मारकु 8
8
येशुगी मी श्यीतोङला श्येलाक ॱनाङवा
(मेथा १५:३२-३९)
1होदे ङीमाक्याला याङ मीछोक क्षे च्यीक जोम्बालाक धेनी खुङक्याला शाग्यु घीया मेती घाङला, येशुगी राङगी ङेनेक्याला भो़री खुङक्याला सुवालाक, 2“दे मीक्या ङीमुला धेदी श्याक्मो सुम डी़। धा शायेला घीया मेता, ङा खुङक्याला ॱङीङ झ्येली। 3धा खुङक्याला फोवा तोङबाराङ, खुङक्याई नाङला झाङना खुङक्या लाम्गाला गेटु घीझ्येरी ॱनाना रीङगा ॱमीच्यीकी थाक्रीङाने होदुक।”
4धेनी खोङबागी ङेनेक्याई खोङबाला श्यी़वालाक, “देरे रीतोङ साज्याला, देक्याला तेरये शामा घाने जोरये?”
5धेनी येशुगी खुङक्याला, “ग्याङगा घाजो़ हेतो।” सुरी ढीला जेपालाक।
धेनी ङेनेक्याई, “धी़न हो़क।” ॱनेरी लेन श्यी़वालाक।
6येशुगी मीक्याला साला धेये का ॱनावालाक। धेनी खोङबागी ग्याङगा धी़नगो क्षाकला ॱनुम्दी, काटीन क्षे श्यी़री च्या जेपालाक। धेनी मीमाङक्याला टाम्येला, खोङबागी ङेनेक्याला ॱनावालाक धेनी ङेनेक्याई होदेरेराङ झ्येवालाक। 7खुङक्याला ङ्या च्युङा तीते रे हो़तालाक धेनी येशुगी होदेला झ्यीलाप जेदी, होदेगोवाः मीमाङक्याला टोम सुरी ङेनेक्याला सुवालाक। 8घीरीगी शेवालाक धेनी डावालाक। धेनी ल्हाक्मा दुबुक्या ङेनेक्याई धी़री, बाक्ता धी़न खावालाक। 9होदुरु मी श्यीतोङ चो़ हो़तालाक। धेनी शामा शेसारती, येशुगी खुङक्याला नाङला झावालाक। 10धेनी लाम्साङ खोङबा ङेनेक्यामुला डु नाङदु फेप्ती, धाल्मानुथा युछोकला फेप्पालाक।
फारुसीपाक्याई ताक श्यी़वा
(मेथा १६:१-४)
11फारुसीपाक्या होरी येशुमुला चो़लीङ झ्येरी, खोङबागी छो़ता झ्यीयेला, नाम्खाने ताक च्यीक तो़न्दा जेरोक ॱनेरी श्यी़वालाक। 12येशुगी सेम नाङने उप रीङबो ताङ जेदी सुवालाक, “दे मीराप दे घीझ्येरी ताक चालाले? ङा ॱङोन्ने ॱनाहीन, दे मीरापला ताक च्यीया ॱमेतो़न्गीलाक।” 13धेनी देक्याला भोरती, खोङबा डु नाङदु श्युक्ती ॱहाकीनला फेप्पालाक।
फारुसीपा धाङ हेरोदेगी गोवा कोरयेगी कोरला
(मेथा १६:५-१२)
14धेनी ङेनेक्याई शामा खेरती हुङये झेपालाक धेनी डु नाङदु खुङक्यामुला ग्याङगा च्यीक माना मेतालाक। 15धेनी येशुगी खुङक्याला सुवालाक, “चाङजे झ्यी, फारुसीपाक्या धाङ हेरोदेगी क्युरचीने शाप-शाप झ्यी।” 16खोराङक्यामुला शामा मेगीन झ्येरी, येशुगी देरे सुङालाक साम्दी, खुङक्याई च्यीकगी च्यीकला चो़लीङ झ्येवालाक। 17धेनी येशुगी देरे लाब खेन्दी खुङक्याला सुवालाक, “शामा मेगीनगी कोरला, खेक्या घीझ्येरी चो़लीङ झ्यीदाले? खेक्या धोराङा ॱहामेघोराई? खेक्याई सेम धोराङा ॱरा हो़ताले? 18खेक्या ॱमीक झ्येरीयाः ॱमेथोङाई धेनी आमच्योक झ्येरीयाः मेघोराई? खेक्याला धोराङा ढेन्बा मीदुई? 19ङी मी ॱङातोङला ग्याङगा ॱङा च्याई घाङला, खेक्याई दुबुक्या धुरी बाक्ता घाजो़ खाजो?”
खुङक्याई, “च्युङङी” ॱनेरी ॱनेवालाक।
20“धेनी मी श्यीतोङगी क्षीला ग्याङगा धी़न च्याई घाङला, खेक्याई दुबु धुरी बाक्ता घाजो़ खाजो?”
धेनी खुङक्याई, “धी़न” ॱनेरी ॱनेवालाक।
21धेनी खोङबागी खुङक्याला, “खेक्या धोराङा ॱहामेघोराई?” सुरी सुवालाक।
बेथसेदागी मी श्यारा च्यीक
22धेनी येशु धाङ ङेनेक्या बेथसेदारु ॱलेप्पालाक। धेनी मी रीङगागी श्यारा च्यीकला, येशुचारु ठीक्ती होरे, होदेला क्षाक जेरोझ्यी ॱनेरी श्यी़वालाक। 23खोङबागी होदे मीगी़ लाक्पा शीम्दी, युगी फीला ठीया जेपालाक। धेनी खी़ ॱमीकला जाक्छाप ढी़री, खोङबाराङगी क्षाक ॱङीगारा खी़ खाला श्या जेदी, खोला ढीवा ताङा जेपालाक, “धा थोङी?”
24खी़ याला टोङ झ्येरी तेरी ॱनेवालाक, “मी रे थोङी हीना मीक्या, दोङबो ग्युक्कीन च्योक्रे थोङी।” 25धेनी येशुगी धाब्ले राङगी क्षाक, मी दी ॱमीकला श्या जेपालाक। धेनी खी़ ॱमीक पेली घाङला, खी़ ॱमीकगो ढाक्ती घीरी साला थोवालाक। 26धेनी येशुगी खोला यु नाङदु माजुवा, स्यारी राङ खीमला सोङ सुरी झावालाक।
येशुराङ मास्यीका हीन्गीनगो पेटोगी खेलेन
(मेथा १६:१३-२०; लुका ९:१८-२१)
27केसारया फीलीप्पीगी युक्याला, येशु धाङ ङेनेक्या फेप्पालाक। लाम्गाला फेई घाङला, खोङबागी ङेनेक्याला ढीवा जेपालाक, “मीक्याई ङाला सु लाक ॱनीओ?”
28खुङक्याई खोङबाला ॱनेवालाक, “रीङगागी ठी़सो़ ॱनाङगीन योहान्ना ॱनी, रीङगागी एलीया ॱनी धेनी रीङगागी ॱङो़नस्येखेनक्याने च्यीक लाक ॱनी।”
29येशुगी खुङक्याला याङ ढीवा जेपालाक, “हीना खेक्या, ङा सु लाक सामी हेतो?”
पेटोगी ॱनेवालाक, “खेराङ नी, मास्यीकागो लाक।” 30धेनी खोङबागी कोरला सुलाः ॱमाना सुरी, खोङबागी खुङक्याला का ॱनावालाक।
राङगी छीवे कोरला येशुगी ॱङो़न सुवा
(मेथा १६:२१-२३; लुका ९:२२)
31“मी-भुगी दुक्पु माङा ङ्याङ घो़गीलाक, धेनी गोठीक्या धाङ क्षो़पो़न क्षेक्या धाङ क्षो़ठीमगी ॱलोपो़नक्याई ङोलोक झ्यीगीलाक धेनी सेगीलाक धेनी श्याक्मो सुम स्याम्ने, याङ सो़न्दी श्याङगीलाक।” सुरी येशुगी खुङक्याला ॱलापच्या ॱनाङयेला गो चुक्पालाक। 32येशुगी दे लाबगो सावो झ्येरी सुवालाक। धेनी पेटोगी खोङबाला शुरदु फेप श्यी़री, “देरे सुङये मेतालाक” ॱनेरी काको़न तावालाक।
33धेनी खोङबागी श्याल ग्युरती, ङेनेक्याला शीक्ती पेटोला काको़न ॱनावालाक, “धी़क ख्यो़ ङाने ॱहाला सोङ। घीझ्येरी ॱनाना ख्यी़ सेम को़न्क्षोक स्योकला मेन्दा मी स्योकला दुक।”
34धेनी खोङबागी मीछोकक्याला, राङगी ङेनेक्यामुला भो़री सुवालाक, “ङी स्याबाला हुङी दो़ना, राङला पारे राङगी ग्याङस्यीङ खुरती ङी स्याबाला डोङ। 35घीझ्येरी ॱनाना राङगी ॱरोक क्योप्कीनगी, ॱरोक स्योरकीलाक हीना राङगी ॱरोक, ङा धाङ ताम्शाङगी क्षीला स्योरतु च्युक्कीनगी ॱरोक क्योप्कीलाक। 36मी च्यीकला जीक्तेन घीरी थोप्नाः, राङगी ॱरोकगो स्योरना घी फेन थोक्ये? 37याङमेना राङगी ॱरोक स्योरना, घीन्गीया होदे धाब्ले खेरती हुङ ॱमीथुक्कीलाक। 38दे लोक्येम धाङ धीक्चेनगी मीराप दोङला, सी़ ङा धाङ ङी काला ङोजा झ्यीदी, होदेक्याला मी-भु राङगी यापगी शीजेगी नाङने, धाम्पे भाङछेनक्यामुला फेई घाङला, खी़या ङोजा झ्यीगीलाक।”
Currently Selected:
मारकु 8: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
