मारकु 9
9
1धेनी येशुगी खुङक्याला सुवालाक, “दुरु लाङगीनक्याने रीङगागी को़न्क्षोकगी ग्यासी वाङला फेप्कीनगो माज्यागीन थुक्पे, स्यीगीमालाक ॱनेरी, ङा धेन्पाराङ ॱनाहीन।”
येशुगी कुयीप ग्युरवा
(मेथा १७:१-१३; लुका ९:२८-३६)
2श्याक्मो ढुकगी स्याम्ला, येशुगी पेटो धाङ याकोब धाङ योहान्नाला राङमुला ठीक्ती, री थोवा च्यीकला खोङबाक्या च्यीगा फेप्पालाक। धेनी खुङक्याई दोङदु येशुगी कुयीप ग्युरपालाक। 3धेनी खोङबागी नाशागो हो़क ग्याप्ती, जीक्तेनदु ठी़गीन सी़या ठी़री होदेरे काउ शो ॱमीथुप्कीन, काउ झ्युवालाक।
4होदुरु खुङक्याई दोङदु एलीया धाङ मोशे फेप्ती, येशुमुला सुङला सुङगीनगो थोवालाक। 5-6खुङक्या ॱमीच्यीकी जीक्ती, धेनी पेटोगी घीया श्यी़ ॱमास्येपा, येशुला देरे श्यी़वालाक, “ॱलोपो़न ला, हेक्या दुरु हो़गीनगो घा झ्युजुङ। धा खोङबाला च्यीक धाङ मोशेला च्यीक धाङ एलीयाला च्यीक झ्येरी, हीकी श्युक्जा सुम शोउ।” 7धेनी ॱरीङ च्यीकगी खोङबाक्याला तुम्दी, होदे साङने केक च्यीकगी देरे सुवालाक, “दे ङी से ढीन्चेनगो हीन। खी़ काला ङेन श्यीक।” 8धेनी लाम्साङ ॱहाला-छुला ती घाङला, खुङक्याई येशु माना श्येम्मा सुलाः होदुरु ॱमाथोवालाक।
9रीने माला भावी घाङला, येशुगी खुङक्याला “मी-भु छीवाने याला माश्याङगीन थुक्पे दे लाब दे सुलाः ॱमास्ये” सुरी का ॱनावालाक। 10खुङक्याई लाब दे राङगी सेमला श्याक्पालाक हीना छीवाने सो़न्पो श्याङगीनगी दो़न्दाकगो, घी हीन्ढी़ ॱनेरी च्यीकगी च्यीकला ढीवालाक।
11खुङक्याई खोङबाला श्यी़वालाक, “क्षो़ठीमगी ॱलोपो़नक्याई घीझ्येरी एलीया एन्ला फेप घो़गीलाक सुङाले?”
12धेनी येशुगी खुङक्याला सुवालाक, “एलीया एन्ला फेप्ती, घीरी साबा शोगीलाक। धा ॱहाना मी-भुगी दुक्पु माङा ङ्याङ घो़गुलाक, धेनी घीरीगी ॱमीचीगीलाक ॱनेरी, सुङरापला घाङगी झ्येरी ढीक्दो? 13हीना ङा खेक्याला ॱनाहीन, एलीया होसालाक धेनी खी़ कोरला ढीक्टीया च्योक्रे, खुङक्याई घी थेगीनगो खोला झ्येवालाक।”
डे जुजा भीजा च्यीक ढाक्पा
(मेथा १७:१४-२१; लुका ९:३७-४३)
14धेनी खोङबाक्या ङेने श्येम्माक्याचारु फेई घाङला, मीछोक क्षे च्यीकगी घुङदु क्षो़ठीमगी ॱलोपो़नक्याई ङेनेक्यामुला चो़ ग्याप्कीनगो शीक्पालाक। 15धेनी मीछोकक्याई येशुला ज्यालुङ मेताला, खुङक्या ॱमीच्यीकी ॱहालेरी, खोङबाचारु भाङ तारी होवालाक धेनी खोङबाला फेप्सु श्यी़वालाक।
16येशुगी ङेनेक्याला ढीवा ताङा जेपालाक, “खेक्या खुङक्यामुला घी कोरला चो़ ग्या?”
17मीछोकगी खोक्ने, मी च्यीकगी लेन ॱलोक्पालाक, “ॱलोपो़न ला, खोङबागी डुङदु ङी भीजा ठीक्ती होहो़क। भीजा देला डे जुजा झ्येरी, लाब ताङ ॱमीथुप्कीन झ्युदुक। 18डेगी खोला शीम्यी घाङला, नाम्हीना खोला साला धावी धेनी खी़ खाने बोवा तो़न्दी, सोक्या ढीक्यी धेनी खी़ शु घीरी धामी। होझ्येरी ङी खेराङगी ङेनेक्याला, डे दे तो़न्रो झ्यी ॱनेरी श्युवी, हीना खुङक्याई तो़न थुक्कु मीदुक।”
19धेनी येशुगी खुङक्याला सुवालाक, “धेपा मेगीन मीरापक्याओ, ङा खेक्यामुला नाम थुक्पे धेये? खेक्याला नाम थुक्पे शो़पा झ्यीये? भीजा दे ङीचारु ठीक्ती स्योक।” 20खुङक्याई भीजागोला ठीक्ती होवालाक। धेनी खोङबाला ज्यालुङ मेताला, डेगी़ भीजागोला साला धाप्पालाक धेनी खी़ खाने बोवा थो़न्दी डेलोक ग्याप्पालाक।
21धेनी येशुगी आकीगोला ढीवा ताङा जेपालाक, “देरे झ्युरी घाजो़ डी़ओ?”
धेनी आकीगी़ ॱनेवालाक, “खो च्यीमेने ॱहालाराङ देरे झ्युजुङ। 22धेनी खोला सेयेला थेङमा ॱमीच्यीकी माङा, डे देगी खोला मे धाङ क्षु नाङदु ॱयुक्जुङ। हीना खेराङगी घी जे थुप्ये हो़ना, हेला ॱङीङजे शीक्ती हेला रोवा जेरोनाङ।”
23येशुगी खोला सुवालाक, “जे थुप्ना ॱनेरी घीझ्येरी ॱनाले? धेपा झ्यीना झ्यी ॱमीथुप्ये घीया मेतालाक।”
24लाम्साङ आकीगी़ केक ग्याप्ती ॱनेवालाक, “ङा धेपा झ्यीदीहो़क, हीना ङी धेपा क्योवा दुक। ङाला धेपा झ्यीयेला रोवा जेरोनाङ।”
25येशुगी मीछोकक्या रुप्ती, खोराङचारु हुङगीनगो शीई घाङला, खोङबागी डे गोला काको़न ॱनावालाक, “ये, लाब ताङ ॱमीथुप्कीन धाङ ङेन ॱमीथुप्कीन डे ख्यो़, खोने थो़न धेनी याङ खी़ नाङदु फुक्की माजु, ॱनेरी ङा ख्यो़ला का तेराहीन।” 26धेनी डेगु फेरा ग्याप्ती, भीजागोला साला ॱमीच्यीकी आ धाप्ती होदेने थो़न्बालाक। भीजागो रो च्योक्रेला ग्युरती, मी माङक्षेगी खो स्यीजुङ ॱनेवालाक। 27हीना येशुगी खी़ लाक्पाने शीम्दी, याला ॱलाङा जेपालाक धेनी खो लावालाक।
28धेनी खोङबा खीमदु फेप्ती, खोङबागी ङेनेक्याई खोङबाला शुरला श्यी़वालाक, “हेक्याई घीझ्येरी होदेला तो़न ॱमाथुक्पाले?”
29धेनी खोङबागी सुवालाक, “देरेक्या ॱमो़लामने माना घानेयाः तो़न ॱमीथुक्कीलाक।”
30धेनी खोङबाक्या होदेने थो़न्दी, गालील युछोकने फेप्पालाक। खोङबाक्या घारु हो़गीनगो मीक्याई ॱहामाघोरास्योक ॱनेरी, येशुगी होदेगो ॱङेवा जेपालाक। 31घीझ्येरी ॱनाना खोङबागी ङेनेक्याला देरे सुरी, क्षो़ तो़न जेदी हो़तालाक, “मी-भु नी मीक्याई लाक्पाला ची ग्याप्कीलाक धेनी खुङक्याई खोला सेगीलाक। धेनी खोला सेती श्याक्मु सुमगी स्याम्ला, खो छीवाने सो़न्गीलाक।” 32हीना ङेनेक्याई सुङला दी दो़न्दाकगो ॱहामाघोरपालाक धेनी ढीवा श्यी़येला जीक्पालाक।
ङेनेक्या नाङने क्षे सु हुङयेगी कोर
(मेथा १८:१-५;१०:४२; लुका ९:४६-५०)
33येशु धाङ ङेनेक्या काफारनाहुमदु ॱलेप्पालाक। धेनी खोङबा खाङबा नाङदु फेप्ती, खुङक्याला ढीवा ताङा जेपालाक, “लाम्गाला खेक्या घीन्गी कोरला चो़ ग्याप्पा?” 34लाम्गाला खुङक्याई खोराङक्याने क्षेस्योक सु हीन्गीनगी कोरला, चो़पा ग्यापक्या झ्येरी खुङक्या खाबा धेपालाक।
35धेनी खोङबा श्युक्ती, ङेने चुङङीला भो़री खुङक्याला सुवालाक, “एन्योक झ्युङी दो़गीनगो, घीरीने स्याम्योक झ्युङ घो़गीलाक धेनी घीरीगी ॱयोक्पो ग्युक घो़गीलाक।” 36धेनी येशुगी टु च्यीमे च्यीक ठीक्ती, खुङक्याई घुङदु श्याक्पालाक। धेनी टु देला राङगी कुपाङदु ॱनुम्दी, खुङक्याला सुवालाक, 37“ङी मीङने टु च्यीमे देला सी़ खेलेन्दी, होदेगी़ ङाला खे लेन्दालाक। धेनी ङाला खे लेन्गीनगी़, ङा मेन्दा ङाला ताङगीनला खे लेन्दालाक।”
38योहान्नागी खोङबाला श्यी़वालाक, “ॱलोपो़न ला, खेराङगी छेनने मी च्यीकगी डे तो़न्गीनगो, हीकी थोजुङ धेनी खो होराङगी स्याबाला मेडागीन झ्येरी, हीकी होदेला काक्पी।”
39हीना येशुगी सुवालाक, “खोला ॱमाकाक, घीझ्येरी ॱनाना ङी मीङने ॱहाङसागीन लेगा झ्यीगीनगी, लाम्साङ ङी कोरला लाब ङेन्पा ताङगीमालाक। 40घीझ्येरी ॱनाना होरी डा मीझ्यीगीनगो, होरी क्षोकला हुङालाक। 41ङा खेक्याला धेन्पाराङ ॱनाहीन, खेक्या मास्यीकागी हीन्गीन झ्येरी, मी सी़ खेक्याला क्षु फोरा घाङ थुङयेला तेरना, खोला थोप्घोये ज्यागागो थोप्कीलाक।”
धीक्पा झ्यीदु च्युक्कीनगी कोर
(मेथा १८:६-९; लुका १७:१-२)
42येशुगी याङ सुवालाक, “मी सु च्यीया ङाला धेपा झ्यीगीन टुवाक्याने च्यीकला, धीक्पा झ्यीदु च्युक्ना मी दी मीक्पाला छोराकगी धोगोङ क्षे च्यीक ताक्ती, खोला ग्याछो नाङदु ॱयुक्ना घा हुङगुलाक। 43धेनी ख्यी़ लाक्पागी ख्यो़ला धीक्पा झ्यीदु च्युक्ना, होदे लाक्पागो च्यो़। ख्यी़ लाक्पा ॱङीगारा खेरती, ॱङ्यावादु नामा ॱमीस्यीगीन मेला डोयेने ल्हाक लाक्दुम झ्युरी थामेपे छेसोक नाङदु जुना घा लाक। 44[ॱङ्यावादु बु ॱमीक्षीयालाक धेनी मेया ॱमीस्यीयालाक।]#यस्याया ६६:२४ 45धेनी ख्यी़ काङबागी धीक्पा झ्यीदु च्युक्ना, होदे च्यो़। काङबा ॱङी झ्येरी ॱङ्यावादु जुयेला ल्हाक, श्याक्योवा झ्युरी थामेपे छेसोक नाङदु जुना घा लाक। 46[ॱङ्यावादु बु ॱमीक्षीयालाक धेनी मेया ॱमीस्यीयालाक।]#९:४६ मारकु ९:४४,४६ दे गीरीक धेप रीङगाला मेतालाक। 47धेनी ख्यी़ ॱमीकगी ख्यो़ला धीक्पा झ्यीदु च्युक्ना, होदे तो़न्दी ॱयुक। ख्यी़ ॱमीक ङीगारा झ्येरी ॱङ्यावादु डोयेला ल्हाक, ॱमीक च्यीक मेता को़न्क्षोकगी ग्यासीला डोना घा लाक। 48ॱङ्यावादु बु ॱमीक्षीयालाक धेनी मेया ॱमीस्यीयालाक।
49“छा तोरती क्षो़पा चाङमा शोगीन च्योक्रे, मी घीरीला मेगी चाङमा शोगीलाक। 50छा घा लाक हीना क्षाई ढोवागो येना, होदेला घाङगी झ्येरी छाढोवा शोये? छाई ढोवा च्योक्रे, ख्यो़ झ्युङ धेनी खेराङक्या नाङदु थी़न्दी धो़क।”
Currently Selected:
मारकु 9: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
