Chenesis 38
38
1Atuk o̱ nitak yʋmma yakohmi tok, Chutah ʋt itibapishi ʋhleha ha̱ i̱ filʋmmit Atullamait hatak osh hohchifo kʋt Hilah ya̱ i̱ fullotʋt ont iba chukowa tok.
2Micha Chutah ʋt yʋmma Kenanait hatak, yʋmma hohchifo kʋt Shuah ushetik o̱ pisa tok; mihmʋt ishi cha, iba chukowa tok.
3Mihma chakali cha, ʋlla nakni yo̱ eshi tok; mihma hohchifo ha̱ El achi tok.
4Atuk o̱ anonti chakali cha, ʋlla nakni yo̱ eshi tok; micha hohchifo ha̱ Onan achi tok.
5Atuk osh himakma anonti chakali cha, ʋlla nakni yo̱ eshi tok; micha hohchifo ha̱ Shelah achi tok: mihmʋt eshi ma, Chutah ʋt Chesib ak o̱ anta tok.
6Atuk osh Chutah ʋt ushi ʋttahpi El a̱ tekchi ya chi̱ ho̱ ohoyo yʋmma hohchifo kʋt Tama yo̱ isht ima tok.
7Atuk o̱ El Chutah im ʋttahpi hʋt Chihowah itikba ya̱ haksi hatuk o̱ Chihowah ʋt ʋbi tok.
8Atuk o̱ Chutah ʋt Onan a̱, Chitibapishi tekchi ya̱ iba chukowʋt ish itauwaya cha, chitibapishi ha̱ aiunchololi a̱ ish i̱ hilechashke, im achi tok.
9Mihma Onan ʋt ishtatiaka yʋt immi ha he keyu kʋt ithana tok: atuk osh yakohmi tok, itibapishi tekchi ya̱ iba chukowa mʋt, itibapishi ishtatiaka ik emo ka chi̱ kʋt yakni a̱ on hlatʋbli tok.
10Nana yʋmihchi tuk ʋt Chihowah ya ik im ʋlhpesacho tok: yohmi hatuk o̱ yʋmmak kia ʋbi tok.
11Yohmi ma Chutah ʋt ipok Tama ya̱, Ohoyo i̱ hatak illi yosh chi̱ki in chuka ish ahanta tuk o̱, sʋso Shelah ʋt hofantit tahak mak ashke, im achi tok: (yʋmmak kia itibapishi ʋhleha hakinli chohmit illi yoba ná achi hatuk okʋt:) mihma Tama yʋt i̱ki in chuka ont ahanta tok.
12Atuk o̱ nitak hopakit taha ma, Shuah ushetik Chutah tekchi ʋt illi tok; atuk osh Chutah ʋt hopohla cha, in chukfʋlhpoa hishi ʋmo puta kʋt Timnalh a̱ asha tuk o̱ i̱ kana Atullamait hatak Hilah yʋt api̱ha ho̱ im ona tok.
13Atuk o̱ Tama ya̱ im anolit, Yakeh; chimʋfo ʋt in chukfʋlhpoa hishi ʋmot Timnalh a̱ iʋshke, achi tok.
14Mihma ohoyo i̱ hatak illi i̱ nafohka ya̱ shu̱fi mʋt, nashuka isht ompoholmo ya̱ isht il ompohomo cha, il apakfohli mʋt, ahikia yʋmmʋt Timnalh hina kʋli tuklo ai ia yo̱ binili tok: Shelah ʋt hofantit taha hokak o̱ ishit tekchi ya chi̱ ho̱ ik i̱ bohlo ka̱, pi̱sa hokʋt.
15Chutah ʋt pisa mʋt, ohoyo haui yoke, ahni tok: nashuka ya̱ ompohomo hatuk oka,
16Atuk o̱ hina bili̱ka binili ka̱ i̱ fullotʋt, Inta, ak chiba chukowa, chim asilhha lishke, achi tok: ipok atuk a̱ ik ithano hatuk okʋt: mihma, Is sʋba chukowa chi̱ kʋt nanta ho is sʋma hinla cho? achi tok.
17Issi kosoma ushi yo̱ nanʋlhpoa chipinta ya̱ ai ishit et chi̱ pila lashke, achi tok: mihma, Isht is sʋm aia̱hlichi ya̱ is sʋma tuk osh et is sa̱ pila hinla cho? achi tok.
18Mihma, Isht‐aia̱hlichi nanta ho̱ chima la hinla cho? achi ma, Chibbak ushi fohka nanisht in chunli, micha napʋna chi shakba ʋlbeha, micha chin tʋbi chibbak fo̱ka aiena ka, achi tok: mihma ima cha, iba chukowa tok; atuk o̱ ʋlla in chakali tok.
19Micha wakaya cha, ia mʋt, nashuka isht ompoholmo ya̱ shu̱fit kanima bohli cha, ohoyo i̱ hatak illi i̱ nafohka ya̱ ishit fohka tok.
20Atuk o̱ Chutah ʋt i̱ kana Atullamait hatak a̱ issi kosoma ushi yash ibbak fohki cha, i̱ nan‐isht aia̱hlichi yash ohoyo hash ibbak fohka tuk a̱ im ai isha chi̱ hosh pit i̱ pila tok, yohmi tuk kia ik ahayucho tok.
21Mihmʋt okla yʋmma a̱sha kash i̱ ponaklot, Ohoyo haui ʋt haiakʋt hina lapalika kʋli tuklo ai ia ya̱ a̱sha tuk mʋto? achi tok. Mihma, Ilʋppa haui ʋt iksho ke uk oke, okla achi tok.
22Mihma falamʋt Chutah ya̱ im ona cha, Ahayuchi la he keyushke; micha yʋmma hatak ʋhleha hʋt, Ilʋppa haui ʋt iksho ke tuk, achi akinli tuk oke, achi tok.
23Mihma Chutah ʋt, ohoyo hash osh ik i̱shí, ishit pi hofahya yoba ná; Yakeh, issi kosoma ilʋppa pit i̱ pila li tuk o̱, chik ahayuchoshke, achi tok.
24Atuk o̱ yakohmi tok, i̱ himmak hʋshi tuchina foka ma, Chutah ya̱ im anolit, Chipok Tama ʋt haui tobʋshke; micha yakeh, hauit chakalishke, achi tok. Mihma Chutah ʋt, Kocha isht hʋsh ona na luashke, achi tok.
25Atuk o̱ kocha isht ona ma, imʋfo ya̱ pit i̱ pilʋt, Ilʋppʋt immi, hatak yʋmmak o̱ ʋlla i̱ shali lishke: micha ibbak ushi fohka nan isht in chunli, micha napʋna shakba ʋlbeha, micha tʋbi ʋt kʋna immi hokma ithʋná, chim asilhha lishke, achi tok.
26Mihma Chutah ʋt ithana mʋt, Aiʋlhpiesa kʋt ʋno ya̱ a̱ shahlishke; sʋso Shelah ya̱ ak i̱ bohlo tuk okʋt, achi tok: micha himmakma anonti ik ithano tok.
27Atuk o̱ yakohmi tok, ʋlla esha chi̱ hosh nukhʋmmi itanitak ma, yakeh, haiyup osh im oshʋtto ya̱ a̱lhto tok.
28Atuk osh ʋlla esha chi̱ hosh nukhʋmmi ma, yakeh, achʋfa kʋt ibbak kocha pit weli tok: mihma ʋlleshi ka̱ apelʋchi ohoyo hʋt ponola tishepa ishi cha, ibbak a̱ ishit ita takchi cha, Ilʋppak osh ti̱kba kohcha hoke, achi tok.
29Atuk o̱ ibbak a̱ falʋmminchit ishi ma, yakeh, itibapishi hʋt kohcha tok; mihma, Nanta Katiohmi ho̱ tiʋblit ish kohcha cho? tiʋbli ilʋppʋt chishno akinli hosh chi onʋtonlashke, achi tok: yʋmohmi hatuk o̱ hohchifo ha̱ Fales, achi tok.
30Atuk o̱ yohmi ha yak o̱ itibapishi ibbak ponola tishepa ishit talakchi yash osh kohcha tok; mihma hohchifo ka̱ Salah achi tok.
Currently Selected:
Chenesis 38: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
