Lukas 13
13
Farlan to rtate nir salar, keta Ratu nukun sir
13:1-5
1Noak ma Yesus naftutu tomwat ngayadin a ne, tomwatar ketnir rfalak ber Yesus feti Pilatus nfen tomwat Galilear ketnir noak ma rloik nir snyompe ber Ratu. 2Ndengar farane, Yesus nfalak ber sir, “Kmi mifliak feti tomwat Galilear ma rmat farane, nir salar maberat a nlengan nof tomwat Galilear monuk e? 3Tate! Mdyengar fen ngamone: Farlan to mtyate mir salar, keta mkyoman suse terik ma myat far sir a nbal. 4Kmi lolone minremi menara na Siloam, ma namsos a npalam tomwate buti resin wal ma rmat a ne nre? Mifliak feti sir a ne nir salar maberat a nlengan nof tomwatar monuk ma ramin Yerusalem a ne e? 5Tate desar! Mpa kfwalak ber a kmi: farlan to mtyate mir salar, keta Ratu nukun a kmi farane nbal.”
Tnyanuk pupule na katutun ara ma to buany
13:6-9
6Ne Yesus nfalak tnyanuk pupular sa farye, “Tomwatar sa ni katutun ara ma namin ni let anggur dalam. Ler sa e nti nanriak katutun a ne bunir, nempa to nbae fen lese nbal. 7Mpa, nfalak ber mangajake na ni lete ne, ‘Mswalan, Yakw kmwa ma kunriak katutun a ne bunir ngarkar tel ye lo, nempa to kbwae fen lese nbal. Mpa mkwetan kalin i! Fali to ubany ma namin lete dalam!’
8Nempa mangajake ne nfalak feti, ‘Amangw farane motak a ma tsalan ngarak ye nbal a fuky, la kswayal ompak a kbwebar ma kyefar pupuk a na. 9Ise nafai feti ngarak ma nma ye nabu. Farlan to nabu a nbal e, la kwetan i lo.’”
Yesus nafngamone tomwatar sa na Yahudyar nir ler Sanari
13:10-17
10Na Yahudyar nir ler Sanari sa e, Yesus naftutu na das sampangar sa. 11Na iane batar sa ma nafanas ngarak buti resin wal e lo fali smwangat yatak nsung i. Nwayat ma nadungun, ma namdir e to namlonry. 12Noak ma Yesus nsalan bate ne nfalak, “Batmaken, mungamon lo!” 13Ne nti nsaup limany na bate ne, mpe ntabw nof a ne i namdir e, namlonry ma ndangin Ratu.
14Nempa ulun na das sampayang a ne nares, fali Yesus nafngamone tomwate na Yahudyar nir ler Sanari, mpene nfalak ber tomwat ngayadin a ne, “Na minggu dalam e, kit tkarya lerar nem; mpa mya ma nafngamone kmi a na lerar ne, ma kete na ler Sanari!”#Kel. 20:9-10; Ul. 5:13-14
15Nempa Yesus nfalak, “Hei lepuskwar a kmi! Koko kmi desar e mkyarya na ler Sanari nre? Kmi myalin mir sapyar nre keledayar rof nir owar ma myor sir ma rti renum. 16Ma na ye bat sa nof dasdalam Abraham, ma smwangat yatak nir ulun a nsung i ngarak buti resin wal e lo. Mpe to bise tafngamone i a na ler Sanari e?” 17Yesus nfalak farane nwayat ma ni muswar rmeat resi; nempa tomwatar monuk ne rampumpuki sir fali rsalan kabain mpasalnar ma Yesus nose ne.
Tnyanuk pupule na sasawi batin ma ragi
13:18-21
(Mat. 13:31-33; Mrk. 4:30-32)
18Lama Yesus nafngamone bate ne, I nenrat sir farye, “Ratu neluk Rai ma nfarete saryamprene ye, keta felan farpe? Keta kal safe la kpwasal i? 19Ratu nfarete na saryamprene felan farlan tnyanuk pupule ye. Tomwatar sa nal sasawi batin#13:19 Sasawi ye to feleles nor sasawi ma namin Tanempar. Sasawi na Palestina ye batin atakanak nempa natrump e bise ma neluk katutun ma mangkyar rose nir ngengyar a na. ma nyefar na ni lete. Ne natrump tila neluk katutun, ma mangkyar rti rose nir ngengyar a na sangnir.”
20Ne Yesus nfalak a nbal, “Keta kal safe la kpwasal Ratu Ni faret ain ye? 21Iane farlan ragi ma batar sa nal betno nabali nor terigu ma silai,#13:21 Terigu silai na teks asli nfalak feti terigu na boti dalmir tel nre terigu kilo buty tel nre liter buty fat. terik ma nbar monuk.”
Tasosonge ma ti surga
13:22-30
(Mat. 7:21-23)
22Mpene Yesus naloran Ni mpampane far kote Yerusalem, I nlole kotar ma pnuar ma naftutu tomwatar. 23Ne tomwatar sa nenrat, “Amangw, mpe lan tomwatar ketnir ma Ratu nfair sir e?”
24 #
Mat. 7:13-14
Mpa Yesus nfalak, “Ka mireke ma mpyan milyole myof fofolat mpalole ne far dalam. Yakw kfwalak ber a kmi, tomwatar yadin rareke ma rmpan rof a ne, nempa to bise. 25Fali ni tewat e das nruany npote i ma nfolat, ma keta kmi mimdir motak burit ma mdyelak dedesar fofolat ma mfyalak, ‘Maken, mbwanril fofolat ber kam a fuky!’ Nempa keta i nfalak ber a kmi, ‘Mpear a kmi ye, to kufai kmi!’ 26Ne keta kmi mfyalak, ‘Kam ye ma mtame menum mor Ko, ma Ko muftutu kam a nbal na srat dalmir na mamy kote!’#Mat. 7:22-23 27Nempa keta i nfalak ber a kmi feti, ‘Mpear a kmi ye, to kufai kmi. Tomwat salar far a kmi ye, ka kete mya ye. Mbyali kmi!’#Mzm. 6:9 28Ma keta kmi mkyeban Abraham, Ishak ma Yakub ror nabyar monuk a rsenang resi na Ratu Ni ain farete, ma kmi e mtyasing ma mkyoman suse fali keta ratian a kmi far burit!#Mat. 22:13; 25:30 29Ma tomwatar ma to Yahudi sir keta reluk Ratu Ni tomwatar na Ratu Ni ain farete. Sir a ne keta rma rof timur, barat, trangan ma marmar, ma keta rampumpuki sir a na Ratu Ni ain farete.#Mat. 8:11-12 30Mpa ni botuan e, tomwate ma lere ye to uban sasaf keta famudi e neluk tomwat silai, ma tomwate ma lere ye neluk tomwat silai keta famudi e to uban sasaf.”#Mat. 19:30; 20:16; Mrk. 10:31
Yesus natanuk na kote Yerusalem
13:31-35
(Mat. 23:37-39)
31Na lere ne nbal, tomwat Farisyar ketnir rti rfalak ber Yesus, “Mbwie ma mtwi anir sa koli rai Herodes nose ma nfen Ko.”
32Ne Yesus nfalak ber sir, “Mtyi mfyalak ber asw alas a ne feti, ‘Lere ye ma bobole keta kutian smwangat yatkar ma kufngamone tomwatar, ma bengdu e ksworu ningw karyae.’ 33Nempa ka kuloran ningw mpampane far Yerusalem lere ye, bobole ma bengdu, fali biase tomwatar rfen nabyar na Yerusalem ma to na ain walyet.
34Hei tomwat Yerusalemar a kmi! Kmi ma mfyen nabyar! Ma mikjai mfyen tomwatar ma Ratu nsiduk sir ber a kmi. Lain yadin lo ma Yakw kmpweang resi ma kufbwurat a kmi monuk ma mlyosir Yakw, farlan sif ene ma nafburat angkir a na slyapan lebabnir, nempa kmi to mlyampir. 35Mpa mdyengar, keta Ratu nti a ntate kmi. Yakw kfwalak ber kmi, keta to mkyeban Yakw lo, terik ma mfyalak feti, ‘Mya ma tdangin I ma nma nor Ratu ma neluk Mangnrure ne Ni kuase.’”#Mzm. 118:26
Currently Selected:
Lukas 13: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
