Lukas 6
6
Ana-ana guru Yesus nopuputi wuli gando tempo eo Pentuua to Yahudi
(Mat. 12:1-8; Mrk. 2:23-28)
1 #
Ul. 23:25 Hangkani tempo, i eo Pentuua to Yahudi, Yesus hante ana-ana guru-Na noliu i bone gando. Bulara nomako, ana-ana guru-Na nopuputi wuli gando ee, laipehora pade laikonira. 2Naupawee bahangkua dua to Farisi nangulikara, “Napa pade laibabeimi to laipetagii tempo eo Pentuua?”
3 #
1Sam. 21:1-6; Im. 24:5-9 Yesus nampahonoira, “Apa poma ibahami napa to laibabei Magau Daud ilodo? Tempo ee hia hante dohe-dohena nakaopua pangkonira pade naoro taira. 4Daud nehua i rara Kemah Alatala pade nangala roti pewaia to laijuju hi Alatala. Roti ee laikonina pade laiwaikana muira to nantuku'i, bo kakonona moma hema haduaa to mamala mangkoni roti ee. Wuwu imam-imam aga.”
5Pade iulika-Na muira Yesus, “Akumi Ana Manuhia. Aku muimi to nabaraka mampakatantu napa to mamala rababei i eo Pentuua.”
Yesus nampakauri tauna tempo eo Pentuua to Yahudi
(Mat. 12:9-14; Mrk. 3:1-6)
6Tempo eo Pentuua to Yahudi ntanina, Yesus nehua rara hou pepuea to Yahudi pade nopatudu. I hou pepuea ee naria hadua tauna to namate pale kanana. 7To nataualu buku Taurat pade to Farisi nangkamata bongo Yesus, baka Napakauri tauna tempo eo Pentuua. Ane Napakauri tauna tempo eo Pentuua, mariami dalara mampahalai-'I. 8Naupawee, laincani-Na napa to laipekirira pade iulika-Na tauna to namate hamika palena ee, “Peongkoko, maiko mokangkore i lentongo hei.” Neongko mpuumi tauna ee pade nokangkoremi.
9Napu ee Yesus nangulikara, “Kupekune komi olu, napa to mamala rababei tempo eo Pentuua, to nabelodi, ba to nadaadi? Mampatulungi taunadi ba mampatehi taunadi?” 10Natikura lainaa Yesus pade iulika-Na tauna to namate pale kanana ee, “Ulumi palemu.” Tauna ee noulu palena, pade ngkali naurimi hakina.
11Naupawee, nahodo mpuura to Farisi bo to nataualu buku Taurat ee, pade pomeuliirami napa to kana rababeira hi Yesus.
Yesus nangkio hampulu rodua rasul
(Mat. 10:1-4; Mrk. 3:13-19)
12Tempo ee, Yesus rau nohambaya i lolo bulu. Pade hamengia-'I nohambaya hi Alatala. 13Nabaapi, laikio-Naramo to pantuku-Na pade laipelihi-Na hampulu rodua lako hira to Napajadi rasul. 14Hangara to hampulu rodua to ipelihi-Na ee mai, Simon to ikahangai-Na Petrus pade Andreas tuaina, Yakobus hante Yohanes, Filipus pade Bartolomeus, 15Matius pade Tomas, Yakobus ana Alfeus, Simon lako kahiromua Zelot#6:15 Zelot ei hanga kahiromua to Yahudi to nampaewa to poparenta Roma., 16Yudas ana Yakobus, pade Yudas Iskariot to mampobalu Yesus mei.
Yesus nopatudu pade nampakauri nadea tauna
(Mat. 4:23-25)
17Napu ee nanaumi Yesus hante ana-ana guru-Na lako lolo bulu pade nentuuramo i kalempeana. I hee nahiromu to pantuku-Na to ntanina hante todea to narata lako humawee ngata i Yudea, ngata Yerusalem, pade lako ngata-ngata to i wiwi talinti Tirus pade Sidon. 18Hira narata mangepe-'I mopatudu pade rapakauri lako hakira. Hira to laipehua anudaa mui laipakauri-Na. 19Humawee todea ee nampehimukui nampatui-'I apa naria baraka nehuwu lako hi Hia nampakauri purara.
Panguli nangkambelai hema to morahi pade hema to maheha
(Mat. 5:1-12)
20Yesus nampanaara to pantuku-Na pade iuli-Na,
“Morahimo komi to nakahiahi,
apa komimi to mawali todea rara poparentaa Alatala.
21Morahimo komi to welau ei naoro,
apa komi mei rapakabohu.
Morahimo komi to welau ei nakeo,
apa makiri mei taimi.
22Morahimo komi, ane tauna mampodaa komi, malohera mampodohe komi, mampahalai komi pade mampakadaa hangami habana komi nantuku-'A Ana Manuhia. 23Kagoemo komi tempo ee pade moence-ence magoe, habana mabohe mpuu tomomi i huruga, apa ewa ee moto mui tumpulokora owi nampoiwee nabi-nabi.
24Naupawee maheha mpuu komi to nahugi,
apa rara kahugia lairatamimi kasanaami.
25Maheha mpuu komi to welau ei nabohu,
apa komi mei maoro.
Maheha mpuu komi to welau ei nakiri taimi,
apa komi mei majuu rarami pade makeo.
26Maheha mpuu komi ane humawee tauna mampaune komi, habana iwee moto mui tumpulokora owi nampaune nabi-nabi to moma nakono.”
Potowemi balimi
(Mat. 5:38-48; 7:12a)
27“Naupawee Aku mangulika komi to nangepe-'A, potowemi balimi. Mabelohawo ingku hi tauna to nampodaa komi. 28Perapi hi Alatala mampatiroi tauna to nampakamo komi. Hambayanira tauna to nadaa ingkura hi komi. 29Ane maria tauna mampahapa pelimu mali kai, waika mui'i pelimu mali kana. Pade ane maria hadua to mangala waru pokarolapiimu, palele muimi na'ala warumu. 30Waikara humawee tauna to merapi hi iko, pade ane maria to mangala gagumu nemopi muperapi nculi. 31Bewa ingku to mipokono rababei tau ntanina hi komi, babeimi ewa ee mui hi tau ntanina.
32Ane wuwu to nampotowe komi moto mipotowe, moma komi Naune Alatala. Apa hira to nadoha mui nampotowe tauna to nampotowera. 33Ane wuwu hi hira to nabelo hi komi moto komi noingku belo, moma komi Naune Alatala. Apa hira to nadoha mui nobabei iwee. 34Ane komi mampopelume hangu hangaa hi tauna pade mampaharumaka panculiana, moma komi Naune Alatala. Apa hira to nadoha mui nampopelume hi to nadoha bona ratarimara nculi to nahibali kadeana.
35Naupawee, komi kana mampotowe bali-balimi pade moingku to nabelo hi hira, pade popelume hante moma mampaharumaka panculiana. Ane wee mibabei, nabohe tomomi pade komi mawali ana-ana Alatala to i Lolona, habana Hia nabelo hi tauna to moma incanira nosukuru pade hi tauna to nadaa ingkura. 36Kana ma'ahi rarami ewa Tuamami to i huruga mui na'ahi rara-Na.”
Nangkambelai pehalai
(Mat. 7:1-5)
37“Nemo komi mehalai, bona moma komi Nahalai Alatala. Pade nemo komi mehuku bona moma komi Nahuku Alatala. Meampunihawo, bona ra'ampuni komi. 38Mewaihawo, bona Nawaika komi Alatala. Ane madea pewaimi, madea mui Nawaika komi, ewa pohuka to nabelo to laipinee bo lailengka pade neluabe Natuaka komi Alatala i tingkuami. To laipakemi nohuka, Nahukaka komi Alatala.”
39Laiulika-Na muira Yesus hangaa porapa, “Moma mamala to naburo mopanuntu to naburo, apa natantu amimi manawu i rara lowu hingkanira.
40Moma naria ana guru nelabi kataualuna lako guruna. Naupawee ane mahududimi meguru, mahibalimi hante guruna. 41Napa pade karupu to i mata ompimu laihilomu, bo tompo kau to i rara matamu moto moma laihilomu? 42Napa pade mabia komi mangulika ompimi, ‘Ompi, mai kulalikako karupu to i rara matamu,’ bo tompo kau to i rara matamu moma ihilomu? He, tauna to nabelo wongko! Lali olu tompo kau lako rara matamu bona maraha karawa penaamu molali karupu to i rara mata ompimu.”
Tauna laincani lako ingkuna
(Mat. 7:16-20; 12:33-35)
43“Moma naria puu kau to nabelo nampopehuwu wua to nadaa. Wee moto mui moma naria puu kau to nadaa nampopehuwu wua to nabelo. 44Apa butu puu kau laincani lako wuana. Habana moma hema haduaa tauna nopuputi wua ara lako dunumpu rui, pade moma mui hema nopuputi anggur lako rui. 45Tauna to nabelo nampopehuwu to nabelo lako rarana to nabelo, bo tauna to nadaa nampopehuwu to nadaa lako rarana to nadaa. Napa to laiulina nehuwu lako rarana.”
Rongaa pondasi
(Mat. 7:24-27)
46“Napa pade laikiomi-'A, ‘Pue, Pue,’ bo moma laipoingkukami napa to laiuli-Ku? 47Ku'ulika komi rapahibali hante napara butu tauna to narata hi Aku, nangepe napa to laiuli-Ku pade laipoingkukara. 48Hira ee ewa tauna to nopatuna hou. Laikaena olu tana pakandalana, laiboliina watu pade laipondasina i lolo watu ee mai. Napu ee naratami ue mowo namparumpa hou ee. Naupawee, ue mowo ee moma namala nolengka'i, apa hou ee naroho pondasina. 49Naupawee, hema-hema to nangepe napa to laiuli-Ku pade moma laipoingkukana, hia ee ewa tauna to nopatuna hou i lolo tana to moma naria pondasina. Naratapi ue mowo, napongkami hou ee pade nadaa mpuu kagerona.”
Currently Selected:
Lukas 6: MYL
Highlight
Share
Copy
Want to have your highlights saved across all your devices? Sign up or sign in
