Jon 10
10
1Nuparhien, nuparhien, tiakani to kamiar, ierem teresuean le nausilua le nipai taha sip min mero tererako ik pusen ker, in iakihla mene ierem iaunak nar.
2Mero ierem terua le nausilua, in ierem terasig sip min.
3Ierem ramail le nausilua teretita tapin ton, an sip min takairou noian, an ramaunin sip min tahan le netigen ilar min, an mir iatou ilar.
4An terasigiatou petum tahan, an teraupan in ilar, an sip min takairoupen in, mero in ka karhinatin noian.
5An tepesairoupenan iapsupus mero tepaikam ton, mero in ka kasarhinatinan noia napsupus.
6Hnoa nakaran uk Iesu neterameni to ilar; mero ilar kamesarhinatinan nar min ka rakameni to ilar.
7An Iesu netereni mun, Nuparhien nuparhien, tiakani to kamiar, Io nausilua taha sip min.
8Nerem kamaiupan in io ilar nakihla mene naunak nar. Mero sip min kamesairouan ilar.
9Io nausilua; takama ieremim ker teraulu lak, in tapos miuh an terepaulu mua an mier, and terepahm hnepusan.
10Iakihla resueaman mero to nakihlean mene nuhwapninan mene netakenan. Io iava moma teparos nemihwan meparos asul aken.
11Io ierem tiakasig ut sip min. Ierem terasig ut sip min terehlau nemihwan tahan to sip min.
12Ierem ramos nerouan mero rosolan momo ierem terasig ship min, an resolan moma sip min tahan, terahm kuri iatipun rakava, neterapas sip min an makam, an kuri iatipun neterkis ilar mos arir ilar.
13Ramakam mero in ka ierem ramos nerouan an reseniapkisan sip min.
14Io ierem tiakasig ut sip min, an iakhinatin tahak min, an tahak min karhinatin io.
15Rolkoma Tata rhinatin io, an io iakhinatin Tata, an tiakahlau nemihwan tahak to sip min.
16An sip min nevin mun tahak resolan moma taha pipai uk; tiakakeikei mir mun ilar, and tepairo noiak, an teparol numanin karena, ierem terasig ilar karena.
17Le nar uk Tata rolkeikel io mero in ka tiakahlau nemihwan tahak, moma tiapos mun.
18Resolan moma ieremim ker terosita tonio, mero tiakahlau atu am. Io iamos nesanenan to nehlauan, an iamos nesanenan to nosan mun. Nowok iamos to Tata.
19An Ju min kenarotaprai mun ilar min mero in ka nakaran min uk.
20An ilar ribor netakani, Nanumun tat remarik lan, an mamalmel. Retol nakamaiteleg kam in?
21Nevin mun netakani, Resolan moma in uk nakaran te ierem nanumun tat ramarik lan. Nanumun tat resanen to nolan nemri iemnou rait?
22An loanian ka naukanan to nofenan kam Wuhgin le Jerusalem; nian ka nian te nerapan,
23An Iesu neteramaliwak mamavan le nimwa ahwak le nimwa kamek am hnagen te Solomon.
24An Ju min netakarua elauelau lan mamani ton, Nian kuhu tenakol nekimar rahminahwin? Takama ik Kristo, ani apu am ra to kamar.
25Iesu neteraram to ilar, Iemeni to kamiar, and nemesanian nuperhienan lan; nar min iakamol le netige Tata ilar kamaiusito in lak.
26Mero kamiar nesanian nuparhienan lan, mero in ka resolan moma kamiar sip min tahak.
27Sip min tahak kamairou noiak, an iakhinatin ilar, an kamarioupa io.
28An tiakofen nemihwan lilen kam ilar, an tesaremisan le nian min petum, an nar ker teresevitean ilar le nelimok.
29Tata ierem ramofa ilar kam io iribor le ilar min, an resolan moma ker rausikausik to nevitean ilar le nelimi Tata.
30Io mene Tata karena.
31An Ju min netakarosit mun kapiel mama takaru in lan.
32Iesu neteraram to ilar, Iametikun kamiar le nolan min ribor ravit am te Tata; nolan ierem petuan tenakaru io ton?
33Ju min netakairam ton, Tiasaruan ik to nolan ierem ravit, mero to nakartetan le Wuhgin, an mero in ka ik ieremim am nakamol atu ik kama Wuhgin.
34Iesu neteraram to ilar, Kamesraian le nowa asul temiar, Io iemeni moma kamiar Wuhgin min?
35Takama rameni moma ilar Wuhgin min nerem nakaran te Wuhgin rava to ilar, an nowa tepesatekenan.
36Kamiar tenakani le ierem Tata ramol ausim hmalipa le ten uk mama, Ik nakamakar tat kam Wuhgin, mero in ka iemeni moma, Io Neri Wuhgin?
37Takama iesolan nar min te Tata, tenesanian nuparhienan lak;
38Mero takama iakamol, takama nesanian nuparhienan lak, mero ani nuparhienan le nolan min moma tenakarhinatin marhinatin ut mama Tata ramarik lak an io iakamarik le Tata.
39An netakarolkeikei mun nehiapatinan in; an neterier le nelimin ilar.
40An neteruan mun le neutai Jordan iken Jon ramaupan mol nebaptisoan iken, an neteramarik iken.
41An neremim ribor netakarua ton; an netakani mama, Jon remesolan nimtatin ker, mero naremnar min Jon ramameni le ieremim uk in nuparhienan.
42An neremim ribor netakani nuparhienan lan iken.
Currently Selected:
Jon 10: LEN1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902, reprinted in 1935.
