Lukas 17

Kete myayat ma tomwatar rfufw far sale dalam

17:1-4

1Yesus nfalak ber Ni manglartar, “Botuan feti kabain yatkar a rwayat ma tomwatar rose sale. Nempa suse desar ber tomwate ma nwayat ma tomwatar rose sale!#Mat. 18:6-7; Mrk. 9:42 2Ni ngafele e, rkete baty silai na tomwate ne nawany, ma ryebas i far tasik dalam. Rose farane nema kete nwayat tomwatar sa nof tomwatar ma dalmir to ramkoran a fuky ye nose sale. 3Mpa mijak fen ngamone!

Farlan soranyar sa ma nose sale ber ko, ka mtwampu i nema ka kete nose farane lo. Farlan nasesal i e, ka mlwure i.#Mat. 18:15 4Farlan i nose sale ber ko lere lese e lain itw, ma nma lain itw ma ntak ma mlwure i, ka mlwure i.”#Mat. 18:22

Ka mimkoran ma milele Ratu

17:5-6

5Ne Yesus Ni mangsidkwar a rfalak ber I, “Mangnrur Silai, mtwulung kam ma mamkoran ma malele Ratu.” 6Yesus ninr Mangnrur Silai nfalak, “Farlan milele Ratu boloka slyain lan sasawi batin, bise ma mfyalak ber katutun silai ye ma ntarpal nof ompak ma nti natkyal a na sawak dalam, ne keta katutun a ne nlarat safe ma mfyalak a ne.”#17:6 Katutun silai ne melayu liriny nfalak feti katutun murbei, ni wakrir a ramkoran desar ma melaman dengan, mpa masumput desar ma ntarpal.

Safe ma Ratu nfalak, ka myose monuk myor dalmir kateman

17:7-10

7Mpene Yesus nfalak, “Farlan tomwatar sa nof a kmi ye ni karwar sa ma nabali ompak na lete nre neluk mangajak dombayar. Nait ma kawar a ne nbali i e, keta tomwate ne to nfalak ber i feti, ‘Mwa mumtoran ma mtwame?’ 8Nempa keta nfalak ber kawar a ne feti, ‘Mose tnyame ber yakw. Mfwonak rabit ngalerap ma myangar yakw titerik ma ktwame monuk; betno ko mtwame.’ 9Keta ndangin kawar a ne nre tate? Fali nkaryae monuk safe ma nruany a nfalak a ne, tate nre? 10Kmi a nbal. Farlan mkyaryae monuk safe ma Ratu nal ber a kmi a ne lo e, ka mfyalak feti, ‘Kam ye mangkarya biase motak; kam mkaryae mlarat lan safe ma Ratu nal ber kam.’”

Tomwat Samariar sa ma nose alang ber Ratu

17:11-19

11Noak ma Yesus nor Ni manglartar rmpan far Yerusalem, sir ralyole yampren Samaria ma Galilea snyap. 12Lama Yesus nait pnu sa e, mangampaul buti rti rakmat I.#17:12 Nof agame Yahudi nir yayatrwar, mangampaul ye to ubany ma rsatngur ber Ratu na das sampayang. Nempa ramdir dodo rof I 13ne rafwayak ma rfalak, “Yesus! Tuangguru! Mlwompang kam!”

14Ne Yesus nfon sir ma nfalak, “Mtyi mikmat ninr mangsompar, nema rlolak tenmir feti mingamon lo nre lolone.”#Im. 14:1-32

Noak ma lolone dalamtene let e, sir rangamon lo.#17:14 Yahudyar nir fatetak nfalak ma mangampalwar ma rangamon lo rti rfatutu tenir ber Yahudyar nir mangsompar sa, nema tomwatar monuk rafai botuan feti sir rangamon lo. 15Tomwatar sa nof sir nsalan tenany e nangamon lo, mpa nbali i ma nampumpuki i ma ndangin Ratu. 16Ne i nsatngur na Yesus sounlury, ma nose alang ber I. Tomwate ne tomwat Samaria. 17Mpene Yesus nfalak, “Dine Yakw kufngamone tomwate buti kmi nre? Ma rasiu a ne sir mpe? 18Fali safe ma lan tomwat mangum ye ma nbali i ma nose alang ber Ratu ma Yahudyar a ne tate?” 19Ne Yesus nfalak ber tomwate ne, “Mumdir, ma mbwali ko. Ko mulele Yakw, mpa mungamon.”

Ratu nma ma nfarete neluk Rai

17:20-37

(Mat. 24:23-28; 24:36-41)

20Tomwat Farisyar ketnir renrat Yesus bengfir e Ratu neluk Rai ma nfarete tomwatar na saryamprene ye. Yesus nbali, “Keta Ratu neluk Rai ma nfarete tomwatar nempa to fanikar ma sir rsalan, 21mpa keta tomwatar to bise ma rfalak feti, ‘Ratu neluk Rai ma nfarete na ye nre, na i a no!’ Fali botuan e, Ratu neluk Rai ma nfarete na kmi dalmir lo.”

22Mpene Yesus nfalak ber Ni manglartar, “Keta nait ni tewat e, kmi mpyeang resi ma myor Yakw, Tomwate Anaky boloka lan lere lese, nempa to bise. 23Keta tomwatar rfalak ber a kmi feti, ‘Mya ma msyalan, I a na ye!’ Nre ‘Msyalan I a na iano!’ Nempa kete mtyi. 24Fali noak ma Yakw, Tomwate Anaky kmwa, keta tomwatar monuk rafai. Iane farlan fitik ma idak nodir langit nof tubnir sa nti nait tubun walyetar. 25Nempa luryain e Yakw, Tomwate Anaky ka kubare susar yadin ma tomwatar na are ye rasipur Yakw. 26Noak ma Yakw, Tomwate Anaky kmwa, keta tomwatar nir momorip feleles farlan na are nabi Nuh.#Kej. 6:5-8 27Tomwatar rtame renum, ma rafasawe sir; nti nait na lere ma nabi Nuh nti kabal dalam betno kjaip silai nma ma nloram tomwatar a ne ma rmat monuk.#Kej. 7:6-24 28Farlan a nbal na are Lot. Tomwatar rtame renum, rabel kabain, raosbo ma rafdiri nir dasar.#Kej. 18:20; 19:25 29Nempa na lere ne nbal, noak ma Lot a nti a ntate kote Sodom, Ratu ntolar au ma belerang nof langit farlan udan ma napu sir titerik ma rmat monuk. 30Na lere ma Yakw, Tomwate Anaky kmwa kbwali saryamprene keta feleles a nbal na are Nuh ma Lot.#17:30 Na lere ma Yesus, Tomwate Anaky, a nma I keta nbotin nor Ni dadangin.

31Na lere ne tomwatar ma ramin bubungan das ka kete rtompur ma rti das dalmir ma ral safe-safe. Farlan tomwatar ma ramin letar kete rbali sir far nir dasar a nbal.#17:31 Na Israel nir bubungan rata, fali udan lan rufuky, ma sir rmpeang ma ramtoran na bubungan ma ratanuk ror tomwatar na das seriny baldu a ne.#Mat. 24:17-18; Mrk. 13:15-16 32Ka minremi safe ma diat Lot sawany lo!#Kej. 19:26 33Tomwatar ma to ral nir momorip ber Ratu, keta to ronri momorip dedesar. Nempa tomwatar ma ral nir momorip na saryamprene ye ber Ratu la ronri momorip dedesar.#Mat. 10:39; 16:25; Mrk. 8:35; Luk. 9:24; Yoh. 12:25 34Yakw kfwalak ber a kmi: Na nronram ma kbwali Yakw e, tomwatar du a rarwa na arwan ain lese, nempa Ratu keta nor sa ma nau kalin sa ne fali i to nalele Yakw. 35Batar du a rloli gandum, keta Ratu nor sa ma nau kalin sa.

36[Farlan tomwatar du a rkarya na lete, keta Ratu nfair tomwatar sa ma nau kalin sa.”] 37Yesus Ni manglartar renrat feti, “Mangnrur Silai, keta Ko mwa mbwali saryamprene na mpe?”

Ne Yesus nal tnyanuk pupule ma nbali, “Na ain ma mpusuk bobar ne ramin, iane ma manik akar rabut sir ma rane. Keta felan farlan ma kmwa kbwal. Yakw kmwa e to kumudim ma keta tomwatar monuk a rsalan.”#17:37 Fanikar ma ramin ayat ye rfatutu feti noak ma Yesus nma saryamprene nbali sesedin lo, ma to dodo a nbal e saryamprene namsos. I ye farlan ma tomwatar rafai mpusuk bobar ramin, fali manik akar rturim a na ain ne das.

Currently Selected:

Lukas 17: YMD

Highlight

Copy