Lucas 9

Apkellapaskama Jesús 12 apkeltamesaikamok

1Apkankesekhek nak Jesús 12 apkeltamesaikamok ma'a, apkellaiangko lhnak na apkelientalhnemo kanhan apkenmopvanka'a kakpota eltaqmelkeskamok anmaska apiempeiok la'a, elentepkeskasangkok na lhamakho aktemakha kasekapok av'alho'ok anmaikama enenlhet'avok. 2Apkellapaskamo lhnak eleltennasama ania'a aktaqmanma aptemakha aptaiekha apveske Eniapom Neten, kakpota eltaqmelkeskamok na anmaska apiempeiok ma'a. 3Lhnak aptemak apkellanemo Jesús:

—Melletsav ankek apkelletsekama neksa apketlhengama la'a, iamet apkelenaikamok apmaniaie', naqhapa, pan, patakkom, kakpota nhan vanlha ta etnamok apkelentalhnekama nak, metka po'ok aptalhnema. 4Apkelvakmek hata nkek lhema pa'at la'a, eniakhamok hata m'a akvakmo apkeltaqhemo mokhom. 5Koka menmakpo la takha ketlhengkap na temma la'a, elpalesemma ta lhepop aktek apmanko'ok napaqtavek ma'a apkelvetaskeskama nkovak hata akiaqmoienta m'a, netamen eltaqho ta m'a —lhnak aptemak Jesús ma'a.

6Ka apketlhengamo lhnak apkeltamesaikamok ma'a, apkelpaieskamo lhnak ania'a aktaqmanma lhamakho aiempek lhmankek ham, apkeltaqmelkeskaiakmo lhnak na anmaska apiempeiok ma'a.

Apmahai'a eiekpelkok Herodes Jesús

7Niemaskangkek nak apvalhok aplengai'o apveske Herodes ania'a aplhenammap Jesús lhamakho aktemakha qaselha apkelanai'a m'a, lhna aptaiangkok enenlhet'avok:

—Juan annenga m'a, aplhatekhangveiakmek kelha m'a —lhna aptaiangkok.

8Po'ok enenlhet nak na aptemak ma'a:

—Ma', apkeltennasemmap ania'a Elias annenga m'a —lhna aptaiangkok.

Po'ok nak na aptemak ma'a:

—Have Elias ma'a, po'ok apkeltennasemmap ania'a annenga aplhatekhangveiam ma'a —lhna aptaiangkok.

9Koka lhna aptemak apveske Herodes:

—Have Juan apkellavkeskama iemmen aniapom ma'a, apmatnangkek ma'a, ko'o lhta skeltemo ngkoiaqtemenalhkak apiaspok ma'a. ¿Se lha enenlhet maie? —lhna ntemak akietnaikama apaqtek.

Apmahai'avek na niekhe etak Jesús Herodes ma'a.

Apkellaikamok aptekamok Jesús enenlhet apentalhnema

10Ka apkelvektamo lhnak mokhom apnakha Jesús apkelapaskamo m'a, apkeleltennaseiangka lhnak ania'a lhamakho aktemakha qaselha apkellanai'a. Ka apkeliantemekho lhnak Jesús natemma Betsaida m'a, apkeltemo lhnak elhek lheme' apkelvanlha apkeltamesaikamok ma'a. 11Koka enenlhet'avok anak ma'a atlheianmo lhnak apvalho'ok apmeiekha Jesús Betsaida, kolhvavek ankek nak apkenmeiekhak ma'a. Apkenmangkek nak takha Jesús ma'a, ka apketlhekmoskamo ania'a aktemakha aptema apveske Eniapom Neten kakpota nhan apkeltaqmelkeskaiakmo lhnak na anmaska apiempeiok ma'a. 12Apkeliennaktesekama lhna lhma m'a, lhnak aptaiangkok 12 apkeltamesaikamok apkellanemo Jesús:

—Ellapes enenlhet anak natemma nkatepelha la'a kakpota elteniangkok aptekamok ma'a, apnakteianmakha la nhan, mamma temma hengke'e —lhnak aptaiangkok ma'a.

13Ka apkellatemmoiangka lhnak Jesús ma'a, lhna aptemak:

—Ellamok aptekamok ketlhengkap —lhna aptemak.

—Ma', vanlha apietno ennengko'o 5 pan kakpota nhan hanet kelasma. Aplhaniek enenlhet hengke'e, vanlha kelha nkaimelhkak anteniangvakhak akiavai'a la nentoma —lhna aptaiangkok.

14Malha lhna lhta niekhe 5.000 apkelennava'ak ma'a, koka lhnak aptemak Jesús apkellano apkeltamesaikamok:

—Eleltennasamo ta enenlhet eniakhangko ta apkelpasmekha akvakmo 50 —lhna aptemak.

15Ka apkeleltennaseiangko lhnak apkeleltemo eniakhangkok enenlhet'avok ma'a. 16Netamen nak ma'a apkenmamo lhnak 5 pan Jesús kakpota nhan hanet kelasma, apkammelhmo lhnak neten, aptemo nhan gracias Eniapom Neten. Apkellaiangko lhnak na apkeltamesaikamok ma'a kakpota ellaskangkok apieseksek enenlhet'avok ma'a. 17Aptoiangkek nak aplhamakho m'a akvakmo apkeliapqanakmo, 12 iama posak nak nteiapmak apkeliakhekha alaimommalhka aptekamok ma'a.

Pedro aplheianma Jesús apto Cristo

18Lhema knem na ntemak apkenmalhnongkomo Jesús, apketlhelhma'ak noka apkeltamesaikamok ma'a, ka apkelelmalhneiangka lhnak, lhna aptemak:

—¿Ko la aptaiangkelha enenlhet hetlheianmo ko'o m'a, he? —lhna aptemak.

19Ka apkellatemmoiangka lhnak apkeltamesaikamok ma'a:

—Moklhem'a enenlhet apketlhenkek apto lheiap Juan apkellavkeskama iemmen aniapom alhta. Po'ok na apketlhenak Elias apkeltennasemmap ania'a annenga lheiap. Napokha nhan apketlhenak apto lheiap apkeltennasemmap ania'a annenga aplhatekhangveiam —lhnak aptaiangkok ma'a.

20Ka apkelelmalhneiangka lhnak mokhom Jesús ma'a, lhna aptemak:

—¿Ketlhengkap na, ko la aptangkelha hetlheno ko'o m'a, he? —lhna aptemak.

—Lheiap apto Cristo Eniapom Neten apkapaskama —lhna aptema Pedro apkatemmoiangka m'a.

Aplheianma Jesús ematong hata

21Avanhek ankek nak na meltemo elentepkasama ania'a nak ma'a, 22lhnak na aptemak:

—Ka Enenlhet Apketka nak ennangkok hata akientalhnema aniem'o metno apketko'ok, apkelemhama apmaniaie' sacerdotes kanhan escribas. Eltaqhesok hata m'a, ellaqhek hata nhan, koka hanetolhem'a aknem hata ngkotnek apketsepma, elhatekhangvomok mokhom ma'a —lhna aptemak.

23Lhna aptemak na Jesús apkellanemo aplhamakho enenlhet'avok ma'a:

—Apmak'o la enenlhet etnek heieplekama nkaimelhkek metnek apmak'akha la etnehek, epatmekhak na akientalhnema malha iamet aktenneskama apankok lhamakho aknem kakpota heieploma ko'o. 24Enenlhet apto la apmahai'a evongkasakpo pankek tep apiokhoho, emaskengvomok hata m'a. Koka enenlhet apto la meniommakpo pankek apiokhoho aniem'o heieplekama ko'o, evongkasakpok hata tep ma'a. 25Aqhemo koka eniankesangkok apketsekama aktemongvakmo la nnelha apkaniemhaikama, aptevasekpo la nhan ma'a. 26Koka allennavengko la etlhenek asvesai'a kanhan asketlhekmoskama nak, nkonnevhok hata nhan ma'a Enenlhet Apketka nak etlhenek apkelvesai'a ketlhengkap apvaktamo ta akieplomo lhamakho aktemakha apmopvana aniem'o Apiapom, apketlhelhma'ak hata nhan ángeles apkelpokkenammap. 27Haveniapak anke moklhem'a enenlhet apkellava nak hengke'e meletsepek hata elvetangkok aknem etnekhak apveske Eniapom Neten —lhna aptemak Jesús apkellanemo enenlhet'avok ma'a.

Aklhenmekha apiempek Jesús

28Ocho aknem na ntemak akiekai'a m'a apkelpaqmetkeskamo apkeltamesaikamok, apkanetvekho lhnak Jesús neten metaimong akhaiam kakpota elmalhnak ma'a. Apkeliantamo lhnak na Pedro, Juan kakpota nhan Jacobo. 29Neksa apkelmalhnongkoma lhnak ma'a, mo'ok aktemakha lhnak ntaiekhak napa'at, ka nhan aptalhnema niangveiakmek nak aptema apmopai'a pankek, apkelienmoma pankek nak aptemak aptalhnema m'a. 30Mpelapkeskankek nak apkelenteiapvei'o Moises nnenga kakpota nhan Elias ania'a niapom annenga. 31Apkellapommatmek nak na m'a, apkelpaqmetkesammakpek nak na m'a Jesús akmak'akha ta ngkotnek apvetai'a m'a, enietsepok hata m'a na temma Jerusalen. 32Tenn nnak nkennapekama niekhe Pedro kanhan apketlhelhma'ak ma'a, nkaqhok koka apkelvetai'ak apkapommatema Jesús kanhan apketlhelhma'ak ma'a. 33Ka apvetai'o lhnak Pedro m'a apkenmahai'a eltaqhok Moises kakpota nhan Elias, lhnak aptemak apkanemo Jesús:

—¡Hengetlhekmoskama, ntasek anke nak nengakhangkelha nak! Apkelto la lheiap alanak hanetolhem'a pa'at, lhema lheiap mo'ok Moises kakpota nhan Elias —lhna aptemak.

Apkeliatongkek na apankek Pedro aniem'o meihamok akmak'akha ngkotnek ma'a. 34Kolhvavek ankek nak nkellapvai'ak iephopai'a takhaplhet'ok ma'a, apkenmenaiangkek nak apkanetolhem'a apkeltamesaikamok ma'a. 35Apkellengai'o lhnak nema aliatekama aiseksek iephopai'a, lhna ntemak:

—Ka eietka askamelaiam ham, eleliehekho ta mota ketlhengkap —lhna ntemak nema aliatekama.

36Netamen akmaskema nema aliatekama lhnak ma'a, aptaiekho aplhepkennenga Jesús. Koka mang nak etlheianmak apkeltamesaikamok aktemakha apkelvetai'a m'a.

Aptaqmelkeskaiam Jesús apketkok keliaqhameio' aktevaskama

37Lhema aknem na ntemak akiekai'a m'a, apteiapmo lhnak Jesús metaimong akhaiam kakpota nhan apqanetolhem'a apkeltamesaikamok. Aplhamongvaiakmek nak enenlhet'avok ma'a akieto apmaniaie', 38lhema enenlhet nak apteteskai'ak Jesús ma'a apkapiosekama lhnak apiennakteskamo nhan apaivoma, lhna ptemak:

—¡Hengetlhekmoskama epasem no eietka nak lhema phapak apanke! 39Mpelapkeskanke mota aktaiekho aniem'o kasekapok av'alhok, mpesama mota apatong, nkelpelhiennengkaskek nahan, niakmopeskek na apatong ma'a, mangkomak'a nkoieniekha mota kasekapok anak ma'a. 40Askeltavek lhe niekhe apkeltamesaikamok anak lheiap elienieskasekha kasekapok av'alhok anak, man lhe nkollapvanka'ak ma'a —lhna aptemak apiapom.

41Koka lhna ptemak Jesús apkellanemo:

—¡Apkeliaskeiam ketlhengkap, meliamolhma nhan, heiastengangke niekhe, mankoleklemo niekhe nhan evalhok aspalhkaiangka mota ketlhengkap! ¡Ngva', eiantementano apketka halep! —lhna aptemak Jesús.

42Sekha apmahai'a eteteskamok nak apketkok anak apkenmangkelha' Jesús, ka aktakho mokhom aliakpelhketo lhepop kasekapok av'alhok, mang na ngkeskama alpelhiennengkeskamo. Koka Jesús apkeliaskangkek na lhma' kasekapok av'alhok akpaiseiam ma'a, aptaqmelkasekho apketkok anak, apkaikokho nhan apiapom ma'a. 43Nkeliemaskangkek nak apvalho'ok enenlhet'avok ma'a apkelvetai'o akiavai'a apmopvana Eniapom Neten.

Aplhenekho mokhom Jesús ematong hata

Nkelpelapkeskangkek nak enenlhet'avok aniem'o apkelvetai'a qaselha apkelanai'a Jesús, lhna aptemak apkellanemo Jesús apkeltamesaikamok:

44—Eleltaqmelkasono apkellailhemo kakpota melvankamankek, ka Enenlhet Apketka nak elhkengvomok hata apkellammelhmakha nak enenlhet'avok —lhna aptemak.

45Mang noka eliangveiakmok mokhom ma'a aktakha apaivoma Jesús, malha aknema allapekha lhna ntemak alietnaikama apaqto'ok ma'a. Man nak eleltemok elpeiveskasekha alhnakho nkek Jesús ma'a, apkellai'a lhna songkek.

Nenganemmalhkelha antek kakpota antek neten apankek

46Apkellatemmommakpek nak apkeltamesaikamok Jesús ma'a sek hata etnek neten apankek apiaspommap apieseksek ma'a. 47Apiamavek nak Jesús aptemakha atlheianma apvalho'ok, ka apkaveiangka lhnak lhema nematka apkenengkeskai'o lhnak napokha m'a, 48lhna aptemak:

—Apto la apmama takha nematka nak hengke'e aniem'o asvesai'a, hemek na takha' ko'o. Apto la nhan hemama takha ko'o, apmek na takha m'a apto lhta heiapaskama. Enenlhet apto la metka apiaspommap apieseksek anak ketlhengkap, koka apto neten ankek apiaspommap napaqtek Eniapom Neten ma'a —lhna aptemak.

Enenlhet manghengelammelhma la ennengko'o, koka netlhelhma'ak ma'a

49Lhna aptemak Juan apkanemo Jesús:

—Hengetlhekmoskama, nelvet'ak lhek ennengko'o lhema enenlhet apmopvana elentepkeskasangkok kasekapok av'alho'ok aniem'o apvesai'a lheiap. Koka nennaveskakmek lhek ennengko'o m'a, ngkanek have netlhelhma'ak —lhna aptemak.

50Koka lhna aptemak Jesús apkanemo:

—Mennaves anko ie' ngkanek enenlhet apto la manghengelammelhma' ennengko'o, netlhelhma'ak ma'a —lhna aptemak.

Apkeliennai'o Jesús Jacobo kanhan Juan

51Ketsek nak nkaimommalhka aknem apmeiekhelha' neten Jesús ma'a, apmeiekhek noka apankek ma'a Jerusalen metka apkai'a. 52Apkellapaskamo lhnak sekama ania'a apmaniaie' kakpota eltenengvomho iokhalhma Samaria, eleliama nhan apnaqteianveianlha la'a. 53Koka mang na nkonmahai'ak enmok takha Jesús ma'a apkellelto apkakhaiangkolha m'a, ngkanek apkeliamavek nak apmeiekha akieto Jerusalen. 54Nkennatheskangkek nak apkeltamesaikamok Jacobo ka nhan Juan, lhna aptaiangkok apkellanemo Jesús:

—Apveske', hengellasekho no kakpota angellelto nkopallentak talha aniem'o neten takhaplhet'ok enenlhet'avok anak ha'e kakpota nkonnapok ma'a —lhna aptaiangkok

55Mang na nkoleklemok apvalhok Jesús ma'a, ka apkeliamenaiangka lhnak apkeltamesaikamok ma'a. 56Netamen nak ma'a, apkelempaikokho lhnak mokhom apketlhengama m'a.

Akientalhnema anieploma Jesús

57Neksa apketlhengama lhnak m'a, apteteskai'o lhnak lhema enenlhet Jesús nalhet amai, lhnak aptemak:

—Apveske, aieploma ta lheiap apmeiakhelha la'a —lhna aptemak.

58Koka apkatemmoiangka lhnak Jesús ma'a, lhna aptemak:

—Nietnek alhano'ok malhek maleng, kakpota nhan alhano'ok na nnak anata. Koka Enenlhet Apketka nak mamma apnemakha la apiamposammakpelha la m'a —lhna aptemak.

59Netamen apvetai'o lhnak Jesús po'ok enenlhet, lhna aptemak apkanemo:

—Heieploma lheiap —lhna aptemak.

Ka apkatemmoiangka lhnak enenlhet anak:

—Koka amanie sekhek nkaimelhkak angvatonnek tata —lhna aptemak.

60Ka apkatemmoiangka lhnak Jesús ma'a:

—Ellangko apkeletsepma elkatonnek apkeletsepmo lheme nak, koka lheiap emhamok ma'a epaieskam hata ania'a aktemakha aptema apveske Eniapom Neten —lhna aptemak.

61Lhna aptemak na mokhom apkanemo po'ok enenlhet:

—Apveske, asmak'a niekhe nhan ko lha aieploma lheiap, koka smak'ak sekhek atnek akpaiveskekha' askelanei'o askennemolhema —lhna aptemak.

62Ka apkatemmoiangka lhnak Jesús ma'a, lhna aptemak:

—Enenlhet apto la apkanmelhekho neptamen neksa apmaikamok vakka alhpehek, manke pankek emakmongvomok ma'a aptemakha nak apveske Eniapom Neten —lhna aptemak Jesús.

Currently Selected:

Lucas 9: TMF

Highlight

Copy