Lukas 4

Smwangat yatkar nir ulun nateman Yesus na ain letkape

4:1-13

(Mat. 4:1-11; Mrk. 1:12-13)

1Noak ma Yesus nti a ntate wer Yordan, Ratu Smwangtany norang I ma nrure I far ain letkape. 2I namin iano doan lere buty fat. Ma smwangat yatkar nir ulun nma ma nateman I. Na lere buty fat a ne I nfodam mpa nkoman ni lafar. 3Ne smwangat yatkar nir ulun nfalak ber Yesus, “Farlan Ko ye Ratu Anaky e, no mose bati ye fen roti.”

4Nempa Yesus nfalak ber i, “Na Kitap Lelerap dalam rarengi feti, ‘To lan roti ma nafmorip tomwatar.’”#Ul. 8:3

5Mpene i nrure Yesus far ain medasar sa, ma nfatutu monuk ain faretar na saryamprene ber I ma nsalan sapat motak. 6Smwangat yatkar nir ulun nfalak ber I, “Keta kal kuase numur kabain saryamprenar monuk a ne ber Ko. Fali monuk-monuk a ne Ratu nal ber yakw lo, mpa keta kal ber se nre se motak klwarat ningw mpempeang. 7Mpa farlan mswatngur ber yakw, keta kal monuk-monuk a ne ber Ko.”

8Nempa Yesus nfalak ber i, “Na Kitap Lelerap dalam rarengi feti, ‘Ka msyatngur ber mir Mangnrure ma neluk mir Ratu ne, ma mkyarya ber lan I!’”#Ul. 6:13

9Mpene i nor Yesus far Yerusalem ma rti ramin Ratu Ni Das Silai ni bubungan, betno nfalak, “Farlan Ko ye Ratu Anaky, mpwutuk mof ye far bab. 10Fali rarengi na Kitap Lelerap dalam na Ko farye: ‘Keta Ratu nfarete Ni malaektar ma rajake Ko,#Mzm. 91:11-12 11ma keta ral tangnir la rsaluk Ko, nema emar kete rtutuk sir a na bati.’”

12Yesus nfalak, “Na Kitap Lelerap dalam rarengi feti, ‘kete miteman mir Mangnrure ma neluk mir Ratu ne!’”#Ul. 6:16

13Lama smwangat yatkar nir ulun nal monuk matan ribun la nateman I, i nti a ntate Yesus ma ndaf let ngamonar sa ma nateman I a nbal.

Yesus nbali I far propinsi Galilea

4:14-15

(Mat. 4:12-17; Mrk. 1:14-15)

14Mpene Yesus nbali I far propinsi Galilea, ma Ratu Smwangtany norang I. Mpe Ngarany nsor yamprene ni kateman. 15I naftutu Ratu Ni ngribatnir na das sampangar ma tomwatar monuk rdangin I.

Tomwat Nasaretar rasipur Yesus

4:16-30

(Mat. 13:53-58; Mrk. 6:1-6)

16Yesus nti Nasaret ain ma raslyai I a na ne, ma ka biase na Yahudyar nir ler Sanari e, I nti das sampayang, ne namdir ma keta nbaca Kitap Lelerap,#4:16 Noak a ne to Alkitab far lere ye, ma Yahudyar rarengi Ratu Ni ngribatnir na domba nre mpimpi kulit betno rlulun nema kete namkur. 17ne mangsampayang nal kitap nabi Yesaya ber I, ma lama nbanril e, nbae ayat ma rarengi farye,

18“Ratu Smwangtany namin Yakw,

fali Ratu Ningw Mangnrure nfil Yakw lo ma kufwibar Ibar Ngamone ber tomwatar ma rawatan.

Ma I nsiduk Yakw lo ma kfwalere ber tomwatar ma rmpan kawar a ne feti keta Ratu nalin sir.

Ma nose ma matbolar rakeban

ma nalin tomwatar ma ramin ngaorat dalam,#Yes. 61:1-2

19Ma I nsiduk Yakw nbal ma kufwibar feti nait ni tewat lo ma Ratu nfatutu Ni ngamone ber Ni tomwatar.”

20Mpene nlulun kitap a ne, ma nal a nbali ber mangsampayang betno namtoran. Tomwatar monuk na das sampayang dalam a ne rfon I. 21Ne nfalak ber sir farye, “Safe ma dine mdyengar a ne lere ye Yakw kufdiat lo.”

22Tomwatar monuk a ne rampriang ma ryoding Ni tnyanuk ngafelar ma nfalak a ne, nempa sir rfalak, “I ye Yusuf anaky motak I a ma!”

23Mpa Yesus nfalak ber sir, “Botuan feti keta kmi myal a mbyali tnyanuk pupule ye ber Yakw, ‘Hei dokter, mufngamone mbwali ko. Mose kabain mpasalnar a nbal na nim pnue sori, farlan ma kam mdengar safe ma mose lo na Kapernaum.’” 24#Mat. 13:57; Mrk. 6:4; Yoh. 4:44 Yesus nfalak a nbal, “Mdyengar fen ngamone, ni botuan e, to nabi fen lese ma ralang i a na ni pnue sori. 25Yakw kfwalak ber a kmi: Luryain na are nabi Elia e, udan to ntompur ngarkar teli lian, mpa lafar nsor monuk yamprenar ye. Noak a ne bat somar yadin na Israel.#1Raj. 17:1; 8:16 26Boloka farane, Ratu to nluan Elia ma nti ntulung bat somar a ne sa nbal, nempa nluan Elia ma nti ntulung bat somar sa na kote Sarfat ma namin yampren Sidon. 27Farlan a nbal na are nabi Elisa, tomwat mangampalwar yadin na Israel, nempa Ratu to nafngamone fen lese nof sir, lan Naaman tomwat Siria ne.”#2Raj. 5:1-14

28Tomwatar monuk ma ramin das sampayang dalam a ne rdengar farane, rares desar. 29Mpa ramdir ma ratian Yesus far kote burit, ma ror I far tetebin, betno rose ma rsikul I far bab. Fali nir kote ne namin bubuar das. 30Nempa Yesus nmpan nof twalelenir ma nti a ntate sir.

Yesus natian kalin smwangat yatak nof tomwat sa na Kapernaum

4:31-37

(Mrk. 1:21-28)

31Mpene Yesus nti kote Kapernaum, na propinsi Galilea. Na iano I naftutu tomwatar na das sampayang na Yahudyar nir ler Sanari. 32Sir rampriang ma rdengar safe ma I naftutu ne, fali natanuk nor ni kuase farlan tomwat silayar sa.#Mat. 7:28-29; Mrk. 1:22 33Na das sampayang dalam a ne tomwatar sa ma smwangat yatak a nsung i. I nafwayak Yesus ma nfalak, 34“He Yesus tomwat Nasaret, Ko mpweang ma mose farpe kam? Mwa ma mufyatak kam e? Yakw kufai lo feti ise Ko. Ko ye Ratu Ni Mangsiduk Ngalerap!”

35Nempa Yesus ntampu smwangat yatak a ne ma nfalak, “Mnwau ko! Mbwie mof tomwate ye!” Mpene tomwate ma smwangat yatak nsung i a ne napelak na tomwatar sonirlury, betno smwangat yatak a ne nbie ma to nose sasaf i. 36Tomwatar monuk rampriang desar, ma rafalak ber sir, “Tomwate ye nbal, bise ma natian smwangat yatkar nor Ni kuase ma rbie desar!” 37Mpe ibar na Yesus a ne nsor monuk yamprene ne.

Yesus nafngamone tomwatar yadin

4:38-41

(Mat. 8:14-17; Mrk. 1:29-34)

38Yesus nbie nof das sampayang a ne ma nti Simon ni das. Simon yanany bate isiny mefanas resi, mpa rtak Yesus ma nafngamone i. 39Mpene Yesus nti namdir a nlosir batmakene ne, betno natian maninik nof i, mpe i nangamon desar. Ne npote i ma nlangun sir.

40Nait ma lere nfufw e, tomwatar monuk ror urnir wanir ma nir maningkyar mpane ber Yesus. I nsaup limany na tomwatar mpane ma nafngamone sir. 41Smwangat yatkar rbie rof tomwatar yadin. Ne fwayak fwoik sir ma rfalak, “Kam mafai lo feti Ko ye Ratu Anaky!” Nempa Yesus ntampu sir fali rafai feti I ye Ray Silai.

Yesus nafwibar Ratu Ni ngribatnir na Yahudyar nir das sampangar

4:42-44

(Mrk. 1:35-39)

42Nait ma bobolisin, Yesus nbie nof kote ne ma nti ain tatutkwar sa. Nempa tomwat ngayadin ranriak I. Lama rtungan I e, rareke desar ma kete nti a ntate sir. 43Nempa Yesus nfalak ber sir, “Ka ktwi kote walyetar a nbal ma kufwibar Ibar Ngamone feti Ratu nose ma nfarete neluk Rai. Fali iane nwayat ma Ratu nsiduk Yakw kmwa saryamprene ye.” 44Mpene Yesus nti propinsi Yudea ni kateman ma nafwibar Ibar Ngamone na das sampangar.#4:44 Na Yunani ni rerengyar noak a ne, rarengi propinsi Yudea farlan propinsi Galilea. Markus 1:39.

Currently Selected:

Lukas 4: YMD

Highlight

Copy