Lukas 5
5
To pojala bau nawali to pojala manuhia
(Mat. 4:18-22; Mrk. 1:16-20)
1Hangkani tempo, Yesus nokangkore i wiwi Rano Galilea#5:1 Rano Galilea ee mai hanga ntani lako Rano Genesaret.. Nadea tauna nahiromu i humpii-Na mingki mangepe lolita Alatala. 2Laihilo-Na rongu duanga i wiwi rano. Tumpu duanga ee nehomporamo pade bulara nampakagaha jala i lorena. 3Nencawimi Yesus rau i duanga Simon. Laiperapi-Na bona duanga ee ratumo hodi lako wiwi rano. Napu ee noncunami Yesus nopatudu tauna lako lolo duanga.
4Nahudupi nopatudu, iulika-Nami Simon, “Kenimi duanga ei rau kandalaana pade tenemi jalami mipopojala bau.”
5Nehono Simon, “Guru, hamengiamo kami nojala, moma naria hangkaua lairata kami. Naupawee, apa Iko to netudu, kana kuteneki jala.”
6Potenera jala, nadea mpuu bau lairatara hampena jalara ke nono mabenta. 7Lauparia, laikawera dohera to i duanga ntanina bona marata mantulungira. Narataramo dohera nokahini rongu duanga ee hante bau hampena duangara ke nono matala. 8Nampahilo ee, notingkodumi Simon Petrus i tingoo Yesus pade iulina, “Pue, nemo'apa Mumohuki, apa aku ei tauna to nadoha.” 9Habana hia hante humaweera dohena namangka mpuura nampahilo kadea bau to laijalara. 10Wee moto mui Yakobus pade Yohanes, ana-ana Zebedeus, dohe hampobagoa Simon.
Lauparia Yesus nangulika Simon, “Nemoko maeka. Mopamula welau, iko mawali to pojala manuhia.” 11Napupi duanga ee laidiira rau lorena, palahirami humaweena pade rauramo nantuku Yesus.
Yesus nampakauri hadua tauna to nohaki kusta
(Mat. 8:1-4; Mrk. 1:40-45)
12Hangkani tempona, bula Yesus i hangu ngata, naria hadua tauna to nahobo haki kusta wotona. Pampahilona Yesus, notingkodumi i tingoo-Na hampe lencena narapa i tana nerapi hi Yesus, iulina, “Pue, ane madota-Ko, mamala'a Mupakauri.”
13Lauparia, Yesus noulu pale-Na nampadama tauna ee pade iuli-Na, “Madota-'A. Kaurimoko.” Hampiniri mata naurimi tauna ee lako hakina. 14#Im. 14:1-32Napu ee Yesus nampalingai tauna ee bona nemo hema haduaa tauna nakewoka, iuli-Na, “Koimoko, pahiloimi wotomu hi imam, pade popewaimi kurban kauriamu ewa to laiparenta Musa, bona humawee tauna mampahilo ane naurimoko.”
15Naupawee, kareba nangkambelai Yesus notoleleki laumi hampena nadeaki tauna narata mangepe-'I mopatudu pade bona Napakaurira lako hakira. 16Naupawee, nangkohu mui-'I rau kalinoana pade nohambaya.
To napungku laipakauri
(Mat. 9:1-8; Mrk. 2:1-12)
17Hangkani tempona, bula Yesus nopatudu, naria bahangkua dua to Farisi pade to nataualu buku Taurat noncuna i hee. Hira ee mai narata lako humawee ngata i Galilea bo Yudea, pade lako Yerusalem. Baraka Pue nampodohe Yesus hampena namala-'I nampakaurira to nohaki.
18Tempo ee mui, naria bahangkua dua tauna nangkowa hadua to napungku hante poturuana pade nampehimukui mehua i rarana bona mantuu to napungku ee i tingoo Yesus. 19Naupawee, moma naria dalara apa nadea gaga tauna i hee. Alaana, nengkahera i lolo ata, laihungkara ata pade laipopanaura tauna ee hante poturuana i lentongora todea, i tingoo Yesus.
20Pampahilo-Na Yesus peparahayara, nojaritami hi tauna to napungku ee, “Ompi, doha-dohamu laiampunimi.”
21Lauparia, to nataualu buku Taurat pade to Farisi nampekiri rara bongora, “Tauna ei nampahauru Alatala. Moma hema mamala moampuni doha, wuwu Alatala aga.”
22Naupawee laincani-Na Yesus napa to laipekirira, pade iulika-Nara, “Nemo wetu pampekirimi. 23Mamala-'A manguli hi tauna ei, ‘Dohamu laiampunimi’ ba ‘Pematamoko pade pomakomoko.’ Uma to mipokono Ku'uli? 24Bona mincani, Ana Manuhia nabaraka moampuni doha i dunia ei.” Napu ee, Yesus nangulika to napungku ee, “Ku'ulikako: Pematamoko, ongkomi alimu pade panculimoko rau i houmu.”
25Tempo ee mui nokangkoremi tauna to napungku ee laidulu naara tauna to naria i hee. To napungku ee no'ongko alina, nanculi rau i houna hamalina nampaune Alatala. 26Humawee tauna nahera bo nampaune Alatala pade naeka purara, iulira, “Welau ei, laihilotami to nepakahera mpuu.”
Lewi to peduhu paja nantuku Yesus
(Mat. 9:9-13; Mrk. 2:13-17)
27Napu ee, nehuwumi Yesus lako hou ee, laihilo-Na hadua to peduhu paja to ikahangai Lewi noncuna i hou popahirurua paja. Lauparia, Yesus nangulika'i, “Tuku-'Amo!” 28Nokangkoremi Lewi nampalahi humaweena pade raumi nantuku Yesus.
29Napu ee, Lewi nobabei huha bohe i houna nampemabohe Yesus. Nadea to peduhu paja pade tau ntanina nangkoni hingkani-ngkani hante Yesus. 30To Farisi hante to nataualu buku Taurat to nantuku patudu to Farisi nampangudui ana-ana guru Yesus, iulira, “Napa pade nangkoni bo nanginu hingkani-ngkani hante to peduhu paja pade to nadoha komi?”
31Nehono Yesus, “Tauna to naseha moma namparaluu dokutoro. Tauna to nadua aga to namparaluu dokutoro. 32Aku narata i dunia moma-'A mangkio tauna to nanoro, naupawee narata-'A mangkio tauna to nadoha, bona mancorora lako dohara.”
Patudu Yesus moma mamala rapomegalo hante ada kabiahaa
(Mat. 9:14-17; Mrk. 2:18-22)
33To Farisi pade to nataualu buku Taurat eera nanguli hi Yesus, “Ana guru Yohanes to Pediu pade ana guru to Farisi naharora nohambaya pade nopuaha nantuku ada kabiahaata. Napa pade ana guru-Mu nangkoni pade nanginu motora, momara nopuaha?”
34Yesus nampahonoira, “Moma nahipato bale-bale pongante balailo ratudu mopuaha ane laipodohera i heedipi pongante balailo ee. 35Naupawee, marata moto mei tempona pongante balailo ee ra'ala lako hi hira. Tempo ee mei pade mopuaharada.#5:35 Patuju Yesus, tempona Hia laipodohera ana-ana guru-Nadipi, pomara mopuaha. Naupawee, ane ra'aladimi mei lako hi hira pade mopuaharada.”
36Yesus nantuturakara hangu porapa, iuli-Na, “Moma hema haduaa tauna nohia waru to nabou laipopotampalana waru to nauha. Apa ane iwee, mabentami waru to nabou ee pade waru to nauha to laitampala hante potaia kae to nabou ee moma'i nabelo laihilo. 37Wee moto mui ue anggur to nabou, moma'i laikahini rara kuhita kuliba to nauha. Apa ane iwee, ue anggur to nabou ee mai mengkumama pade mampakabenta kuhita kuliba ee. Alaana mabubumi ue anggur ee pade kuhita kuliba ee mai marotami. 38Ue anggur to nabou kana rakahini i rara kuhita kuliba to nabou. 39Pade moma hema haduaa tauna to nadota nanginu ue anggur to nabou, ane bela inunami ue anggur to nahae, apa nauli mei, ‘Nabelopi ue anggur to nahae.’ ”
Currently Selected:
Lukas 5: MYL
Highlight
Share
Copy
Want to have your highlights saved across all your devices? Sign up or sign in
