Maruk 16
16
Yéesu nayihoúl, nápurul dó nꞌfuyaak faafu
(Máca 28.1-8 ; Lúk 24.1-12 ; Saŋ 20.1-10)
1Nan fulako Esúiif yaayu fuwuj mee, Mari hara Magudala, Salome bugo mꞌMari jaw Saak ngunoom ekarabanjo be ekaan eñalen Yéesu. 2Dimaas mꞌbújom pím, ngúja'aali bu bo nꞌfuyaak faafu, 3nak gurogoor mꞌbulago : « Ay abilolaal gákirinken ekenkereŋ yatoj mee butum fuyaak faafu ? »
4Nan gútiiŋ mee, nguñow mara ekenkereŋ yaayu yareh mee mee ékirinkenikirinken ehajeni mee. 5Ngunogen dó nꞌfuyaak faafu, ngutook dó akambaano nalakoe nꞌgañen gárib hakaanoe gásabadoor gahiina pararar. Ngúsebi jálako. 6Akambaano aahu narogiil : « Jambil jíwollo. Let Yéesu hara Nasaret han gufaaŋ mee nꞌekuruwa yaayu njiŋese ? Nayihouloyiho nꞌgacet mee, alet taahe ! Jiñoñow taahe ute ngubaŋeenool mee. 7Ñeer jijow jirok ulagenaool bu mꞌPiyeer ró mara Yéesu nalohuuloh fácil bu Gálile. Bo njibil mee eñowool naŋ min alobuul yo mee. » 8Ñeer ngúpurul nꞌfuyaak faafu min gúwolloe, ngutey matelene. Ngúsebi mee, gulobut yo anooan mꞌbulago.
Yéesu nápurul ulagenaool bugo mꞌMari hara Magudala
(Máca 28.9-10 ; Lúk 24.13-49 ; Saŋ 20.11-18)
[9Mꞌbújom bara Dimaas yan Yéesu ayihoulo mee nꞌgacet mee, namundummundum ápurul Mari hara Magudala. Nu ho namus mee ápuren siseytaane futok nꞌsíruba. 10Ñeer Mari natey agaan galageneen mee Yéesu, garoŋ mee nekulool nuhuool. 11Bare nan arogiil mee mara Yéesu arondoŋ ban añowooñow, gúyinenutool.
12Púr to, Yéesu naŋar búnogoor bucee búbuto min ápurul ulagenaool gucee gúruba gan nejow bu nꞌésuk ecee yara futaŋaat. 13Ulagenaool gúruba gaagu ngúbaañul bu Yéruusalem gugaan gupaaliil ulagena, gúyinenutiil may.
14Púr to, Yéesu nápurul ulagenaool fannaiil gammee guñen nu hanur bugo nfúcaho. Narotooriil mara gáyinenaahi'iil, muhankiil gukow, son min gúyinenut mee gañowool mee ho bayihoerúl nꞌgacet mee. 15Narogiil : « Jijow nꞌdúniya búroom yo, njiwaare bugan gaagu peepe Furim Fásuum mee. 16An áyinen mee nábatiisei, ho be epak. Bare an afoy mee gáyinen abiloot epak. 17Gáyinen mee be éjuh ekaan nꞌgajow gúmbaam waaf wajaahalie bugan : ekam siseytaane, elob gúlobum galet gooliil, 18ejok sinaab nꞌguñeniil, marem busik, ban mat bújuhiil waafóowaaf, son gariten guñeniil nꞌúsonta ngukolo. »
Yéesu nabaañ bu fatiya
(Lúk 24.50-53 ; Bakaaner 1.9-11)
19Nan Acila aahu Yéesu alobiil mee gurim gaagu afaak, natebo bu fatiya min alako nꞌgañen gárib Atúuha. 20Ñeer ulagenaool ngufanjoor gunogen banooban, nguwaare Furim Fásuum mee. Acila aahu nja arandeniil ngukaan waaf wajaahalie bugan be eliik mara wan guwaare mee maregen. ]
Currently Selected:
Maruk 16: gsl
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
