Lukas 16
16
Tnyanuk pupule na mangomat doit ma to namlonry nempa nafai resi
16:1-13
1Ne Yesus nfalak a nbal ber Ni manglartar, “Tomwat mangoskayar sa, nal tomwatar sa ma nomat doit ma nurus ni kabanir. Mangoskai ne ndengar feti tomwate ne to najake fen ngamone ni kabanir. 2Mpa ntar i ma nfalak feti, ‘ko nim karyae farpe ye? Lere ye nbal ka mufbotin monuk nim karyae ma mose ne. Ma ko to mkwarya lo.’ 3Tomwate ne ndengar farane nfalak na dalamy feti, ‘Kose farpe ye? Ningw bos a nose ma nalin yakw nof ningw karyae. Ma to boangw kal ma kuosbo, ma kweluk mangatake e kmweat. 4O tate la kose farye; farlan makene nalin yakw e, la kunriak tbwarngur fen yadin nema rmpeang ma rlangun yakw na nir dasar!’ 5Mpa i ntar mpane tomwatar ma nir utngar a na ni makene ne. I nfalak ber mangbaluan feti, ‘Ko nim utngar fir a na ningw makene?’ 6Tomwate ne nfalak feti, ‘Ningw utang ngul zaitun ngusi rati.’ Ne nfalak feti, ‘Mal ko nim surat utang ye. Ma murengi musnyalik feti: ngusi buty lim.’#16:6 Ngul zaitun ngusi rati feleles nor liter ribun tel a raty lim. 7Mpene i nfalak ber tomwat sa nbal feti, ‘Ko nim utngar fir a nbal?’ Tomwate ne nfalak feti, ‘Gandum kadute ribun.’ Ne nfalak feti, ‘Ko nim surat utang ye. Murengi feti raty wal motak.’#16:7 Gandum kadute ribun feleles nor ton buty du. 8Ne makene ne ndangin ni mangomat doit ma to namlonry a ne fali ni aklar yadin; Yesus nfalak a nbal feti tomwatar na saryamprene ye rafai resi ma rurus nir momorip ror tomwat walyetar rlengan rof tomwatar ma rmorip a na ngaodir dalam ma rlarat Ratu Ni mpempeang.”#16:8 Yesus Ni andaun feti tomwatar na saryamprene ye rafai resi ma rurus nir ngriar bobole bengdu, rlengan rof tomwatar ma ralele Ratu nir anfai ma rurus nir ngriar bobole bengdu.
9Yakw kfwalak ber a kmi, “Myal kabain saryamprene ye la myose ngamone ber tomwatar, nema farlan mir kabanir a ne omp lo, Ratu keta nlangun a kmi a na surga. 10Tomwate ma tomwatar bise ma ralele i a na kabain marumtar, keta bise ma ralele i a nbal na kabain silayar. Ma tomwate ma tomwatar to bise ma ralele i a na kabain marumtar, keta to ralele i a nbal na kabain silayar. 11Mpa farlan tomwatar to ralele kmi ma mijake kabain saryamprenar ye, keta Ratu to nalele kmi a nbal ma mijake kabanir a na surga. 12Farlan tomwatar to ralele kmi a na nir kabanir lo keta to ral sasaf neluk kmi mire?
13Mangkaryayar to rkarya ber bosar du. Fali keta nkamis sa nlengan nof sa, nre keta i nalarat liry ber sa, ma sa e to nfaduli. Feleles farlan kmi a nbal, kmi to bise ma mkyarya ber Ratu, ma dedesar ma mdyaun kabain saryamprenar.”#Mat. 6:24
Ratu Ni ngribatnir nmon titerik ma dedesar
16:14-18
14Tomwat Farisyar ma ramin iane rdengar Yesus ma nfalak farane. Ne rmalip I, fali ramkeus resi doit. 15Ne Yesus a nfalak ber sir, “Na tomwat ngayadin sonirlury e, kmi myose felmir farlan tomwat ngamonar, nempa Ratu nafai dalmir. Fali safe ma tomwatar rmpeang, Ratu to nmpeang.
16Musa ni tetetkar ma nabyar nir kitpar, rmpan dedesar ti nait are Yohanes mangadiris. Ntabw nof are ne Ibar Ngamone na Ratu neluk Rai ma nfarete tomwatar nsor saryamprene. Ma tomwatar yadin rareke desar ma rti Ratu Ni farete dalam.#16:16 Ratu Ni Ngribatnir na Yoyoding Wangim (Perjanjian Lama) iane ye kitpar ma Musa narengi ma kitpar ma nabi walyetar ma rarengi.#Mat. 11:12-13 17Langit numur saryamprene ye keta ramwer, nempa to huruf fen lese nlai nof Musa ni tetetkar.#Mat. 5:18
18Merwane ma nyebas sawany ma nafsau nor bat walyete, merwane ne nanronr. Ma merwane ma nafsau nor bate ma sawany nyebas i a ne, merwane ne nanronr a nbal.”#Mat. 5:32; 1Kor. 7:10-11
Tomwat mangoskai ma Lazarus ma nawatan
16:19-31
19Yesus nasaur, “Tomwat mangoskayar sa ni rabit ngafelar, feleles far rai ni rabtyar, rose rof maloly ngafele desar.#16:19 Rose rabit melawas ne nof maloly weympuse daran ma nangafel resi, ma nfatutu feti ma i ni e ne naoskai desar. Lerar monuk e ni momorip farlan tomwate ma naosfesta. 20Na mangoskai ne ni fakar souny e, tomwatar rfele mangtak sa na i a ne. Mangtak a ne ngarany Lazarus. Tenany nfen ber wempar ma rampampur ma mpusuk lo. 21I namlafar resi nwayat ma nmpeang ma tomwatar ral mangoskai ne ni tnyam linir ma rfufw rof mede ma nane. Ne ntafal a nbal ma aswar rma ralebe ni mngalar a ne.
22Mpene Lazarus a nmat ne malaektar ror i far surga ma rti raftoran i a na Abraham seriny. Ne mangoskai ne nmat a nbal ma rti rafonak i. 23Ne i nti neraka dalam ma nkoman suse silai desar. Noak ma nfon far das e, nsalan Lazarus a nsenang resi ma namtoran Abraham seriny. 24Ne i nafwayak ma nfalak, ‘Amangw Abraham! Mlwompang yakw nrela. Mluan Lazarus ma nsob limany na weye ma nafmpwetan keringw ye fuky. Fali yakw kwoman suse silai desar na au dalam ye!’
25Nempa Abraham a nfalak, ‘Amo: ka munremi, noak ma lolone mworip e, ko nim safe-safe monuk ramin nempa Lazarus e to ni sasaf. Mpe lere ye i nsenang na ye, ma ko e mkwoman suse. 26To lan i a ne, fali na let ko a ma kam e, tetebin silai namin a ne. Nwayat ma tomwatar ma rof ye to bise ma rti iano, ma tomwatar ma rof iano to bise ma rma ye nbal!’ 27Mangoskai ne nfalak, ‘Amangw,’ farane e ktwak kof ko desar ma mlwuan Lazarus ma nti amangw ni das a fuky. 28Fali wangur lim lolone ne. Ma Lazarus nsurat sir, nema ka mprangu sir rmat e, ka kete rma au dalam ye rbalak yakw.
29Nempa Abraham a nfalak, ‘Sir romat Musa numur nabyar nir kitpar lo! Mpa la rlarat safe ma rarengi na kitap dalmir a ne!’ 30Ne tomwate ne nfalak, ‘Maken Abraham, i a ne to dengan a fuky, keta mangmwatar sa nmorip a nbali ma nakmat sir, betno rtate nir salar.’ 31Nempa Abraham a nfalak, ‘Farlan sir to rmpan a rlarat Musa ma nabyar nir kitpar, botuan feti keta sir to ralele nbal, boloka mangmwatar sa ma nmorip a nbali.’”
Currently Selected:
Lukas 16: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
