Lukas 7
7
Yesus nampakauri hadua batua kapitee tantara i ngata Kapernaum
(Mat. 8:5-12; Yoh. 4:46-53)
1Nahudupi Yesus nojarita i tingoo todea, rau-'Imi i ngata Kapernaum. 2I hee, naria hadua kapitee tantara Roma. Batuana to laipotowena mpuu nadua ntomo pade ke nono mamatemi. 3Pangepena kapitee tantara ee ane Yesus naria i Kapernaum, laihuronara totua ngata to Yahudi rau hi Yesus mamperapi bona marata-'I mampakauri batuana. 4Lauparia, rauramo nerapi mpuu-mpuu hi Yesus, iulira, “Mahipato'i kapitee ee ria Mutulungi, 5habana nabelo'i hi kita to Yahudi pade hiami to nampaongkohoni popatuna hou pepuea kami.”
6Nangepe lauria, raumi Yesus dohera. Namohurapa i hou kapitee tantara ee, kapitee tantara ee nampahuro bale-balena rau hi Yesus mangulika-'I, “Tuama, wetumo-Ko mampakaheha woto-Mu tumai i houku, apa moma'akuwo mahipato mantarima-Ko i houku. 7Aku mui moma'a mahipato marata hi Iko. Ulimi nau hamati romati aga, maurimi batuaku. 8Apa laiparahayaku kana mauri'i. Habana, aku ei to laiparenta moto mui'akuwo pade naria mui tantara to laiparentaku. Ane kutudu hadua tantaraku, ‘Koimoko,’ rau mpuu'imi. Ane ku'ulika mui hadua ntanina, ‘Maimoko,’ marata mpuu'imi. Ba ane kutudu hadua batuaku, ‘Pobago ei,’ napobago mpuumi. Wee moto mui Iko Tuama, laiparahayaku ane humawee napa to Mu'uli kana madupa.”
9Pangepe-Na Yesus lauria, nahera-'I pade laipeili-Nara todea to nampodohe-'I, iuli-Na, “Ku'ulika komi, poma naria lairata-Ku peparahaya ewa ei kabohena, naupa hi to Israel.”
10Panculira to laihuro ee rau hou kapitee tantara, lairatara ria, naurimi batua ee.
Yesus nampakatuwu nculi hadua kabilaha i Nain
11Poma nahae lako ee raumi Yesus i hangu ngata to ikahangai Nain. Ana-ana guru-Na pade tauna to nadea nantuku-'I. 12Namohupi Yesus i womo pehuaa ngata ee, naria hadua kabilaha to namate, laikowa nehuwu lako rara ngata rau ratana. Kabilaha ee ana hadudua, pade tinana nabalumi. Nadea tauna lako ngata ee nampodohe bangkele to nabalu ee.
13Hangka Yesus nampahilo bangkele to nabalu ee, nehuwu ahi rara-Na pade iulika-Na'i, “Nemoko makeo.” 14Lauparia laimohuki-Nami popakowaa ee pade laikakamu-Na hampena to popakowa ee nentuura. Napu ee, nojaritami Yesus hi to namate ee, “Kabilaha, Ku'ulikako, pematamoko.” 15Nemata mpuumi to mate ee, noncuna pade nopamulami nojarita. Yesus nampopewai kabilaha ee hi tinana.
16Nampahilo to nadupa lauria, humawee tauna to naria i hee naeka pade nampaune Alatala, iulira, “Naratami nabi bohe i lentongota,” pade iulira mui, “Naratami Alatala nampatulungi todea-Na.”
17Lauparia, kareba nangkambelai Yesus notolele i humawee ngata i Yudea pade humawee ngata to nonehumpii hante Yudea.
Yesus pade Yohanes to Pediu
(Mat. 11:2-19)
18Bula Yohanes to Pediu i rara tarungku, ana-ana guruna nangkewoka'i humawee to laibabei Yesus. Lauparia Yohanes nangkiora rodua ana guruna, 19pade laihuronara rau hi Pue Yesus mampekune-'I iwei, “Ikomidi Magau to Pepakahalama to laitipa Alatala, ba to ntaninadi kipopea?”
20Karatara ana guru Yohanes to rodua ee hi Yesus, iulira, “Yohanes to Pediu nampahuro kami mepekune hi Iko, ‘Ikomidi Magau to Pepakahalama to laitipa Alatala, ba to ntaninadi kipopea?’ ”
21Tempo ee Yesus nampakauri nengila hakira tauna pade nampopehuwu nadea anudaa to nampehuai tauna. Pade nadea mui to naburo namalaramo nenaa. 22Aji, nehono Yesus hi ana guru Yohanes, “Panculimo komi pade kewoka'i Yohanes napa to laihilomi pade napa to laiepemi. ‘Tauna to naburo nenaa, to napungku nomako, to nohaki kusta nauri, to nawongo ne'epe, to namate laipakatuwu nculi pade hi tauna to nakahiahi laikewoka Kareba Belo.’#7:22 Tauna to naburo nenaa, to napungku nomako, to nohaki kusta nauri, to nawongo ne'epe, to namate laipakatuwu nculi pade hi tauna to nakahiahi laikewoka Kareba Belo. Lolita ei laiala Yesus lako buku nabi Yesaya 25:5-6; 61:1, nampakanoto hi hira ane humawee to laibabei-Na nampopahiloi ane Hiami Magau to Pepakahalama to laitipa Alatala i rara buku nabi Yesaya. 23Norahi mpuura tauna to naroho moto peparahayara hi Aku.”
24Nanculirapa to laihuro Yohanes ee, nojaritami Yesus nangkambelai Yohanes hi todea, iuli-Na, “Napa to rau hilomi i tongo mpada to nabai? Rau komi nampahilo rumpu to laitawiri ngolu rau tumai? 25Aji, napa to rau hilomi? Rau komi nampahilo tauna to nampake waru to nahuli? Tauna to nowaru nahuli pade natuwu rara kahugia, no'oha i hou magau aga. 26Ane moma iwee, napa patujumi rau? Nampahilo nabi? Ane etu, nakono hi komi. Naupawee Ku'ulika komi, neliupi Yohanes ee lako nabi. 27#Mal. 3:1Apa nangkambelai Yohanes naria laitulihi rara Buku to Nagaha, iwei,
‘Hilo, Aku nantudu huro-Ku nampoilodoka-Ko,
hia mei mopahadia dala to Mupomakoi.’
28Ku'ulika komi, humawee to laiote bangkele i dunia ei, moma naria to neliu pobununa i tingoo Alatala lako Yohanes to Pediu. Naupawee tauna to moma nobunu gaga i rara poparentaa Alatala neliupi pobununa lako Yohanes.”
29Humawee tauna i hee hante hira to peduhu paja to nangepe napa to laiuli Yesus nangkambelai Yohanes, nampemakono Alatala, apa hira nampopewai wotora laidiu Yohanes. 30Naupawee to Farisi pade to nataualu buku Taurat moma itarimara patuju Alatala hi hira, apa momara nadota laidiu Yohanes.
31Laiuli-Nami Yesus, “Tauna to natuwu tempo ei Kurapaika bo Kupahibali hante 32ngana to noncuna i pasar pade noneulika iwei,
‘Laitawui kami tulali hi komi bona magoe komi,
naupawee moma komi noence,
laipoulia kami ulia kamatea bona majuu rarami,
naupawee moma komi nakeo.’
33Apa Yohanes to Pediu narata, moma'i nangkoni roti ba nanginu ue anggur, iulimi, ‘Laipehua anudaa'i.’ 34Naupawee, Ana Manuhia narata, Hia nangkoni bo nanginu, iulimi, ‘Hilo! Tauna ei nadea pangkoni-Na pade nadea panginu-Na. Hia nampobale to peduhu paja pade tauna to nadoha.’ 35Naupawee noto Alatala laihilo lako ingku humawee tauna to nantarima noto Alatala ee mai.”
Hadua bangkele to nadoha notuahi Yesus hante lana to nawongi
36Hadua to Farisi to ikahangai Simon nampaoka Yesus rau i houna mangkoni dohena. Lauparia, raumi Yesus i hou to Farisi ee pade nangkoniramo. 37Naria hadua bangkele to nadoha no'oha i ngata ee. Pangepena ane Yesus nangkoni i hou to Farisi ee, laikeninami butolo to laibabei lako watu pualam to naponu hante lana wongi. 38Pade nokangkoremi i talikua Yesus namohu paa-Na, hante keona. Ue matana natudo i paa Yesus, laipurihina hante wuluana. Laiekinami paa Yesus pade laituahina hante lana wongi ee.
39Pampahilona napa to laibabei bangkele ee mai, to Farisi to nampaoka Yesus ee nanguli i rara bongona, “Ane nabi-'I tauna ei mai, tantu laincani-Na bangkele to bewa'i to nantui-'I. Apa bangkele ee mai tauna to nadoha.”
40Lauparia iuli-Na Yesus, “Simon, naria hangaa to mingki Ku'ulikako.”
Nehono Simon, “Ulimi Guru.”
41Iuli-Nami Yesus, “Naria rodua tauna to noinda hi tauna to nampopelume doi. Hadua'i noinda alimatu doi halaka#7:41 Hampeka doi halaka nahibali hante tomo hadua tauna nobago haeo. pade to hadua mui'i noinda alima mpulu doi halaka. 42Hangka momapi laibukura nobayari, tumpu doi ee nampakaputa indara. Ane iwee, hema to nelabi towena hi tumpu doi ee?”
43Nehono Simon, “Ane aku, to nadea indana.”
Iuli-Na Yesus, “Nakono iulimu.”
44Napu ee negolimi Yesus nampeili bangkele ee pade nangulika Simon, “Hilo napa to laibabei bangkele ei. Nehua-'A rara houmu, moma-'A laipahadiakamu ue Kupopokabohi paa-Ku. Naupawee, bangkele ei nampakaburu paa-Ku hante ue matana pade laipurihina hante wuluana. 45Narata-'A i houmu, moma-'A laiekimu, naupawee bangkele ei lako pehua-Ku moma'i nentuu nampaeki paa-Ku. 46Moma'i laituahimu woo-Ku hante lana#7:46 Mantuku kabiahaa to Yahudi, mampatuahi woo to rata hante lana ee mai halaku pebila to nelabi kabelona hi to rata mampahiloi kabelo rara tumpu hou, naupawee moma kana rababei., naupawee hia ei nampatuahi paa-Ku hante lana wongi. 47Aji, Ku'ulikako, towena to nadea hi Aku nampahiloi ane dohana to nadea laiampunimi. Naupawee tauna to laiampuni hodi, hodi moto mui towena.”
48Lauparia, iulika-Na Yesus bangkele ee, “Doha-dohamu laiampunimi.”
49Pade hira to nangkoni dohe-Na nanguli rara bongora, “Moma'i naowo tauna ei. Napa pade iuli-Na mamala-'I moampuni doha.”
50Naupawee iulika-Na mui Yesus bangkele ee, “Peparahayamu nampakahalamako. Panculimoko hante goe raramu.”
Currently Selected:
Lukas 7: MYL
Highlight
Share
Copy
Want to have your highlights saved across all your devices? Sign up or sign in
