मारकु 5
5
डे जुजा मी च्यीक
(मेथा ८:२८-३४; लुका ८:२६-३९)
1येशु धाङ खोङबागी ङेनेक्या ग्याछोगी ॱहाकीनला, गेरासेने ॱनागीन लुङबाला ॱलेप्पालाक। 2येशु डुने थो़न्लुङ मेताला, धी़ठोने डे झ्युजा मी च्यीकगी खोङबाला ज्यावालाक। 3होदे मीगो धी़ठोक्याला धेदालाक। धेनी मी देला सी़या च्याक्थाकगीयाः धाम ॱमाथुक्पालाक, 4घीझ्येरी ॱनाना खोला थेङ माङा च्याक्डोक धाङ च्याकथाक ग्याप्पालाक हीना खी़ च्याक्थाकक्या चेती दुबु-दुबुला च्यालाक। धेनी खोला आङजाला श्याक्येला, सुलाः स्युक मेतालाक। 5ङीन-छेन खो धी़ठो धाङ रीक्याला केक ग्यावालाक, धेनी राङ-राङला धोगोङगी ॱमा शोवालाक।
6खी़ येशुला थाक्रीङाने ज्याली घाङला, खो भाङ तारी सोरी खोङबागी दोङदु क्षाक छावालाक। 7धेनी केक ग्याप्ती, खी़ ॱनेवालाक, “ॱलानामेपे को़न्क्षोकगी से येशु, ङाला खेकी ढेवा घी हो़ताले? ङा को़न्क्षोकला ॱना क्यारी श्योवा पुलाहीन, ङाला दुक्पु ताङा माजे।” 8घीझ्येरी ॱनाना होदे मीने थो़न्दी स्योक ॱनेरी, येशुगी होदे डेला होदे एन चो़ला सुवालाक।
9धेनी येशुगी खोला ढीवा लेन जेपालाक, “ख्यी़ मीङ घी ले?”
खी़ लेन ग्याप्पालाक, “ङी मीङ ॱमाक्छोक लाक घीझ्येरी ॱनाना हे ॱमीच्यीकी माङा हो़क।” 10धेनी खुङक्याला होदे लुङबाने फीला तो़न्रो माझ्यी ॱनेरी, खी़ येशुला ॱङीङ थाक्पाने श्योवा पुवालाक।
11होदुरु री थामाला फाकख्यु क्षे च्यीक छो़री धे हो़तालाक। 12धेनी डेक्याई येशुला श्यी़वालाक, “हेक्याला फाकक्या नाङदु जुयेला, होदेक्या चारु झाङरोनाङ।” 13धेनी खोङबागी खुङक्याला डोरु च्युक्पालाक धेनी डेक्या फीला थो़न्दी, फाकक्या नाङदु जुवालाक। धेनी फाकगी ख्यु ङीतोङ रीने माला ग्याछो स्योकला छाङगा ग्याप्ती सोरी, ग्याछोला भीप्ती स्यीवालाक।
14फाकगी झीउक्या डो़री सोरी, ग्याजा धाङ लुङबा नाङ घीरीदु होदे लाब स्येपालाक। धेनी मीक्या घी झ्युङगीनगोला तारु होवालाक। 15धा खुङक्या येशुचारु होरे एन्ला, डेगी ॱमाक्छोक जुजा मीगो धा घायेरा झ्युरी घोलाक घो़न्दी, होदुरु धेगीनगो थोवालाक धेनी खुङक्या जीक्पालाक। 16होदे थोथाक्याई होदे डे जुजा धाङ फाकक्याला घी झ्युझ्युवागो, मी श्येम्माक्याला स्येपालाक। 17धेनी खुङक्याई येशुला, खुङक्याई लुङबा भोरोक झ्यी ॱनेरी, ॱमीच्यीकी श्योवा पुवालाक।
18येशु डु नाङदु जुली घाङला, डे जुजा मीगी़ खोङबामुला डोयेला श्योवा पुवालाक। 19हीना येशुगी खेमालेन्बालाक धेनी खोला सुवालाक, “ख्यो़री रोवाक्या चारु नाङला सोङ धेनी चोवो को़न्क्षोकगी ख्यो़ला घी जेगीनगो धाङ ख्यो़ला ॱङीङजे जेगीनगी कोरला स्यो़क।” 20धेनी खो होदेने सोरी, येशुगी खोला जेगीनगी कोरला देकापोलीस लुङबादु स्येपालाक धेनी मी घीरी ॱहाङसावालाक।
स्यीस्या भोमो च्यीक धाङ केमी नेपा च्यीक
(मेथा ९:१८-२६; लुका ८:४०-५६)
21धेनी येशु डु नाङदु श्यो़न्दी ॱहाकीनला फेप्पालाक। धेनी मीछोक क्षे च्यीक, खोङबागी डुङदु जोम्बालाक धेनी खोङबा ग्याछोगी थामारु श्युक हो़तालाक। 22धेनी छोक्खाङगी पो़न्पोक्याने याईरोस ॱनागीन पो़न्पोगो होदुरु होवालाक। धेनी येशुला ज्यारी, खोङबागी श्याप्डुङला क्षाक छावालाक, 23धेनी ॱङीङ थाक्पाने श्योवा पुरी ॱनेवालाक, “ङी भोमो च्युङागो स्यीगु झ्यीदी। खोङबा फेप्ती, मो ढाक्ये धाङ सो़न्पो धेयेला, खोङबागी क्षाक मी़ खाला श्याजे।”
24धेनी येशु खी़मुला फेप्पालाक। धेनी मीछोक क्षे च्यीक, खोङबा स्याबाला डारी खोङबागी थाकोरला रुप्पालाक। 25लो च्युङङी थुक्पे ठाक्जागी नाजा हो़गीन, केमी च्यीक होदुरु हो़तालाक। 26ॱमीच्यीकी माङा आम्चीक्याला तो़न्दी, मी़ दुक्पु ॱमीच्यीकी ङ्या सावालाक। मी़ मोराङला हो़गीन घीरी डोसोङ ता सावालाक। देरे झ्येरीयाः, घारु डोयेगो भोरती मो दुक्तु सोवालाक। 27मी़ येशुगी कोरला ॱहाघो हो़तालाक धेनी मीछोकगी खोक्दु, येशुगी ग्याप स्योकला होरी खोङबागी शेनला जी़वालाक। 28घीझ्येरी ॱनाना येशुगी शेनला च्यीगा जुनाः, मो ढाक्कुलाक ॱनेरी मी़ साम्लो खोरपालाक। 29धेनी उक्कुरा च्यीकला मी़ ठाक्जा क्षो़पालाक धेनी मोरी नाजाने, मोराङ ढाक्कीनगो मोरी शुला छोरपालाक। 30येशुगी लाम्साङ राङने स्युक थो़न्गीनगो खेन्दी, मीछोक स्योकला श्याल ॱलोक्ती सुवालाक, “ङी घोलाकला सी़ जी़जो?”
31खोङबागी ङेनेक्याई खोङबाला ॱनेवालाक, “मीछोकगी खोङबाला रुप्कीनगो शीक्तीयाः, धोराङा खेराङ ‘सी़ ङाला जी़जो’ सुरी सुङाले?” 32हीना सी़ जी़वा हीन्ढी़ ॱनेरी शीक्येला, येशुगी राङगी छोक घीरीला शीक्पालाक। 33धेनी भोमो दे मोराङला घी झ्युङगीनगो स्येरी, मो जीक्ती दारी-दारी, येशुगी डुङदु पीमु चुक्ती लाब धेन्पा घीरी स्येपालाक।
34खोङबागी मोला सुवालाक, “भोमो, खेरी धेपागी ख्यो़ला चो़गा झ्येजुङ। कीपोमा झ्येरी सोङ, धेनी ख्यो़री नाजाने थारास्योक।”
35खोङबा सुङला सुङी घाङला, पो़न्पो याईरोसगी़ नाङने मी रीङगा होदुरु होरी ॱनेवालाक, “खेराङगी भोमो स्यीजुङ। धा ॱलोपो़नलाला घीझ्येरी धोराङा होपक्या ताङये?”
36हीना खुङक्याई ॱनागीनगोला येशुगी या माझ्येवा छोक्खाङगी पो़न्पोला सुवालाक, “माजीक, धेपा च्यीका झ्यी।” 37धेनी पेटो धाङ याकोब धाङ याकोबगी नो योहान्ना माना, श्येम्मा सुलाः खोङबामुला हुङदु ॱमाच्युक्पालाक। 38खोङबाक्या छोक्खाङगी पो़न्पोगी़ नाङदु ॱलेई घाङला, येशुगी होदुरु शाङा-शीङी झ्यीगीन, ङुगीन धाङ ङुता ग्याप्कीनक्या शीक्पालाक।
39धेनी येशु नाङला फेप्ती, खुङक्याला सुवालाक, “खेक्या घीझ्येरी शाङा-शीङी झ्यीदा धेनी ङुवाले? दे टु दे ॱमास्यी दुक हीना ॱङी लोक्ते धेदुक।” 40धेनी मीक्या खोङबाला घो़ स्योरपालाक। हीना खोङबागी मीक्याला फीला तो़न्दी, टुगी फामा धाङ खोङबामुला हो़गीनक्याला ठीक्ती टु हो़जारु फेप्पालाक। 41धेनी मी़ लाक्पाने शीम्दी, खोङबागी मोला सुवालाक, “तालीथा कुमी।” दे ॱनाना “भोमो च्यीमे, ङा ख्यो़ला लोङ ॱनेरी ॱनाहीन।” 42धेनी लाम्साङ मो याला लारी, घोबा चुक्पालाक। भोमो दे लो च्युङङी लाक। दे थोरी मीक्या ङ्यामो घेरी ॱमीच्यीकी ॱहालेवालाक। 43खोङबागी दे लाब दे सी़या ॱहामाघोरास्योक ॱनेरी, खुङक्याला का ॱरा ॱनावालाक। धेनी मोला शायेला च्यीक रे तेर सुरी, खुङक्याला सुवालाक।
Currently Selected:
मारकु 5: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
