Lukas 10
10
Yesus nsiduk Ni manglarat buty itw
10:1-12
1Mpene Yesus ninr Mangnrure nfil Ni manglarat buty itw.#10:1 Manglarat buty itw na naskah Yunani kuno walyetar nfalak feti buty itw resin du. Ne I nsiduk tomwatar dudu mpane ma rbalun far kotar ma keta I nlole ne. 2I nfalak tnyanuk pupular sa ber sir, “Let isnir ma keta tal ye yadin desar nempa mangkaryayar lan du. Mpa ka mtyak myof lete nruany ma ntafal mangkaryayar nema ral let isnir ye.#Mat. 9:37-38 3Mtyi lo! Nempa ka minremi feti Yakw kswiduk a kmi farlan domba anak ma nti nor asw alas tair.#Mat. 10:16 4Ka mtyi e, kete myonr lufu, kodnar nre sabatwemar. Ma kete misaur kabain dodo myor tomwatar na dalamtene let.#Mat. 10:7-14; Mrk. 6:8-11; Luk. 9:3-5
5Farlan msyung dasar sa e, ka mfyalak ber tomwatar na das dalam a ne fuky feti, ‘Maline ber a kmi.’ 6Ma farlan rlangun a kmi ma nangafel e, keta Ratu nal maline ber sir. Nempa farlan to rlangun a kmi e keta Ratu nal a nbali maline ne ber a kmi. 7Ka mimin lan das a ne, kete myof dasar sa mtyi dasar sa. Mtyame myenum safe-safe motak ma ral ber a kmi, fali iane mir sewe ne lo. Ma nangafel feti tomwatar ma rkarya e, ronri sewe.#1Kor. 9:14; 1Tim. 5:18
8Farlan mtyi kotar sa ma tomwatar rlangun a kmi e, mine motak tnyamar ma ral ber a kmi. 9Mifngamone mangafansar na kote ne ma mifwibar ber tomwatar na iane feti, ‘Nait ni tewat lo ma Ratu neluk Rai ma nfarete kmi.’ 10Nempa farlan mtyi kotar sa ma tomwatar to rlangun a kmi e, ka mtyi dalamten matnir ma mfyalere feti: 11‘Kam mbali kam ye lo ma keta to monr mir kabanir fen lese boloka mir ompak masun ma ramin emyamar ye nbal, keta matetar na somirlury. Iane neluk faniak feti keta Ratu nukun sir. Nempa ka minremi: Nait ni tewat lo ma Ratu neluk Rai ma nfarete kmi.’ 12Yakw kfwalak ber a kmi: Na lere ma Ratu nukun saryamprene e, keta nukun tomwatar na kote ne maberat a nlengan nof tomwatar na kote Sodom noak a ne!”#Kej. 19:24-28; Mat. 10:15; 11:24
Ratu keta nukun tomwatar ma rasipur I
10:13-16
(Mat. 11:20-24)
13“Yore desar tomwat Khorazim ma Betsaidar a kmi. Keta Ratu nukun a kmi maberat desar! Yakw kose ngrimpasalnar ber a kmi lo nempa to mtyate mir salar. Farlan luryain tomwatar na kote Tirus ma Sidon rsalan ngrimpasalnar ma Yakw kose ber a kmi lere ye, botuan feti rtate nir salar ma rampalim doan ye lo.#Yes. 23:1-18; Yeh. 26:1; 28:26; Yl. 3:4-8; Am. 1:9-10; Za. 9:2-4 14Nait ma Ratu nukun saryamprene e, keta nukun a kmi maberat a nlengan nof tomwatar na Tirus ma Sidon. 15Tomwat Kapernaum a kmi a nbal! Mdyaun feti keta Ratu nfair a kmi far surga e? Tate! Ratu keta nyebas a kmi far neraka!”#Yes. 14:13-15
16Ne Yesus nfalak ber Ni manglartar a ne, “Tomwatar ma rdengar safe ma kmi mfyalak, iane rdengar Yakw. Tomwatar ma rasipur a kmi, sir a ne rasipur Yakw. Tomwatar ma rasipur Yakw, sir a ne rasipur Ratu ma nsiduk Yakw nbal.”#Mat. 10:40; Mrk. 9:37; Luk. 9:48; Yoh. 13:20
Manglarat buty itw rbali sir ber Yesus
10:17-20
17Manglarat buty itw a ne, rbali sir ber Yesus. Rampumpuki sir ma rfalak, “Mangnrure Silai, kam mal Ko ngaram la matian kalin smwangat yatkar mpa sir monuk rlarat desar.”
18Ne Yesus nfalak ber sir, “Kswalan smwangat yatkar nir ulun nfufw nof langit farlan fitik. 19Kfwalak ber a kmi: Yakw kal kuase ber a kmi lo ma mtyai kasi ma seplakrue, terik ma mifufu mir muswar monuk. Mpa keta to sasaf ma rafngal a kmi.#Mzm. 91:13 20Boloka farane kete mimpumpuki kmi fali smwangat yatkar rlarat a kmi desar. Nempa ni ngafele e, mimpumpuki kmi, fali Ratu narengi ngarmir a na surga lo.”
Yesus nose alang ber Ratu
10:21-24
(Mat. 11:25-27; 13:16-17)
21Na lere ne nbal Ratu Smwangtany nose ma Yesus nsenang resi ma nfalak, “O Amo, Ko ye Mangnrur Silai ma mkwuase langit ma saryamprene. Yakw kose alang ber Ko, fali mfwatutu kabanir monuk a ne ber tomwatar ma to rafai sasaf. Nempa mumudim ber mangafayar ma nir andaun ngamonar. Amo, iane Ko Nim mpempeang.
22Amo mwal safe-safe monuk ber Yakw lo. To tomwate fen lese ma nafai Anaky, lan Amangw. Farlan a nbal, to tomwate fen lese ma nafai Amangw, lan Anaky. Ma keta kufbwotin Amangw a nbal ber tomwatar klwarat Ningw mpempeang.”#Yoh. 3:35; 10:15
23Yesus nmange i ma nfalak ber lan Ni manglartar, “Ngamone ber a kmi fali msyalan monuk kabanir ma Yakw kose ne lo. 24Yakw kfwalak ber a kmi, luryain a ne nabyar ma rayar yadin rmpeang ma rsalan safe ma kmi msyalan lere ye, nempa to bise ma msyalan. Sir rmpeang ma rdengar safe ma kmi mdyengar, nempa to rdengar.”
Tnyanuk pupule na tomwat Samaria ma dalamy ngamone
10:25-37
25Ni ler sa e mangaftutu Musa ni faretar sa namdir ma nateman Yesus ma nfalak, “Tuangguru, ka kose safe nema konri momorip dedesar?”
26Ne Yesus nfalak ber i, “Rarengi safe na Musa ni tetetkar? Ma mbwaca safe na iane?”
27Tomwate ne nfalak, “rarengi farye:
‘Ka mkyamis mir Ratu ma neluk mir Mangnrure ne myor dalmir kateman:
Ma noak ma myose safe-safe motak ma mdyaun safe-safe motak e ka mfyatutu feti mkyamis I,
ma ka mkyamis I myor mir fakoran monuk.’
Ma ‘ka mkwamis tomwat walyetar farlan ma mkwamis ko a nbal.’”#Im. 19:18; Ul. 6:5
28Yesus nfalak ber i, “Ko mfwalak a ne botuan, mpa mose farane nema bise ma mworip dedesar.”#Im. 18:5
29Nempa mangaftutu Musa ni faretar a ne nose ma nafdiat i, mpa nenrat Yesus, “Ka kwamis mpear?”
30Ne Yesus nasaur tnyanuk pupule farye, “Na ler sa e, merwan Yahudyar sa nrunrur nof kote Yerusalem far kote Yerikho. Na dalamtene let e, natungan nor mangamnangar. Sir rbabal i terik ma ketla nmat ma ral monuk ni kabanir, betno rti a rtate i motak. 31To dodo a nbal e, Yahudyar nir mangsompar sa nlanre nof a ne. I nsalan tomwate ne, nempa nlanre far dalamtene balisya ma nmpan naloran. 32Mpene tomwat Lewiar#10:32 Tomwat Lewiar ye ngare na nus Israelar sa. Tomwatar ma rof nuse ye, nir karyae raftutu Musa ni tetetkar ma rtulung mangsompar na Ratu Ni Das Silai na Yerusalem. sa nma ma nlanre nof dalamtene ne nbal. Noak ma nsalan tomwate ne, nti nlosir i ma nlolak i. Nempa nlanre far balisya betno nmpan naloran. 33To dodo e, tomwat Samariar#10:33 Samaria ye yamprenar sa ma namin propinsi Yudea ma Galilea let. Tomwat Yahudyar ma tomwat Samariar nof luryain e to rasenange sir lo, fali nir nuse, nir wewelmpampane, agame, ma politik to feleles. sa nlanre dalamtene ne nbal ma nti anir sa. Noak ma nsalan tomwate ne nlompang resi i. 34Ne nti nlosir tomwate ne, betno nal anggur ma naflerap ni mngalar ma naftasak nor ngule, betno nlele nteri. Mpene nfair tomwate ne na ni keledai, betno nor i far dasar sa ma nsewe kamar. Ma najake i ma nangafel. 35Ni bobole ne nal doit dinar#10:35 Dinar du ye isiny feti: Doit matan na are ne rose rof perak. Tomwate ma nkarya lere lese ni sewe dinar lese. du ber das nruany ma nfalak, ‘Mujake i ma farlan doit a ne to dengan, keta kbwali yakw betno kbwaras a kbwali ber ko.’”
36Yesus nasaur monuk e, nenrat mangaftutu Musa ni faretar a ne, “Nof nim andaun e, nof tomwatar tel a ne ise ma nkamis tomwatar farlan ma nkamis i?”
37Mangaftutu Musa ni faretar a ne nfalak, “Tomwate ma ni lolompang ma ntulung tomwate ne.”
Mpene Yesus nfalak, “Mbwali ko ma mose mlwarat farane nbal.”
Yesus namin Marta ma Maria nir das
10:38-42
38Mpene Yesus nor Ni manglartar raloran nir mpampane rti rait pnu sa. Na pnue ne bat sa ngarany Marta. I ma nlangun Yesus na ni das.#Yoh. 11:1 39Marta wainy ngarany Maria. I namtoran nlosir Yesus ma ndengar Ni anftutu. 40Nempa Marta nalsou ma nsalan lan olyar. Mpa i nti nlosir Yesus ma nfalak, “Mangnrur Silai, farpe ye, Maria nsalan lonri motak ma koko yakw kwarya e, mfwalak ber i ma ntulung yakw!” 41Nempa Yesus nfalak, “Marta, Marta, safema mose suse ko mor karyayar yadin? 42Lan lese ma Ratu nmpeang, iane ma nangafel ma Maria nose, ma keta to tomwate fen lese ma nal nof i.”
Currently Selected:
Lukas 10: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
