मारकु 2
2
येशुगी शा फोक्पा मी च्यीक चो़गा जेपा
(मेथा ९:१-८; लुका ५:१७-२६)
1श्याक्मो तीते स्याम्ने, येशु काफारनाहुमदु लोक्ती फेप्पालाक। धेनी मीक्याई खोङबा खीमदु श्युक दुक ॱनेरी ॱहाघोरपालाक। 2धेनी होदे नाङदु मी ॱमीच्यीकी माङा जोम्दी, घोच्चागी फीलाः मी धेजा माजोरालाक। धेनी येशु मीक्याला को़न्क्षोकगी का सुङी हो़तालाक। 3धेनी मी श्यी शा फोक्पा मी च्यीकला खुरती, खोङबाचारु होवालाक। 4मी छाङगाक झ्येरी खुङक्या खोङबा भोलोक्तु ॱमाथारपा, खोङबा श्युक्जा खाप्तेगी थोकगो स्यी़वालाक। धेनी होदे ॱमीउने शा फोक्पा मीगोला, ङ्याजेमुलाराङ माला पाप्पालाक। 5येशुगी खुङक्याई धेपा शीक्ती, शा फोक्पोवा मीला सुवालाक, “भीजो, ख्यी़ धीक्पाक्या सेजुङ।”
6होदुरु क्षो़ठीमगी ॱलोपो़न रीङगा धे हो़तालाक। खुङक्या खोराङ सेम नाङदु देरे साम्लो ताङी हो़तालाक, 7“मी दे देरे लाब घीझ्येरी ताङाले? खो नी को़न्क्षोकला ॱमेटा पाई। को़न्क्षोक माना सी़ धीक्पा थारतु च्युक्कीले?”
8खुङक्याई साम्लो देरे ताङी ॱनेरी, लाम्साङ येशुगी राङ सेमला खेन्दी, खुङक्याला सुवालाक, “खेक्या देरे साम्लो घीझ्येरी ताङाले? 9शा फोक्पोवा देला ख्यी़ धीक्पा सेजुङ याङमेना लोङ, धेनी ख्यो़री ङ्याजे खुरती घोबा चुक, दे ॱङीउने घीन्गो ॱनाना लेल्हा दुओ? 10होझ्येरी मी-भुला दे जाम्बुलीङदु धीक्पा सेयेगी आङ हो़तालाक ॱनेरी, खेक्याई स्येलाझ्यी।” 11धेनी खोङबागी शा फोक्पोवागोला सुवालाक, “लोङ धेनी ख्यो़री ङ्याजे खुरती, नाङला सोङ ॱनेरी ङा ख्यो़ला ॱनाहीन।” 12खो लारी उक्कुरा च्यीकला, खोरी ङ्याजे खुरती मीमाङक्याई थोङजाने, राङ फीला सोवालाक। धेनी “देरे हीकी नामा थोङ माङ्युङ” ॱनेरी मी घीरी ॱहालेरी, को़न्क्षोकला तो़टा पुवालाक।
येशुगी लेवीला भो़वा
(मेथा ९:९-१३; लुका ५:२७-३२)
13येशु याङ गालील ग्याछोगी डामदु फेप्पालाक धेनी मीगी छाङगा च्यीक खोङबाचारु होवालाक। धेनी खोङबागी खुङक्याला क्षो़ तो़न जेपालाक। 14येशु फेई घाङला, खोङगी आल्फायुगी भीजा लेवीला, ठा दुजा लेखुङदु धेतागो शीक्पालाक। धेनी खोला, “ङी स्याबाला स्योक” सुरी सुवालाक। धेनी खो लारी खोङबागी स्याबाला सोवालाक। 15धेनी येशु लेवी नाङदु श्येलाक श्येयेला श्युई घाङला, ॱमीच्यीकी माङा ठा धुगीन धाङ श्येम्मा धीक्चेनक्या, खोङबा धाङ ङेनेक्यामुला धे हो़तालाक। घीझ्येरी ॱनाना खोङबागी स्याबाला डागीन मी ॱमीच्यीकी माङा हो़तालाक। 16येशु धीक्चेनक्या धाङ ठा धुगीनक्यामुला श्येलाक श्येगीनगो, फारुसीपा छोक्पागी क्षो़ठीमगी ॱलोपो़नक्याई थोरी, येशुगी ङेनेक्याला ढीवालाक, “खो घीझ्येरी धीक्चेनक्या धाङ ठा धुगीनक्यामुला शामा शाले?”
17येशुगी दे सेन्दी खुङक्याला सुवालाक, “मी थाङाक्याला आम्ची मेघो़गीलाक हीना नेपाक्याला घो़गीलाक। ङा मी ढाङतेनक्याला मेन्दा, धीक्चेनक्याला भो़रु होवाहीन।”
ॱङ्युङनेगी कोरला ढीवा
(मेथा ९:१४-१७; लुका ५:३३-३९)
18योहान्नागी ङेनेक्या धाङ फारुसीपाक्या ॱङ्युङने श्युई घाङला, मीक्या होरी येशुला श्यी़वालाक, “योहान्नागी ङेनेक्या धाङ फारुसीपागी ङेनेक्या ॱङ्युङने श्युई, हीना खोङबागी ङेनेक्या घीझ्येरी मीश्युक्वाले?”
19येशुगी खुङक्याला सुवालाक, “माक्पामुला हो़ती घाङला, रोवाक्या ॱङ्युङनेला धेगीलाक से? माक्पा खुङक्यामुला हो़गीन थुक्पे, खुङक्या ॱङ्युङनेला श्युक्कीमालाक। 20हीना माक्पा खुङक्याने खा टारी ठीक्कीन धी़चो़ च्यीक हुङगीलाक धेनी होदे ङीमागो खुङक्या ॱङ्युङनेला श्युक्कीलाक। 21सी़या घोलाक ॱङीङबाला, ल्हेम्बा साबा मेग्यालाक। ग्याप्नाः ल्हेम्बा साबागो, ॱङीङबा घोलाकने रारी ॱयोल्ले ॱमीउ क्षे रारु च्युक्कीलाक। 22धेनी सी़या घुन्डुमगी क्षाङ साबागो, पीखु ॱङीङबा नाङदु ॱमीलुवालाक। धेनी ॱलुक्जुङ ॱनाना, पीखुगोवा रागीलाक धेनी घुन्डुमगी क्षाङगो भोगीलाक धेनी पीखुगोवाः नोगीलाक। घुन्डुमगी क्षाङ साबा पीखु साबा नाङदु ॱलुक्वालाक।”
ङासुगीन ङीमागी चोवो
(मेथा १२:१-८; लुका ६:१-५)
23ङासुगीन ङीमा च्यीकला, येशु ढोई श्यीङने फेई हो़तालाक। होदेने फेई घाङला, खोङबागी ङेनेक्याई ढोई ॱङीमाक्या कोक्पालाक। 24धेनी फारुसीपाक्याई खोङबाला, “शीक्ताङ, ङासुगीन ङीमाला देक्या घीझ्येरी ठीमला ॱमीथी़न्गीन लेगा झ्यीदाले?” ॱनेरी श्यी़वालाक।
25खोङबागी खुङक्याला सुवालाक, “दावीद धाङ खी़मुला हो़गीनक्या तोक्ती शामा घो़ली घाङला, दावीदगी घी झ्येवाले ॱनेरी खेक्याई नामा माढोक हो़ती? 26चो क्षो़पो़न आबीयाथारगी धी़ला, खो को़न्क्षोकगी घुरखाङ नाङदु जुरी, क्षो़पो़नगी माना श्येम्माक्याई शा मेछोक्कीन को़न्क्षोकला पुपा ग्याङगागो शेरी, होदे ग्याङगा खोरी रोवाक्याला तेरपालाक।”
27धेनी याङ येशुगी सुवालाक, “मी ङासुगीन ङीमागी क्षीला मेन्दा, ङासुगीन ङीमा मीगी क्षीला को़वालाक। 28होझ्येरी मी-भु ङासुगीन ङीमागी चोवो लाक।”
Currently Selected:
मारकु 2: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
