Lukas 21

Snyompe nof bat some ma nawatan

21:1-4

(Mrk. 12:41-44)

1Noak ma Yesus namin Ratu Ni Das Silai dalam, nsalan mangoskayar ma rnau nir dotyar na babatak snyompe dalam. 2I nsalan a nbal bat somar sa ma nawatan, nau ni doit gobngar du#21:2 Doit gobngar du nre peser du, ni kotaky atakanak desar, fali noak a ne mangkaryae ni sewe lere lese, slyain gobang (peser) rati buty du resin wal. na babatak snyompe ne dalam. 3Ne Yesus a nfalak, “Mdyengar fen ngamone: bat some ma nawatan ye nau doit yadin a nlengan nof tomwatar monuk a ne. 4Fali mangoskayar a ne ral nir dotyar rof nir kabanir ma nres a ne. Nempa bat some ma nawatan ye, nal monuk ni dotyar la nmorip a ne.”

Yesus nfalak feti Ratu Ni Das Silai keta namsos

21:5-6

(Mat. 24:1-2; Mrk. 13:1-2)

5Noak a ne tomwatar ketnir a rfalak feti Ratu Ni Das Silai ne nangafel resi, fali rafyamping ror baty ngafelar numur kabanir ma rloik ber Ratu. Ne Yesus nfalak ber sir, 6“Keta nait ni tewat e, safe-safe monuk ma msyalan ye keta tomwatar rsose monuk; ma to bati fen lese nbal ma namtoran ain!”

Lere ma keta tomwatar rkoman suse

21:7-19

(Mat. 24:3-14; Mrk. 13:3-13)

7Mpene sir renrat Yesus, “Tuangguru no mfwalak ber kam feti bengfir a betno kit tsalan safe ma mfwalak a ne? Ma farlan nbotin e ni faniak farpe?”

8Ne Yesus nfalak, “Ka mijak fen ngamone, nema tomwatar kete rfule kmi. Fali keta tomwatar yadin ral ngarangw ma rfalak feti sir ye Ray Silai. Ma rfalak a nbal feti, ‘saryamprene sesedin ma namsos lo.’ Nempa ka kete milele sir. 9Farlan mdyengar ibar feti tomwatar ramdiri yayat nre kafreye ka kete mimtaut. Botuan feti keta safe-safe monuk a ne rbotin. Nempa iane to ni tewat ma saryamprene namsos a fuky.”

10Ne Yesus nfalak naloran, “Keta nusar raale sir ma rayar raale sir a nbal. 11Keta ruku silai desar ma lafar silai numur maninik anraul nsor mpenempen. Keta msyalan faniak yatkar ma rbotin na langit, rose ma mimtaut. 12Keta tomwatar rose kmi farye fuky: Romat ma rsiksa kmi, rsidang a kmi a na das sampangar ma rnau kmi a na sel dalam. Ma keta ror a kmi ber rayar ma mangfaretar fali mlyarat Yakw. 13Iane let ber a kmi ma mifwibar Ibar Ngamone ber sir. 14Mpa ka mimkoran ma kete dalmir suse feti keta mfyalak safe la mbyali tomwatar ma rsoi kmi a ne.#Luk. 12:11-12 15La kal ngribatin anfayar ber a kmi, nema mir muswar a ne to fen lese ma nbangal nal mir tnyangkwar a ne. 16Keta enmir amir, urmir wamir, mir dasdalmir ma tbwarmir rfenri kmi. Ma keta rfen tomwatar ketnir rof a kmi. 17Keta tomwatar monuk rkedan a kmi fali mlyarat Yakw. 18Nempa keta to sasaf diat a kmi ma to buke fen lese nbal ma ntarpal nof ulmir. 19Mpa farlan mimkoran ma milele Yakw ma mlyarat Yakw dedesar, keta kmi myonri momorip dedesar.”

Kote Yerusalem keta namsos

21:20-24

(Mat. 24:15-21; Mrk. 13:14-19)

20Yesus nfalak, “Farlan msyalan suldadwar rbebar kote Yerusalem, keta mifai feti to dodo a nbal e, kote ne namsos. 21Na lere ne tomwatar ma ramin propinsi Yudea ka rafla rbie ain a ne ma rti buburir. Tomwatar ma ramin kote dalam ka rafla far burit, ma tomwatar ma ramin kote burit ka kete rbali sir far dalam. 22Fali lere ne ni tewat ma Ratu nukun tomwatar ye, iane la nafdiat safe ma rarengi na kitap dalmir.#Hos. 9:7 23Na lere ne batar ma rlenr, nre rasusw keta rkoman suse silai! Fali na lere ne keta Ratu nukun nuse ye nwayat ma tomwatar ma ramin kote ye rkoman suse silai desar. 24Keta ral smade la rfen ketnir ma keta ror ketnir far nus walyetar ma rmpan kawar; keta tomwatar ma to Yahudi sir, rma ma rfarete ma rtean tomwatar na kote Yerusalem ye nti nait ngongolin ma Ratu ntetak ber sir a ne.”

Yesus nfalak a nbal na Ni mamae

21:25-28

(Mat. 24:29-35; Mrk. 13:24-31)

25Yesus nfalak a nbal, “Keta tomwatar rsalan fanikar na bulan, ftunar ma lere. Tomwatar monuk na saryamprene keta ramtaut ma to rafai anir, fali rdengar uman, ma rsalan lalawar ma ner silayar rafefar na dol.#Yes. 13:10; Yeh. 32:7; Yl. 2:31; Why. 6:12-13 26Keta ramtaut desar ma rmat fali rsalan safe ma nbotin na saryamprene ye, ma kabanir monuk na langit a ne ramyefar. 27Noak a ne tomwatar keta rsalan Yakw, Tomwate Anaky ma kmwa kof mutan dalam. Ma kmwa e kor Ningw kuase ma nlie nlengan ma snyaingw idak resi.#Dan. 7:13; Why. 1:7 28Noak ma msyalan kabanir monuk a ne rbotin lo e, ka milele ma miftesi dalmir fali sesedin ma Ratu nfair a kmi lo.”

Tnyanuk pupule na katutun ara

21:29-33

29Ne Yesus nal tnyanuk pupule ber sir farye, “No msyalan katutun ara ma katutun walyetar. 30Farlan ratrisan lo e, iane mifai feti ler metyefu sesedin lo. 31Feleles farlan ma msyalan fanikar a ne nbal, iane feti ni tewat ma Ratu nfarete neluk Rai sesedin lo.

32Mdyengar fen ngamone safe ma kfwalak ye, ni botuan e tomwatar na are ye keta to rmat monuk a fuky terik ma rsalan kabanir monuk ma kfwalak a ne. 33Langit numur saryamprene keta rlie, nempa Ningw ngribatnir rmon titerik ma dedesar.”

Mijake kmi fen ngamone ma msyampayang

21:34-38

34Yesus nfalak, “Mijake kmi fen ngamone, kete mdyaun lan festayar, anabuk, nre mir momorip lerar, nema ni lere ma kmwa e, kete myetrat. 35Fali Ningw mamae ye keta nfetryat tomwatar monuk na saryamprene farlan kekete ntey babyar. 36Mijake kmi fen ngamone, ma msyampayang dedesar nema mimkoran ma bomir myal kabanir monuk ma keta rbotin a ne, terik ma mitungan myor Yakw, Tomwate Anaky noak ma kmwa ma kukun tomwatar na saryamprene.”

37Lerar monuk e, Yesus nti naftutu na Ratu Ni Das Silai, ma nronmar e, nbali I far lenran Zaitun ma narwa i a no.#Luk. 19:47 38Bobolisnir monuk e, tomwatar yadin rti Ratu Ni Das Silai ma rdengar Yesus naftutu sir.

Currently Selected:

Lukas 21: YMD

Highlight

Copy