Chenesis 26
26
1Atuk o̱ yakni ya̱ Eblaham ahanta nitak ma, hohchʋfo chito ʋmmona tok ʋt a̱sha na, anonti hohchʋfo chito tok. Mihma Aisak ʋt Filistin okla i̱ mi̱ko Abimelek im onʋt, Kela ya̱ ona tok.
2Mihma Chihowah yʋt i̱ haiaka cha, Echip a̱ chik aiyo kashke: yakni chim anoli la chi̱ kak o̱ ish ahantashke.
3Yakni ilʋppak o̱ nowʋt a̱ya yosh ish ahantashke, mikma chibafoyuka lish, chi yukpali lashke; chishno, micha chi aiunchololi yak o̱ yakni ilʋppa moma ka̱ ima la chi̱ hoka, micha anumpa kʋllo yʋmma anumpulit chi̱ki Eblaham a̱ im il onochi li tok ʋt aia̱hlichi la chi̱ hoke.
4Micha chim ishtatiaka ya̱ apaknʋchit ʋba fochik choyuhmichi la chi̱ hoke; mikmʋt yakni ilʋppa moma ka̱ chim ishtatiaka ya̱ ima la chi̱ hoke: mikma chim ishtatiaka yak o̱ oklushi moma yakni paknaka aiasha kʋt ai yukpa hi oke.
5Eblaham ʋt ʋm anumpa ha̱ im antiʋt, atokolit i̱ miha li, micha ʋm anumpa ʋlhpisa, micha a̱ nanʋlhpisa a puta aiena ka̱ holitobli tok oka, achi tok.
6Mihma Aisak ʋt Kela ya̱ ahanta tok.
7Atuk o̱ yakni yʋmma hatak ʋhleha hʋt tekchi ya̱ im a ponaklo tok; mihma, An tek oke, achi tok: Sa tekchi yoke, achi kʋt nukshopa hokʋt; yakni yash hatak ʋhleha hʋt Lebekah ak atuk pulla mak o̱ sʋbi yoba na, achi hatok; pisaka aiokli hatuk oka.
8Atuk o̱ yakohmi tok, yʋmma ahanta tuk a̱ hopakit taiyaha ma, Filistin okla i̱ mi̱ko Abimelek ʋt okhissushi pit a hopo̱koyot pisa ma, yakeh, Aisak ʋt tekchi Lebekah ya̱ itiba ihlauʋlli hosh a̱shwa na pisa tok.
9Mihma Abimelek ʋt Aisak a̱ hoyo cha, Yakeh, chi tekchi pullʋshke: yohmi hokak o̱ nanta katiohmi ho̱, An tek oke, ish achi tuk oh cho? achi tok. Mihma Aisak ʋt, Ishit sʋlli yoba na, achi li hatuk oke, im achi tok.
10Mihma Abimelek ʋt, Ilʋppak osh nanta ho̱ ish pi̱ yʋmihchi cho? okla hash achʋfa kʋt chi tekchi ya̱ yʋmmak fokalichit iba tʋshka hinla tuk oke; yohmi tuk ma nanashʋchi ish pi onocha hetuk oke, achi tok.
11Mihmʋt Abimelek ʋt im okla moma ka̱ atokolit i̱ mi̱hʋt, Kʋna hosh hatak ilʋppa, keyukmʋt tekchi ya̱ potolikmʋt, illi pullashke, achi tok.
12Yohmi ma Aisak ʋt yakni yʋmma a hokchi cha, afʋmmi mih makinli ka̱ inlohmi tahlepa achʋfa ho̱ ishi tok: mihma Chihowah yʋt yukpali tok.
13Mihma hatak ash osh holitopa cha, tikba ma̱ha̱yʋt holitopa kʋt i̱ shahlit ma̱ha̱ya cha, holitopa fehnʋt taha tok.
14Imila̱yak ʋlhpoa chipinta, micha imila̱yak ʋlhpoba hochito, micha tishu laua fehna aiena kʋt im aiasha tok: mihma Filistin ʋhleha hʋt isht i̱ potʋnno tok.
15I̱ki Eblaham ahanta nitak a̱ i̱ki in tishu ʋhleha hʋt kʋli hofobi moma ka̱ kulli tok a̱ Filistin ʋhleha hʋt i̱ kamalit lukfi a̱ isht alotoli tok oka.
16Mihma Abimelek ʋt Aisak a̱ Ish pi̱ filʋmmashke: kʋllo kʋt ish pi̱ shahli fehna hokʋt, im achi tok.
17Mihma Aisak ʋt yʋmma ʋttʋt ia mʋt, Kelaokfa ak o̱ ʋlhtipo ha̱ hilechi cha, yʋmmak o̱ ahanta tok.
18Micha i̱ki Eblaham ʋt ahanta nitak mʋt, kʋli hofobi oka okla kulli tok ash Aisak ʋt anonti kulli tok: Eblaham ʋt illi ha ya̱ Filistin ʋhleha hʋt i̱ kamali tok oka: micha hohchifo ha̱ i̱ki ʋt hochifo tok akinli ho̱ ita hochifo tok.
19Atuk o̱ Aisak in tishu ʋhleha hʋt okfa ha̱ a kulli mʋt oka tobohonli kʋli ho̱ ahayuchi tok.
20Atuk o̱ Kela ya̱ nan ʋlhpoa apistikeli ʋhleha hʋt Aisak i̱ nan ʋlhpoa apistikeli ʋhleha ha̱ im afoʋt, Oka ʋt pimmi hoke, achi tok: mihma kʋli hofobi yash hohchifo ha̱ Esek achi tok; im afoa tuk ak atok.
21Atuk o̱ kʋli hofobi inla ho̱ okla kulli tok; atuk o̱ yʋmmak kia afoa tok: mihma hohchifo ha̱ Sitnah achi tok.
22Mihma yʋmma ʋtta tuk ʋt kanʋlli cha, kʋli hofobi inla ho̱ kulli tok; mihma yʋmmʋno ik im afowo tok: mihma hohchifo ha̱ Lehobolh achi tok: micha, Himak ano Chihowah yʋt aiasha pin chitoli hoke; yohmi ho̱ yakni ya̱ waya achukmʋt il aiasha chi̱ hoke, achi tok.
23Atuk osh yʋmma ʋtta tuk ʋt iʋt Bee‐sheba ya̱ ona tok.
24Atuk o̱ mih nitak akinli ka̱ Chihowah yʋt i̱ haiaka cha, Chi̱ki Eblaham a̱ in Chitokaka sia hoke: chi nukshopa ná, an tishu Eblaham ak atuk pulla kak o̱ chibafoyuka lish chi yukpalit chim ishtatiaka ya̱ apaknʋchi la chi̱ hoke, achi tok.
25Mihma yʋmma alta ai ikbi cha, Chihowah hochifʋt i̱ pa̱ha̱ya tok; micha yʋmmak o̱ im ʋlhtipo ya̱ a hilechi tok: mihma yʋmmak o̱ Aisak in tishu ʋhleha hʋt kʋli hofobi ya̱ a kulli tok.
26Atuk o̱ Abimelek, micha i̱ kana ʋhleha ha̱ achʋfa Ahussalh, micha in tʋshka chipota i̱ kʋpitʋni chito Fikol aiena kʋt Kela a̱sha tuk ʋt Aisak a̱ im ona tok.
27Mihma Aisak ʋt, Hʋs sa̱ nukkilli cha, hʋchi̱ filʋmmichit hʋs sa chʋffichi tuk okʋt, nanta katiohmi ho̱ hʋs sʋm ʋla cho? im achi tok.
28Mihma Chihowah yʋt chibafoyuka pulla ka̱ e pisa tuk oke: mihmʋt himak a̱ anumpa kʋllo ʋt pitin takla itonlashke, pishno, micha chishno pulla ka̱ pitin takla itonlashke; yohmi kʋt chishno ya̱ nan e chitim apesashke.
29Yʋmohmi ho̱ nana e chi̱ kaniohmichi tuk keyu ka̱, micha nana kʋt achukma bieka ho̱ e chi̱ yumihchi tuk, micha achukma ho̱ a̱yashke, e chim ai ahni tuk oka̱, chiyuhmit chik pi hotopalo kashke: himak a̱ Chihowah yʋt yukpali chia hoke, okla achi tok.
30Mihma Aisak ʋt impʋchi im ikbi na, impʋt nan ishkot okla aiasha tok.
31Atuk osh onnahinli fehna ho̱ okla wakaya cha, anumpa kʋllo itim il onochi tok: mihma Aisak ʋt ik iá ahni na, i̱ filʋmmit iti̱ kana achukma hosh ilhkoli tok.
32Atuk o̱ mih nitak akinli ka̱ yakohmi tok, Aisak in tishu ʋhleha hʋt kʋli hofobi kulli tuk ʋt ant im anolit, Oka il ahayuchishke, achi tok.
33Mihma Sheba hochifo tok: yʋmohmi tok o̱ himak nitak a̱ tʋmaha holihta yʋt hohchifo kʋt Bee‐sheba moma hoke.
34Atuk o̱ Esau ʋt afʋmmi pokoli ushta hosh Hittait hatak Beeli ushetik Chutilh a̱, micha Hittait hatak Elon ushetik Bashemalh a̱ itauwaya tok.
35Yʋmmak oka Aisak micha Lebekah ʋt ishit nukha̱klo beka tok.
Currently Selected:
Chenesis 26: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
