मेथा 28
28
येशु छीवाने सो़न्पो श्येङपा
(मारकु १६:१-१०; लुका २४:१-१२; योहान्ना २०:१-१०)
1ङासुगीन ङीमा स्याम्ने, धी़न्डागी ङीमा धाङपोगोला, ॱनाम शारा-शीरीला मीरीयाम माक्दालीनी धाङ मीरीयाम श्येम्मागो, धी़ठो तारु सोवालाक। 2धेनी लाम्साङ चोवोगी भाङछेन च्यीक, नाम्खे श्यीङखामने होदुरु भाप्ती, सायोम क्षे च्यीक ग्याप्पालाक। धेनी खोङबा फेप्ती धी़ठोगी फोङगीङगो ॱहाला रीरी, होदेगी थोकला श्युक्पालाक। 3खोङबागी श्याल ॱलोक्मार च्योक्रे धाङ खोङबागी नाशागो खावा च्योक्रे काउ हो़तालाक। 4धेनी ॱरुङगीनक्या खोङला जीक्ती दारती, मी स्यीम्बु च्योक्रे झ्युवालाक।
5हीना भाङछेनगी केमी ॱङीउला सुवालाक, “माजीक, खे ॱङीउ ग्याङस्यीङ खाला टोङगीन येशुला चालालाक ॱनेरी, ङाला स्येयेहो़क। 6खोङबागी सुङगीन च्योक्रे, खोङ कुसो़न्पो श्येङसारती दुरु मीदुक। स्योक, खोङबा श्याक्जा साजागो तो़। 7धेनी ग्योक्जे सोरी, खोङबागी ङेनेक्याला खोङबा छीवाने सो़न्पो श्येङसारतु ॱनेरी स्यो़क। धेनी खोङबा खेक्याने एन्ला, गालीलदु फेप्कीलाक धेनी होदुरु खोङबाला ज्यागीलाक ॱनेरी स्यो़क। धा ङी खेक्याला स्येसाहो़क।”
8धा खुङक्या जीक्टा धाङ घाटोगी खारी, लु-लु धी़ठोने ङेनेक्याचारु भाङ तारी स्येरु सोवालाक।
9धेनी लाम्साङ येशु खुङक्या दोङदु फेप्ती, खुङ ॱङीउला सुवालाक, “खेक्याला श्यीदे हुङास्योक।” धेनी खुङ ॱङीउ खोङबागी दोङदु होरी खोङबागी श्यापला जुरी क्षाक छावालाक। 10धेनी येशुगी खुङ ॱङीउला सुवालाक, “खेक्या माजीक। सोला, ङी पी़नक्याला गालीलदु सुङ ॱनो़ धेनी होदुरु खुङक्याई ङाला थोङगीलाक।”
ॱरुङगीनक्याई लाब शो़वा
11धा होदे केमी ॱङीउ डी़ घाङला, ॱरुङगीनक्याने रीङगा ग्याजारु सोरी घी झ्युङगीन घीरी, क्षो़पो़न क्षेला स्येपालाक। 12धेनी क्षो़पो़न क्षेक्या गेम्पाक्यामुला जोम्दी, डो़ झ्येरी ॱमाक्मीक्याला ॱमीच्यीकी आले तेरती 13देरे ॱनेवालाक, “‘खी़ ङेनेक्या छेनला होरी, हेक्या ॱङी स्योरती धेती घाङला, खी़ रो की़री खेरती लाजुङ।’ ॱनेरी मीमाङक्याला स्यो़क। 14धेनी दे लाब दे चीख्यापगी आमच्योकरु घोरना, हेक्याई लाब ढीक्ती खेक्याला ॱङ्योक्टा देने तो़न्दु।” 15होझ्येरी खुङक्याई आलेगो ॱरुङगीनक्याई खेरती, घी झ्यीदु च्युक्कीनगो झ्येवालाक। धेनी ताम दे धीरीङ थुक्पे, याहुदापाक्याई खोक्दु दार हो़तालाक।
थामे कालो़न
(मारकु १६:१४-१८; लुका २४:३६-४९; योहान्ना २०:६-८)
16धा ङेने च्युक-च्यीक्पाक्या येशुगी सुङगीन च्योक्रे, गालीलगी रीदु सोवालाक। 17धेनी खुङक्याई खोङबाला ज्याली घाङला, खुङक्याई क्षाक छावालाक हीना रीङगागी दोक्पा झ्येवालाक। 18धेनी येशु खुङक्याचारु फेप्ती सुवालाक, “ॱनाम्सा ॱङीगी वाङ घीरी ङाला ॱनाङ हो़तालाक। 19होझ्येरी सोङ धेनी मीरीक घीरीला ङेने शो़, धेनी याप धाङ से धाङ धाम्पे थुक्ङीगी छेनने खुङक्याला ठी़सो़ तेर। 20धेनी ङी खेक्याला ॱलाप्कीन का घीरी ॱरुङयेला, खुङक्याला ॱलोप। धेनी थागी धी़ थुक्पे नाम्हीना, ङा खेक्यामुला हो़क ॱनेरी ॱहाघोरा झ्यी।”
Currently Selected:
मेथा 28: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
