Yohanes 18
18
Mangfaret Yahudyar rluan tomwatar ma romat Yesus
18:1-11
(Mat. 26:47-56; Mrk. 14:43-50; Luk. 22:47-53)
1Lama Yesus nsampayang monuk e I nor Ni manglartar a rti kewas Kidron balisya. Ne sir rti let sa ma namin iane.
2Yudas ma nfenri Yesus nafai ain a ne nbal, fali biase Yesus nor Ni manglartar a rabut sir a na iane. 3Mpe Yudas nma nor suldadw Romar kompi lese ma mangajakar na Ratu Ni Das Silai. Sir ye ma mangsomp ulnir ma tomwat Farisyar rluan sir ma rti romat Yesus. Sir rti e ronr lenterar, obrar, numur mingkar.
4Yesus nafai safe-safe monuk ma keta diat I. Mpa nti nlosir sir ma nenrat, “Ali kmi minriak ise?”
5Ne sir rfalak, “Yesus tomwat Nasaret a ne.”
Ne Yesus nfalak, “Yakw ye lo!”
Noak a ne, Yudas ma nfenri Yesus a ne namdir nor sir a nbal. 6Noak ma Yesus nfalak ber sir feti, “Yakw ye lo,” ne sir monuk rsue sir ma rapelak.
7Ne Yesus nenrat sir a nbal, “Ali kmi minriak ise?”
Sir rfalak, “Kam manriak Yesus tomwat Nasaret a ne.”
8Yesus nfalak, “Dine Yakw kfwalak ber a kmi feti Yakw ye lo. Farlan kmi minriak Yakw e msyalan lonri ma Ningw manglartar ye rbali sir.” 9(Yesus nfalak farane la nafdiat safe ma luryain e I nfalak, “Nof tomwatar ma Amangw nal ber Yakw ne, keta kujake sir nema kete suse silai diat sir nwayat ma rmat dedesar.”)
10Noak a ne Simon Petrus nonry smade. I nles smade ne ma nsabit Malkhus tlingany fian ma namosit. Malkhus ye mangkaryayar sa ma nkarya ber Mangsomp Silai.
11Mpa Yesus nfalak ber Petrus, “Mswifik a mbwali nim smade ne na pnuan! Yakw kwinrang motak ma kwoman suse klwarat safe ma Amangw ntetak ber Yakw lo.”
Tomwatar ror Yesus far Mangsomp Silai Hanas
18:12-14
12Lama Yesus natanuk monuk nor Petrus, suldadw Romar ror nir ulun, ma mangajak Yahudyar ma ramin Ratu Ni Das Silai ne, romat Yesus ma rkete limnir. 13Betno ror I baluan ber Hanas. Hanas ye Kayafas yanany merwane. Noak a ne Kayafas ye neluk tomwat Yahudyar nir Mangsomp Silai. 14Ma Kayafas ye ma luryain e nfalak ber mangfaret Yahudyar feti, “Ni ngafele e tomwatar sa nmat ber tomwatar monuk.”
Petrus namsoal Yesus
18:15-18
(Mat. 26:69-70; Mrk. 14:66-68; Luk. 22:55-57)
15Noak ma ror Yesus ber Hanas, Simon Petrus ma manglarat walyetar sa rlarat a nbal. Yesus Ni manglarat a ne nafai Mangsomp Silai ne. Mpa noak ma ror Yesus far Mangsomp Silai ni latyompur e i nlarat a nbal. 16Nempa Petrus e namin fofolat fakar burit. Mpe Yesus Ni manglarat ma nafai Mangsomp Silai ne nma burit ma nfalak ber bate ma najake fofolat fakar a ne nema nor Petrus far dalam.
17Mpe bate ne nfalak ber Petrus, “Ko ye Yesus Ni manglarat ber ko a nbal nre?”
Petrus nfalak, “Tate!”
18Noak a ne nmauk nririn, mpa mangkaryayar na Mangsomp Silai ni das, ma mangajakar na Ratu Ni Das Silai ne rasuni au ma raflaran. Petrus nti naflaran nor sir a nbal.
Mangsomp Silai nenrat Yesus
18:19-24
(Mat. 26:59-66; Mrk. 14:55-64; Luk. 22:66-71)
19Mpe Mangsomp Silai nenrat Yesus, “Ko Nim manglartar ber mpear? Ma Ko mfwatutu safe motak ber sir?”
20Ne Yesus nfalak, “Yakw kuftutu Ningw anftutwar na tomwat ngayadin sonirlury. Ma dedesar ma kuftutu na das sampangar ma na Ratu Ni Das Silai, ain ma biase tomwat Yahudyar rafburat sir a na. Ma to lain sa ma kuftutu kumudim tomwatar. 21Safema mwenrat Yakw? Mwenrat motak tomwatar ma rdengar Ningw anftutwar a ne. Sir a ne ma rafai botuan safe ma kfwalak a ne.”
22Noak ma Yesus nfalak farane, mangajakar sa na iane ntef I ma nfalak, “Ko mutanuk ber Mangsomp Silai farane desar e!”
23Nempa Yesus nfalak ber i, “Farlan safe ma kfwalak a ne sale e mfwalak desar Ningw sale ne. Nempa farlan safe ma kfwalak a ne botuan e safema mtwef Yakw?”
24Mpe Hanas nluan tomwatar ma ror Yesus ma lolone rkete limnir a ne ber Kayafas Mangsomp Silai ne.
Simon Petrus namsoal Yesus a nbal
18:25-27
(Mat. 26:71-75; Mrk. 14:69-72; Luk. 22:58-62)
25Noak a ne Simon Petrus lolone namdir ma naflaran. Ne tomwatar ma ramin iane renrat i, “Ko ye Ni manglarat ber ko a nbal nre?”
Nempa i nulak ma nfalak, “Tate!”
26Ne Mangsomp Silai ni mangkarya sa namdir iane nbal. I wainy ber tomwate ma Petrus nsabit tlingany a ne. Ne i nfalak, “Ko ye ma kweban ma miktem Yesus mimin lete ne nre?”
27Nempa Petrus namsoal a nbal. Mpe noak a ne sife nkikyeu.
Sir ror Yesus far gubernur Pilatus sounlury
18:28-38
(Mat. 27:1-2; 27:11-14; Mrk. 15:1-5; Luk. 23:1-5)
28Noak a ne lolone bobolisin makrokap. Ma mangfaret Yahudyar ror Yesus rof Kayafas ni das far gubernur Roma ni istana. Tomwat Yahudyar to rlampir ma rti istana dalam, fali nof nir yayatrwar, farlan rti dalam e iane rngeryai lo. Ma noak a ne rasusan sir ma rane tnyam Paskah lo. 29Iane nwayat ma Pilatus nti burit ma natungan nor sir ma nfalak, “Kmi mfyasale I a na safe mampe myor I a mya ye?”
30Ne sir rfalak, “Farlan I to nose kabain yatkar e kam to mor I ber ko.”
31Ne Pilatus nfalak ber sir, “Farane e myor a mbyali I! Ma myukun I a mlyarat mir agame ni tetetkar!”
Ne mangfaret Yahudyar a ne rfalak, “Nof agame ni yayatrwar e kam to mamy kuase sasaf ma mtetak tomwatar sa ni mamate.” 32Sir rfalak farane la rafdiat safe ma Yesus nfalak feti Ni mamate ne felany farpe.
33Mpe Pilatus nbali i far istana dalam. Ne ntar Yesus ma nenrat, “Ali, Yahudyar nir rai Ko e?”
34Yesus nfalak, “Ko mwenrat farane e iane nof dalam nre tomwat walyetar rfalak na Yakw ber ko.”
35Ne Pilatus nfalak ber I, “Ko mufliak feti tomwat Yahudi Yakw e? Ko Nim tomwat Yahudyar ma mangsomp ulnir ma ror Ko ber yakw. Ko mose sal safe mampe ror Ko a rma ye?”
36Ne Yesus nfalak, “Ain ma kfwarete ne to na saryamprene ye. Farlan ain ma kfwarete ne na saryamprene ye, la Ningw tomwatar rma ma raale sir nema kete ror Yakw ber tomwat Yahudyar nir mangfaretar. Nempa ain ma kfwarete ne to na saryamprene ye.”
37Mpe Pilatus nenrat Yesus a nbal, “Farlan farane e rai Ko e?”
Ne Yesus nfalak, “Koko ko a mfwalak feti rai Yakw. Iane nwayat ma ramtoranbabe Yakw ma kmwa saryamprene ye, ma kufwibar anftutw botunar. Mpa ise ma nlarat Ningw anftutw botunar a ne, iane ndengar safe ma kfwalak.”
38Ne Pilatus nfalak ber I, “Safe a! Anftutw botuan safar a ne?”
Pilatus ntetak Yesus Ni mamate
18:39-40
(Mat. 27:15-31; Mrk. 15:6-20; Luk. 23:13-25)
Lama Pilatus nfalak farane, nti nakmat tomwat Yahudyar ma nfalak ber sir, “Yakw to ktwungan tomwate ne Ni sal sasaf? 39Nempa farlan tlarat mir agame ni yayatrwar, ka yakw kalin tomwatar sa nof sel dalam na ler silai Paskah mpane. Mpa mpyeang ma kwalin tomwat Yahudyar a kmi mir rai ye e?”
40Ne sir rafwayak, “Kete mtwate I! Ma mtwate Barabas!” (Barabas ye tomwate ma nose mimiri.)
Currently Selected:
Yohanes 18: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
