मारकु 11
11
येरुसालेमदु येशु फेप्पा
(मेथा २१:१-११; लुका १९:२८-४०; योहान्ना १२:१२-१९)
1येशु धाङ ङेनेक्या येरुसालेमगी ङ्येरु हो़गीन, क्युरुस्यीङगी री डामदु हो़गीन, बेथफागे धाङ बेथानीरु ॱलेप्पालाक। धेनी खोङबागी ङेने ॱङीला 2दे सुरी झावालाक, “खेक्याई दोङदु हो़गीन युला सोङ, धेनी होदुरु ॱलेप्लुङ मेताला सुवा श्यो़न माङ्युङगीन, भुङटु च्यीक ताक्ती श्याकश्या थोङगीलाक। होदेला टोरी ठीक्ती स्योक। 3धेनी मीक्याई घी झ्यीदाले ॱनेरी ढीना, ‘हीकी चोवोला दे घो़ली धेनी खोङबागी लाम्साङ ॱलोक्कीलाक।’ ॱनेरी ॱनो़।”
4धेनी खुङक्या सोरी भुङटु च्यीकगो फीदागी लाम्गारु, ताक्ती श्याकश्यागो थोवालाक धेनी टोवालाक। 5होदुरु लारी धेता रीङगागी, “खेक्या भुङटु टोरी घी झ्यीदाले?” ॱनेरी ढीवालाक। 6खुङ ॱङीउगी येशुगी का ॱनाङगीन च्योक्रे ॱनेवालाक धेनी खुङक्याई खुङ ॱङीउला तावालाक।
7खुङ ॱङीउगी येशु डामदु भुङटु ठीक्ती होवालाक धेनी राङगी घोलाक पी़दी, भुङटु खाला ग्याप्ती, येशु होदे खाला छीप्पालाक। 8मी माङक्षेगी राङगी घोलाकक्या लाम्गाला तीवालाक धेनी श्येम्माक्याई श्यीङने चेदी होवा याक्काक्या, लाम्गाला टाम्बालाक। 9धेनी खोङबागी दोङ-दोङला डुगीन धाङ स्याम-स्याम्ला डागीनक्याई केक क्षे ग्याप्ती ॱनेवालाक, “होसान्ना, चोवो छेनला फेप्कीनगोला झ्यीलाप हुङवास्योक।#सुङगुर ११८:२५,२६ 10होरी याप दावीदगी ग्यासी हुङगीन देला झ्यीलाप हुङवास्योक। थोस्योकरु श्युक्कीनला होसान्ना।”
11येरुसालेमदु फेप्ती, येशु क्षो़खाङ नाङदु फेप्पालाक धेनी थाकोर घीरीला शीक्पालाक। धेनी फी राक्ती, ङेने चुङङीमुला बेथानीरु लोक्ती फेप्पालाक।
स्यीङदोक मेगीन दोङबो
(मेथा २१:१८-१९)
12ॱङेटोगो बेथानीने खोङबाक्या फेई घाङला येशु टेवालाक। 13धेनी लोमागी तुम्दा, सेयापगी दोङबो च्यीक ग्याङने, खोङबागी शीक्ती होदुरु छो़येला, स्यीङदोक रे हो़टु साम्दी डामदु फेप्पालाक। हीना सेयापगी दोङबोला स्यीङदोक के मारीन्बा, लोमा माना श्येम्मा घीया मेगीनगो खोङबागी शीक्पालाक। 14धेनी खोङबागी होदे दोङबोला सुवालाक, “धीरीङने ॱहाला ख्यी़ स्यीङदोक मी सी़या माशास्योक।” धेनी खोङबागी ङेनेक्याई होदे घोरपालाक।
येशु क्षो़खाङदु
(मेथा २१:१२-१७; लुका १९:४५-४८; योहान्ना २:१३-२२)
15खोङबाक्या येरुसालेमदु फेप्ती, येशु क्षो़खाङदु फेप्पालाक। धेनी ॱमारछो़गी छीला सेम्चेनक्या ङ्योगीन धाङ चोङगीनक्याला फीला तो़न्दा जेपालाक। धेनी ॱङु झ्येगीनक्याई चोक्चेक्या धाङ पुङमु चोङगीनक्याई कुपक्याक्या ॱलोक्वा जेपालाक। 16धेनी खोङबागी मी सुलाः छोङ-शोक खेरती, क्षो़खाङने झ्युरी डोरु ॱमाच्युक्पालाक। 17धेनी खोङबागी खुङक्याला क्षो़ ॱनाङी-ॱनाङी सुवालाक, “‘ङी खाङबा नी, मीरीक घीरीगी छीला ॱमो़लाम ग्याप्येगी खाङबा ॱनेरी ॱनागीलाक’#यस्याया ५६:७; येरेमीया ७:११ सुरी को़न्क्षोकगी सुङरापला देरे ढीक मीदुई? हीना खेक्याई देला झ्याक्पाक्याई छाङ शो़दुक।” 18धेनी क्षो़पो़न क्षेक्या धाङ क्षो़ठीमगी ॱलोपो़नक्याई, दे लाब घोरती खोङबाला घाङगी झ्येरी सेये ॱनेरी, झ्यी़ झ्येवालाक। धेनी खुङक्या येशुमुला जीक्पालाक घीझ्येरी ॱनाना मीछोक घीरी खोङबागी क्षो़ला ॱहालेवालाक। 19धेनी ॱरो रुक्ती, येशु धाङ ङेनेक्या ग्याजा देने फीला फेप्पालाक।
धेपागी स्युक
(मेथा २१:२०-२२)
20ॱङेटो ॱङारोकगो खोङबाक्या सेयापगी दोङबोने फेई घाङला, होदे चावाने काम्गा थोवालाक। 21धेनी पेटोगी येशु सुङगीनगो ढेन्दी खोङबाला ॱनेवालाक, “राब्बी, शीक्ताङ। खेराङगी ॱमेमो जेगीन सेयापगी दोङबोगो काम्दुक।”
22येशुगी खुङक्याला लेन ग्यावा जेपालाक, “को़न्क्षोकला धेपा झ्यी। 23ङा खेक्याला धेन्पाराङ ॱनाहीन, मी सी़ च्यीकगी राङगी सेम नाङदु दोक्पा च्यीया ॱमासाक्पा, राङगी ॱनागीनगो डुप्कीलाक साम्दी धेपा झ्येरी, री देला, ‘देने घोक्ती ग्याछो नाङदु ल्हीम’ ॱनेरी ॱनाना खी़ ॱनागीनगो डुप्कीलाक। 24होझ्येरी ङा खेक्याला ॱनाहीन, ॱमो़लामला खेक्याई घी ॱलाङगीनगो थोप्साहो़क ॱनेरी, धेपा झ्यी धेनी होदे ख्यो़ला थोप्कीलाक। 25खेक्या ॱमो़लाम ग्याई घाङला, सी़मुला मेदो़गीन रे हो़ना, होदेला घोङपा तेर धेनी नाम्खे श्यीङखामदु श्युक्कीन याप को़न्क्षोकगी, खेक्याई धीक्पा सेल ॱनाङगीलाक।” 26[हीना मी श्येम्माला घोङपा ॱमेतेरना, नाम्खे श्यीङखामदु श्युक्कीन खेक्याई याप को़न्क्षोकगीयाः, खेक्याई धीक्पा सेल ॱनाङगीमालाक।]#११:२६ २६ दे गीरीक धेप रीङगाला माढीक हो़तालाक।
येशुगी आङजागी कोरला ढीवा
(मेथा २१:२३-२७; लुका २०:१-८)
27येशु धाङ ङेनेक्या येरुसालेमदु ॱलेप्पालाक। धेनी येशु क्षो़खाङदु फेई घाङला, क्षो़पो़न क्षेक्या धाङ क्षो़ठीमगी ॱलोपो़नक्या धाङ गेम्पाक्या खोङबाचारु होवालाक। 28धेनी खुङक्याई खोङबाला श्यी़वालाक, “घीन्गी आङजाने ख्यो़ दे लेगाक्या झ्यीदाले? देरे झ्यीयेला ख्यो़ला आङजा सी़ तेरजो?”
29येशुगी खुङक्याला सुवालाक, “ङी खेक्याला ढीवा च्यीक कुलु ङाला लेन ग्योप। धेनी आङजा घाने, ङा देक्या झ्यीदाले ॱनेरी ॱनाउ। 30योहान्नागी ठी़सो़ दे नाम्खे श्यीङखामने झ्युवाले याङना मीने झ्युवाले? ङाला लेन ग्योप च्यीक।”
31धेनी खुङक्या राङ-राङ नाङदु चो़लीङ झ्येरी ॱनेवालाक, “नाम्खे श्यीङखामने लाक ॱनाना, खी़ होराङला घीझ्येरी खोला धेपा मीझ्यीदाले ॱनेरी ॱनागुलाक। 32मीने लाक ॱनेरी घाङ झ्येरी ॱनाये।” घीझ्येरी ॱनाना मी घीरीगी योहान्ना ॱङो़नस्येखेन च्यीक लाक ॱनेरी, धेपा झ्यीदालाक होझ्येरी खुङक्या मीक्याला जीक्पालाक।
33होझ्येरी खुङक्याई येशुला लेन ग्याप्पालाक, “हेक्याला स्येयेमेक।”
धेनी येशुगी खुङक्याला सुवालाक, “ता देरे हीन्ना, ङा आङजा घाने देक्या झ्यीदाले ॱनेरी, खेक्याला स्येयेमेन।”
Currently Selected:
मारकु 11: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
