मारकु 4
4
साङा ग्याप्कीनगी पे
(मेथा १३:१-२३; लुका ८:४-१५)
1याङदा येशु ग्याछोगी थामाला क्षो़ ॱनाङये गो चुक्पालाक। धेनी मीछोक ॱमीच्यीकी माङा खोङबागी थाकोरला जोम्दी, खोङबा डु नाङदु फेप्ती, छोला श्युक्पालाक। धेनी मीछोकक्या ग्याछोगी थामारु धेपालाक। 2खोङबागी मीक्याला पेक्या थोक्ने, ॱलापच्या ॱमीच्यीकी माङा ॱलावा जेपालाक। धेनी खोङबागी पेक्याने च्यीक देरे सुवालाक, 3“ङेन्दाङ, साङा ग्याप्कीन च्यीक साङा ग्याप्तु सोवालाक। 4धा, साङा तोरी घाङला, रीङगा लाम्गा स्योकला थोरपालाक धेनी झ्याक्या होरे होदे शेवालाक। 5साङा रीङगा सा माङा मेगीन धोरुकगी साङला थोरपालाक। धेनी सा तीङ मेगीन झ्येरी, होदेक्या लाम्साङ केवालाक। 6धेनी ङीमा स्यारी घाङला, होदे केक्यागो छीक्ती चावा मेगीन झ्येरी काम्दी सोवालाक। 7साङा रीङगा छेम्मागी खोकला थोरपालाक धेनी छेम्माक्या छारती, होदे झ्याङबाक्याला ॱलेपालाक होझ्येरी होदेने ढेबु घीया माझ्युवालाक। 8धेनी श्येम्मा साङाक्या सा शाङपोला थोरपालाक धेनी ढेबु केरी, याला छारती एम्माले माङा, रीङगाने सुमच्यु रीङगाने ढुकच्यु धाङ रीङगाने ग्या थाम्बा बाप्पालाक।”
9धेनी येशुगी सुवालाक, “आमच्योक हो़गीनक्याई ङेन्दी ॱहाघोरास्योक।”
10येशु खोराङ च्यीगा हो़ती घाङला, खोङबागी ॱये-ॱयो़नला हो़गीनक्या धाङ ङेने च्युङङीक्याई, होदे पेगी़ कोरला ढीवा श्यी़वालाक। 11धेनी येशुगी खुङक्याला सुवालाक, “को़न्क्षोकगी ग्याखापगी साङवा, खेक्याला ॱनाङ हो़तालाक। हीना फीदागी मीक्याला#४:११ येशुला धेपा मीझ्यीगीनक्या लाब घीरी पेगी थोक्ने स्येगीलाक,
12खुङक्याई ताये तागीलाक हीना ॱमेथोङगीलाक,
ङेन्ये ङेन्गीलाक हीना ॱहाघोरकीमालाक,
खुङक्याई हुरे झ्येहो़ना खुङक्या सेम ग्युरती, धीक्पाक्याने थार हो़टु।”
13धेनी खोङबागी खुङक्याला सुवालाक, “दे पेगी दो़न्दाक ॱहामेघोना, श्येम्मा पेक्याई दो़न्दाक खेक्या घाङगी झ्येरी ॱहाघोरये? 14साङा तोरकीनगी को़न्क्षोकगी का तोरकीलाक। 15मी रीङगा लाम्गाला तोरता, साङाक्या च्योक्रे हुङालाक। खुङक्याई कागो ङेन्लुङ मेताला, धी़क होरे खुङक्या नाङदु ताप्ता कागो ठोक्ती डुगीलाक। 16धेनी मी रीङगा धोरुकगी साङला तोरता, साङाक्या च्योक्रे हुङालाक। खुङक्याई कागो ङेन्दी लेमो च्यीक्लाराङ, ङ्यामो घेरी खे लेन्गीलाक। 17हीना चावा मेगीन झ्येरी, तीते माना धे थुक्कीमालाक। धेनी कागी झ्येरी काङे धाङ दुक्पु झ्युङी घाङला, खुङक्या उक्कुरा धेपाने ग्याप ॱलोक्कीलाक। 18धेनी छेम्मागी खोकला तोरता साङा श्येम्माक्या, दे मीक्या लाक खी़ कागो ङेन्गीलाक। 19हीना जीक्तेनगी दुङा धाङ ग्युनोरला घागीन धाङ श्येम्मा ॱनाछोकगी दो़छाकगी झ्येरी, कागो छारतु ॱमीच्युक्कीलाक धेनी होदेने ढेबु ॱमेकेगीलाक। 20धेनी सा शाङपोला तोरता साङागो दे मीक्या लाक। खी़ का ङेन्दी खेलेन झ्यीगीलाक धेनी साङा च्यीकने रीङगाने सुमच्यु, रीङगाने ढुकच्यु धाङ रीङगाने ग्या झ्येरी ढेबु फेगीलाक।”
क्युङगी पे
(लुका ८:१६-१८)
21येशुगी ङेनेक्याला सुवालाक, “क्युङ थोङजाला मेन्दा ॱहायाङ याङमेना ङ्याठीगी होकला श्याक्येला, नाङदु खेरती हुङाले? 22बेरी श्याक्सा घीरी थोङदु चुक्कीलाक धेनी सारी श्याक्सा घीरी ॱहाघोरतु च्युक्कीलाक। 23आमच्योक हो़गीन घीरीगी ङेन्दी ॱहाघोरास्योक।”
24खोङबागी खुङक्याला सुवालाक, “खेक्याई घोरकीनला दो़नाङ तेर घीझ्येरी ॱनाना खेक्याई छो़ घाङ झ्येरी ग्यावी, होदे छो़लाराङ खेक्याला ग्याप्कीलाक धेनी होदेला ल्हाक खेक्याला ॱनाङगीलाक। 25घीझ्येरी ॱनाना हो़गीनला ॱयोल्ले माङा तेरकीलाक धेनी मेगीनला खोला हो़गीनगोवा खोने ठोक्कीलाक।”
साङा छारकीनगी पे
26येशुगी सुवालाक, “को़न्क्षोकगी ग्यासी दे, मी च्यीकगी श्यीङला साङा तोरकीन च्योक्रे लाक। 27मी दे ङीन-छेन ङ्याना-लाङनाः, होदे साङाने घाङ झ्येरी झ्याङबा साबा थो़न्गीन धाङ छारकीनगो, खी़ ॱहाघोरकीमालाक। 28सानेराङ ढेबु केगीलाक। धाङपोगो झ्याङबा धेनी ॱङीमा धेनी ॱङीमागी नाङदु ढेबु झ्युङगीलाक। 29धेनी लोदोकगो छो़लुङ मेताला, खी़ चेमा ॱङागीलाक घीझ्येरी ॱनाना तो़न धुगीन धी़चो़गो ॱलेप्सालाक।”
छुकगी साङागी पे
(मेथा १३:३१-३२,३४; लुका १३:१८-१९)
30येशुगी धोराङा सुवालाक, “को़न्क्षोकगी ग्यासी दे, होराङ घीमुला दुरये याङमेना पे घारे च्यीकगी ढेस्ये ग्याप्ये? 31दे नी साला ताप्ता, छुकगी साङा च्योक्रे लाक। दे साश्यी नाङगी साङाक्याने चुङस्योकगो लाक। 32हीना ताप्यी घाङला, दे श्येम्मा ॱङोच्छेक्याने क्षेस्योक झ्युङालाक। धेनी ॱनामगी झ्याक्याई होदेगी ढीम्जाकला छाङक्या शो थुक्येला, होदेला यारकाक्या क्षे-क्षे केलालाक।”
33मीक्याई ॱहाघोथुप्कीन थुक्पे, येशुगी देरे ॱमीच्यीकी माङा पेक्याने, खुङक्याला का ॱनाङा जेपालाक। 34येशुगी खुङक्याला पे ढारे माना घीयाः सुङा माजेपालाक हीना शुरला, खोङबाराङ ङेनेक्याला दो़न्दाक घीरी टोला जेपालाक।
येशुगी ॱलुङछुपला ल्हेवी जेपा
(मेथा ८:२३-२७; लुका ८:२२-२५)
35होदे ङीमागो ॱरो रुक्ती, येशुगी ङेनेक्याला सुवालाक, “होराङ ग्याछोगी ॱहाकीनला डोउ।” 36धेनी मीछोकक्याला तारी ङेनेक्या, येशु श्युक्कीन डु नाङदु जुरी, खोराङक्यामुला ठीक्पालाक। धेनी खोङबामुला डुगीन डु श्येम्माक्या हो़तालाक। 37ॱहाताक्पाला ॱमीच्यीकी क्षे ॱलुङछुप लारी, भालापगी डुला श्युरती, डु नाङदु क्षु खावालाक धेनी भीप्कु झ्येवालाक। 38हीना येशु ॱङे च्यीक चुक्ती, डुगी ग्याप स्योकला शीम हो़तालाक।
धेनी ङेनेक्याई खोङबाला ॱङी चेदी श्यी़वालाक, “ॱलोपो़न ला, हे भीप्ती स्यीगु झ्यीदी। खोङबा घीया दो़नाङ मेजेये?”
39धेनी खोङबा श्येङदी ॱलुङछुपला काको़न जेदी ग्याछोला सुवालाक, “खाबा धो़क, ल्हेवी सोङ!” धेनी ॱलुङछुप छो़पालाक धेनी तीङल्हेवी झ्युवालाक।
40धेनी येशुगी खुङक्याला सुवालाक, “खेक्या घीझ्येरी जीआ? खेक्याला धान्दा थुक्पे धेपा मेते?”
41धेनी खुङक्या जीक्नाङ केरी, च्यीकगी च्यीकला ॱनेवालाक, “दे सुले? ॱलुङ धाङ ग्याछोगी़याः खोङगी काला ङेन्दी!”
Currently Selected:
मारकु 4: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
