Lukas 17
17
Weyak ogasagwi wene
(Matius 18:6-7, 21-22; Markus 9:42)
1Yugirigya lagagirik, Yesus en At ane welagwi menda ako yugirigya dugwit, “Hit weyak ogarovovok yiluk, henendawima nomalhinivi warisogon ovara, at henendawima nomalhinivi wandiga ako andi, anggin ovaga arugwi! 2Ap ambien avyak mariduk yi, weyak ogarupwak en yiluk, enendawima nomalinivi wandiga vaga avyak ako weyak ogagu saoen, helep ombok gandum yanggalisagwi menda vaga ap andi avup heda yidibaluk, inamut agurukmu wombabiselapmu en sek aro. 3Anderogo atma, henova hwalogo dogwes.”
“Hit henaswe ambien weyak ogagya halok, anggadi warup. Anggadi wakbaluk, weyak ogaga ako asam helok, mbobagya halok, at omaduk andi, degerogo bagu dogop.”
4“Eke, ap ambien ndugwis ambi vaga weyak 7 hudi okbugugu dogomindik, asam helok, ‘Ai, an weyak okbigigis o,’ yiluk, ogaga ndatak 7 hudi yukhera wagya halok, hirenen 7 hudiat omaduk degerogo bagu dogop,” yiluk, yugeragagi.
Enendawi avyarat ombasagwi wene
5Yugirigya lagagimu, it lakbigik menda akoen, “Nenasin o. Nenendawi hat hovaga vanggabaluk, avyarat hombasagwi ako ambi inim hoda aruguluk okbininin.”
6Yugugu lagagwama, At Nenowa Yesus en it yugirigya dugwit, “Hit henendawi novaga vanggabaluk, avyarat nombasagwi ako yo vudok enggen maduk ovagak duklipmu en yo wane ombok yi, ‘Hadem hen hedelok is endawima yaklarilak,’ yugugu hiniselok, yaklari lagya helap,” yiluk, yugeragagi.
Asin en yugugu halok, ayeloman ogagya dogop wene
7Yugirigya lagagirik, ambi yugirigya dugwit, “Hit henayeloman ambien yavup ogagya a, ata henandomba malinipu a, ogarit lagya dogomindik, wasim en henamwa nunggwigya halok, hiren, ‘Hodorogo erom na oma,’ yiluk, yugurup embetep? 8Ata, hiren henayeloman ako yugugu dugwit, ‘Nit nenagarom isagago biniluk, hayum yikhidigya dogomindik, nit nunggu ninigik, hat nit nenake yi welagek ndi welagek ogagya dogop. Eke, nit ovok nunggu niniselok, hat erom na omano,’ yiluk, anderogo yugisagwi. 9Asin en ayeloman ‘Yerogo ogarup, nderogo ogarup,’ wene yugigas ako adigat ogagya halok, at eyavup atma, asin en, ‘Wa!’ yugisigadek. 10Andi halok, hit ndatak, wene, ‘Yerogo ogarup, nderogo ogarup,’ yukheraliga ako ovok erogo okbagu dogomindik, ‘Dek. Nit un hayeloman adigat agurik. Havema dugwit, hat yuknirigya halok adigat ogasagwi atma, wa yuknerabuk,’ yugugu dogop sek,” yiluk, yugeragagi.
Ap amu hunik eneyave 10 sek okbogogi wene
11Hivis ndugwis ambi vaga At Yesus o Yerusalem lagya dugwit, o Samaria wombalhegek, o Galilea ilik hegek, sup ilim vaga lagagi. 12Lagya dugwit, o asoragoma nunggwigya hegek, ap eneyave 10 amu hunik menda en Yesus nunggu wagya inil hugu lagagwarik, adumu lenak en#17:12: It avakwa enamu hunik halok, amu ako ap eneyave sek menda enovaga arugwi en yiluk, horok-horok ari warup moga, yiluk, yugu lagagwa. Andi halok At Yesus wagya inil hugu lagagwarik, it o adumu en yugogogwa. Imamat 13:45-46 yokhanes. 13enane ombok vaga At yugugu dugwit, “Nenasin Yesus wai! Nenabwa hanen o.”
14 #
Imamat 14:1-32 yokhanes. Yugugu lagagwama, At Yesus il biginugu lagagirik, “[Musa wene dirup warek ako ndatak], it ap imam-imam en inil hinisapwak yiluk, heneyave inuk eralales.” Yugirigya lagagimu, it ako, lagusigik, enamu hunik ako dek agagi.
15Enamu ako dek agya lagagimu, at ambien imbita dugwit, “An sek agi,” yiluk, imbita lagagirik, suguliluk, eyami vaga wagya dugwit, ane ombok vaga Ala inis siyabalin wagagi. 16Ala inis siyabalin Yesus avema seve yi wagya lagagirik, endawi adenggen en, Yesus “Wa!” yugogogi. Eke, ap andi, awi Samaria menda aro.
17Ap ako Yesus, “Wa!” yugugu lagagimu, At Yesus en, “It ap eneyave 10 sek aga akora? Eke nin eneyave 9 ako nggoma lagao? 18It nin Yakuri menda ako wagetek inigik ap weram Samaria menda yi adigat Ala inis siyabagiluk, eyami vaga suguliluk waga?” 19Yiluk, Yesus en ap ako yugugu dugwit, “Hendawi novaga vanggabaluk, avyarat nembeten vaga sek agindikmu, mendek yiluk elak o,” yiluk, lakbagagi.
Ala avema bisa warup wene
(Matius 24:23-28, 37-41)
20Andien, hivis it Varisi menda en Yesus yugugu dugwit, “At Ala en nit mera avema binina warimi?” yiluk, Yesus aigwakma wugu lagagwama, Yesus en it yugirigya dugwit, “At Ala en avakwa At avema bigiga warup ako andi, avakwa yedok hapwak yiluk, ogagetek hegek warugwi. 21It avakwa en ogo, ‘Yoma wandiga yi bikhanes.’ ‘Andoma wandiga andi bikhanes,’ yukheregetekma warugwi. Ala avema bisaup andi, vage hit henanggelekma agarik umbutu dogones,” yiluk, yugeragagi.
22Anderogo yugirigya lagagirik, At ane welagwi menda ako yugirigya dugwit, “An Ap-At Endaklagagis yi, ‘Ndugwis ambiat eyave ninil hauk dek ai,’ nombarumwi ovara, hinil neyagupuk andi, vage vanggo yi wasogon. 23It avakwa en, ‘Eyave yoma agarik atma, bikhamanes.’ ‘Andoma agarik atma, bikhalales,’ yukhiruguselok, enamusek labuk. 24Andi, o digavok mbogot vaga en yovalevet higya halok, o atok-atokma ovok erogo awiya agya dugwit ovok sigam asiga hak, An Ap-At Endaklagagis warup andi vaga anderogo ogarugwis. 25Anderogo ogarugwis ovara, endak, avakwa en mondok novaga edup-mbedup erogo banunggwi, avakwa yogak agarwik akoen An enanggon yiluk, mbobanunggwi, ogarusogom.”
26 #
Kejadian 6:5-6 yokhanes. “Ap Nuh eyave hegek, avakwa ugun ogarit nagu lagagwa ako ndatak, An Ap-At Endaklagagis warup amor agyaim it avakwa anderogo ugunat ogarit lagu dogosogom. 27#Kejadian 7:6-24 yokhanes. It avakwa en ugunat enagarom nunggwi, enagas nunggwi, ap en akwa hidugwi, akwa en ap hidugwi, ogarit nagusigik, ap Nuh mburis ombok elola nunggwigya lagagimu, is yanggadit inggya dugwit, it eneyave ovok erogo is ndokalinipigi.”
28“At Lot eyave hegek, ogagagi ako ndatak avakwa en enagarom nunggwi, enagas nunggwi, enangge-enangge hunggun okhidugwi, yavup ogagwi, o vanggwis, ugun ogarit lagusigik, 29#Kejadian 18:20-33; 19:1-25 yokhanes. ap Lot o Sodom en wunggu lagagimu, Ala mbogot vaga en helep enggen hali inim wombaba wagya dugwit, it eneyave ovok erogo degerogo bogogi.”
30“It ugun ogarit lagusim, degerogo bogogi ako ndatak, An Ap-At Endaklagagis ako avakwa anderogo ugun ogarit lagusim, andi vaga sigam ari warugwis.”
31“Henangge handimen hegek, heneyave mbedakma werekma, An wagya neyalok, henangge handimen agarik ako heda dagabuk, eke, hit nin yavumu agipik ako heneyami vaga suguliluk, henamwa labuk.”
32“At Lot ogwa ogagagi ako henape wenggeles!#17:32: At Lot ogwa ogagagi ako, mbuku Kejadian 19:26 yokhanes. At Lot ogwa ako, o Kota Sodom en wunggu dugwit, ambukmu bikha lagya lagagimu, helep garam ovagak agagi. 33Hit heneyave hinidi okhidugu dugwit, An nane mbobamwi halok, heneyave yelemele yusogom. Eke, An ninis ombok arupwak yiluk, heneyave idi dek okbetamwi halok, hinidi ogarek dogosogom. 34Ndugwis andi vaga hup ap mberen handimen nogo yugusim ambi wigya, ambi hekbagya, 35akwa mberen gandum enggen yangganggusim ambi wigya, ambi hekbagya, 36(eke, ap mberen eneyavumu werekma, ambi wigya, ambi hekbagya,) ogagya hagup, yiluk, yukheraliga,” yugeragagi.
37Yugirigya lagagimu, At ane welagwi menda en, “Nenasin. Andi o nggoma en ogarup yiluk yegen?”
Yugugu lagagwama, At Yesus en, “Wam vidis agarikmu akoma swa ikakuk linggilisagwi,” yiluk, yugeragagi. #17:37: Swa ikakuk linggilisagwi halok, ap en, wam vidis agarik yedok helagwi. Andi wane-wane, Yesus en yerogo oklarisogon yagagi ako oklagya halok, Yesus vage warisogon yedok hasogom.
Currently Selected:
Lukas 17: nbq2013
Highlight
Share
Copy
Want to have your highlights saved across all your devices? Sign up or sign in
