मेथा 27
27
युदा ईस्कारीयोत ढोङपा
(मारकु १५:१; लुका २३:१,२; योहान्ना १८:२८-३२)
1ॱङारोक ॱङात्ती क्षो़पो़न क्षेक्या धाङ मीक्याई गेम्पाक्याई, येशुला सेयेगी क्षीला ढो़ झ्येवालाक। 2धेनी खुङक्याई येशुला कीक्ती ठीक्ती सोरी, रोमापा चीख्याप पीलातुला ची ग्याप्पालाक।
3येशुला ग्याप्तो़ झ्यीगीन युदागी, येशुला सेघोयेगी ठीम थाक चेगीनगो थोरी ग्यो़पा केवालाक। धेनी ॱङुगी टाङगा सुमच्युगो, क्षो़पो़न क्षेक्या धाङ मीक्याई गेम्पाक्याचारु खेरती होरी, 4ॱनेवालाक, “ङी क्यो़न मेगीन मी च्यीकला ग्याप्तो़ झ्येरी धीक्पा झ्येजुङ।”
खुङक्याई ॱनेवालाक, “हेक्याला झ्यी़दोक मेक। होदे ख्यो़री ॱङ्योक्टा लाक।” 5धेनी होदे ॱङुगी टाङगाक्या को़न्क्षोकगी क्षो़खाङ नाङदु ॱयुक्ती, खो होदेने सोवालाक धेनी राङगी मीक्पा धाम्दी स्यीवालाक।
6हीना क्षो़पो़न क्षेक्याई होदे ॱङुगी टाङगाक्या धी़री ॱनेवालाक, “दे टाङगा दे ठाकगी रीङ झ्येरी, दे क्षो़खाङगी ॱङुखाङ नाङदु ॱमीछी़गीलाक।” 7होझ्येरी खुङक्याई ढो़ झ्येरी, होदे ॱङुगी टाङगागी़ फीदी मीक्याई धी़ठोगी क्षीला, जामा शोगीन च्यीकने श्यीङ ङ्यो़वालाक। 8होझ्येरी धीरीङ थुक्पे होदे श्यीङगी मीङ “ठाकगी श्यीङ” ॱनालाक।
9ॱङो़नस्येखेन येरेमीयागी थोक्ने, देरे ॱनागीनगो डुप्पालाक, “ईस्राएलगी भुग्यु रीङगागी, खोङबागी क्षीला थाक्चो़चा रीङ ॱङुगी टाङगा सुमच्युगो खुङक्याई खेरती 10चोवो को़न्क्षोकगी ङाला का ॱनाङना च्योक्रे, खुङक्याई होदे टाङगागो जाखेनगी श्यीङगी रीङला ज्यावालाक।#जेकारीयास ११:१२,१३ ”
येशु चीख्याप पीलातुगी डुङदु ठीक्पा
(मारकु १५:२-१५; लुका २३:३-५; योहान्ना १८:३३-३८)
11धा येशु चीख्याप पीलातुगी डुङदु श्याङदु च्युक्ती, चीख्यापगी खोङला ढीवालाक, “ख्यो़ याहुदापाक्याई ग्यावु हीने?”
येशुगी सुवालाक, “खेकीराङ सुजुङ।” 12हीना क्षो़पो़न क्षेक्या धाङ मी गेम्पाक्याई, खोङला क्यो़न काली घाङला, खोङबागी कालेन च्यीया ॱमानावालाक।
13धेनी पीलातुगी खोङबाला श्यी़वालाक, “खुङक्याई ख्यी़ खाला क्यो़न घाजो़ चुक्कीनगो ख्यी़ मेघोराई?” 14हीना खोङबागी क्यो़न्जुक च्यीकगीया कालेन ॱमासुवालाक। होझ्येरी चीख्यापगो ॱमीच्यीकी ॱहालेवालाक।
15पेसाकगी धी़छेनला, चीख्यापगी मीक्याई दो़पाला हो़गीन चो़न्पा च्यीकला ॱलो़ ताङगीन ॱरो हो़तालाक। 16धेनी होदे घाङला बाराब्बा ॱनागीन, चो़न्पा ङेन्टाकक्षे च्यीक हो़तालाक। 17होझ्येरी मीमाङक्या जोम्दी, पीलातुगी खुङक्याला ॱनेवालाक, “खेक्याई क्षीला बाराब्बा याङना मास्यीका ॱनागीन येशु ॱङीउने, ङी सुला ॱलो़ ताङगीनगो थेदीओ?” 18घीझ्येरी ॱनाना याहुदापा पो़न्पोक्याई ठादोक झ्येरी, येशुला ची ग्याप्कीनगो खोला स्येये हो़तालाक।
19पीलातु ठीम्चो़गी ठीला धेती घाङला, खी़ केमीगी खोला लो़न दे कुरपालाक, “होदे मीगी झ्येरी, धीरीङ ॱङी ॱमीक्लामला ॱमीच्यीकी दुक्पु क्षे ङ्यावी। होझ्येरी होदे क्यो़न मेगीन मीला घीया माझ्यी।”
20धा क्षो़पो़न क्षेक्या धाङ गेम्पाक्याई, मीमाङक्याला बाराब्बाला ॱलो़ये धाङ येशुला सेये ॱनेरी, श्यी़येला उजुक ग्याप्पालाक। 21धेनी चीख्यापगी खुङक्याला याङ ॱनेवालाक, “दे ॱङीउने खीकी क्षीला, ङी सुला ॱलो़ ताङगीनगो खेक्या थेदीओ?”
खुङक्याई “बाराब्बा” ॱनेरी ॱनेवालाक।
22पीलातुगी ॱनेवालाक, “देरे हीन्ना मास्यीका ॱनागीन येशु देला ङा घी झ्यीगु?”
धेनी खुङक्या घीरीगी, “खोला ग्याङस्यीङ खाला क्योङ” ॱनेरी ॱनेवालाक।
23धेनी खी़ ॱनेवालाक, “घीझ्येरी, खी़ ङेन्पा घी झ्येदो?” हीना खुङ घीरीगी “खोला ग्याङस्यीङ खाला क्योङ!” ॱनेरी ॱयो़ल्ले माङा फेरा ग्याप्पालाक।
24धा पीलातुगी खोरी घीया झ्यी ॱमीथुप्कीन, हीना ॱयोल्ले ॱङ्योक्टा लाङगु झ्यीगीनगो थोरी, खी़ मीमाङक्याई दोङदु क्षु खेरती लाक्पा ठी़वालाक धेनी ॱनेवालाक, “दे मी दी ठाकगी क्यो़न ङाला फोक्येमेक। दे खीकी गोवाला फोक्कीलाक।”
25धेनी मी घीरीगी ॱनेवालाक, “खी़ ठाकगी छेपा हेक्या धाङ हीकी टुवाक्या खाला फोक्वास्योक।”
26धेनी खी़ खुङक्या क्षीला बाराब्बाला ॱलो़ तावालाक। धेनी येशुला ताजाक श्युरती, ग्याङस्यीङला क्याङयेला ॱमाक्मीक्याई लाकला ची ग्याप्पालाक।
ॱमाक्मीक्याई येशुला क्षाले ताङवा
(मारकु १५:१६-२०; योहान्ना १९:२,३)
27धेनी चीख्यापगी ॱमाक्मीक्याई, येशुला चीख्यापगी फोडाङदु ठीक्ती ॱमाक्खाक घीरी, खोङबागी दोङदु रुप्पालाक। 28धेनी खुङक्याई खोङबागी नाशा पी़दी, फीघो़ ग्यामुक च्यीक को़न्बालाक। 29धेनी छेम्मागी ल्हेल्हा चो़पेन च्यीक, खोङबागी उला को़न्दी खोङबागी क्षाक ॱयेला भेक्योक च्यीक चुक्पालाक। धेनी खुङक्या खोङबागी दोङदु पीमु चुक्ती, “याहुदापे ग्यावुला क्षाक छाल्लो” ॱनेरी खोङबाला क्षाले ग्याप्पालाक। 30धेनी खुङक्याई खोङबाला छीमाक तोरती, होदे भेक्योक ठोक्ती खोङबागी उला धाब्ले कुल्ले श्युप्पालाक। 31धेनी खुङक्याई खोङबाला क्षाले ग्याप्सारती, खुङक्याई होदे फीघो़गो पी़दी खोङबागी नाशागो को़न्बालाक। धेनी खोङबाला ग्याङस्यीङ खाला क्याङयेला ठीक्पालाक।
येशु ग्याङस्यीङला
(मारकु १५:२१-३२; लुका २३:२६-४३; योहान्ना १९:१७-२७)
32धेनी खुङक्या होदेने थो़न्दी घाङला, सीमोन ॱनागीन कुरेनेपागी मी च्यीक ठेपालाक। धेनी ॱमाक्मीक्याई खोला खोङबागी ग्याङस्यीङगो उजुक झ्येरी, खुरतु च्युक्पालाक। 33धेनी खुङक्या गोलगोथा ॱनागीन साजारु ॱलेप्यी घाङला (गोरी़गी साजा), 34खुङक्याई खोङबाला ठीवा ॱरेरोवा घुन्क्षाङ श्येयेला पुवालाक हीना खोङबागी होदेगी ढोवा लेन्दी, श्येये माग्येवालाक।
35धेनी खुङक्याई खोङबाला ग्याङस्यीङ खाला क्याङसारती, खोराङक्या नाङदु खोङबागी नाशागो गेन ग्याप्ती घो़वालाक। 36धेनी खुङक्या होदुरु खोङबाला ॱरुरी धेपालाक। 37धेनी खुङक्याई क्यो़न्जुकगी यीक, “दे नी याहुदापे ग्यावु येशु लाक।” ॱनेरी ढीक्ती, खोङबागी उगी थोकला ज्यारपालाक। 38धेनी खोङबामुला झ्याक्पा ॱङी, च्यीकला खोङबागी ॱये धाङ च्यीकला ॱयो़न स्योकला क्याङबालाक।
39धा होदेने ॱहाला डोगीन मीक्याई, राङगी गोवा ॱयुक्ती खोङबाला ॱमेबेप तारी 40ॱनेवालाक, “ख्यो़ को़न्क्षोकगी क्षो़खाङला स्यीक्ती श्याक्मो सुमला चीक थुप्कीन ख्यो़, राङला क्योप! ख्यो़ को़न्क्षोकगी से हीन्ना ग्याङस्यीङने माला भाप्ती स्योक।”
41होझ्येरीराङ क्षो़पो़न क्षेक्या धाङ क्षो़ठीमगी ॱलोपो़नक्या धाङ गेम्पाक्याई, खोङबाला देरे ॱनेरी क्षाले ग्याप्पालाक, 42“खो नी श्येम्माला क्योप थुक्ती, राङला क्योप ॱमीथुक्वालाक। खो नी ईस्राएल्पाक्याई ग्यावु लाक ॱनागीनगो माले? खो धान्दा ग्याङस्यीङने माला भाप्ती हुङास्योक धेनी होराङक्या धेपा झ्यीदु। 43खी़ को़न्क्षोकला ॱलोते झ्येरी, ‘ङा नी को़न्क्षोकगी से हीन।’ ॱनेरी ॱनालाक। धा को़न्क्षोकगी थुक ॱङेना, धान्दा खोला थारपा जेदास्योक।”
44धेनी खोङबामुला ग्याङस्यीङला क्याङदी श्याकश्या, झ्याक्पा ॱङीउगीया देरेराङ झ्येरी, खोङबाला ॱमेबेप तावालाक।
येशु ढोङपा
45धा ङीमा ढीप्ती, ङीङघुङने छुची सुम्बा थुक्पे यु घीरीदु मी़नाकगी खावालाक। 46धेनी छुची सुम्बा चो़ला, येशुगी सुङकेक क्षेला देरे सुवालाक, “एली, एली, लेमा साबाक्थानी?”#सुङगुर २२:१ दे ॱनाना “ङी को़न्क्षोक, ङी को़न्क्षोक, खेकी ङाला घीझ्येरी पाङा हीनो?” 47होदुरु डामला हो़गीन मी रीङगागी, होदे ॱनागीनगो घोरती ॱनेवालाक, “मी दे नी ॱङो़नस्येखेन एलीयाला भो़ली।”
48लाम्साङ खुङक्याने मी च्यीक भाङ तारी सोरी, ॱरीङबा च्यीक खेरती होरी घुन्क्षाङ क्युरमुला बारी, ग्युक्पाला क्यो़न्दी येशुला श्येयेला पुवालाक। 49हीना श्येम्माक्याई ॱनेवालाक, “घुक च्यीक, एलीया खोला क्योप्तु फेप्यी ताउ।” 50धेनी धाब्ले येशुगी सुङकेक क्षे तो़न्दी, कुसोक ॱलो़ तावालाक।
51धा होदे घाङलाराङ को़न्क्षोकगी क्षो़खाङ नाङगी योल्वा, गोने गाप थुक्पे दुबु ॱङीला रावालाक। धेनी सायोम ग्याप्पालाक धेनी डाकक्या गेवालाक। 52धी़ठोगी घोक्या भेवालाक। धेनी को़न्क्षोकगी ढोटा मी धाम्पाक्या सो़न्पो लावालाक। 53धेनी येशु कुसो़न्पो श्येङसारती, खुङक्या धी़ठोने थो़न्दी धाम्पे ग्याजा येरुसालेमदु सोवालाक धेनी मी माङागी खुङक्याला थोवालाक।
54धा ॱमाक्मीगी ग्यापो़न धाङ खी़मुला येशुला ॱरुङगीनक्याई, सायोम ग्याप्कीन धाङ घी झ्युङगीन घीरी थोवालाक। धेनी खुङक्या जीक्टागी खारी ॱनेवालाक, “दे नी ॱङोन्नेगी को़न्क्षोकगी से हीन्दाराक!”
55धेनी गालीलने येशुगी स्याबाला डारी होवा, खोङबाला श्याप्ची श्युगीन केमी भोमा ॱमीच्यीकी माङा, ग्याङने होदुरु तेरी धे हेतालाक। 56खुङक्याने मीरीयाम माक्दालीनी धेनी याकोब धाङ योसेफगी आमा मीरीयाम धेनी जेबेदीगी भीजाक्याई आमा हो़तालाक।
येशुगी कुफुङ धुरखाङ नाङदु चुक्पा
(मारकु १५:४२-४७; लुका २३:५०-५६; योहान्ना १९:३८-४२)
57धेनी घोमो चो़ला आरीमाथीयाने, येशुगी ङेने हीन्गीन, योसेफ ॱनागीन मी क्षुक्पु च्यीक होवालाक। 58खो पीलातुचारु सोरी येशुगी कुफुङ ॱनाङरो ॱनेरी श्यी़वालाक। धेनी पीलातुगी खोला तेरयेगी का तेरपालाक। 59धेनी योसेफगी येशुगी कुफुङ लेन्दी, रे साबा च्यीकगी टीवालाक। 60धेनी डाकला शो़सा खोरी धी़ठो साबा नाङदु खोङबागी कुफुङ श्याक्पालाक। धेनी धी़ठोगी घोगो फोङगीङ क्षे च्यीकगी काक्ती, खो होदेने सोवालाक। 61मीरीयाम माक्दालीनी धाङ मीरीयाम श्येम्मागो धी़ठोगी स्योकला खा तो़न्दी धेहेतालाक।
धी़ठो ॱरुङदु च्युक्पा
62धेनी ङासुगीन ङीमा स्याम्मागोला, क्षो़पो़न क्षेक्या धाङ फारुसीपाक्या पीलातुगी दोङदु जोम्दी 63ॱनेवालाक, “चोवो, दे ॱली़टे देगी खोराङ सो़न्पो हेती घाङला ‘ङीमा सुमगी स्याम्ने, ङा छीवाने सो़न्पो लाङयेहीन’ ॱनेरी ॱनागीनगो, हेक्याला ढेन्बा हो़क। 64होझ्येरी श्याक्मो सुम थुक्पे, धी़ठो ॱरुङयेला का तेरोझ्यी। देरे मीझ्यीना खी़ ङेनेक्या होरी, खी़ रोगो की़री सोरी मीक्याला खो छीवाने सो़न्पो लाङदुक ॱनेरी ॱना सीगीलाक। धेनी दे गोकोर दे एम्माने ल्हाक आ झ्युङगीलाक।”
65पीलातुगी खुङक्याला ॱनेवालाक, “ॱरुङगीन ॱमाक्मीक्या ठीक। धेनी सोरी घाङथुप्तु ॱरुङ।” 66होझ्येरी खुङक्या सोरी, धी़ठोगी घो काक्कीन फोङगीङला थेचे ग्याप्ती ॱरुङगीनक्या श्याक्पालाक।
Currently Selected:
मेथा 27: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
