe m'a, lhna aptemak:
—Moven ankek lheia' —lhna aptemak.
14Ka apteteskaiakmo lhnak apietnakha aphapak ma'a, apmangveiakmo lhnak na ntanema nema aktankeskama m'a. Apkelanveiakmo lhnak na enenlhet apkellelto apkelletsoma, lhnak aptemak Jesús apkanemo apketsepma:
—¡Lheiap apketkok, etnemekha neten! —lhna aptemak.
15Ka apkenmekho lhnak neten apketkok ma'a, apkeliatongkomo lhnak na m'a, apiantemekho lhnak Jesús aknakha ngken ma'a. 16Avanhek ankek nak apkellai'a enenlhet'avok apkelvetai'o m'a, apkeliavenkaskesaiangka nhan apvesai'a Eniapom Neten ma'a, lhna aptaiangkok:
—¡Apva'ak hengke'e apkeltennasemmap ania'a neten apanke apiaspommap, Eniapom Neten apkeltave epasmok apkennemolhema! —lhnak aptaiangkok ma'a.
17Kolhvavek ankek nak nketkaikama ania'a apvesai'a Jesús iokhalhma Judea kakpota nhan nekhav'ak.
Apkellapaskama Juan apqanet apkelieplekama
18-19Apkeltamesaikamok Juan apkellavkeskama iemmen aniapom apkeleltennaseiangka lhnak ania'a lhamakho aktemakha apkelanai'a Jesús. Ka apkellapaskamo lhnak Juan apqanet apkeltamesaikamok elelmalhnengvakha Jesús apto kelha aplhenammakpo lhna lhta evak ma'a, nlho ka la angellailhek po'ok la'a. 20Ka apkenmeiekho lhnak apnakha Jesús, lhna aptemak apkellanemo:
—Hengellapaskek lhek Juan apkellavkeskama iemmen aniapom kakpota angelelmalhnama lhema qaselha, ¿lheiap anlho apto aplhenammakpo na mota eva, nlho ka la angellailhek po'ok, he? —lhna aptaiangkok.
21Ka apkeltaqmelkasekho lhnak Jesús kolhvavek ankek lhamakho aktemakha anmaska apiempeiok kakpota nhan apkellengaiangko akientalhnema, metka apaqto'ok, kakpota nhan enenlhet'avok aknaqtevaskama kasekapok av'alho'ok ngkollatsekama m'a. 22Lhna aptemak apkellanemo Jesús Juan apkellapaskama:
—Eltaqho ta mokhom apnakha Juan, eleltennaskakha ta lhamakho aktemakha apkelvetai'a kakpota nhan apkellengai'a. Apkelvetakhe lhma' metka nak apaqto'ok, nkeltaqmelakhek na apketlhengama apkeliaktekama nak, nkelalhnakhek na apiempeiok nenmaskema lepra ato'ok. Apkellengakhek na lhma mellengai'a lhma, apnaklhatekhangvakmek na apkeletsepma nak, enenlhet apkellelto metka apkelletsekama apkelleng'ak ania'a aktaqmanma. 23Aktaqmelakho nkek enenlhet mankotlapongkeskama asketlhekmoskama ko'o —lhna aptemak Jesús.
24Apkeltaqhemo lhnak Juan apkeltamesaikamok ma'a, ka apkelpaqmetkeskamo lhnak Jesús enenlhet'avok aplheianmo aptemakha Juan, lhnak aptemak apkellanemo:
—¿Se lhta atlheianmo apvalho'ok apkellanemakha elhok Juan ke neksa apkenmahai'a elvetangvomok metkelha temma, he? ¿Malha lhema iompat anlho lhta akievhesaikama nak alhkaiam, he? 25¿Se lhta nhan atlheianmo apvalho'ok apkellanemakha elhok Juan ke neksa apkenmahai'a elvetangvomok metkelha temma, he? ¿Malha enenlhet apennave nak aptalhnema, he? Koka enenlhet anak apmennave aptalhnema apkelan'a mota akleklemelha la apvalhok apanke, apnek na m'a apnemakha la apiav'akha apveske. 26¿Se lhta nhan atlheianmo apvalho'ok apkellanemakha elhok Juan ke neksa apkenmahai'a elvetangvomok metkelha temma, he? ¿Lhema apkeltennasemmap ania'a nlho lhta, he?
Hai', have niapak ma'a apto apkeltennasemmap ania'a kanhan tep ankek qaselha apmopvana elana. 27Koka m'a aklheianmo lhnak nanek Eniapom Neten apaivoma aptemakha m'a, lhnak na ne ntemak hengke'e:
«Angvapaksek hata sekama ania'a ehenkok apmanie lheiap, epeneskasok hata amai apankok ma'a amanie nhan apmahai'a emhangkok ma'a#7:27 Malaquias 3:1».
28Have niapak ankek, Juan apto neten apankek apiaspommap apieseksek enenlhet'avok hengke'e nalhepop anak. Koka m'a apieseksek aktemakha nak ma'a Apveske Eniapom Neten apnek lhema meiennaktema m'a, koka neten apankek mokhom ma'a melhnok Juan. 29Aplhamakho enenlhet'avok ka nhan apkenmaikamok patakkom impuesto apkellailhemave mota apketlhekmoskma Juan, ka apkellavkesaiangko nhan konne iemmen ma'a apieplavkeskamo nhan aktemakha akietemo nkek apkanemakha etnek Eniapom Neten. 30Koka fariseos kakpota nhan hengetlhekmoskama ley ma lhtoka eleltemok ellavkesangkok konne iemmen Juan ma'a, ma lhta nha nkonmahai'ak eleliehekhok apkanemakha etnangkok Eniapom Neten.
31¿Sek la alietkesek enenlhet nenvanlha nak ke, he? 32Malha niekhe nematkak apkennaivoma nak apkanvekhelha na mota enenlhet, apkelvenema mota apkelvannama po'ok: "Koka ennengko'o nelpaivaskaske niekhe iompa'at akpaivoma, mang koka eleltama ketlhengkap ma'a. Nennekmasengke niekhe nhan nennekmaskama akmaiose engvalhok, mang koka eliepqalhak na ketlhengkap ma'a", ka aptaiangkolha nematkak ma'a.
33Ka malha nhan aptaiangkok na ketlhengkap ma'a ngkanek apkelvetai'a Juan apkellavkeskama iemmen aniapom metomak pan, meiamak na vino, apketlheno nhan ketlhengkap kasekapok av'alhok akmaikama m'a. 34Netamen apvai'o nhan Enenlhet Apketka nak aptavkek na aptoma, apienkek nahan. Koka apketlhenkek na ketlhengkap ma'a apto meiapkanveiam etavekha, mankastengama einek, apketlhengke mota apkelpalhakvaiam enenlhet apkellanekamok ngkollatsekama kakpota nhan apkenmaikamok patakkom impuesto ankok. 35Koka nema neniamo nak nne ktemeskeso akpeivomo aniem'o m'a qaselha apkelanekamok aplhamakho atkak —lhna aptema Jesús ma'a.
Aptema amaika'a Jesús, Simon fariseo apnemakha
36Apkeltemo lhnak lhema fariseo etasemok apnemakha Jesús. Ka apmeiekho lhnak ma'a, apnaiakmo nhan. 37Nlomaka lhnak na m'a ngkelvana akto neten ankek ngkolatsekama alanai'a, aklengai'o lhnak ania'a aplhenammap Jesús apvai'a m'a, ka aksomo lhnak alhankok akmases aimes alabastro akmennave nkoie'. 38Ka aknaiakmo lhnak akieto apmankok Jesús ma'a, man na ngkeskamak akvenemo m'a, aksepkenentamo lhnak na aimen'ok aqto'ok, alpalvektamo lhnak takhalhet apmanko'ok Jesús. Aliemaskesekho apmanko'ok ava' Jesús ma'a, alpetsesmo lhnak na apmankok, aleltelhnaskesaiangko lhnak na akmases aimes aimenek apmankok ma'a. 39Apvetai'ak nak fariseo apto apnemakha m'a, lhna ntemak apvalhok ma'a:
—Kolhtema nak aptema apkeltennasemmap ania'a apanke enenlhet anak, eiekpelkok lhek alanai'a mota ngkolatsekama ngkelvana akmangvakmo nak —lhna ntemak apvalhok.
40Koka lhna aptemak Jesús:
—Simon, eniailho no asmak'o nak altennasama asietkeskama lheiap —lhna aptemak.
—Hai' hengetlhekmoskama, angvailho ta —lhnak aptemak Simon.
41Lhnak aptemak Jesús apkanemo m'a lhema apietkeskama: Apkakhaiangkek nak apkanet enenlhet apkeliaqmoiangko lhnak patakkom enenlhet nenmopvana angeliaqmong aniapom. Lhema lhnak 500 patakkom denario apkeliaqmomak ma'a, po'ok nak na 50 patakkom denario m'a. 42Mang nak nkonmopvanka'ak eltaqhesok patakkom apkeliaqmoikamok ma'a, ka aptaiangka lhnak na apankek apkeliaqmoikamok ma'a.
¿Ko la aptakha lheiap, se lha avanhek ankek apkasekhekho apveske ie, he? —lhna aptemak.
43Ka apkatemmoiangka lhnak Simon, lhna aptemak:
—Ka akiavai'a lhkek aptemeskesaikama pankek apkeliaqmoma —lhnak aptemak Simon.
Lhna aptema mokhom Jesús:
—¡Hai, apietavek aplheianma lheiap! 44Elanho no ngkelvana nak, malha alienieskama emanko'ok aimen'ok aqto'ok, ka aliemasakho nhan ava'. Lheiap koka manheiangkok iemmen askelienieskama la emanko'ok astalhnengvo'o lhkek apnemakha ka nentaiangkolha na mota ennengko'o. 45Ka ngkelvana nak mangkasak alpetsesma emanko'ok, lheiap koka manghepaivesak akieplomo hepetsesma nentaiangkolha na mota ennengko'o. 46Nkeltelhnangkek akmases aimes emanko'ok, lheiap koka mangheltelhnaskesangkok aceite engva' ankok anak epatek. 47Nietnengke songke akiavai'a asekhai'o ngkelvana nak ngkanek nnek aktemeskesangka nkek akiavai'a ngkolatsekama alanai'a. Koka enenlhet la nnek na aktemeskesangka nkek ketsek apkelanai'a la ngkolatsekama, ketsek na songkek apkasekhai'o m'a —lhna aptemak Jesús.
48Netamen Jesús lhnak aptemak apkanemo ngkelvana:
—Nnek aktemeskesangka nkek ngkolatsekama alanai'a lheia' —lhna aptemak.
49Koka lhna aptaiangkok apkelpaqmeiasmo mok apankavek apkellelto apkellanemmap:
—Apientalhnesakpe na apanke enenlhet anak, aplheno apmopvana etneskesama apankek nentemakha ngkolatsekama —lhna aptaiangkok ma'a.
50Koka lhnak aptemak mokhom Jesús apkanemo ngkelvana nak:
—Nvongkaskek tep lheia' mangkoi'askeiam anak, kotaqhekha ta metka aktaikama av'alhok —lhna aptemak.
Currently Selected:
Lucas 7: TMF
Highlight
Share
Copy
Want to have your highlights saved across all your devices? Sign up or sign in
©2023 LETRA Paraguay
