Lukas 15
15
Tnyanuk pupule na domba ma nlai
15:1-7
(Mat. 18:12-14)
1Na ler sa e, mangtak ulbatyar ma tomwat salar, rti rakmat Yesus ma rdengar I.#Luk. 5:29-30 2Mpa tomwat Farisyar ma mangaftutu Musa ni faretar nroke nraki sir. Ma rfalak, “Tomwate ye nabut I nor tomwat salar ma ntame nor sir!” 3Iane nwayat ma Yesus nasaur tnyanuk pupule ber sir farye, 4“Farlan nof a kmi ye tomwatar sa ni domba rati, ne ni domba lese nlai, keta i nose farpe? Botuan feti keta tomwate ne nau kalin ni domba buty siw resin siu ne na ain letkape, betno nti nanriak domba ma nlai ne titerik ma ntungan i. 5Farlan i ntungan a nbali domba ne, keta nsenang resi ma nabare domba ne, 6betno nor a nbali i. Mpene nait ni das e, natare tbwarnir ma tomwatar na ni das seriny baldu a ne ma nfalak feti, ‘Mya ma tampumpuki kit. Fali ktwungan a kbwali ningw domba ma nlai ne lo!’ 7Yakw kfwalak ber a kmi, keta Ratu nor Ni malaektar rampumpuki nbal na surga fali tomwat salar sa ma ntate ni salar a ne. Sir rsenang desar ror i nlengan nof tomwat ngamone buty siw resin siu ne ma rase feti to nir sal.”
Tnyanuk pupule na doit gobang ma nlai
15:8-10
8Ne Yesus nasaur tnyanuk pupule nbal farye, “Farlan batar sa ni doit gobang buti, ne doit gobngar sa nlai, keta i nose farpe? I ntutun faduk betno nsol das dalam ma nanriak fen ngamone desar doit ma nlai ne titerik ma nbae.#15:8 Doit gobang ye Yunani liriny nfalak feti drakma. Drakma ye bertyan feleles far sewe lere lese ber mangkaryae. 9Lama nkeban doit a ne, ntar tbwarnir numur tomwatar na ni das seriny baldu a ne, ma nfalak ber sir feti, ‘Mya ma tampumpuki kit. Fali kweban a kbwali ningw doit ma nlai ne lo!’ 10Yakw kfwalak ber a kmi feleles a nbal nor Ratu Ni malaektar ma rampumpuki sir fali tomwat salar sa ntate nir salar lo!”
Tnyanuk pupule na kanak ma nlai
15:11-32
11Yesus nfalak a nbal farye, “Maken sa anaky merwanar du.” 12Ne anaky famudi nfalak ber amany feti, “Amo, mswaman kit ninr kabanir lo nema kal ningw wayat.” Mpe amany nsaman nir kabanir a ne ber angkir du a ne.#15:12 Na tomwat Yahudyar e biase ma amnir a rmat betno rsaman nir kabanir ber angkir. Merwan keyai biase nonri kabanir yadin nlengan nof urany wainy. 13Lerar fir a ne rsak anaky famudi ne nfenri monuk ni kabanir a ne betno nti nus dodo. Na iano nfenri nlai monuk ni dotyar la naosfesta dedesar. 14Nait ma ni dotyar omp monuk lo, lafar silai desar nsor nuse ne, ma i to ni sasaf desar. 15Mpa nti nkarya ber tomwatar sa na nuse ne, tomwate ne nluan i ma nti najake babyar na ni lete.#15:15 Ratu Ni tetetak nose nteri Yahudyar ma kete rasyol babyar nre rane. Yahudyar ma rajake babyar sir a ne ma rawatan desar. 16I namlafar resi nwayat ma i nmpeang desar ma nane babyar a ne nir tnyamar. Nempa to tomwate fen lese, ma nal babyar ni tnyamar ber i. 17Famudi e, nfenai nbali ma nfalak feti, “Tomwatar ma rkarya ber amangw, nir tnyamar yadin desar, nempa yakw na ye ketla kmwate ningw lafar!” 18Mpa keta kbwali yakw ber amangw, ma kfwalak feti: “Amo, yakw kose sale ber Ratu ma ber ko lo. 19To mdwaun feti ko angkam ber yakw lo. Ma mdwaun lan feti ko nim mangkaryae ber yakw.” 20Mpa nbali i a nti nakmat amany.
Lolone dodo e, amany nkeban i lo. Fali amany nlompang resi i mpa nafla ma nkakal anaky a ne, ma natmpur i betno nbon i. 21Ne kanak a ne nfalak ber amany, “Amo, yakw kose sale ber Ratu ma ber amangw lo. Mpa kete mdwaun feti ko angkam ber yakw lo.” 22Nempa amany ntar ni karwar ma nfalak feti, “Misnyalik! Ma mtyi myal rabit melawas ngafele desar la mfyonak i. Myal toslyange ma myolw na limany, ma myal sabatwemar la myolw na emnir. 23Betno myal sapi anak madunkar sa ma mfyen i ma mdyane. Nema taktem a tame ma tampumpuki kit. 24Fali yakw anakw ye nmat lo, nempa lere ye nmorip a nbali; bengfir a ne i nlai, nempa lere ye ktwungan a kbwali i lo.” Ne raosfesta desar.
25Ni lere ne nbal, anaky keyai namin letar. Nait ma nbali i ma sesedin nir das lo, i ndengar ma rbeu ma bulyar delkir ma rose anputar. 26Ne ntar ni kawar, ma nenrat feti, “Rose safe na das a ne?” 27Kawar a ne nfalak feti, “Waim a nbali i lo! Mpa amoi naluan kam ma mfen sapi anak madunak a ne, fali waim ma nlai ne ntungan a nbali i lo ma nangamon motak!”
28Kanak keyai ndengar farane nares desar nwayat ma to nlampir ma nti das dalam. Ne amany nti burit ma nalonge i nema nti das dalam. 29Nempa nfalak ber amany feti, “Amo, yakw kwarya ma kmwat a klwai desar ber ko ngarkar rose ngarkar. Ma to klwanre nim faretar lain lese. Nempa mwal safe ber yakw? Mpimpy angkir sa nbal e, to mwal ber yakw ma kuosfesta kor tbwarngur a fuky!” 30Safo angkam famudi ma nafere monuk nim kabanir ber bat yatkar, betno nbali i motak e, mfwen sapi anak madunak ber i lo! 31Ne amany nfalak ber i feti, “Amo, mdwengar ma kfwalak! Ko dedesar ma mor yakw. Ningw safe-safe monuk ye ko nime nbal. 32Mpa ka taosfesta ma tampumpuki kit, fali waim ma nmat a ne, nmorip a nbali lo; bengfir a ne nlai, nempa tungan a tbali i lo.”
Currently Selected:
Lukas 15: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
