Chenesis 39
39
1Atuk o̱ Chosef a̱ Echip a̱ okla isht ona tok: micha Echip hatak, Falaoh in tishu, nan atoni i̱ kʋpitʋni, Potifa ak osh yʋmmaisht ona tuk; Ishmaelait hatak ʋhleha hash in chumpʋt im ishi tok.
2Atuk o̱ Chihowah yʋt Chosef a̱ ibafoyuka na hatak nana amosholit, im aia̱hli achukma atok: mihma i̱ shahli Echip hatak in chuka ya̱ ahanta tok.
3Mihma Chihowah yʋt ibafoyuka, micha nana moma ka̱ ibbak isht ieshikma, Chihowah yʋt im aia̱hlichi ka̱ i̱ shahli hʋt pisa tok.
4Mihma Chosef ʋt itikba ya̱ holhponayo hanta ya̱ ai ahayuchi cha, in toksʋli tok; mihma in chuka achʋfa ya̱ apesʋchi ikbi mʋt, nana im a̱sha tuk ʋt moma ibbak fohki tok.
5Atuk o̱ yakohmi tok, in chuka achʋfa, micha nana moma im a̱sha tuk ʋt apesʋchi ikbi tok nitak itin takla ma, Chihowah yʋt Chosef ak atuk pulla mak o̱, Echip hatak ash in chuka achʋfa ya̱ yukpali tok: micha Chihowah nan ishit yukpali ʋt nana moma chuka aiasha, micha osapa aiasha ka̱ onʋtoyula tok.
6Mihma nana im asha tuk moma kʋt Chosef ibbak a̱ fohki tok: nana im a̱sha tuk ʋt achʋfa kia ithana keyu, amba pʋska ʋpa ak illa beka tok: mihma Chosef ʋt hatak aiokli nipi pisa achukma atok.
7Atuk o̱ ilʋppa puta kash i̱ himmakma yakohmi tok, i̱ shahli ha̱ tekchi ʋt Chosef a̱ nishkin a̱ onochi tok; micha, Sʋba tʋshkí, achi tok.
8Yohmi kia ʋlhpesa ik ahno tok; micha i̱ shahli tekchi ya̱, Yakeh a̱ shahli hʋt sʋbbak foyuka tuk osh chuka nana aiasha ka̱ ithana keyu, micha nana im aiasha tuk ʋt moma sʋbbak fohki tuk oke.
9Chuka ilʋppa achʋfa kia ʋno ya̱ a̱ shahli kʋt ikshoshke: micha nana kia a̱ halanli tuk keyu, amba chishno ak illa tuk, tekchi chia hoka, yohmi ka̱ nanta katiohmi ho̱ nana ik achukmo chinto ilʋppa yʋmihchit Chitokaka ya̱ i̱ yoshuba la hinla cho? im achi tok.
10Atuk o̱ yakohmi tok, onna hosh onnak ma Chosef a̱ im anumpuli kia, ik i̱ haponaklot iba tʋshka he keyu, micha iba takla ahanta he keyu tok.
11Atuk o̱ nitak yʋmma foka ma Chosef ʋt im atoksʋli isht ʋtta chi̱ hosh chuka ya̱ chukowa tok; mihma chuka yʋmma hatak a̱sha chatuk achʋfa kia anu̱kaka iksho tok.
12Mihma yʋmmak o̱ i̱ nafohka ya̱ hoklit ai ishi cha, Sʋba tʋshkí, achi tok: mihma i̱ nafohka ʋt ibbak fo̱ka na kanchi cha, malelit kohcha tok.
13Atuk o̱ yakohmi tok, i̱ nafohka yʋt ibbak fo̱ka na kanchi cha, malelit kohcha na pisa mʋt,
14In chuka hatak ʋhleha ha̱ hoyo cha, im anumpulit, Heblu hatak ʋt ishit pi yopula chi̱ ho̱ ishit pim ʋla tuk a̱ ho pesá; sʋba tʋshka chi̱ hosh sʋba chukowa ma, chitoli hosh pa̱ya li tuk oke.
15Atuk osh yakohmi tuk oke, chitoli hosh pa̱ya li ka̱ haklo mʋt, i̱ nafohka yʋt an tonla na, kanchi cha malelit kohcha tuk oke achi tok.
16Mihma i̱ nafohka yash achukmalit bohli na, itonla tuk o̱ i̱ shahli hʋt in chuka ya̱ ʋla tok oke.
17Mihmʋt anumpa ilʋppa chohmi kak o̱ im anumpulit, Heblu tishu isht ish pim ʋla tuk ʋt ishit si yopoma chi hosh sʋba chukowa tuk oke.
18Atuk osh yakohmi tuk oke, chitoli hosh pa̱ya li ma, i̱ nafohka yʋt an tonla na, kanchi cha malelit kohcha tuk oke, achi tok.
19Atuk o̱ yakohmi tok, i̱ shahli hash osh tekchi im anumpa ha̱ im anumpulit, Chin tishu hʋt si yakohmichi tuk oke, achi na haklo mʋt, im ai i̱ nukkilli ʋt libbi tok.
20Mihma Chosef a̱ i̱ shahli yash osh ishi cha, aboha kʋllo, mi̱ko i̱ yuka hʋt talakchit aiasha ya̱ fohki tok: mihma aboha kʋllo yʋmmak o̱ foyuka tok.
21Yohmi kia Chihowah yʋt Chosef a̱ iba foyukʋt i̱ nukha̱klo cha, aboha kʋllo apistikeli yʋt i̱ kana hi ya̱ nukfo̱ho̱ki tok.
22Mihma aboha kʋllo apistikeli ʋt yuka aboha kʋllo aiasha moma ka̱ Chosef ibbak a̱ fohki tok: mihma nana hosh yʋmma a yʋmohmikma, yʋmmak osh yʋmihchi atok.
23Nana hosh yʋmma ibbak foyukak ma, aboha kʋllo apistikeli ʋt ik apesacho tok: Chihowah yʋt ibafoyuka hatuk oka, micha nana yʋmihchikma, Chihowah yʋt im aia̱hlichi beka tok.
Currently Selected:
Chenesis 39: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
