Lucas 8

Nkelvana'ak alpasmoma mota Jesús

1Netamen nak ma'a, apiaihekama lhnak Jesús lhamakho apiav'akha la temma kakpota nhan temma apketkok la'a. Apkeleltennaskangkek nak ania'a aktaqmanma aktemakha aptema apveske Eniapom Neten, apketlhelhma'ak noka 12 apkeltamesaikamok. 2Apketlhelhma'ak nak na moklhem'a ngkelvana'ak ma'a, lhennenga lhnak aktaikamok anmaska aiempeiok kakpota nhan aknaqtevaskama kasekapok av'alho'ok ngkollatsekama, Jesús noka apkeltaqmelkeskaiakmok ma'a. Ka alvesai'a lhnak hengke'e, María nema altema lhnak na Magdalena, apkelentepkeskeskamo lhnak siete kasekapok av'alho'ok ma'a. 3Juana, atava' lhnoka apvesai'a Cuza, apveske Herodes Antipas nak apkeltakmelkeskeskama apanko'ok ma'a. Mo'ok noka akvesai'a Susana kakpota nhan mo'ok ngkelvana'ak ma'a allaiangko lhna mota alletsekama alaimommalhkelha la mota m'a Jesús.

Nema akietkeskama aniep aniapom

4Man na ntek enenlhet'avok apkaknekho m'a apnakha Jesús, apkelleniem'o lhnak neiava' m'a, ka apkeltennaiangka lhnak Jesús ma'a lhema apietkeskama, lhna aptemak:

5—Apkanmek nak aktek lhema enenlhet, moklhem'a aktek nak mpalveiakmok amai, nemo lhnak alteioiakmo m'a, alvai'o lhnak na anata tko'ok ma'a, aktaveiangko nhan. 6Mo'ok aktek noka mpalveiakmok alhievak'akha lhepop takhalhet metaimong, kolhvavek nak nteiapma niekhe', koka nkeliemai'ak nak ma'a ngkanek mamma iemmen. 7Mo'ok aktek na mpalveiakmok takhalhet menevke aktek aknaikamok konne lhepop. Ka aktengamo lhnak lhemek menevke m'a, nkelapekhek nak anammalhka, ka aletsepmo nhan ma'a. 8Koka mo'ok aktek nak na mpalveiakmok aktaqmelakha lhepop, ntasek ankek nak aktekteiapma m'a, ngvaiakmek nak 100 aktek lhema apvathetma m'a ¡Eltaqmelkaso no apkellailhemo apaiko'ok anak! —lhna aptemak Jesús apiennakteskamo apaivoma m'a.

9Ka apkelelmalhneiangka lhnak apkeltamesaikamok Jesús ma'a, lhna aptaiangkok:

—¿Se lha akietkesammalhka aplheno nak ke, he? —lhna aptaiangkok.

10Ka apkellatemmoiangka lhnak Jesús ma'a, lhna aptemak:

—Nnek allelto eliangvomhok ketlhengkap qaselha akielhammalhka aktemakha aptema apveske Eniapom Neten, koka napokha enenlhet'avok asketlhekmoske mota asietkeskama. Apkelvet'a niekhe koka malha melvet'o aptaiangkok, apkellengai'a niekhe' koka malha melleng'o aptaiangkok.

Apkelpeiveskasekha Jesús apietkeskama aniep aniapom

11Hai', kolhva smak'ak alpeiveskasekhak asietkeskama lhkek. Ka aktek anak akietkesammalhka Eniapom Neten apaivoma. 12Moklhem'a enenlhet ngva'ak ma'a aknemo m'a aktek lhek akpalleiam amai. Apkellailhemo ania'a koka kolhvavek ankek na ngva'ak aveske keliaqhameio', ka akmenielhkaso ania'a lhkek kakpota eliaskamok, melvongkasakpek tep na m'a.

13Moklhem'a nhan enenlhet ngva'ak aknemo m'a aktek lhek akpalleiam alhievak'akha lhepop takhalhet metaimong koka koneng ma'a. Apkellailhemo ania'a, nkelpaihakhek na apvalho'ok, kolhvavek na apkenmak takha ania'a, koka akiakvatakho nkoie'. Ka akpelapkeso akvai'a akientalhnema, apkelieniakho m'a apkelieploma Eniapom Neten, ngkanek mangkolvaiakmok konne aikapmen'ok ma'a. 14Moklhem'a enenlhet na ngva'ak aknemo m'a aktek lhek akpalleiam takhalhet menevke aktek aknaikamok konne lhepop. Apkellailhave niekhe' ania'a aktaqmanma, koka vanlha mota atlheianma apvalho'ok patakkom, kakpota nhan apkeleltemo ngkoitek ngkeskama qaselha apanko'ok. Akto nhan alpaiesekha mota apvalho'ok aniem'o allaneskeskama aktaqmelaikama lhma apanko'ok, ka ngkanek elvangkamangkok ania'a nak, mamma apkellanai'a qaselha aktaqmanma.

15Kakpota nhan moklhem'a enenlhet ngva'ak aknemo m'a aktek lhek akpalleiam takhalhet aktaqmelakha lhepop. Apkeltakmelkasavek apkellailhemo ania'a, apkenmangkek na takha', apkelleliahakhavek nahan, nkoihek na apketlhengkeskama, ngva'ak na aktema ngkeskama akielhna —lhna aptemak Jesús ma'a.

Nema akietkeskama talha alhankok

16Lhna aptemak na mokhom Jesús ma'a:

—Nengapommatkaskek hata nke' talha alhankok anak, ¿envanke i'e ampekkenek koneng nenietnemakha', nlho ka la angapkaksek ma'a, he?

¡Mma'! Neten nelhanmak ma'a kakpota nkotsaskese lhma' apkellelto apkelentalhnema konne pa'at. 17Kakpota lhamakho qaselha aknaikamok anak ienaqtesa lhma' ngkolvetalhka ta, kakpota nhan lhamakho alposemmalhka nak qaselha nkolhnangkongvatak hata alhnakhoho#8:17 Mankovak mokhom akiokho nkek neliangveiakmo hengetlhekmoskama Jesús, koka nkovak hata m'a neliangveiakmo..

18¡Eltaqmelkaso no apkellailhemo! Akietno la qaselha lhema enenlhet, ngkolhek hata angkokho mokhom ma'a, koka metko la qaselha, ngkolhek hata aklekkasakho ketsek qaselha apankok la'a —lhna aptemak Jesús.

Jesús angken kakpota nhan apkelialheng'a

19Apketlhekmoskangkek nak Jesús konne pa'at ma'a, ka alvai'o lhna ngken kakpota nhan apkelialheng'a, alketansemo lhnak Jesús ma'a. Mannoka nkolvaiakmok apnakha m'a, aplhaniek na songkek enenlhet'avok. 20Ka aptemo lhnak apkanemo lhema enenlhet Jesús:

—Ngken kakpota nhan apkelialheng'a tep anak pa'at nkeleltavek nkolpaqmetkesek lheiap —lhna aptemak.

21Ka apkatemmoiangka lhnak Jesús ma'a, lhna aptemak:

—Enenlhet apkellelto apkellailhemo ania'a aktaqmanma, apkellasekhai'o nhan Eniapom Neten, koka elialheng'a m'a ka nhan meme' —lhna aptemak.

Apmaskeskama Jesús alhkaiam iemmen akiennaktema

22Apkanetvekho lhnak Jesús loma nemmen ma'a, apketlhelhma'ak apkeltamesaikamok, lhnak aptemak apkellanemo:

—Nok angenmeiakhak mo'ok nekha alvata nak —lhna aptemak.

23Ka apteianmo lhnak Jesús neksa aklhengama loma nemmen ma'a. Mpelapkeskankek nak apkeltaniai'a alhkaiam iemmen akiennaktema m'a, ntalhnengkek nak iemmen konne loma nemmen, nkaikama lhnak akvaivekamok ma'a. 24Kolhvavek ankek nak apnaqlhatekhaskekha Jesús ma'a, lhna aptaiangkok:

—¡Hengetlhekmoskama, nemmak'ak angelvaivangkok! —lhna aptaiangkok.

Ka apkenmekho lhnak kolhvavek ankek neten Jesús ma'a, apiamenaiangka lhnak alhkaiam kakpota nhan iemmen alakhaiam ma'a, mmaskemavek nak ma'a. 25Ka aptemo lhnak apkellanemo Jesús apkeltamesaikamok:

—¿Se lha aktemo apkeliaskeiakmo nak ke, he? —lhna aptemak.

Nkeliemaskangkek nak apvalho'ok apkelvetai'o m'a, apkellai'ak nak na m'a, lhna aptaiangkok apkelpaqmetkesammakpo mok apankavek ma'a:

—¡Se lha enenlhet ai'e, vakho alhkaiam anak kanhan iemmen alakhaiam nkeliahakhoho! —lhna aptaiangkok ma'a.

Enenlhet aktevaskama keliaqhameio' ko Gerasa

26Apvekho lhnak Jesús ka nhan apkeltamesaikamok mo'ok nekha alvata, iokhalhma akvesai'a Gerasa, akieto ammelhakha iokhalhma Galilea. 27Ka apteiapveiakmo lhnak Jesús loma nemmen ma'a, apteteskai'o lhnak lhema enenlhet akiavai'a aktevaskama kasekapok av'alhok. Mamma lhnak apnemakha vanlha lhnak apnaiakmo m'a aiseksek nemakha aknengkanveianlha enghapak. Kakpota nhan metka aptalhnema, apkalhnai'o lhnak ma'a. 28Ka apvetai'o lhnak enenlhet Jesús ma'a, apkeltanentamo lhnak aptapno'ok napaqtek ma'a, ka nkeskamo lhnak akveneiangka m'a, lhna ntemak:

—¡Jesús, Eniapom Neten apketka apto apnema netne kanke nak! ¡Skapioselhkek ko'o manghetvasekha!

29Lhna ntemak ma'a akveneiangka m'a ngkanek apiamenaiangka lhnak Jesús kasekapok av'alhok akpaiseiam apmahai'a elentepkesek ma'a ngkanek nnaqtevaskankek na mota metka nnelha enenlhet anak. Apnakteteiangkek na niekhe' enenlhet knonemaie cadena apmeiok kakpota nhan apmanko'ok. Koka nkaqhemavek nak ma'a, apkelietepkeskangkek na mota kakpota enieniekhak akieto metkelha temma.

30Ka apkenmalhneiangka lhnak Jesús ma'a, lhna aptemak:

—¿Ko la akvesai'a?

—Kempokhakmek ko'o asvesai'a —lhna ntemak atemmoiangka m'a ngkanek nlhanie kankek nak ma'a.

31Ka allaioseiangka lhnak mankoleltemok ellapaksek akieto malhek konnek ankek ma'a. 32Anmahai'o lhnak nkolentalhnengvomok ietapomap aptoiangko lhnak aptekamok akieto akhaiam lhepop ma'a.

Apkasekhai'avek nak Jesús ma'a, 33ka alentalhnengvaiakmo lhnak apvalho'ok ietapomap, kolhvavek nak apkeniaiangkok apkelvaiventamo lhnak akvakmo apkelvaivengko alvata. 34Apkelvetai'ak nak na enenlhet apkellelto apkeltakmelkeskama ietapomap, kolhvavek nak apkelletkasekama ania'a lhamakho apiav'akha temma kakpota nhan temma apketko'ok ma'a. 35Ka apkenmeiekho lhnak enenlhet'avok ma'a akieto akvetammalhkelha qaselha, apkelvetangvekhek nak enenlhet kasekapok av'alho'ok aktevaskama apnemo m'a akieto apnakha Jesús. Aptalhnema lhnak na apnekhak ma'a, aptaqmelekhek nak. Man na ngkeskama apkellai'a apkelvetai'o m'a. 36Koka apkellelto lhnak ma'a apkelvetaiangko m'a aptemakha aptaqmelkasekha Jesús enenlhet anak, apkeleltennaseiangka lhnak ania'a apkellelto apkelvaiam ma'a. 37Netamen nak ma'a enenlhet'avok ko Gerasa apkeleltemo lhnak etiepok Jesús ma'a ngkanek avanhek nak apkellai'a. Ka apkanetvekho lhnak loma nemmen Jesús ma'a, aptaqhekho akieto Galilea. 38Koka enenlhet apto lhnak apkelentepkeskeskama kasekapok av'alho'ok Jesús, apkapiosekama lhnak apkeltemo eieplakhak ma'a, koka lhnak aptemak Jesús apkanemo:

39—Etaqhekha apnemakha, eleltennasama ta aktakha apasmoma Eniapom Neten lheiap —lhna aptemak.

Ka aptaqhekho lhnak ma'a, apkeleltennaseiangka lhnak lhamakho apkellavakha aktemakha apkelanei'o Jesús.

Jairo apketka ngkelvana kakpota nhan ngkelvana akmangveiam Jesús apkaqlammap

40Aptaqhemavek nak mokhom Jesús ma'a, apkenmangkek nak takha enenlhet'avok ma'a, nkelpaihekhek nak apvalho'ok ngkanek apkellailhengkek nak na m'a. 41Ka apvai'o lhnak apkemhama apmanie apkaqnekhelha judios apvesai'a Jairo. Apteteskai'o lhnak Jairo Jesús ma'a, apkelteklhekvai'o lhnak aptapno'ok napaqtek ma'a, apkapiosemmakpek nak ma'a apkeltemo lhnak emhangkok apnemakha, 42ngkanek vanlha lhnak lhemapak apketka mmahai'ak nak nkotsepok ma'a, 12 iantelhkapa ankok nak. Apmeiekhek nak Jesús ma'a kakpota nhan Jairo, apkelieplekhek nak na apentalhnema enenlhet'avok ma'a, apkeliepetkaseiakmek nak Jesús. 43Nlomaka lhnak na apieseksek enenlhet lhema ngkelvana akmaska aiempek, 12 iantelhkapa lhna ngvaiakmok ma'a, avanhek nak akteiapma ema ankok. Nsavhommalhkek na mota patakkom ankok akianmongkeskama ponha niapom, koka mang noka nkotaqmalveiakmok ma'a. 44Ka aktetesaiangko lhnak akieto apkapok Jesús, akmangveiakmo nepva'a apkaqlammap ma'a, kolhvavek nak mmaskemak akteiapma akiavai'a ema ankok ma'a.

45Apkelelmalhneiangka lhnak Jesús enenlhet'avok ma'a, lhna aptemak:

—¿Selha hemangvo nak ke, he? —lhna aptemak.

—¡Have ko'o! ¡ko'o nhan have! ¡have nhan ennengko'o! —lhna aptaiangkok enenlhet'avok ma'a.

Koka lhna aptemak Pedro:

—¡Hengetlhekmoskama, apvakha'ak enenlhet lheiap, apkeliepetkasakmek nahan! —lhna aptemak.

46Koka Jesús lhnak aptemak mokhom apkanemo Pedro:

—Aslengangkek lhek aktepo asmopvana, ka ngkanek asmak'o nak aihoho' se lha hemangvo nak ke —lhna aptemak.

47Mang nak nkomovanak nkoielhanmok ngkelvana m'a, alpelhiennomo lhnak ai'a m'a. Alteklheklhemo lhnak atapno'ok napaqtek Jesús, aklheianmo lhnak vanlha akteniai'a aktaqmalveiam ma'a. Apkellengai'ak nak aplhamakho enenlhet'avok aktaqmalveiam ma'a ngkelvana nak. 48Koka lhna aptemak Jesús apkanemo:

—Lheia eietka, ntaqmelakhek aniem'o nkoi'askeiam, kotaqhekha metka aktaikama av'alhok —lhna aptemak.

49Nheklhek nak apaqmetkesaikama Jesús ngkelvana m'a, ka apvai'o lhnak apkennengkasekama Jairo, apnemakha lhnak apkempai'ak ma'a, lhnak aptemak apkanemo Jairo:

—Jairo, nkaqhok emhangkok hengetlhekmoskama m'a, nketsepkek lhek apketka lheiap —lhna aptemak apkennengkasekama.

50Aplengai'ak nak Jesús aktakha ania'a, lhnak aptemak apkanemo Jairo:

—¡Meniaga, mei'askem koka, ntasek hata ngkotnek apketka ngkovomok hata tep! —lhna aptemak

51Ka apkelvaiakmo lhnak apnemakha Jairo m'a, apkeltemo lhnak Jesús elentelhek vanlha Pedro, Jacobo, Juan, kakpota nhan ngkana'ak nematka. 52Lhamakho enenlhet nak apiapqalhemak ma'a, koka lhna aptemak Jesús apkellanemo:

—¡Meliapqalh, mangkotsepak nematka nak, ntenke'! —lhna aptemak.

53Apkelvannaikama lhnoka enenlhet'avok Jesús ma'a, apkeliamavek nak atsepmo ngkelvana atkok nak ma'a. 54Ka apmamo lhnak amek Jesús, lhnak aptemak apkanemo:

—¡Kolhatakha, kotnemekha neten! —lhna aptemak.

55Kolhvavek ankek nak ngvektak aiempek ma'a, aktaiekho lhnak mokhom alhnankok, anmekho lhnak na neten ma'a, apkeltemo lhnak na Jesús nkollangkok aktoma m'a. 56Nkeliemaskangkek nak av'alho'ok ngkana'ak, koka Jesús meltemo lhnak mankotlhenama aktakha alvetai'a m'a.

Currently Selected:

Lucas 8: TMF

Highlight

Copy