Lukas 12

Kete mlyarat tomwat Farisyar nir wewelmpampane

12:1-12

(Mat. 16:26-28)

1Noak a ne tomwatar yadin desar ramdir ma rkolu Yesus mpa rasesekan sir. Nempa Yesus nfalak ber lan Ni manglartar, “Ka mijake kmi fen ngamone, kete mlyarat tomwat Farisyar nir wewelmpampane, fali sir rose felnir ma nangafel nempa dalmir e, mpusuk. Iane farlan ragi ma naslyai terigu.#12:1 Tomwat Farisyar nir wewelmpampane farlan ragi, boloka lan du sir nempa sir bise ma ralonge tomwatar ma rlarat nir wewelmpampane ne.#Mat. 16:6; Mrk. 8:15 2Nempa safe-safe monuk ma ramudim a ne keta Ratu nfatutu, ma safe-safe monuk ma tomwatar to rafai keta I nfatutu ber sir.#Mrk. 4:22; Luk. 8:17 3Mpa safe-safe monuk ma mfyalak mimudim keta tomwatar rafai; ma safe-safe monuk ma msyarmpump na kamar dalam, ka mfyalere na tomwatar monuk sonirlury nema rafai.

4Tbwarngur, ka minremi! Kete mimtaut tomwatar ma rfen a kmi. Fali keta rfen lan tenmir, nempa to bise ma rose rlengan rof a ne. 5Kfwalak ber a kmi, ka mimtaut lan Ratu! Fali Ni kuase ma nfen tomwatar, ma Ni kuase nbal ma nyebas sir far neraka!

6Almunar lim kotkir lan senar du. Boloka farane Ratu to namlufe fen lese nbal. 7Ma Ratu nfayaki monuk ulmir bukrir lo, mpa kete mimtaut; fali na Ratu sounlury e kotkimir nlengan nof almunar ne!

8Mdyengar fen ngamone: Ise ma nyoding Yakw na tomwat ngayadin feti Ningw manglarat ber i, keta Yakw, Tomwate Anaky kyoding i a nbal na Ratu Ni malaektar sonirlury feti i ye Ningw manglarat. 9Nempa ise ma namsoal Yakw na tomwat ngayadin sonirlury feti to Ningw manglarat ber i, keta kumsoal i a nbal na malaektar sonirlury feti i ye to Ningw manglarat.

10 # Mat. 12:32; Mrk. 3:29 Ise ma natanuk bolar na Yakw, Tomwate Anaky, keta Ratu bise ma nlure i; nempa ise ma nafbwere Ratu Smwangtany,#12:10 Tafbwere Ratu Smwangtany isiny farye: tomwatar ma to ryoding feti Yesus ye ninr Ray Silai, ma rfalak feti Ni karyayar ne nof smwangat yatkar ni ulun. Mrk. 3:28-30; 1Yoh. 5:16; ma Ibr. 6:4-8; 10:26-27. keta to nlure i.

11Keta tomwatar ror kmi ber mangfaretar ma rsidang a kmi na das sampangar, nempa kete dalmir suse feti keta mfyalak safe la mifdiat a kmi.#Mat. 10:19-20; Mrk. 13:11; Luk. 21:14-15 12Fali na lere ne nbal keta Ratu Smwangtany naftutu safe ma mfyalak.”

Tnyanuk pupule na tomwat mangoskai ma nmod

12:13-21

13Tomwatar sa nof tomwat ngayadin a ne nfalak ber Yesus, “Tuangguru, mfwalak ber waingw nema nsaman amangw ni kabanir ber madu.”

14Nempa Yesus nfalak, “Awa, ise nfil Yakw ma kweluk mangtetak nre lenre ber a kmi?” 15Ne Yesus nfalak ber tomwatar a ne, “Ka mijak fen ngamone, ma kete mir makeus a nresy. Fali tomwatar to rmorip rof lan nir anoskai, boloka nir kabanir monuk a ne nlie nlengan.”

16Mpe Yesus nasaur tnyanuk pupular sa farye, “Mangoskayar sa ni lete isiny yadin desar. 17Ne nfalak na dalamy feti, ‘To ain lo ma knwau lete isiny. Mpa kose farpe?’ 18Ne nfalak na dalamy a nbal, ‘O kose farye; keta kswose ningw lumbungar a ne ma kufdiri kbwali lumbung ma silai desar nlengan nof lumbungar a ne. Ma knwau monuk let isnir numur kabain walyetar. 19Keta kfwalak: Kswenang desar! Fali ningw kabanir yadin ma keta bise ma knwau titerik ngarkar rose ngarkar. Mpa lere ye! Kumtoran motak, ktwame, kwenum ma kswenang!’ 20Nempa Ratu nfalak ber i feti, ‘Hei mode ko! Nronram ye nbal keta mwat, ma kabanir monuk ma mnwau ne keta ber ise?’

21Farane nbal ber tomwate ma nabutin kabanir na saryamprene ber lan i, keta nawatan na Ratu sounlury fali to nlarat Ratu Ni mpempeang.”

Milele lan ber Ratu

12:22-31

(Mat. 6:25-34)

22Yesus nfalak ber Ni manglartar, “Mdyengar ma kfwalak, ka kete dalmir suse na mir momorip feti keta mine safe. Ma ka kete dalmir suse nbal feti keta mfyonak safe. 23Fali mir momorip ubany nlengan nof tnyamar, ma tenmir ubany nlengan nof rabtyar. 24No msyalan manik akar! Sir to ryefar finyar, to ral isnir, ma to rnau nir tnyamar na lumbung, nempa Ratu nfane sir. Kmi mifai feti keta Ratu nsalan a kmi a nlengan nof mangkyar a ne. 25Tomwatar ma dedesar e dalmir suse keta to bise ma rtafal ni ngarkar, boloka jam lese motak. 26Mpa farlan to bise ma myose kabain angkir farlan mtyafal mir ngarkar, safema dalmir suse na kabanir monuk na mir momorip? 27No msyalan lelemukwar; To rkarya, ma to raosyamp. Yakw kfwalak ber a kmi, rai Salomo ma naoskai desar e, to nfonak rabit ngafelar far bungar a ne!#1Raj. 10:4-7; 2Taw. 9:3-6 28Urwar ma lere ye ramin lete dalam ma bobole tomwatar rapu motak e Ratu nafyamping sir ma nangafel. Ma keta I npiare kmi nlengan nof urwar a ne! Ma safema to milele I! 29Mpa, kete dalmir suse feti keta mine safe, myenum safe, nre mfyonak safe. 30Tomwatar ma to ralele Ratu dedesar ma ranriak kabanir monuk a ne. Nempa kmi e kete myose farane, fali Amir nafai feti kmi mpyerlu safe-safe monuk a ne. 31Mpa ka mireke ma Ratu nfarete neluk Rai na mir momorip a fuky, betno keta I ntafal safe-safe monuk a ne ber a kmi.”

Tose ngamone na saryamprene nema bise ma taoskai na surga

12:32-34

32“Hei Ningw manglartar a kmi, kete mimtaut! Boloka lan du kmi, Ratu nfil a kmi ma keta miktem a mfyarete na Ratu Ni ain farete. 33Mpa mfyenri monuk mir kabanir ma msyaman dotyar a ne ber tomwatar ma rawatan. Myose lufu ma to bise nayatak, iane mir adat ngamonar ma keta neluk mir kabanir ma to bise omp na surga. Ma mangamnangar to bise ma ral ma langatrar to bise ma rafyatak. 34Fali ain mpe ye ma mnyau mir kabanir ma kotkir, keta mdyaun dedesar kabanir a ne!”

Mangkaryae ma najak dedesar

12:35-40

(Mat. 24:43-51)

35Yesus nfalak naloran, “Ka mijak dedesar ma mlyangun Ratu lere nronram. 36Iane farlan mangkaryayar ma rdaf nir makene nbali nof festa nikah. Noak ma makene ne nbali i ma ndelak fofolat, ne mangkaryayar a ne rasnyalik ma rbanril fofolat. 37Ngamone ber mangkaryayar ma lolone rdaf nir makene noak ma nbali i. Mdyengar fen ngamone: Ni botuan e, keta makene ne nluan sir ma ramtoran, betno nlangun sir ma nal tnyame ma rtame. 38Ngamone ber mangkaryayar ma lolone rdaf nir makene noak ma nbali i nronram fetwalan nre sesedin ngalawar lo! 39Ka minremi tnyanuk pupule ye: Farlan das nruany nafai lo feti keta jam farye, mangamnange ne nma, botuan feti najake ni das nema mangamnange to nti dalam. Nempa to nafai feti bengfir e mangamnange ne nma, mpa ka najak dedesar.#Mat. 24:43-44 40Mpa kmi a nbal e ka mijak dedesar, fali keta metryat motak e Yakw, Tomwate Anaky a kmwa saryamprene.”

Mangkaryae ma nalarat liry ma to nalarat liry

12:41-48

(Mat. 24:45-51)

41Petrus nenrat Yesus, “Mangnrur Silai, mpa tnyanuk pupule ne snyain kam nre ber tomwatar monuk?”

42Yesus ninr Mangnrur Silai nfalak, “Mangkaryae ma tomwatar bise ma ralele i, ma nafai ma nayatur, keta ni makene nfair i neluk ulun ber mangkarya walyetar. Ma lerar monuk e, nasaman tnyamar ber sir. 43Ngamone desar ber mangkaryae ma farlan ni makene nbali i e, nsalan ma lolone nafmpwane ni karyae! 44Yakw kfwalak ber a kmi: ni botuan e, makene ne keta nal kuase ber mangkaryae ne ma najake ni kabanir monuk. 45Nempa farlan mangkaryae ne ni andaun yatak e, keta nfalak na dalamy feti, ‘Ningw makene to nbali i a fuky.’ Mpa nababal monuk mangkarya bate merwane. Ma ntame nenum ma nanabuk. 46Mangkaryae ne to nafai desar ni tewat ma ni makene ne nma, ma metryat motak e ni makene ne nma lo. Mpa keta nukun i feleles farlan ma nukun tomwatar ma rose lole ma ralarat liry ber Ratu.

47Mangkaryae ma nafai ni makene ni mpempeang, nempa to nmpan a nlarat ma to najak dedesar, keta raus a rbabal i ma nlengan desar. 48Nempa mangkaryae ma to nafai ni makene ni mpempeang, ma nose sale nwayat ma ka rukun i, keta raus a rbabal i e, to maberat. Fali ise ma Ratu nal nimet yadin ber i, keta Ratu ntuntut yadin nof i. Ma ise ma Ratu nal kuase ber i ma najake tomwatar, keta Ratu ntuntut i nlie nlengan a nbal.”

Yesus nwayat ma tomwatar rabangal

12:49-53

(Mat. 10:34-36)

49Yesus nfalak ber Ni manglartar, “Yakw kmwa saryamprene ye kor au. Au ye keta nose ma tomwatar rabangal. Yakw kmpweang desar feti au ne nfolur! 50Ka kwoman suse silai desar, ma dalangw to ntai desar ma kdwaf ma ngrie ne nbotin.#Mrk. 10:38 51Kmi mdyaun feti Yakw kmwa saryamprene ye ma kose ma tomwatar rmorip rangamon ror tomwat walyetar. Tate. Nempa Yakw kmwa e kose ma tomwatar rkafre. 52Mpa nof lere ye, keta tomwatar lim ma ramin das dalam rkafre, tomwatar tel a rbangal tomwatar du, nre tomwatar du a rbangal tomwatar tel. 53Keta amany nor anaky merwane rabangal. Enany nor anaky bate rabangal. Ma yanan bate nor bat ketam rabangal.”#Mi. 7:6

Are ni fanikar

12:54-56

54Yesus nfalak a nbal ber tomwat ngayadin, “Farlan kmi msyalan mutan ma nsai far barat, mfyalak desar feti, ‘Keta udan.’ Ne botuan feti naudan.#Mat. 16:2-3 55Farlan msyalan mnaur nof trangan, mfyalak feti, ‘Keta mefanas.’ Ne botuan feti mefanas. 56Tomwat lepuskwar a kmi! Msyalan langit ma saryamprene felan motak e, mifai myal desar. Ma safema to mifai myal fanikar ma nfatutu safe ma Ratu nose na are ye?”

Mungamon mor nim musu

12:57-59

57“Safema koko ko to mtwetak feti impe ma botuan?#Mat. 5:25-26 58Farlan nim musu nose ma nmangadu ko ber mangtetak ma nurus mir ngrie, ni ngamone e lolone mumin dalamtene let e, munriak ma mungamon. Nema kete nakei ko ber mangtetak, ma nor ko ber ni mangajake ma nau ko a na sel dalam. 59Yakw kfwalak ber ko: Keta to bise ma mbwie mof sel terik ma mbwaras monuk nim utngar.”#12:59 Ansaur ye isiny feti ka tangamon tor Mangnrure noak ma to nukun kit a fuky.

Currently Selected:

Lukas 12: YMD

Highlight

Copy