मारकु 3
3
लाक्पा काम्गा मी
(मेथा १२:९-१४; लुका ६:६-११)
1येशु याङ छोक्खाङदु फेप्पालाक। धेनी होदुरु लाक्पा काम्गा मी च्यीक हो़तालाक। 2येशुला क्यो़न चुक्येला ङासुगीन ङीमागोला, खोङबागी होदे मीला चो़गा जेदी मेजेदी ॱनेरी, फारुसीपाक्या सो ग्याप्ती धेपालाक। 3येशुगी होदे लाक्पा काम्गा मीला “लारी दुरु स्योक।” ॱनेरी सुवालाक। 4खोङबागी खुङक्याला सुवालाक, “ङासुगीन ङीमाला शाङपो झ्यीये याङना ङेन्पा झ्यीये? ॱरोक क्योप्ये याङना ॱरोक चेये, ठीमला घीन्गो थी़न्दीओ?” हीना खुङक्या खाबा धेपालाक। 5खुङक्याई सेम ॱरागोला येशुगी थुक फाम्दी खोङडो लारी, खुङक्या घीरीला शीक्पालाक। धेनी होदे मीला सुवालाक, “ख्यो़री लाक्पा क्योङ।” खी़ लाक्पा क्यावालाक धेनी खी़ लाक्पा चो़गा झ्युवालाक। 6धेनी फारुसीपाक्या होदेने थो़न्दी सोरी, खोङबाला घाङगी झ्येरी सेये दुई ॱनेरी, हेरोदेगी मीक्यामुला लाम्साङ ढो़ झ्येवालाक।
मीमाङगी येशुला डावा
7होदे स्याम्ने येशु खोङबागी ङेनेक्यामुला, ग्याछो स्योकला फेप्पालाक। धेनी मीछोक क्षे च्यीक गालीलने, खोङबागी स्याबाला सोवालाक। 8खोङबागी क्षाक्ले घीरीगी कोरला ॱहाघोरती, युदेया धाङ येरुसालेम धाङ ईदुमीया धाङ योरदान ॱहाकीन धाङ ताएर धाङ सीदोनगी ॱये-ॱयो़नने, मीछोक क्षे खोङबाचारु होवालाक। 9मीछोकगी ॱमाच्युरास्योक ॱनेरी, खोङबागी खोरी ङेनेक्याला खोङबागी क्षीला डु च्यीक साक झ्यीदु च्युक्पालाक। 10खोङबागी मी ॱमीच्यीकी माङाला चो़गा जेदी नाजा हो़गीन घीरी, खोङबाला जुयेला ॱहाला-छुला पुरी उजुक झ्येरी होवालाक। 11धेनी ॱनो़पाक्याई येशुला नाम थोङना, खोङबागी दोङदु क्षाक छारी, “खोङबा नी, को़न्क्षोकगी सेगो लाक।” ॱनेरी फेरा ग्यालाक। 12हीना येशुगी राङ सु हीन्गीनगो ॱमानास्योक ॱनेरी, खुङक्याला का स्युक्क्षे ॱनावालाक।
येशुगी ङेने च्युङङी
(मेथा १०:१-४; लुका ६:१२-१६)
13येशु री च्यीकला फेप्ती, खोराङला थुक्ङेउ हो़गीनक्याला खोराङचारु भो़ जेपालाक। धेनी खुङक्या खोङबाचारु होवालाक। 14-15खोङबामुला धेयेला धाङ खुङक्याला क्षो़ स्येदु झारी, डेक्या तो़न्येगी आङजा ॱनाङयेला, खोङबागी खुङ च्युङङीला कुछाप सुरी को़वालाक। 16खोङबागी को़का च्युङङीगो देक्या लाक। खोङबागी पेटो ॱनेरी ताक्कीन सीमोन, 17जेबेदीगी भीजा याकोब धाङ खी़ नो योहान्ना, खोङ ॱङीला येशुगी भोआनेरगे ॱनेरी मीङ ताक्पालाक। होदे ॱनाना “डुककेगी#३:१७ दे ॱनाना खुङक्या ॱमीच्यीकी केक क्षे, ॱङाङडा क्षे, छाटाक झ्यीगीन लाक। भीजा” लाक। 18धेनी आन्डीरीया धाङ फीलीप धाङ बारथोलोमा धाङ मेथा धाङ थोमा धाङ आल्फायुगी भीजा याकोब धाङ थाएदेआ धाङ ग्याल्चेपा#३:१८ राङगी ग्याखापगी राङजेगी क्षीला दो़पा क्षे धाङ ॱमाक टाप थुप्कीन ॱनागीन सीमोन 19धाङ खोङबाला डाला ची ग्याप्कीन, युदा ईस्कारीयोतगो लाक।
येशु धाङ बेएलजेबुल
(मेथा १२:२२-३२; लुका ११:१४-२३;१२:१०)
20होदे स्याम्ने येशु खीमला फेप्पालाक। धेनी मीमाङक्या याङ जोम्दी, खोङबाक्याला श्येलाक श्येये धी़चो़गोवा माजोप्पालाक। 21मीक्याई खोङबा ॱङ्योदुक ॱनागीनगो, खोङबागी नाङमीक्याई घोरती खुङक्या खोङबाला लेन्दु होवालाक।
22धेनी येरुसालेमने होवा क्षो़ठीमगी ॱलोपो़नक्याई ॱनेवालाक, “खो नाङदु डेक्याई चो बेएलजेबुल जुदुक। धेनी होदेगी आङजानेराङ खो डेक्या तो़न्दी।”
23धेनी येशुगी खुङक्याला भो़री, पे ढारे सुवालाक, “धी़क राङगी राङला घाङगी झ्येरी तो़न थुक्कीले? 24ग्याखाप च्यीकगी नाङ ॱमीथी़न्दा झ्युङना, ग्याखाप दे ॱने ॱमीथुप्कीलाक। 25धेनी खाङबा च्यीकगी नाङ ॱमीथी़न्ना, खाङबा दे ॱने ॱमीथुप्कीलाक। 26होझ्येरीराङ धी़क राङ खोरी डाला लाङदी ॱमीथी़न्दा झ्युङना, खोवाः ॱने ॱमीथुक्वा मेताला डुगीलाक। 27मी तोप शाङा च्यीकगी नाङला जुरी, खी़ ग्युनोर ठोक्येला, एन्ला खोला धाम घो़गीलाक। धेनी च्यीगा मी दे खाङबाने कुमु कु थुक्कीलाक।
28“मी घीरीगी धीक्पा धाङ खुङक्याई, को़न्क्षोकला ॱमेटा पाप्कीन घीरी सेल्गीलाक ॱनेरी ङा धेन्पा स्येदाहीन। 29हीना सी़ धाम्पे थुक्ङीला ॱमेटा पाई, होदेला घोयाङ नामा थोप्कीमालाक धेनी खो नामा मेदाक्कीन धीक्पागी ग्यो़पा झ्यी घो़गीलाक।” 30येशुगी देरे सुवालाक घीझ्येरी ॱनाना मीक्याई खोङबा नाङदु ॱनो़पा जुदुक, ॱनेरी ॱने हो़तालाक।
येशुगी आमा धाङ नोक्या
(मेथा १२:४६-५०; लुका ८:१९-२१)
31धेनी येशुगी आमा धाङ नोक्या होरे फीला लारी धेदी, खोङबाला फेप श्युरु झावालाक। 32मीमाङक्या येशुगी थाकोरला कोरती धे हो़तालाक, धेनी खुङक्याई ॱनेवालाक, “खोङबागी युम धाङ कुछेक्या, खोङबाचारु फीला फेप्दुक।”
33येशुगी लेन ॱनावालाक, “ङी आमा धाङ नोक्या सुले?” 34धेनी खोङबागी राङला खोरती धेता मीक्याला शीक्ती सुवालाक, “ङी आमा धाङ पी़नक्या देक्याराङ हीन। 35को़न्क्षोकगी थुकोङ डुप्तु च्युक्कीनक्याराङ, ङी नो-नुमो धाङ आमा हीन।”
Currently Selected:
मारकु 3: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
