Lukas 11

Yesus naftutu Ni manglartar ma rsampayang

11:1-13

(Mat. 6:9-13; 7:7-11)

1Na ler sa e, Yesus nsampayang na ain sa. Lama nsampayang monuk e, Ni manglartar sa nfalak, “Mangnrur Silai, Yohanes mangadiris naftutu ni manglartar ma rsampayang, mpa muftutu kam a nbal.”

2Yesus nfalak ber sir, “Ka msyampayang farye,

Kam Amyamar, ka weni tomwatar ralang Ko ngaram,

ka weni Ko mweluk Rai ma mfwarete tomwatar na saryamprene.

3Mwal tnyame dengan ber kam lerar monuk.

4Ma mlwure kam mamy salar,

fali kam a nbal mlwure tomwatar ma rose yatak kam.

Mujake kam nema smwangat yatkar nir ulun kete nateman kam ma mose sale.”

5Ne Yesus nfalak ber sir, “Farlan tomwatar sa nof a kmi ye, nronram fetwalan lo ma nti tbwariny ni das, ma nfalak ber i feti, ‘Atbwar, mwal rotyar fen tel ber yakw fuky, 6fali tbwaringw nof pnu dodo a nma ma nwelat ningw das, ma to sasaf ma kal ber i!’

7Farlan tbwarim a ne nbali nof dalam feti, ‘Kete mwayat yakw! Yakw kwusy fofolat, ma kor angkur a marwa lo. Mpa to bise kpwote yakw ma kal sasaf ber ko.’”

8Ne Yesus a nfalak, “Mdyengar fen ngamone ma kfwalak: Boloka tomwate ne tbwarim desar ma to nlampir ma npote i ma nal safe ma mtwak a ne, nempa fali to mufai mweat ma mtwak dedesar mof i a mpa la npote i ma nal ber ko.

9Mpa Yakw kfwalak ber a kmi: Mtyak dedesar myof Ratu, keta I nal ber a kmi. Ma minriak safe ma mpyerlu myof I a ne keta nal ber a kmi. Ma dedesar ma mtyar ngarany nema keta nbanril fofolat ber a kmi.#11:9 Mtyar ngarany dedesar keta nbali kmi na teks asli nfalak feti mdyelak fofolat dedesar keta rbanril ber a kmi. 10Fali tomwate ma ntak nof Ratu keta nal ber i. Tomwate ma nanriak ni perluar nof Ratu keta nal ber i. Ma tomwate ma dedesar ma ntar Ratu ngarany, keta nbanril fofolat ber i a nbal. 11Farlan tomwatar sa nof a kmi ye anaky a ntak ian e, keta myal kasi ber i e? 12Nre rtak sife batin e, keta myal seplakrue e? 13Boloka tomwat yatkar a kmi e, nempa mifai ma myal kabain ngamonar ber angkimir. Ma nlengan e Amir ma namin surga ne! I nafai nlengan nof a kmi a nbal ma keta nal Smwangtany ber sir ma rtak rof I!”

Yesus Ni kuase nlengan nof Beelzebul

11:14-23

(Mat. 12:22-30; Mrk. 3:20-27)

14Na ler sa e, Yesus natian kalin smwangat yatak ma nose ma tomwat sa namomou. Noak ma smwangat yatak a ne nbie e, tomwate ne natanuk desar. Mpa tomwatar yadin na iane rampriang, 15nempa tomwatar ketnir a rfalak, “I nal Beelzebul ni kuase ma natian kalin smwangat yatak a ne. Beelzebul ye smwangat yatkar nir ulun.”#Mat. 9:34; 10:25

16Ketnir a nbal e, rose ma rateman Yesus, sir rtak I ma nose kabain mpasalnar sa ma neluk faniak ber sir, nema rsalan feti Ni kuase ne nof Ratu nre tate.#Mat. 12:38; 16:1; Mrk. 8:11 17Nempa Yesus nafai nir andanwar. Mpa I nfalak, “Farlan tomwatar na ain faretar sa rakes rasam sir, keta ain farete ne namsos. Farlan tomwatar na nir dasdalmir rakafreye dedesar sir, keta dasdalmir a ne ramsos a nbal.

18Farane nbal na smwangat yatkar nir ulun ni ain farete; farlan smwangat yatkar rakafreye sir, keta ain farete ne namsos. Yakw kfwalak farye fali kmi mfyalak feti Yakw kal Beelzebul ni kuase la kutian kalin smwangat yatkar. 19Mpa farlan farane mir manglartar ral ise ni kuase la ratian smwangat yatkar. Ma nof safe ma mir manglartar rose ne, iane nfatutu feti safe ma mfyalak na Yakw ne sale! 20Yakw kutian smwangat yatkar kor Ratu Ni kuase. Ma iane nfatutu feti Ratu ntabw ma nfarete neluk Rai na twalelenmir lo.”

21Yesus nfalak tnyanuk pupular sa nbal farye: “Tomwat makornar sa e, najake ni das nor ni demnir, nema ni kabanir kete rlai. Tomwate ne farlan smwangat yatkar nir ulun. 22Ne tomwat makornar sa ma nlengan i nbangal a ntuni i, ma nal tomwate ne ni demnir, ne nal tomwate ne ni kabanir ma nasaman ber tomwatar. Mpe tomwate ne farlan Yakw.

23Ise ma to nlarat Yakw, iane nbangal Yakw, ma ise ma to ntulung Ningw karyayar, iane nafyatak Ningw karyayar!”#Mrk. 9:40

Smwangat yatak keta nbali i ber tomwatar ma to ralele Yesus

11:24-26

(Mat. 12:43-45)

24“Noak ma smwangat yatak a nbie nof tomwatar sa, keta i nmpan a nlole nus mangretwar ma nanriak ain ma namin, nempa to ntungan. Mpa i nfalak, ‘Ni ngafele e, kbwali yakw far tomwate ma luryain e kswung i a ne!’ 25Ne smwangat yatak a ne nbali i ma nsalan tomwate ne farlan das ma rsoli rsere ma nanglerap ma rafyamping. 26Mpene nti burit ma ntar smwangtar itw ma rayatak a rlengan i. Sir rsung tomwate ne. Mpa famudi e, ni momorip ntafal ma nayatak a nlengan nof luryain a ne.”

Ngamone ber tomwatar ma rmpan a rlarat Ratu Ni ngribatnir

11:27-28

27Noak ma Yesus natanuk, batar sa nof tomwat ngayadin a ne nafwayak ma nfalak, “Ngamone ber bate ma namtoranbab ma nsusw Ko!”

28Nempa Yesus nfalak, “Ngamone ber tomwatar ma rdengar Ratu Ni ngribatnir ma rmpan a rlarat!”

Tomwatar rtak Yesus ma nose ngrimpasalan

11:29-32

(Mat. 12:38-42)

29Noak ma tomwatar rtafal ma yadin a rkolu Yesus e I nfalak, “Tomwatar na are ye tomwat yatkar. Sir rtak ma kose ngrimpasalnar sa neluk faniak betno ralele Yakw, nempa keta to kose fen lese nbal, Yakw kose lan ngrimpasalan farlan na are nabi Yunus.#Mat. 16:4; Mrk. 8:12 30Farlan luryain a ne nabi Yunus neluk faniak ber tomwatar na kote Niniwe, keta Yakw, Tomwate Anaky a nbal kweluk faniak ber tomwatar na are ye.#Yun. 3:4 31Na lere ma Ratu nukun saryamprene e, rai bate nof trangan ma nmorip luryain a ne, ma tomwatar na are ye keta raktem a rmorip a rbali. Nempa keta rai bate ne nfasale tomwatar na are ye. Fali rai bate ne nma nof nus dodo desar ma ndengar rai Salomo ni anfai silai. Ma lere ye tomwatar sa ma silai I a nlengan nof rai Salomo namin ye, nempa kmi to mdyengar I!#1Raj. 10:1-10; 2Taw. 9:1-12 32Noak ma Ratu ntetak tomwatar nir ngriar keta tomwat Niniwar ma rmorip luryain a ne, ma tomwatar na are ye, raktem a rmorip a rbali. Nempa keta tomwat Niniwar rfasale tomwatar na are ye. Fali tomwat Niniwar a ne rtate nir salar, noak ma nabi Yunus nafwibar Ratu Ni ngribatnir ber sir. Ma lere ye tomwatar sa ma silai i a nlengan nof nabi Yunus namin ye, nempa kmi to mdyengar I!”#Yun. 3:5

Ratu Ni ngribatnir la naflawar ninr momorip

11:33-36

33“Tomwatar to rtutun damar betno ramudim nre ral ngusi#11:33 Ngusi na naskah kuno ketnir to sasaf: nre repat ror ngusi. ma rsungap. Nempa ka rtikloi damar na impan, nema tomwatar rti das dalam e, rkeban ngaodir.#Mat. 5:15; Mrk. 4:21; Luk. 8:16 34Matmir ye farlan damar ber tenmir. Farlan matmir a rangafel, keta mkyeban safe-safe motak. Ma farlan matmir makrokap, keta to mkyeban sasaf. 35Mpa mijake ma ka odir ma namin dalmir a ne kete nmat ma dalmir makrokap. 36Farlan dalmir monuk idak, keta mir momorip idak a nbal farlan damar ma nodir das dalam a ne.”

Yesus ndotar tomwat Farisyar ma mangaftutu Musa ni faretar

11:37-54

(Mat. 23:1-36; Mrk. 12:38-40; Luk. 20:45-47)

37Lama Yesus naftutu monuk e, tomwat Farisyar sa ntar I ma ntame na ni das, mpa Yesus a nti. 38Tomwat Farisi ne nampriang fali Yesus ntame to nbur limnir, nlarat agame ni yayatrwar.#11:38 Tomwat Yahudyar nir yayatur agame nfalak feti, ka rbur limnir betno rtame. 39Ne Yesus ninr Mangnrure nfalak ber i, “Tomwat Farisyar a kmi, kmi ye farlan tomwate ma nbur mpinan ma gelayas burtir, nempa to mbyur dalmir mpa lolone rarai. Mpe farlan kmi a nbal ma dalmir rfen ber kabain yatkar ma mkyampres tomwatar nir kabanir. 40Hei modar a kmi! To mifai feti Ratu nose tenmir ma dalmir a nbal e? 41Mpa ka dalmir lelerap ma myal ber tomwatar ma rawatan. Farlan myose farane, keta dalmir ma mir momorip a ne nanglerap a nbal.

42Suse desar ber tomwat Farisyar a kmi! Keta mtyungan suse maberat desar. Mir let isnir farlan selasih, inggu, ma sayorar felnir mpane, myal sepersepuluh ber Ratu, safe ma myose ne diat nempa to mimlonry ber tomwatar ma to mkyamis Ratu. Mpa ni botuan e ka myal sepersepuluh myof mir let isnir ber Ratu nempa ka myose mlyarat Ratu ni faret walyetar ma ubany a ne nbal.#Im. 27:30

43Hei Farisyar a kmi! Keta mtyungan suse maberat desar! Fali mpyeang lan ma mimtoran lury na das sampayang dalam, ma mpyeang ma tomwatar ralang a kmi na nus ngayadin. 44Keta suse desar ber a kmi! Fali myose felmir farlan tomwat ngamonar, nempa dalmir e, nfen ber kabain yatkar. Iane farlan kubur ma to ni faniak. Keta tomwatar rmpan a na kubur a ne das, nempa to rafai feti kubur dalam a ne mpusuk.”

45Ne mangaftutu Musa ni faretar sa nfalak ber Yesus, “Tuangguru, Ko mfwalak farane e, mufmweat kam!”

46Yesus nfalak, “Mangaftutu Musa ni faretar a kmi, keta mtyungan suse maberat desar a nbal! Kmi mryibut tomwatar ma rlarat mir yayatur mabertar, nempa kmi desar e, to mtyulung sir ma rmpan a rlarat. 47Keta kmi mtyungan suse desar! Fali kmi myose nabyar nir kubrar a ne, safo empmir nusmir rfen sir.#11:47 Tomwat farisyar rose farane nema tomwatar rafliak sir tomwat ngamonar. 48Iane nfatutu feti koko kmi a mlyarat ma myoding safe ma empmir nusmir rose ne lo; fali botuan feti sir ma rfen nabyar a ne, ma kmi myose nir kubrar. 49Iane nwayat ma noak a ne Ratu nfalak nor Ni anfai silai feti, ‘Keta kswiduk nabyar a ma mangsidkwar ber sir; ne keta rfen ketnir ma ketnir e rsiksa sir!’” 50Ratu nose farane nema nukun tomwatar ma rmorip na are ye, fali rafene monuk nabyar ntabw nof saryamprene betno ni luryain, 51ntabw nof ma rfen Habel titerik Zakharia, ma rfen i a na Ratu Ni Das Silai ni latyompur, na snyompe ain ma Ratu Ni das let. La msyalan: keta Ratu nukun tomwatar na are ye fali ngriar monuk a ne.#Kej. 4:8; 2Taw. 24:20-21

52Ne Yesus nfalak, “Suse desar ber mangaftutu Musa Ni faretar! Fali kmi mnyau kukusy fofolat ma mbyanril tomwatar nir andanwar nema bise ma rafai Ratu Ni mpempeang. Nempa kmi desar e, to mlyampir ma mifai. Safo sir rmpeang ma rafai Ratu Ni mpempeang nempa kmi myose mtyeri!”

53Lama Yesus nti a ntate ain a ne, mangaftutu Musa ni faretar ma tomwat Farisyar rkedan desar I. Ne raenrat dedesar I nema bise nfalak kabanir yadin. 54Sir rose farane nema Ni ngribatnir sa ntaksal e, bise ma romat I.

Currently Selected:

Lukas 11: YMD

Highlight

Copy