मारकु 1
1
ठी़सो़ ॱनाङगीन योहान्नागी क्षो़ स्येपा
(मेथा ३:१-१२; लुका ३:१-१८; योहान्ना १:१९-२८)
1को़न्क्षोकगी से, येशु मास्यीकागी ताम्शाङ गो चुक्पा। 2ॱङो़नस्येखेन यस्यायागी धेपला देरे ढीक हो़तालाक,
“तो़दाङ, ख्यी़ लाम डाढीक शोयेला,
ङा ङी भाङछेन ख्यी़ दोङ-दोङला झाङाहीन,
3रीतोङने भो़गीन च्यीकगी केक,
‘चोवो को़न्क्षोकगी लाम डाढीक झ्यी।
खोङबागी फेप्लाम खाप्ते शो़।’”
4ठी़सो़ ॱनाङगीन योहान्नागी रीतोङदु होरी, मीक्याला ठी़सो़ तेरपालाक धेनी राङगी धीक्पा सेल्येला, राङगी धीक्पा पारी सेम ग्युरयेगी, ठी़सो़गी क्षो़ स्येपालाक। 5युदेयागी यु घीरी धाङ येरुसालेमगी मीक्या घीरी, खी़चारु सोवालाक धेनी खुङक्या राङ-राङगी धीक्पाक्या खेलेन्दी, खोने योरदान चाङबुरु ठी़सो़ लेन्बालाक। 6योहान्ना सेम्चेन ॱनाउगी पुगी घो़ घो़न्दालाक। खी़ केपाला कोवागी काउ रेलालाक धेनी खो ईली च्याक-च्याक धाङ रीगी ढाङचीक्या शालाक। 7खी़ मीक्याला ख्याप्टाक झ्येरी ॱनेवालाक, “ङाले आङक्षे च्यीक ङी स्याम्ला फेप्कीलाक धेनी ङी खोङबागी दोङदु पीमु चुक्ती, खोङबागी श्याप्हामगी डुतोक टोरीन खाये मेक। 8ङी खेक्याला क्षुगी ठी़सो़ तेराहीन हीना खोङबागी खेक्याला धाम्पे थुक्ङीगी ठी़सो़ ॱनाङा जेगीलाक।”
येशुगी ठी़सो़ धाङ छो़ता
(मेथा ३:१३–४:११; लुका ३:२१-२२;४:१-१३)
9होदे घाङगी ङीन च्यीकला, येशु गालीलगी नाजारेत ॱनागीन युने फेप्पालाक धेनी योरदान चाङबुरु योहान्नाने ठी़सो़ लेन्बालाक। 10क्षुगी नाङने थो़न्लुङ मेताला, खोङबागी नाम्खा भेपा धाङ धाम्पे थुक्ङी, फुक्रो़नगी स्यीकाला भाप्कीनगो शीक्पालाक। 11धेनी नाम्खाने सुङकेक च्यीक घोरपालाक, “ख्यो़ ङी भीजा ढीन्चेन हीन। ख्यी़मुला ङा ॱमीच्यीकी ङ्यामो घा हो़क।” 12धेनी धाम्पे थुक्ङीगी, खोङबाला लाम्साङ रीतोङ स्योकला ठीया जेपालाक। 13धेनी खोङबा होदुरु श्याक्मु श्यीपच्यु थुक्पे, धी़कगी छो़ताला धाङ सेम्चेनक्या मुला श्युक्पालाक। धेनी को़न्क्षोकगी भाङछेनक्याई खोङबाला श्याप्ची श्यी़वालाक।
येशुगी गोमा ङेनेक्या दाम्पा
(मेथा ४:१२-२२; लुका ४:१४-१५;५:१-११)
14योहान्ना चो़न्खाङदु धाक सारती स्याम्ला, येशु गालीलदु को़न्क्षोकगी ताम्शाङ सुङी-सुङी फेप्पालाक। 15खोङबागी सुवालाक, “धा धी़चो़ ॱलेप्सालाक धेनी को़न्क्षोकगी ग्यासी ङ्ये ॱलेप्दुक। सेम ग्युरवा तोङ धेनी ताम्शाङला धेपा झ्यी।”
16गालीलगी ग्याछो डामने फेई घाङला, येशुगी सीमोन धाङ खी़ नो आन्डीरीयागी ग्याछो नाङदु ङ्यारे ॱयुक्कीनगो शीक्पालाक। खोङ ॱङीउ ङ्यापा लाक। 17धेनी येशुगी खोङ ॱङीउला, “ङी स्याबाला स्योक। ङी खेक्याला मीगी ङ्यापा हुङयेला को़लो।” सुरी सुवालाक। 18धेनी लाम्साङ खुङ ॱङीउगी ङ्यारेगो भोरती, खोङबागी स्याबाला डावालाक। 19च्यीमे ॱहाला फेप्ती, खोङबागी जेबेदीगी भीजा याकोब धाङ योहान्नाला डु नाङदु ङ्यारे, धी़ धेगीनगो शीक्पालाक। 20खोङबागी भो़लुङ मेताला, खोङ ॱङीउ खोरी आकी जेबेदीला मीलाकक्यामुला डु नाङदु भोरती, खोङबागी स्याम्ला डावालाक।
ॱनो़पा झ्युजा मी च्यीक
(लुका ४:३१-३७)
21येशु धाङ ङेनेक्या काफारनाहुमदु फेप्पालाक। ङासुगीन ङीमाला, खोङबा छोक्खाङ नाङदु फेप्ती क्षो़ ॱनावालाक। 22धेनी क्षो़ठीमगी ॱलोपो़नक्या च्योक्रे मेन्दा, खोङबागी ॱमीच्यीकी वाङक्षे झ्येरी, ॱलाप्कीनगोला मीमाङक्या खोङबागी क्षो़ला ॱहालेवालाक। 23होदे घाङला खुङक्याई छोक्खाङदु ॱनो़पा झ्युजा मी च्यीक हो़तालाक। खी़ केक ग्याप्पालाक, 24“नाजारेतगी येशु, खेराङमुला हीकी घी ढेवा हो़तालाक से? खेराङ हेक्या मेताला जेदु फेप्पा हीने? खेराङ को़न्क्षोकगी धाम्पागो लाक ॱनेरी, ङी ङो स्येलीहो़क।”
25येशुगी देला काको़न ॱनावालाक, “खाबा धो़क धेनी खी़ नाङने थो़न।” 26धेनी होदे ॱनो़पागी खोला ॱहाला-छुला ॱरुक्ती, ॱमीच्यीकी फेरा ग्याप्ती खोने थो़न्दी सोवालाक। 27धा मी घीरी ॱहालेरी, च्यीकगी च्यीकला ढीवालाक, “दे घी ले? दे नी आङजा हो़गीन क्षो़लुक साबा च्यीक हीन्दाराक। खी़ ॱनो़पाक्यालाः का ॱनाङी धेनी ॱनो़पाक्या खी़ खाला ङेन्दी।” 28धेनी येशुगी दे लाबक्या गालीलगी युछोक घीरीला उक्कुरा च्यीकला ख्याप्पालाक।
येशुगी नेपाक्या चो़गा जेपा
(मेथा ८:१४-१७; लुका ४:३८-४१)
29धा येशु लाम्साङ छोक्खाङने थो़न्दी, याकोब धाङ योहान्नामुला सीमोन धाङ आन्डीरीयागी खाङबारु फेप्पालाक। 30सीमोनगी केमीगी़ आमागो छावा फारती, नेरी धे हो़तालाक धेनी मी़ कोरला खुङक्याई येशुला श्यी़वालाक। 31धेनी खोङबा मी़ भोलोक्तु फेप्ती, लाक्पा शीम्दी मोला याला ॱलाङा जेपालाक। धेनी छावागी मोला तावालाक धेनी मी़ खोङबाक्याला श्याप्ची श्यी़वालाक।
32होदे घोमु ङीमा फेप्ती, खुङक्याई नेपाक्या धाङ डे जुजा घीरीला, खोङबाचारु ठीक्ती होवालाक। 33होदे ग्याजागी मी घीरी, खाङबी घोच्चारु मुला जोम्बालाक। 34येशुगी नाजा ॱनामी ॱनाछोकगी नेपाक्याला चो़गा जेपालाक धेनी डे ॱमीच्यीकी माङा तो़न जेपालाक। डेक्याई खोङबा सु हीन्गीनगो ङोस्येरी, खोङबागी होदेक्याला लाब ताङदु ॱमाच्युक्पालाक।
येशुगी गालीलदु क्षो़ स्येपा
(लुका ४:४२-४४)
35नाम लाङये एन्लाराङ, येशु याला श्येङदी सा एन्दा च्यीकला फेप्ती, होदुरु सोवा ग्याप्ती श्युक्पालाक। 36सीमोन धाङ खी़ रोवाक्या खोङबाचारु सोवालाक, 37धेनी खुङक्याई खोङबाला ज्यारी श्यी़वालाक, “मी घीरी नी खोङबा चाली।”
38धेनी खोङबागी सुवालाक, “होराङक्या यु ङ्येक्याला डो। होदुरुवाः ङा ताम्शाङ स्ये घो़गुलाक घीझ्येरी ॱनाना दी क्षीलाराङ ङा होवाहीन।” 39धेनी छोक्खाङक्या नाङदु क्षो़ सुङी-सुङी धाङ डेक्या तो़न्दा जेदी-जेदी, खोङबा गालीलगी साज्या घीरीदु फेप्पालाक।
येशुगी जे फोक्पा च्यीकला चो़गा जेपा
(मेथा ८:१-४; लुका ५:१२-१६)
40जेने मी च्यीक येशुगी दोङदु होरी, पीमु चुक्ती, “खोङबागी थुकला हो़ना, खोङबा ङाला नाजा देने दाक्तु च्युक्वा जे थुक्कीलाक” ॱनेरी श्योवा पुवालाक।
41ॱङीङ झ्येरी येशुगी क्षाक क्यारी, खोला जुरी सुवालाक, “ङा ख्यो़ ढाक्येगी दो़पा हो़क।” 42लाम्साङ खी़ जे नाजागो तोरपालाक धेनी खो ढाक्पालाक।
43-44धेनी येशुगी, “देगी कोरला सुलाः घीया ॱमाना, हीना सोङ धेनी क्षो़पो़नचारु ख्यो़राङला तो़न। धेनी घीरीगी दोङदु पाङपो हुङयेला, मोशेगी काला सुङगीन च्योक्रे क्षो़पा पु।#लेवी १४:२-३२” ॱनेरी खोला का स्युक्क्षे ॱनारी, धाला घीन्दा माजेपा होदेने ॱहाला झावालाक। 45हीना खो सोरी होदे कोरला, हो़लेरु टाम्ये गो चुक्पालाक। धेनी येशु ग्याजादु धाब्ले मीमाङक्याई थोङसाला फेप ॱमाथुक्पालाक। धेनी येशु रीतोङ स्योकला श्युक्पालाक, घीहीनाः मीक्या छोक घीरीने खोङबाचारु होवालाक।
Currently Selected:
मारकु 1: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
