Lukas 8

Bangkele-bangkele to nampahuko bago Yesus

1Poma nahae lako ee, raumi Yesus noliliko i butu ngata noparata Kareba Belo ane nopamulami Alatala noparenta halaku Magau. Hampulu rodua ana guru-Na nampodohe-'I, 2pade bahangkua dua bangkele to laipakauri-Na lako anudaa bo lako hakira. Hira ee mai: Maria to ikahangai Magdalena to lako wotona Yesus nampopehuwu papitu anudaa, 3Yohana bangkele Khuza to pouruhi gagu Herodes, Susana, pade nadea muidipi bangkele ntanina. Humaweera bangkele ee mai nantulungi Yesus pade ana-ana guru-Na hante napa to naria hi hira.

Porapa nangkambelai hadua to pohawu

(Mat. 13:1-23; Mrk. 4:1-20)

4Hangkani tempona nadea tauna lako ngata-ngata bohe narata nampotomu Yesus. Lauparia iulika-Nara Yesus hangu porapa, iwei, 5“Naria hadua to pohawu rau nohawu hawuana. Tempona nohawu, habagia hawuana nanawu i wiwi dala, laitodu-todu tauna pade tonci nantilo hawua ee duu kaapuna. 6Habagia nanawu i tana to nawatua to moma nadea tanana. Hangka natuwupi, poma nahae nabangimi, apa momahawo nahii tanana. 7Habagia nanawu i lentongo dunumpu rui hampena neumba hingkani-ngkani hante dunumpu rui ee, pade dunumpu rui ee mai nampabungu tinuda ee duuna namate. 8Pade habagia mui nanawu i tana to narudu. Hawua ee natuwu belo duuna nowua hatu ngkani kadeana.” Nahudupi Yesus nanguli porapa lauria, iulika-Nara, “Hema to natalingaa, epe belo to iuli-Ku lauria.”

9Pangepera lauria, nepekuneramo ana-ana guru-Na napa batua porapa ee.

10 # Yes. 6:10 Laihonoi-Nara, “Komi laiwaika noto mangincani napa to ipopalerui nangkambelai bewa Alatala noparenta halaku Magau. Naupawee hi to ntanina to ipopalerui ee laikewokara hante porapa,

‘bona nau mehilora momara menaa,

nau me'epera momara mampaha.’

11Iwei batuana porapa ee. Hawua ee mai lolita Alatala. 12To nanawu i wiwi dala, nahibali hante tauna to nangepe lolita Alatala, naupawee Magau Heta narata nangala lolita ee lako pekirira bona nemora meparahaya pade rapakahalama. 13To nanawu i tana to nawatua, nahibali hante tauna to nangepe lolita Alatala, laitarimara hante goe rarara. Naupawee momara nolari, pade peparahayara hangoni aga. Hangka naratapi pehori, nangkohuramo. 14To nanawu i lentongo dunumpu rui, nahibali hante tauna to nangepe lolita Alatala, naupawee kahaa-haea hira laiupi kamere rara, kahugia, pade kasanaa katuwua i dunia ei. Etu pade moma naria wuara to nataha. 15To nanawu i tana to narudu, nahibali hante tauna to nangepe lolita Alatala hante rara to nabelo, pade natigu peparahayara duura nampowuaka ingku to nabelo.”

Porapa nangkambelai poindo

(Mrk. 4:21-25)

16“Moma naria haduaa tauna notutuni poindo pade laitalounina hante loya ba laibolina i une poturua. Naupawee kana naboli i lolo poboliana ami, bona tauna to marata i rara hou ee mampanaa baana. 17Moma naria to laitabuhini to moma rahungke, pade moma naria to laipopalerui to moma rakewoka tauna. 18Etumo, maingahawo bewa komi mangepe lolita Alatala, habana hema-hema to mantarima pade manturuhi lolita Alatala, Alatala mampatambaiki napa to incanira. Naupawee hema-hema to moma madota mantarima pade manturuhi lolita Alatala, nau napa to ipekirira laincanira kana ra'ala nculi lako hi hira.”

Yesus pade ompi-ompi-Na

(Mat. 12:46-50; Mrk. 3:31-35)

19Tempo Yesus nopatudu, tina-Na pade ompi-ompi-Na narata hi Hia. Naupawee moma-'I namala laimohukira apa nadea tauna nahiromu i humpii-Na. 20Lauparia naria to nangkewoka-'I, iulina, “Tina-Mu pade ompi-ompi-Mu i hawalikuna eera ria, mingki mampotomuka-Ko.”

21Nangepe lauria, laiulika-Nara, “To nangepe pade nampoingkuka lolita Alatala, hirami tina-Ku pade ompi-ompi-Ku.”

Yesus nampakaora ngolu bohe

(Mat. 8:23-27; Mrk. 4:35-41)

22Hangkani tempo, Yesus nencawi hangu duanga hingkani-ngkani hante ana guru-Na, pade iulika-Nara, “Kitamo rau i dipo rano ei.” Lauparia neongkoramo. 23Bulara noduanga, Yesus natepoturu. Lauparia, ngolu bohe nantawiri i rano ee hampena duangara laipehua ue pade ke nono matala.

24Alaana ana-ana guru-Na rau nampalike-'I, iulira, “Guru! Guru! Mamatetamo!”

Nematami Yesus nangkamaro ngolu pade balumba ee. Hangoo-ngoni ngolu pade balumba ee nentuu.

25Napu ee iuli-Na Yesus hi ana-ana guru-Na, “Napa pade moma komi neparahaya hi Aku?”

Naeka bo nahera purara ana guru-Na pade noneulika hore hira, “Hema kakonona tauna ei? Wungka ngolu pade ue nanturuhi-'I.”

Yesus nampopalai anudaa lako tauna to Gerasa

(Mat. 8:28-34; Mrk. 5:1-20)

26Poma nahae lako ee, narataramo Yesus hante ana-ana guru-Na i Gerasa to nonedipohi hante Galilea. 27Pehompo Yesus lako duanga rau i lorena, hadua tauna to laipehua anudaa lako ngata ee nampotomu-'I. Nahaemi tauna ee moma nowaru pade momami no'oha i hou, no'oha i podayoadimi. 28Hangka tauna ee nampahilo Yesus, nongaremi pade notingkodu i tingoo-Na, pade hante narimboho, iulina, “Yesus, Ana Alatala to i Lolona, napa uruhia-Mu hante aku? Nemo'akuwo Mupakaheha!” 29Hia nanguli iwee habana Yesus namparenta anudaa ee malai lako tauna ee. Apa nadea ngkanimi anudaa ee nampehuai tauna ee mai, hampena laipodoo moto oa'i, laihilu hante rante pade laibalangku. Naupawee laipakadepana oa rante ee mai, pade anudaa ee nangkeni'i nehuwu rau i kalinoana.

30Pade nepekunemi Yesus, “Hema hangamu?”

Nehono'i, “Legion#8:30 Legion ei lako baha Yunani. Batuana: tantara to kadeara maria 3.000 hampe 6.000 dua..” Laiulina iwee apa nadea anudaa nampehuai'i. 31Lauparia, anudaa ee nerapi hi Yesus bona nemora Naparenta rau i lowu to moma namala laihuka kandalana.

32Moma na'awa lako hee, nadea mpuu wawu bulara nampali pangkoni i wiwi bulu. Nerapiramo anudaa ee mai hi Yesus bona Napaliura mampehuai wawu-wawu ee mai. Laituruhi-Nami Yesus perapiara. 33Lauparia, nehuwuramo anudaa lako hi tauna ee mai pade rau nampehuai wawu-wawu ee. Alaana wawu-wawu ee mai nokumeno nengkanawu lako bingkena rau rara rano, hampena namate naonga hangkanira.

34Hangka laihilora napa to nadupa, to nampodoo wawu eera mai nokumeno pade nangkewo to nadupa lauria hi tau-tauna i ngatara pade tongki-tongki ngatara. 35Lauparia humawee tauna rau nampahilo napa to nadupa ee mai. Karatara hi Yesus, laihilora tauna to ipehua anudaa ee mai noncuna i humpii paa Yesus, nowarumi pade nanotomi. Nampahilo lauria naeka purara. 36Tau-tauna to nampahilo mata napa to nadupa, nangkewokara tauna to lako narata, bewa tauna to laipehua anudaa ee laipakauri. 37Napu ee, humawee todea i Gerasa namperapi hi Yesus bona Napalahiramo, apa naeka mpuura. Lauparia nencawimi Yesus i lolo duanga madota manculimi.

38Tauna to natebakaha lako anudaa ee nerapi hi Yesus bona rapaliu'i mantuku Yesus. Naupawee Yesus nantudu'i manculi, iuli-Na, 39“Panculimoko rau i houmu pade kewokaramo hangu hangaa to laibabei Alatala i wotomu.” Lauparia, raumi to laipakauri ee i humawee ngata, nangkewo nangkambelai humawee to laibabei Yesus hi hia.

Yesus nampakatuwu nculi ana Yairus pade nampakauri hadua bangkele to nohaki noraa

(Mat. 9:18-26; Mrk. 5:21-43)

40Karata-Na Yesus i dipo rano, nadea tauna nampotomu-'I, habana humaweera nampopea-'I. 41Tempo ee mui narata hadua to ikahangai Yairus, to pangkeni i hou pepuea. Yairus notingkodu i paa Yesus nerapi bona rau-'I i houna. 42Habana, anana to hadudua hangu-hangudimi inohana, parami mamate. Anana ee mai bangkele, umuruna ba maria hampulu rompaemi. Bulara nomako rau hou Yairus, nonegompa-gomparamo todea nomako i humpii Yesus.

43Naria hadua bangkele to hampulu rompaemi naharo noraa. [Humawee gaguna napu laipopobayarina hando, naupawee moma hema namala nampakauri'i.] 44Laimohukinami Yesus lako talikua-Na, laituina wuntu waru-Na, pade ngkali nentuumi poraana.

45Lauparia, nepekunemi Yesus, “Hema to nantui-'A?”

Humawee tauna nehapu. Petrus nanguli, “Guru, nadea tauna nahiromu i humpii-Mu pade nampagompa-Ko.”

46Naupawee iuli-Na Yesus, “Naria tauna to nantui-'A, habana lairasai-Ku naria baraka nehuwu lako woto-Ku.”

47Hangka laincanina bangkele ee ane momami mamala napopalerui napa to ibabeina, naratami hante nokaridi notingkodu i tingoo Yesus. Laituturanami hi Yesus i tingoo todea ee mai napa pade laituina wuntu waru Yesus, pade podamana wuntu waru Yesus ngkali naurimi hakina.

48Lauparia Yesus nangulika bangkele ee, “Ana-Ku, iko nauri habana neparahayako hi Aku. Panculimoko hante goe raramu.”

49Bula Yesus nojaritadipi, naratami hadua tauna lako hou Yairus, nangulika Yairus iwei, “Namatemi anamu. Nemopi mupakaheha Guru.”

50Pangepe-Na Yesus lauria, laiulika-Na Yairus, “Nemoko maeka, parahaya-'Amo. Mahalama moto'i anamu.”

51Karatara i hou Yairus, moma hema laipaliu Yesus nehua rara hou. Wuwu Petrus, Yohanes, Yakobus, hante tuama pade tina ngana ee aga to laipaliu-Na. 52Humawee tauna i hee nakeo notantangihi ngana ee. Naupawee iuli-Na Yesus, “Nemo makeo, ngana ei moma'i namate. Naleta moto'i.”

53Laitawanakara-'I, apa laincanira ngana ee namatemi.

54Laikakamu-Na Yesus pale ngana ee pade iuli-Na, “Ana, pematamoko.”

55Tempo ee mui nanculimi inoha ngana ee pade neongkomi ngana ee nokangkore. Yesus nantudura mopakoni'i. 56Nahera mpuura totua ngana ee, naupawee laitagi-Nara Yesus bona nemo rakewora hi hema-hema napa to nadupa.

Currently Selected:

Lukas 8: MYL

Highlight

Copy