Yohanes 20
20
Yesus nmorip a nbali
20:1-10
(Mat. 28:1-8; Mrk. 16:1-8; Luk. 24:1-12)
1Na Minggu ni bobolisin noak ma nuse lolone makrokap, Maria Magdalena nti bange. Ne i nsalan baty silai ma rpaki la repat bange ne namin seriny lo. 2Mpe nafla ma nakmat Simon Petrus ma Yesus Ni manglarat ma nkamis resi i a ne ma nfalak, “Tomwatar ral kit ninr Mangnrur Silai tenany rof bange lo, ma kam to mafai feti rnau I a na mpe.”
3Ne Petrus nor Yesus Ni manglarat a ne rti bange ne. 4Radu a rafla ma rti rsalan. Nempa Petrus tbwariny a ne nafla e manrilak mpa nait baluan bange ne. 5Lama nait e i to nti dalam ma nsol motak. Ne i nsalan lan maloly buri ma rpule Yesus a ne. 6Noak ma Simon Petrus nait e i nti desar bange ne dalam. Ne i nsalan maloly buri ne nbal. 7Ma maloli ma rbebe na Yesus uluny a ne to namin ain a ne lo, nempa nkese i ma nalulun lo. 8Ne manglarat walyete ma nbalun a ne nlarat ma nti bange ne dalam a nbal. Ne i nsalan, mpa nalele feti Yesus nmorip a nbali lo. 9Fali na Kitap Lelerap dalam rarengi feti Yesus ka nmorip a nbali nof mangmwatar, nempa Ni manglartar to rkaul ral ngrie ne fuky. 10Mpe radu a rbali sir far das ma ramin.
Yesus nafbotin I ber Maria Magdalena
20:11-18
(Mat. 28:9-10; Mrk. 16:9-11)
11Nempa Maria Magdalena namdir bange ne burit ma ntasing dedesar. Noak ma ntasing e i namdu ma nsol far bange ne dalam. 12Ne i nsalan malaektar du ma rfonak rabit mafutyar ma ramtoran ain ma rfele Yesus a ne. Sa e namtoran mangtan ulun ma sa e namin emnir. 13Ne malaektar a ne rfalak, “Ano, safema mtwasing?”
Ne Maria nfalak, “Tomwatar ral ningw Mangnrur Silai lo, ma to kufai feti rnau I a na mpe!”
14Lama nfalak farane I nfon far mudy, ma nsalan e Yesus namdir. Nempa to nafai feti iane Yesus. 15Ne Yesus nfalak, “Ano, safema mtwasing? Ma munriak ise?”
Ne Maria nafliak feti tomwate ne ma ni lete, mpa nfalak, “Maken, farlan mwal Yesus tenany e mfwalak feti mnwau I a na mpe nema ktwi kal I.”
16Ne Yesus nfalak, “Maria!”
Ne i nfon Yesus ma nfalak nor Ibrani liriny, “Rabuni!” (Ma isiny feti Tuangguru.)
17Ne Yesus nfalak ber i, “Kete momat Yakw koli to ktwi kukmat Amangw a fuky. Nempa mtwi mufbotin ber wangur feti lere ye ktwi kukmat Amangw ma neluk Amir a nbal. I a ne Ningw Ratu ma neluk mir Ratu nbal.”
18Mpe Maria Magdalena nbali i ma nafbotin ber Yesus Ni manglartar feti i nsalan Mangnrure lo. Ma nfalak safe-safe monuk ma Yesus nfalak ber i a ne.
Yesus nafbotin I ber Ni manglartar
20:19-23
(Mat. 28:16-20; Mrk. 16:14-18; Luk. 24:36-49)
19Na Minggu nronram Yesus Ni manglartar rafburat sir a na dasar sa. Ne sir rkusy fofoltar monuk fali ramtaut mangfaret Yahudyar. Metryat e Yesus nma ma namdir twalelenir ma nfalak, “Maline ber a kmi.”
20Lama Yesus nfalak farane, I nfatutu limnir ma ruskwany lebaban ma rtebak a ne ber sir. Noak ma manglartar rsalan nir Mangnrure e dalmir a rsenang resi.
21Ne Yesus nfalak ber sir a nbal, “Maline ber a kmi! Feleles farlan Amangw ma nsiduk Yakw ma kmwa saryamprene, mpa Yakw kswiduk kmi nbal na saryamprene.” 22Lama nfalak monuk farane noup Ni sanawe ber sir ma nfalak, “Ka mlyangun Ratu Smwangtany ye na mir momorip.” 23Farlan kmi mlyure tomwatar nir salar keta Ratu nlure sir a nbal. Nempa farlan to mlyure tomwatar nir salar keta Ratu to nlure sir a nbal.
Yesus nafbotin I ber Tomas
20:24-29
24Noak ma Yesus nfatutu I ber Ni manglartar, Tomas to nor sir. Tomas ma ngarany Didimus a ne Yesus Ni manglartar sa nof manglarat buti resin du a ne. 25Noak ma Tomas nma e manglarat walyetar a ne rfalak ber i, “Tomas! Kam msalan Mangnrur Silai lo.”
Nempa Tomas a nfalak ber sir, “Farlan to kswalan ma to kfwofur pakw anir a na Yesus tangnir keta to kulele. Ma farlan to kfwofur ruskwany a fuky e keta to kulele nbal.”
26Minggu dalam ma nsapat a ne, Yesus Ni manglartar rafburat rbali sir a na das a ne ma Tomas namin a nbal, sir rkusy monuk fofoltar. Nempa metryat e Yesus nma ma namdir twalelenir ma nfalak, “Maline ber a kmi.” 27Ne I nfalak ber Tomas, “Mswalan pakw anir a na limngur ye ma mfofur. Ma mfofur ruskwang ye nbal. Ma kete mfwalak feti to mulele nempa ka mulele.”
28Ne Tomas nfalak ber I, “Botuan feti Ko ye yakw ningw Mangnrur Silai ma ningw Ratu.”
29Ne Yesus nfalak ber i, “Tomas! Ko mulele Yakw fali mswalan Yakw lo. Ma ngamone ber tomwatar ma ralele Yakw boloka to rsalan Yakw fuky.”
Yohanes narengi kitap ye nema tomwatar ralele Yesus
20:30-31
30Botuan feti Yesus nose ngrimpasalnar yadin a nbal na Ni manglartar sonirlury. Nempa to rarengi monuk na kitap ye dalam. 31Nempa rarengi ngriar monuk na kitap ye, nema milele feti Yesus ye Ray Silai ma Ratu Anaky. Farlan kmi milele I, keta myonri momorip dedesar.
Currently Selected:
Yohanes 20: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
