Yohanes 19
19
1Lama Pilatus natanuk nor tomwat Yahudyar a ne, i nluan suldadwar ma raus a rbabal I. 2Mpe suldadwar a ne rwanim makot matdyemin ma rnau na Yesus uluny. Betno rwol rabit melawas weympuse daran na I. 3Ma leles mpane rmpan ma nlosir I ma rfalak, “Ngamone ber tomwat Yahudyar nir rai Ko!” Ma rtef souny.
4Ne Pilatus nma burit a nbal ma nfalak, “Msyalan, yakw kor I ber a kmi, nema mifai feti to ktwungan Ni sal sasaf.” 5Mpe Yesus nma burit e I natulu makot matdyemin ma nfonak rabit melawas weympuse daran. Ne Pilatus nfalak ber sir, “Msyalan tomwate ye!”
6Noak ma mangsomp ulnir ma mangajakar a ne rsalan I e sir rafwayak, “Mswangwalu I, mswangwalu I!”
Ne Pilatus nfalak ber sir, “Myal I ma koko kmi msyangwalu I fali to ktwungan Ni sal sasaf.”
7Mpe tomwat Yahudyar a ne rfalak ber i, “Nof kam mamy tetetkar e ka kam mukun a mfen I, fali nfalak feti Ratu Anaky I.”
8Noak ma Pilatus ndengar farane i ntafal ma namtaut. 9Ne nbali i far istana dalam ma nenrat Yesus, “Ali Ko mof mpe?”
Nempa Yesus to nfalak sasaf. 10Ne Pilatus a nfalak, “Safema to mbwali yakw? Ali to mufai feti yakw ningw kuase ma ktwate Ko, ma ningw kuase nbal ma kswangwalu Ko e?”
11Yesus a nfalak, “Farlan Ratu to nal kuase ber ko, ko to nim kuase sasaf a na Yakw. Mpa tomwate ma nanrenre Yakw ber ko a ne, ni sale silai desar nlengan nof ko.”
12Lama ndengar farane Pilatus nareke ma ntate I. Nempa tomwat Yahudyar a ne rafwayak, “Farlan mtwate I e ko to tbwarim ber Kaisar. Ma tomwate ma nfalak feti rai i, iane feti nbangal Kaisar.”
13Lama Pilatus ndengar ma rfalak farane, i nluan ma ror Yesus far burit. Ma Pilatus namtoran kadere ma biase rtetak ngriar. Ain a ne ma biase ma rtar feti flur bati. Ma Ibrani liriny e rfalak feti Gabata.
14Lere ne fafa ler fardu langit, ma rasusan sir la rdaf ler silai Paskah. Ne Pilatus nfalak ber tomwat Yahudyar a ne, “Msyalan, mir rai ye!”
15Mpe sir rafwayak, “Mfwen I! Mfwen I, mswangwalu I!”
Ne Pilatus a nfalak a nbal, “Kmi mpyeang ma kswangwalu mir rai e?”
Ne mangsomp ulnir a rfalak, “Kam to mamy ray walyet ma mamy ray ber lan Kaisar e!”
16Mpe Pilatus nlarat nir mpempeang ma nanrenre Yesus ber suldadw Romar ma rsangwalu I.
Suldadw Romar rsangwalu Yesus
19:17-27
(Mat. 27:32-44; Mrk. 15:21-41; Luk. 23:26-43)
Ne suldadw Romar ror Yesus ma rti rsangwalu I.
17Noak a ne Yesus koko I a nabare Ni sangwalu ma nti kote burit. Ma ror I a rti lenir sa ma ngarany Ulbati. (Ma na Ibrani liriny e rtar feti Golgota). 18Na iane rsangwalu I nor tomwat walyetar du. Sa e na balisya bayal, sa e na balisya fian, ma Yesus namin twal.
19Ne Pilatus nluan ma rpaku kpau lolan na Yesus Ni sangwalu. Na kpau ne sir rarengi feti: “Yesus Tomwat Nasaret, Yahudyar Nir Rai.” 20Ma ngribatnir a ne rarengi na Ibrani liriny, Latin liriny ma Yunani liriny. Tomwat Yahudyar yadin rbaca safe ma rarengi ne, fali ain ma rsangwalu Yesus a ne nlosir kote. 21Mpe Yahudyar nir mangsomp ulnir rfalak ber Pilatus, “Kete ko murengi feti: Yahudyar nir Rai. Nempa ka murengi feti: Tomwate ye nfalak feti I ye Yahudyar nir Rai.”
22Ne Pilatus a nfalak, “Safe ma kurengi ne, farane lo.”
23Lama suldadwar a ne rsangwalu Yesus, sir ral Ni rabtyar ma rsaman a rmpan fat, ma ronri leles mpane. Betno ral a nbal Ni rabit melawas. Rabit a ne to rsot fali rpet rabit a ne nof das terik bab e kateman desar. 24Iane nwayat ma rafalak ber sir, “Kete tabisi rabit ye, ma ni ngafele e tose undi ma tsalan feti ise nonri.” Sir rose farane nema iane feleles farlan ma rarengi na Kitap Lelerap dalam:
“Sir rasaman Ningw rabit mpane ber sir,
ma sir rose undi na Ningw rabit melawas.”
Mpa suldadwar a ne rose farane feleles farlan ma rarengi luryain a ne#Mzm. 22:19. 25Yesus enany nor wainy ramdir a rlosir Yesus Ni sangwalu. Ma Klopas sawany Maria, ma Maria Magdalena#19:25 Magdalena ye nof pnue ma ngarany Magdala ramin iane nbal. 26Noak ma Yesus nsalan enany ma Ni manglarat ma nkamis resi i a ne ramdir iane, I nfalak ber enany, “Ano, mwal i a mweluk angkam!”
27Betno nfalak ber Ni manglarat a ne, “Mwal i a mweluk anoi!” Ntabw nof a ne Yesus enany ma namin manglarat a ne ni das.
Yesus nmat
19:28-30
(Mat. 27:45-56; Mrk. 15:33-41; Luk. 23:44-49)
28Yesus nafai feti nose nsoru Ni karyayar ma Ratu nal ber I a ne lo. Ne I nfalak, “Yakw kumwes!”#Mzm. 22:16; 69:22 I nfalak la nafdiat safe ma rarengi na Kitap Lelerap dalam.
29Na iane ngusyar sa ma nfen ber anggur manilu. Mpa suldadwar a ne ral kabanir sa ma nbalak spon ma rsob a na anggur manilu ne, betno rtabak na katutun hisop tubun ma rnau na sukany. 30Lama Yesus nwokut anggur manilu ne I nfalak, “Dengan lo.”
Ne ntalak uluny ma nmat.
Suldadwar sa ntebak Yesus
19:31-37
31Lere ne lere ma tomwat Yahudyar rasusan sir la rdaf ler Sanari. Ma nof Yahudyar nir yayatrwar e to bise ma rtikloi tomwatar na katutun sangwalu na ler Sanari. Ma ler Sanari ne to far biase ma sir rose fali ler Sanari ne ubany desar ber sir. Iane nwayat ma mangfaret Yahudyar rtak Pilatus ma nluan ni suldadwar ma rfat Yesus numur tomwat walyetar du a ne emnir, nema weni rmat ma rtolar sir rof katutun sangwalu. 32Mpe suldadwar rma ma rfat tomwatar du ma rsangwalu sir ror Yesus a ne emnir. 33Noak ma rait e sir rsalan Yesus e nmat lo, mpa sir to rfat emnir. 34Nempa tomwatar sa nof suldadwar a ne nal sole ma ntebak Yesus ruskwany lebaban, ne dare ma weye nlale desar.
35Tomwate ma nafbotin ngrie ne koko i a nsalan desar. Mpa i nafbotin safe ma nsalan a ne nema kmi milele. Ma i nafai feti safe ma nfalak a ne botuan.#19:35 Tomwate na ayat ye nfatutu Yohanes ma narengi kitap ye. Na ayat ye Yohanes koko i natanuk na i. 36Kabanir monuk a ne sir rose la rafdiat safe ma rarengi na Kitap Lelerap dalam farye, “Sir to rfat Ni duryar fen lese nbal.”#Kel. 12:46; Bil. 9:12; Mzm. 34:21 37Ma rarengi nbal farye, “Tomwatar keta rsalan tomwate ma rtebak I a ne.”#Za. 12:10; Why. 1:7
Tomwatar rafonak Yesus
19:38-42
(Mat. 27:57-61; Mrk. 15:42-47; Luk. 23:50-56)
38Lama Yesus nmat, tomwat sa ngarany Yusuf nof kote Arimatea. I ye Yesus Ni manglarat nempa nose ma tomwatar to rafai feti Yesus Ni manglarat ber i, fali namtaut mangfaret Yahudyar. Noak ma Yesus nmat, i nti nakmat Pilatus ma ntak Yesus tenany ma nafonak I. Mpe Pilatus ninrang ma ntolar Yesus tenany mpa Yusuf nti ntolar I. 39Ma Nikodemus nlarat Yusuf a nbal. Nikodemus ye ma luryain e nma ma nakmat Yesus na nronram. I nti e nonry kabain angat ngafelar ma rtar feti mur ma gaharu, ma bertyan fafa kilo buty tel. 40Sir rtolar Yesus tenany, ma rpule I ror maloly buri, ma ryefar kabanir ma angat ngafelar a ne na I. Sir rose farane rlarat tomwat Yahudyar nir adat noak ma rafonak mangmwatar. 41Ain ma rsangwalu Yesus a ne nlosir let sa. Na lete dalam a ne, bang beberyar sa namin, ma tomwatar to rafonak mangmwatar na bange ne fuky. 42Noak a ne tomwat Yahudyar nir ler Sanari sesedin lo, ma kubur a ne sesedin motak mpa rafonak Yesus na iane.
Currently Selected:
Yohanes 19: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
