Lukas 2
2
Ramtoranbabe Yesus
2:1-7
(Mat. 1:18-25)
1Lama ramtoranbabe Yohanes to dodo e, Kaisar Agustus nal farete ber ni mangkaryayar ma ral tomwatar monuk ngarnir na Roma ni ain farete. 2Noak a ne Kirenius nose gubernur na propinsi Siria ma betno luryain ye ma ral ngarnir. 3Mpa tomwatar monuk rti ma ral ngarnir na nir kotar mpane.
4Yusuf a nbal nti a ntate kote Nasaret na Galilea ma nal far kote Betlehem na propinsi Yudea. Betlehem ye kote ma ramtoranbabe rai Daud, Yusuf empuny nusiny. 5I nti a no e, nor ni tnyiman Maria, nema ral ngarnir ber mangalngarar na kote ne. Noak a ne Maria nakebansou i lo.
6Lama rait Betlehem, nait ni tewat ma Maria namtoranbab. 7Ma namtoranbab e, anaky merwan keyai. Ne nal sikar la npule kanak a ne, betno nfele I a na wanral dalam, fali na tomwatar nir dasar to ain ma ramin.
Mangajak dombayar rti rsalan Yesus ma betno ramtoranbabe I
2:8-20
8Na nronram a ne mangajak dombayar rajake nir dombayar na ain mangkaku ma to dodo nof kote Betlehem. 9Metryat farye Ratu ninr Mangnrure Ni malaektar sa nafbotin i ber sir, ma Ratu ninr Mangnrure Ni snyain idak resi nbebar sir, mpa ramtaut desar. 10Nempa malaekat a ne nfalak ber sir, “Kete mimtaut! Fali yakw konr Ibar Ngamone ber a kmi, ibar ye keta nose ma tomwatar monuk a rsenang resi. 11Lere ye ramtoranbabe kanak memeye sa na kote Daud. I ye ma Ratu nfil I lo ma neluk mir Ray Silai ma nfair tomwatar. 12Ni faniak farye: Keta mtyi e, mtyungan kanak memeye sa ma ral sikar la rpule I, ma rfele I a na wanral dalam.”
13Metryat farye malaektar yadin rbotin na ain a ne, ma raktem malaekat dine ne, rdangin Ratu ma rfalak,
14“Mya ma tdangin Ratu Mangamin medase!
Ma tomwatar monuk na saryamprene ma rafsenange Ratu dalamy keta ronri maline!”
15Lama malaektar a ne rti a rtate sir ma rbali sir far surga, mangajak dombayar a ne rafalak ber sir, “Mya ma ti Betlehem ma tsalan safe ma nbotin na iano, far ma Ratu ninr Mangnrure Ni malaekat a nfalak ber kit a ne.” 16Mpene rasnyalik ma rti Betlehem ma ranriak ain a ne. Lama rait e, rtungan Maria ma Yusuf numur kanak memeye ma narwa na wanral dalam. 17Noak ma mangajak dombayar rsalan kanak memeye ne, sir rasaur safe ma malaektar a rfalak na kanak memeye ne ber tomwatar monuk na iane. 18Tomwatar monuk rampriang ma rdengar safe ma mangajak dombayar a ne rfalak. 19Nempa Maria nau ngriar monuk a ne ma nfarnyobak na dalamy. 20Mpene mangajak dombayar a ne rbali sir far ain mangkaku, ma rdangin Ratu fali safe-safe monuk ma rdengar ma rsalan a na kanak memeye ne, feleles far malaekat ma nfalak.
Yusuf ma Maria rsomp Yesus ber Ratu ninr Mangnrure na Ratu Ni Das Silai
2:21-24
21Lama kanak memeye ne ni lerar wal e, rsunat I. Ne rafneni I a na Yesus farlan ma malaekat nafbotin ber Maria, noak ma to nakebansou i a fuky.#Im. 12:3; Luk. 1:31
22Nait ni tewat ma Yusuf radu Maria raflerap tenir, rlarat Musa ni tetetak. Sir rti e, ror Yesus ma rsomp I ber Ratu ninr Mangnrure na Ratu Ni Das Silai na Yerusalem.#Im. 12:6-8 23Sir rose farane fali na Ratu Ni tetetak dalam nfalak, “Kanak merwan keyayar monuk, ka rsomp sir ber Ratu.”#Kel. 13:2,12 24Sir a nbal ka rsomp manik wetruar du nre manik merpati angkir du, rlarat safe ma rarengi na Ratu Ni tetetak dalam.
Simeon ma Hana
2:25-40
25Na Yerusalem tomwat sa ngarany Simeon. I ye tomwat ngamonar sa i ma namlonry, ma Ratu Smwangtany nor i. I ndaf ni tewat ma Ratu nfair tomwat Israelar. 26Ratu Smwangtany nafbotin ber i lo feti, keta nsalan Ray Silai fuky betno nmat. Ratu nyoding Rai ye lo ma nfair Ni tomwatar. 27Ratu Smwangtany nrure Simeon ma nti Ratu Ni Das Silai. Na lere ne nbal Yusuf radu Maria ror Yesus ma lolone memeye ne far Ratu Ni Das Silai ma rsomp I. Sir rose rlarat safe ma rarengi na Musa ni tetetak dalam. 28Simeon nal memeye ne ma npot I, ma ndangin Ratu ma nfalak,
29“O Ratu ninr Mangnrure, lere ye Ko mufdiat Nim yoyoding lo,
mpa mwinrang yakw ma kmwat na maline dalam.
30Fali koko yakw kswalan desar I lo ma Ko mswiduk ma nfair tomwatar.
31I a ne ma Ko mfwil I la nfair nusar monuk na saryamprene,
32I farlan ngaodir ma nodir dalamtene ber tomwatar ma to rof dasdalam Israel. Ma keta I nonry dadangin ber Nim tomwat Israelar.”#Yes. 42:6; 49:6; 52:10
33Enany amany rampriang desar ma rdengar safe ma Simeon nfalak na Yesus. 34Ne Simeon ntak Ratu ma nberkat Yusuf radu Maria. Mpene i nfalak ber Kanak a ne enany, “Ratu nfil Kanak ye lo nema keta silai I e, nafufu tomwat Israelar yadin ma nfair yadin a nbal. I farlan fanikar sa nof Ratu, ma nwayat tomwatar ranremi nir salar, nempa keta tomwatar yadin rbangal I farane, 35nema safe ma namin tomwat ngayadin a ne dalmir keta rbotin. Ma Maria ko, keta dalam suse resi, farlan smade ma nane la rtebak batim.”
36Na iane nbal e, nabi batar sa ma nabatmaken desar lo. Ngarany Hana. I ye Fanuel anaky, nof dasdalam Asyer. Radu sawany a rmorip ngarkar itw, 37mpe lere ye nsom lo ma ni ngarak buty wal resin fat. Lere nronram e, nafmodam i ma dedesar ma nti Ratu Ni Das Silai ma nsampayang. 38Na lere ne nbal i nti ain a ne ma nose alang ber Ratu, betno nfalak na Kanak a ne ber tomwatar monuk ma lolone rdaf ni tewat ma Ratu nalin tomwat Israelar nof nir muswar.#2:38 Tomwat Israelar rdaf Ray Silai ma nalin sir nof nir muswar ma mangfaret Roma. Nempa I nma ma nfair sir nof nir salar. 1:68; 2:25.
39Lama Yusuf ma Maria rose rlarat Ratu Ni tetetak e, rbali sir far nir pnue sori na kote Nasaret na Galilea.#Mat. 2:23 40Kanak a ne ntafal ma naslyai ma namkoran. I ni anfai silai, ma Ratu nkamis resi I.
Yesus na Ratu Ni Das Silai
2:41-52
41Ngarkar monuk e, Yesus enany amany rti Yerusalem ma rose ler silai Paskah.#2:41 Paskah ye isiny feti Ratu nfair tomwat Israelar ma rmpan kawar na Mesir.#Kel. 12:1-27; Ul. 16:1-8 42Noak ma Yesus Ni ngarak buti resin du, enany amany ror I far Yerusalem ma rose ler silai ne far biase. 43Rose monuk ler silai ne rbali sir, ma Yesus lolone namin Yerusalem, nempa enany amany to rafai. 44Sir rafliak feti I nor tomwatar ma rmpan a ne. Mpa rmpan ler ngadoe ne betno sir ranriak I a na anir wanir ma nir fatnyemar. 45Nempa to rtungan I, mpa rbali sir ma ranriak I a na Yerusalem. 46Ranriak I lerar tel, betno rbae I a na Ratu Ni Das Silai. I namtoran nor tuanggurw agamar ma rabali ngengentar. 47Tomwatar monuk ma rdengar Ni tnyangkwar a ne, rampriang desar fali I nafai resi ma nbali nir ngengentar. 48Noak ma enany amany rsalan I, ramngangebab. Ne enany a nfalak, “Amo, ka kete mose farye ber kam lo! Madu amoi dalmyamar suse desar ma manriak Ko.”
49Ne Yesus nfalak ber sir, “Safema enangw amangw minriak Yakw? Fali mpe kmi to mifai feti ka kumin Amangw Ni das e?” 50Nempa enany amany to rkaul ral safe ma I nfalak ber sir a ne. 51Ne Yesus nor enany amany rbali sir far Nasaret; ma ndengar sir desar. Enany nau ngriar monuk a ne na dalamy.
52Yesus ntafal ma naslyai, ma ni anfai silai nbal. Ratu nkamis I ma tomwatar rsenang ror I.#1Sam. 2:26; Ams. 3:4
Currently Selected:
Lukas 2: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
