मारकु 12
12
घुन्डुमगी दुम्रागी पे
(मेथा २१:३३-४६; लुका २०:९-१९)
1येशुगी खुङक्याला पेगी थोक्ने सुवालाक, “मी च्यीकगी दुम्रा नाङदु घुन्डुम ताप्ती, होदेगी थाकोरला चीक्पा चीक्पालाक। धेनी घुन्डुम चीरयेला, सादोङ ढी़वालाक। धेनी चोक्खार च्यीक शो़री श्यीङबाक्याला, होदे दुम्रागो बोक्माला तेरपालाक धेनी खो यु श्येम्मा च्यीकला सोवालाक। 2धेनी घुन्डुम छो़गीन धी़चो़ ॱलेप्ती, खी़ खोरी ॱयोक्पो च्यीक होदे श्यीङबाक्याचारु, खोरी थोप्ताङगो लेन्दु झावालाक। 3हीना होदे श्यीङबाक्याई खोला ठीक्ती दुवालाक धेनी लाक्पा तोङबा ॱलोक्ती झावालाक। 4धेनी याङदा खी़ ॱयोक्पो श्येम्मा च्यीक झावालाक हीना खुङक्याई होदेगी गोवाला श्युरती ॱमा शो़री ॱमीच्यीकी ॱमेटा पाप्पालाक।
5“धेनी याङ खी़ श्येम्मा ॱयोक्पो च्यीक झावालाक। होदेगोला खुङक्याई सेपालाक। दुक झ्येरी श्येम्मा ॱमीच्यीकी माङाला, खुङक्याई दुवालाक धेनी रीङगाला सेपालाक।
6“धा खोला भीजा ढीन्चेन च्यीक हो़तालाक। धेनी ‘खुङक्याई ङी भीजाला घुस्याप झ्यीगीलाक।’ साम्दी, खी़ भीजागो झावालाक।
7“हीना होदे श्यीङबाक्याई च्यीकगी च्यीकला ॱनेवालाक, ‘दे नी दाक्पोगी भीजा ढोङबा आङगीनगो लाक। स्योक, देला सेदु धेनी ग्युनोर घीरी होरी झ्युङगीलाक।’ 8धेनी खुङक्याई खोला ठीक्ती सेपालाक। धेनी खोला दुम्राने, फीला ॱयुक्ती झावालाक।
9“धा दुम्रागी दाक्पोगी़ घी झ्यीदी हेटी़? खो होरी होदे श्यीङबाक्याला सेगीलाक धेनी दुम्रागो मी श्येम्माक्याला तेरकीलाक। 10धाम्पे सुङरापला ढीक्टा दे, खेक्याई माढोक हो़ती?
‘खाङबा शोगीनक्याई फेन ॱमेथोक्कीन ॱनेरी, ॱयुक्कीन धोगोङगो राङ शुरधोगो#१२:१० धोगोङ खाक्क्षे झ्युदुक,
11दे लेगा दे चोवो को़न्क्षोकगी जेपालाक,
धेनी दे होरी तादाङला, ॱमीच्यीकी ॱहाङसागीन दुक।’#सुङगुर ११८:२२-२३”
12दे लाब दे खोराङक्याई क्षीला सुवालाक ॱनेरी घोरती, याहुदापा गोठीक्याई येशुला शीम्येला चाजो़ झ्येवालाक हीना खुङक्या मीमाङक्यामुला जीक्पालाक। होझ्येरी खुङक्या येशुला भोरती सोवालाक।
ठा झ्याङगीनगी कोरला ढीवा
(मेथा २२:१५-२२; लुका २०:२०-२६)
13होदे स्याम्ने याहुदापा गोठीक्याई, फारुसीपा रीङगा धाङ हेरोदे ग्यावुगी मी रीङगाला, येशुला लाब-लाबला गो कोरतु च्युक्येला झावालाक।
14खुङक्या होरे येशुला ढीवालाक, “ॱलोपो़न ला, खेराङ धेन्पा हीन्गीनगो हेक्याला क्षाहो़क धेनी खेराङ मी श्येम्माक्याई लाबला या मीझ्यीदालाक। खेराङ मीगी ङोदोङला शीक्ती मेन्दा, हीना को़न्क्षोकगी लाम्गा दे धेन्पा झ्येरी मीला तो़न्दालाक। धा केसारला ठा झ्याङये लेगा दे, काठीमला थी़न्दाले याङना ॱमीथी़न्दाले? हेक्या ठा झ्याङये याङना मेझ्याङये?”
15हीना येशुगी खुङक्याई शोक झ्यीगीनगो ॱहाघोरती, खुङक्याला सुवालाक, “खेक्या घीझ्येरी ङाला छो़ लेन्दा? ङाला टाङगा च्यीक खेरती स्योक धेनी ङी ताउ।”
16खुङक्याई येशुला टाङगा च्यीक तेरपालाक धेनी खोङबागी खुङक्याला ढीवालाक, “दे टाङगाला सी़ रीमो धाङ यीगे दो?”
खुङक्याई ॱनेवालाक, “केसारगी दुक।”
17धेनी येशुगी खुङक्याला सुवालाक, “केसारगी हीन्गीनगो केसारला तेर, धेनी को़न्क्षोकगी हीन्गीनगो को़न्क्षोकला पु।” धेनी दे लेन घोरती, खुङक्या ॱमीच्यीकी ॱहालेवालाक।
छीवाने याङ सो़न्पो लाङगीनगी कोरला ढीवा
(मेथा २२:२३-३३; लुका २०:२७-४०)
18होदे स्याम्ने, सादुकीपा रीङगा येशुचारु होवालाक। खुङक्या छीवाने सो़न्पो लाङगीन लाबला धेपा मीझ्यीदालाक। खुङक्याई येशुला ढीवा च्यीक श्यी़वालाक, 19“ॱलोपो़न ला, मोशेगी हेक्याला देरे ढीक्दुक, मी च्यीक खोरी केमीला टुवा माझ्युवा स्यीना, होदेगी नोगी़ खी़ केमी युक्जामाला ॱनामा लेन्दी, खोरी आज्योगी क्षीला टुवा शो घो़गीलाक। 20धा धी़चो़ च्यीकला आज्यो-नो पी़न्दा धी़न हो़तालाक। आज्यो क्षेस्योकगी़ ॱनामा लेन्बालाक हीना टु माझ्युवा स्यीवालाक। 21देरे झ्युरी आज्यो भाम्मागी़ आज्यो क्षेगी़ केमी युक्जामामुला ॱनामा लेन्बालाक हीना खोवाः टु माझ्युवा स्यीवालाक। देरे झ्येरी आज्यो सुबागोवाः स्यीवालाक। 22धेनी श्येम्मा घीरी होझ्येरीराङ, आज्यो केमी ॱनामाला लेन्दी टु माझ्युवा स्यीवालाक। धेनी थाला केमीगोवा स्यीवालाक। 23धा, हेला सुङरोनाङ, छीवाने सो़न्पो लाङना केवे-भोमो दे सी़ केमी झ्युङगीलाक? आज्यो-नो धी़न्गारागी मोला ॱनामा लेन्बालाक।”
24येशुगी खुङक्याला सुवालाक, “खेक्या नोरदुक घीझ्येरी ॱनाना खेक्याला सुङराप धाङ को़न्क्षोकगी वाङगी कोरला स्येये मीदुक। 25घीझ्येरी ॱनाना स्यीसागीन मी सो़न्दी लाङना, होदे मी को़न्क्षोकगी भाङछेनक्या च्योक्रे झ्युङगीलाक धेनी ॱनामा लेन्ये धाङ ॱनामाला डोये झ्यीगीमालाक। 26धेनी छीवाने याङ सो़न्पो लाङगीनगी कोरला, खेक्याई मोशेगी क्षो़ठीमगी धेपला मे भारती धेता छेम्मागी खोक्ने को़न्क्षोकगी मोशेला, ‘ङा आब्राहामगी को़न्क्षोक धाङ ईसाकगी को़न्क्षोक धाङ याकोबगी को़न्क्षोक हीन।’ सुरी सुङगीन दे माढोक हो़ती? 27होझ्येरी को़न्क्षोक स्यीम्बुगी मेन्दा, सो़न्पोगी को़न्क्षोक हीन। खेक्या नोरदुक।”
घीरीने ॱनेक्षेस्योक का
(मेथा २२:३४-४०)
28क्षो़ठीमगी ॱलोपो़नक्याने च्यीक, होदुरु झ्युजुवा लाब घीरी ङेन्दी धे हो़तालाक। येशुगी सादुकीपाक्याला लेन घा ॱलोक्वा जेगीनगो थोरी, खी़ येशुला ढीवा श्यी़वालाक, “क्षो़ठीमगी का घीरीने गेक्षास्योकगो घी ले?”
29येशुगी लेन ॱलोक्वा जेपालाक, “काक्याने गेक्षेस्योक धाङपोगो, ‘ये ईस्राएल ङेन, चोवो होरी को़न्क्षोक नी, चोवो च्यीक च्यीगा लाक। 30धेनी खेक्या खेरी चोवो को़न्क्षोकला राङगी ॱङीङ तीङने धाङ सेम नाङने धाङ यीद घीरी धाङ राङगी स्युक घीरीने चेवा झ्यी।’#काठीम ६:५ 31धेनी ॱङीवागो, ‘ख्यो़ खेरी खीम्चेला ख्यो़राङला च्योक्रे चेवा झ्यी।’#लेवी १९:१८ दे ॱङीउने क्षे श्येम्मा का घीन्दा मेतालाक।”
32धेनी क्षो़ठीमगी ॱलोपो़नगी खोङबाला सुवालाक, “ॱलोपो़न ला, खेराङगी धेन्पा सुजुङ। को़न्क्षोक च्यीक च्यीगा हो़तालाक, खोङबा माना श्येम्मा सुवा मेतालाक। 33धेनी खोङबाला राङगी ॱङीङ तीङने धाङ नोक्साम घीरी धाङ स्युक घीरीने, चेवा झ्यीये धेनी राङगी खीम्चेला राङला च्योक्रे चेवा झ्यीये का दे ॱमारछो़ घीरी धाङ क्षो़पा घीरीने गेक्षेस्योक लाक।”
34धेनी येशुगी खी़ लेन खेवा झ्येरी तेरकीनगो शीक्ती, खोला सुवालाक, “ख्यो़ को़न्क्षोकगी ग्यासीने थाक्रीङा मीदुक।” होदे स्याम्ने मी सी़या, खोङबाला ढीवा श्यी़येगी झ्यी़ माझ्येवालाक।
मास्यीकागी कोरला ढीवा
(मेथा २२:४१-४६;२३:१-३६; लुका २०:४१-४७)
35क्षो़खाङ नाङदु ॱलापच्या ॱनाङी घाङला येशुगी सुवालाक, “मास्यीका नी दावीदगी भीजा लाक ॱनेरी, क्षो़ठीमगी ॱलोपो़नक्या घाङगी झ्येरी ॱना थुक्वाले? 36दावीद खोराङगी धाम्पे थुक्ङीगी थोक्ने देरे ॱनेवालाक, ‘चोवो को़न्क्षोकगी ङी चोवोला सुजुङ,
ख्यी़ डाक्याला ख्यी़ काङबा होकला, ङी माश्याक्कीन थुक्पे,
ख्यो़ ङी क्षाक ये स्योकला धो़क।’”#सुङगुर ११०:१
37“दावीद खोराङगी खोङबाला चोवो ॱनेरी श्यी़ना, मास्यीका घाङ झ्येरी दावीदगी भीजा झ्युङगीले?” धेनी मीछोक ॱमीच्यीकी माङागी, खोङबागी ॱलापच्या ॱमीच्यीकी ॱङेन्दा झ्येरी ङेन्दी धेपालाक।
38याङ येशुगी ॱलापच्या ॱनाङी सुवालाक, “क्षो़ठीमगी ॱलोपो़नक्याने नेम झ्येरी धो़क। खुङक्या घो़ रीङबो घो़न्दी ॱहाला-छुला ग्युक्ये दो़दालाक धेनी ठोमक्याला राङला मीक्याई घुस्याप झ्यीगीनगी रेवा झ्यीदालाक। 39धेनी छोक्खाङक्याला खुङक्या धेजा घायोकगो धाङ श्युक्टाक्याला धेजा थोवागो चालालाक। 40खुङक्या युक्जामाक्याई खाङबा तोङबा तो़न्दी, मीला तो़न्येगी क्षीला ॱमीच्यीकी ॱमो़लाम रीङा ग्यावालाक। देरेक्याला ॱयोल्ले क्षे क्षेपा फोक्कीलाक।”
युक्जामागी पुपा टाङगा
(लुका २१:१-४)
41धेनी येशु क्षो़खाङदु ॱङु पुजा च्यागामगी भोलोक्तु श्युक्ती, मीक्याई ॱङु पुगीनगो शीक्ती श्युक्पालाक। मी क्षुक्पु ॱमीच्यीकी माङागी ॱङु ॱमीच्यीकी माङा पुगीनगो, खोङबागी शीक्पालाक। 42धेनी युक्जामा उटे च्यीक होरे, शाङगी टाङगा ॱङी पुवालाक। 43धेनी खोङबागी खोरी ङेनेक्याला भो़री सुवालाक, “धेन्पाराङ ङा खेक्याला ॱनाहीन, दे उटे युक्जामा देगी, घीरीने माङस्योक पु हो़तालाक। 44घीझ्येरी ॱनाना श्येम्मा घीरीगी राङगी ग्युनोर माङाने पुवालाक हीना दे युक्जामा दे उटे झ्येरीयाः, राङगी मीजी पी़येला हो़गीन घीरी पु दुक।”
Currently Selected:
मारकु 12: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
