Chenesis 37
37
1Mikma i̱ki ʋt okla inla yosh yakni aiahanta tok; Kenan yakni ak o̱ Chekob ʋt ai ahanta tok.
2Ilʋppak osh Chekob in chuka achʋfa ya̱ anoli holisso yoke: Chosef ʋt afʋmmi auah untuklo hosh itibapishi ʋhleha ha̱ takla nanʋlhpoa chipinta impʋchi hosh ahanta tok, micha ʋlla yʋt i̱ki tekchi ʋhleha Bilhah ushi ʋhleha micha Silpah ushi ʋhleha hak o̱ takla ahanta tok; atuk osh Chosef ʋt nana ik achukmo yʋmohmi tuk a̱ i̱ki ya̱ ont im anoli tok.
3Sipoknit taiyaha hosh ushi im ʋtta tok, atuk osh Islael ʋt Chosef a̱ holitobli kʋt im ʋlla ʋhleha moma ka̱ i̱ shahlichi tok: micha nafohka pisa il aiyukali yo̱ im ikbi tok.
4Atuk o̱ i̱ki ʋt itibapishi ʋhleha moma ka̱ i̱ shahlichit holitobli na itibapishi ʋhleha hʋt pisa mʋt, okla i̱ nukkilli cha, i̱ kanʋt im anumpula he keyu tok.
5Atuk o̱ Chosef ʋt naholhpokna ho̱ holhpokna cha, itibapishi ʋhleha ha̱ im anoli tok: mihma i̱ shahlichit i̱ nukkilli tok.
6Micha, Naholhpokna ilʋppa sa holhpokna tuk a̱ ho hakló, hʋchim asilhha lishke.
7Yakeh, osapa anu̱kaka ya̱ onush takchi hosh il a̱sha tuk o̱, yakeh, a̱ sita hʋt wakaya cha apissʋt hikia tuk oke; mihma yakeh, hʋchi̱ sita hʋt a̱ sitha ha̱ hiohlit apakfoyupa cha, im akachunoli tuk oke, im achi tok.
8Mihma itibapishi ʋhleha hʋt, Ish pi̱ mi̱ka chi̱ ho̱ mʋhli cho? micha ish pi̱ shahla chi̱ ho̱ mʋhli cho? im achi tok: micha holhpokna, micha im anumpa aiena atuk pulla kak o̱ i̱ shahlichit i̱ nukkilli tok.
9Atuk osh himakma naholhpokna ho̱ holhpokna cha, itibapishi ha̱ im anolit, Yakeh, himak a̱ naholhpokna ho̱ sa holhpoknʋshke: mihma yakeh, hʋshi, micha hʋshi ninak a̱ya, micha fochik auahachʋfa hash osh ʋm akachunoli tuk oke, achi tok.
10Mihmʋt i̱ki, micha itibapishi ʋhleha ha̱ im anoli tok: mihma i̱ki ʋt im alʋmmit, Ilʋppak osh holhpokna nanta mak o̱ chi holhpokna tuk oh cho? Ʋno, micha chishki, micha chitibapishi ʋhleha il aiena kʋt ant akachunolit aka pit e chin hlipkʋcha chi̱ ho̱ mʋhli cho? im achi tok.
11Mihma itibapishi ʋhleha hʋt i̱ potʋnno tok: amba i̱ki ʋto anumpa ha̱ ithaiyanʋt a̱ya tok.
12Atuk o̱ itibapishi ʋhleha hʋt i̱ki i̱ nanʋlhpoa chipinta ya̱ impʋcha chi̱ hosh Shekem a̱ ilhkoli tok.
13Mihma Islael ʋt Chosef a̱, Chitibapishi ʋhleha hʋt Shekem a̱ nanʋlhpoa chipinta ya̱ ai impʋchi keyu cho? Inta, pit i̱ chi chʋffichi lashke, im achi tok. Mihma, yak hikia lishke, im achi tok.
14Mihma, Iá, chim asilhha lishke, chitibapishi ʋhleha hʋt achukma hosh a̱shakma, micha nanʋlhpoa chipinta ʋt achukma hosh a̱shakmá, nanakmá, ont pisa cha, anonti anumpa isht is sʋm ʋlashke, im achi tok. Yohmi mʋt Heblon okfa ha̱ a chʋffichi na, Shekem a̱ ona tok.
15Atuk o̱ hatak osh ahayuchi ma, Yakeh, yakni haiaka ya̱ fullokahanchi tok: mihma hatak ash osh i̱ ponaklot, Nanta ish hoyo cho? achi tok.
16Mihma Itibapishi li ʋhleha ha̱ hoyo li hoke: kanima yo̱ i̱ nanʋlhpoa ya̱ ai impʋchikma ʋm anolí, chim asilhha lishke, achi tok.
17Mihma hatak ash osh, Ilʋppa asha tuk ʋt ilhkoli tuk oke: Tohlan ak o̱ kiloh iá, achi ho̱ ha̱klo li tuk oka, achi tok. Mihma Chosef ʋt iakaiyʋt ia tuk osh itibapishi ʋhleha ha̱ Tohlan a̱ ont ai ahayuchi tok.
18Atuk o̱ hopaki ho̱ minti na, bili̱ka ik lo ki̱sha ho̱ pisa mʋt, haksichi hosh ʋba chi̱ kʋt itim apesa tok.
19Micha ilap bi̱ka, itim anumpulit, Yakeh, ilʋppʋt holhpokna shahli ash osh mintishke.
20Yʋmohmi hoka inta, himak a̱ iloh ʋbashke, micha hichukbi kanima pit eho kanchashke: micha, Nampoa okpulo hosh ʋbit ʋpʋt tahli tuk oke, iloh achashke; mikma holhpokna tuk ʋt kaniohmi na eho pisashke itim achi̱ tok.
21Mihma Luben ʋt haklo cha, ibbak a̱ a kohchit hlakofichi tok; micha kiloh abo kashke, achi tok.
22Micha Luben ʋt, Issish a̱ hʋch ik hlatablo kashke, amba yakni haiaka hichukbi hikia ilʋppak o̱ pit hʋsh kanchi cha, hʋch ibbak hʋch ik onocho kashke, im achi tok, ibbak a̱ a kohchit hlakofichi cha, anonti i̱ki ya̱ falaminchit pit ima chi̱ hosh yʋmohmi tok.
23Atuk o̱ yakohmi tok, Chosef ʋt itibapishi ʋhleha ha̱ im ona ma, Chosef a̱ i̱ nafohka, i̱ nafohka pisa ilaiyukali fohka kash i̱ shu̱fi tok.
24Micha okla ishi cha, hichukbi yo̱ pit fohki tok: mihma hichukbi ya̱ nana iksho, oka ʋt iksho tok.
25Micha okla binilit pʋska ʋpa tok; atuk osh akachakalit hopo̱koyo ma, yakeh, Ishmaelait hatak kanohmi kʋt Kileat minti hosh i̱ kamel ʋt nabalama, micha balsam, micha hlitili mʋh shali ho̱, Echip isht ona chi̱ hosh a̱ya tok.
26Mihma Chutah ʋt itibapishi ʋhleha ha̱, Pitibapishi ha̱ e bi cha, im issish a̱ e luhmi kak osh nanta ho̱ ishit pim ai achukma hinla cho?
27Inta, Ishmaelait ʋhleha hak o̱ iloh i̱ kanchi cha, pibbak ʋt ik onʋtoyulo kashke; pitibapishi, micha pi nipi yoka, im achi tok: mihma itibapishi ʋhleha hʋt ʋlhpesa, ahni tok.
28Yohmi ma Mitianait nan‐itatoba ʋhleha hʋt ant a̱ya tok; mihma Chosef a̱ halʋllit ʋba takalichit, hichukbi ya̱ a kohchi cha, Chosef a̱ tʋli hʋta tushahli pokoli tuklo ho̱ Ishmaelait hatak ʋhleha hash i̱ kanchi tok: mihma Chosef a̱ Echip a̱ isht ona tok.
29Atuk o̱ Luben ʋt falamʋt hichukbi ya̱ ona tok: mihma yakeh, Chosef ʋt hichukbi ya̱ iksho tok: mihma i̱ nafohka ya̱ hlilʋffi tok.
30Mihmʋt itibapishi ʋhleha ha̱ falamʋt im ona cha, Ʋlla yash osh ikshoshke: yohmi ka̱ ʋno ʋto katima yak o̱ ia la chi̱ cho? achi tok.
31Atuk o̱ Chosef i̱ nafohka yash ishi cha, issi kosomushi ya̱ ʋbi mʋt, nafohka yash issish a̱ okʋchi tok.
32Mihmʋt nafohka pisa ilaiyukali yash okla pila na i̱ki ya̱ isht im ona tok; micha, Ilʋppa il ahayuchi tuk oke: yohmi hoka chiso i̱ nafohka yokmá, keyukmá nanakmá himak a ish ithʋnashke, achi tok.
33Mihma ithana cha, Sʋso i̱ nafohka yoke; nampoa okpulo ʋt ʋpʋt tahli tuk oke: Chosef ʋt nipʋt taha pullʋshke, achi tok.
34Mihmʋt Chekob ʋt i̱ nafohka ya̱ hlilʋffi cha, na hishi tʋnna isht ʋskofʋchi mʋt, nitak laua ho̱ ushi ya̱ ishit ya̱ha̱ya tok.
35Mihma ushi ʋhleha moma, micha ushetik ʋhleha moma aiena kʋt wakayʋt hopohlʋli bʋnna tok: yohmi kia hopohla ik bʋnno tok; micha, Ya̱ha̱yʋt ahollohpi ya̱ sʋs o hash im ona la chi̱ hokʋt, achi tok. Yʋmohmit i̱ki ʋt ishit ya̱ha̱ya tok.
36Mihma Mitianait ʋhleha hash osh Echip a̱ isht ona cha, Falaoh in tishu, micha nan atoni i̱ kʋpitʋni Potifa ya̱ i̱ kanchi tok.
Currently Selected:
Chenesis 37: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
