Matius 27

Yesu nipehea mao i ampu parenta tu Roma, dea‑mo Pilatus

(Mrk. 15:1, Luk. 23:1-2, Yoh. 18:28-32)

1Tòna masilao:‑mo, nasang kapala-kapala imang pang ung si matua:-tuana tu Yahudi mamesa sua:‑mo mangking Yesu nipatei. 2Na pungunna‑mi se ti Yesu, màli: na baha‑i se mao i gubernur Pilatus.

Kamateangna Yudas

(KUNP 1:18-19)

3Na itanna‑i Yudas, ung mambaloko Yesu to, moa teꞌ Yesu nihukung mate‑mo, minassang tungka. Na ulena‑ming ti itàlu pulona seeng peraꞌ to mao i kapala-kapala imang pang ung si matua:-tuana tu Yahudi. 4Na konai: teꞌ, “Ku kasalaang‑moko mambaloko Tau ung dang ara kasalaangNa.”

Hampoꞌ na sùmui‑i se teꞌ, “Aka‑ka ti ìsangki to? Ìsangmu‑do!”

5Na pitumpana‑mi Yudas ti seeng to mao i laling Tamming Kabussùngang, màli: na lumao mingkasosang mampatumpio: kalaena.

6Kapala-kapala imang marroroko seeng to pang musua: teꞌ, “Hang mading‑i ti seeng tee nikobu: sola: seeng pinomba, sàbaꞌ seeng raa:‑da.”*#27:6 seeng raa:, palleona, seeng ung nipake mambalaꞌ kamateangna tau. 7Tòna silàhai:‑mi se, na pake‑i se ti seeng to mambalaꞌ tampo: ung nikonai: Tampona Pibabe Koring Tampo:, mangking tampo: to nipake miluhali pukaburuꞌangna tubùruꞌ. 8Dea pùna tampo: to nikonai: Tampo: Raa: deaꞌ i latenna.

9Nai anto tikannaꞌ aka ti ung nipusua: mangola: nabi Yermia teꞌ, “Na ala‑i se ti itàlu pulona seeng peraꞌ, dea‑mo balaꞌna tau ung na kasitoroꞌi tu Israel, 10pang na pake‑i se mambalaꞌ Tampona Pibabe Koring Tampo:, mène: ti ung na pasakiꞌ‑ingnaꞌ Puang.”*#27:9-10 Hele i Sak. 11:12-13, Yer. 19:1-13.

Yesu i heleꞌna gubernur Pilatus

(Mrk. 15:2-5, Luk. 23:3-5, Yoh. 18:33-38a)

11Tòna Yesu tèdeꞌ i heleꞌna gubernur Pilatus, mingkutiki ti gubernur teꞌ, “Tongang naꞌ U datuna tu Yahudi?”

Na sùmui Yesu teꞌ, “Mène:‑mo ti ung ta pusua:.”

12Hampoꞌ tòna kapala-kapala imang pang ung si matua:-tuana tu Yahudi mantannaꞌ‑I, hari: Na misùmu. 13Musuana‑mi ti Pilatus moa teꞌ, “Ha U sàding‑i naꞌ nasang aka ti ung nipantannaꞌ‑ingKo?”

14Hampoꞌ hang na sùmui‑i hura: Yesu, dea pu na kallei‑I tungka gubernur.

Yesu nihukung mate

(Mrk. 15:6-15, Luk. 23:13-25, Yoh. 18:38b~– 19:16a)

15Tumpuꞌ heaꞌ tempo perayaang Paska, miluhali‑mo kabiasaangna gubernur ti mangholi besa tau ung nitarungkuꞌ, isai-sai ti ung na palau tau boso:. 16Tempo dea to, ara besa tau ung nitarungkuꞌ ung makona: gorombolang ung nikonai: Yesu Barabas. 17Deanna‑mo to, tòna mukobu:‑mi se ti tau boso:, mingkutiki ti Pilatus teꞌ, “Isai ti ung nu kapelai: se ku holi‑ingko se? Yesu Barabas? dea‑raka Yesu ung nikonai: Datu: Pipasalamaꞌ.” 18Musua: mène: to ti Pilatus sàbaꞌ na ìsang teꞌ Ung si Nipiama: i tu Yahudi mampehea Yesu, ha umma‑i to, mapanaꞌ pinanaha‑i se.

19Tòna tarrang mesong i esòngang mangkàtui kara-kara ti Pilatus, mipasang ti bahinena teꞌ, “Hau mangkatama‑do kara-karanna Tau to ung dang kasalaang. Ku masussa tungka i laling pupaturungku hengi i langena: sàbaꞌ Dea.” 20Hampoꞌ kapala-kapala imang pang ung si matua:-tuana tu Yahudi malloloꞌ tau boso: mampalau mangking Barabas ti ung niholi pang Yesu nihukung mate.

21Na kutikìna‑mi pole gubernur teꞌ, “Nai idua tau to, isai ti ung nu kapelai: se ku holi‑ingko se?”

Na sùmui‑i se teꞌ, “Barabas!”

22Jadiꞌ, na kutiki Pilatus teꞌ, “Ìna mène: to, aka ti ung ku pukauꞌa mao i Yesu ung nikonai: Datu: Pipasalamaꞌ?”

Na sùmui‑i se nasang teꞌ, “Pai oròngang‑I!”

23Musuana‑mi teꞌ, “Hampoꞌ aka ti kasalaangNa?”

Hampoꞌ sa: na pilabu:-labuina‑i se ti mikakoang moa teꞌ, “Pai oròngang‑I!”

24To na hele‑mo Pilatus teꞌ hari: buaꞌna to ung na pukauꞌ pang tau to‑i se marrara‑mo maritu, na alanna‑mi ti uhai, na ase: ti kangkangna i heleꞌna tau boso: to, na pasianu musua: teꞌ, “Hari:‑ko kasalaangku mampatu: raana Tau tee. Dio dosse: teng ti ung mangìsang!”

25Nasang tau to‑i se massùmui teꞌ, “Eloꞌna kami pang ana-anakàki ti ung mangìsang!”

26Na holinna‑mi Pilatus ti Barabas, hampoꞌ dea ti Yesu, na pisuo:‑ing nisasa: mampake pisasa: ung mène: diu:, màli: na pehea‑I nipai oròngang.

Yesu na òhoꞌ-òhoꞌi tantara

(Mrk. 15:16-20a, Yoh. 19:2-3)

27Na bahanna‑mi tantaranna gubernur ti Yesu mao i pangàloang ung na pai laling pangkaoneina gubernur, pang manghàngo nasang pasukang mukobu: mampimpalìngi Yesu. 28Na hungkai‑i se ti kayaꞌna Yesu pang na pakei‑i se kayaꞌ ung malea:, ung mène: pakeangna datu:. 29Malliko:‑i se oaꞌ ung kisura, pang na pantalii‑ing Yesu, màli: na patokaꞌi‑i se doke: i kangkang konangNa. Mukalimuntuꞌna‑mi se i heleꞌNa pang na òhoꞌ-òhoꞌi‑i se teꞌ, “O Datuna tu Yahudi, salamaꞌ!” 30Na tangkudui‑i se, pang mangala doke: to, na pangkunnong‑ing. 31Ladu na òhoꞌ-òhoꞌi‑i se, na esing‑i se ti kayaꞌ to pang na pakei‑i se kayaꞌNa hon‑da, màli: na toroꞌ‑i se lumao nipai oròngang.

Yesu nipai oròngang

(Mrk. 15:20b-32, Luk. 23:26, 33-43, Yoh. 19:16b-24)

32Tòna sòhong‑mi se lipu:, sikorai:‑i se besa tau tu Kirene ung nikonai: Simon. Na paruku‑i se ti tau to mangkoha: oròngangna Yesu.*#27:32 tau to mangkoha: oròngangna Yesu. Hele catatan kaki i Yoh. 19:17.

33Deaꞌna‑mi se i kaoneang ung nikonai: Golgota, palleona i Karurung.*#27:33 Golgota nikapang tungka moa teꞌ anaka mungku hatu ung heleangna mène:-mènei: karurung tulino. 34I anto, na paenung‑i se anggoroꞌ ung nilaoko pùru ti Yesu. Hampoꞌ to Na illaꞌi‑mo, hang mio:‑I mangenung.

35Na pai oròngangNa‑mi se, màli: na kàlaꞌ-kàlaꞌ‑i se ti pakeangNa mangola: mantammo undi. 36Ladu to, mesong‑i se mangkuyaꞌ‑I. 37Iahona bakàNa nipindasong‑ing ti papang ung niparronnoi: to ung nipampakasalaang‑ing moa teꞌ, Dea‑mo te ti Yesu, datuna tu Yahudi.

38Nipai oròngangna‑mi ho ti idua gorombolang sitere Yesu, besa mui konangNa, besa mui kairinNa.

39Tau ung liung i anto mampibìsiꞌ‑ing, na pasianu mingiling,*#27:39 Tu Yahudi, ìna ara ung na pibìsiꞌ‑ing, mingiling‑da, hampoꞌ tu Padang mangio:-io:‑ing bakàna. 40pang musua: teꞌ, “He Tau ung marronnònga Tamming Kabussùngang pang mampatèdeꞌa pole i laling itàlu àlona, ìna U Anakàna‑do Puang, minguluꞌ‑Ko nai oròngang! Pasalamaꞌ ti kalaeMu!”

41Mène:‑da ho ti kapala-kapala imang sola: ung si manarangna i aluku pang ung si matua:-tuana tu Yahudi, mampenge:‑I. Na konai:‑i se teꞌ, 42“Tau sintàna: Na pasalamaꞌ, hampoꞌ kalaeNa hang hela‑i Na pasalamaꞌ! Àla: Datuna‑i tu Israel, na minguluꞌ‑mo nai oròngang to, màli: ta mupatongang mao i Dea. 43Na pasare‑da ti kalaeNa mao i Puang, pang Na konai: teꞌ, ‘Ku Anakàna Puang.’ Baꞌ eloꞌna‑mo Puang mampasalamaꞌ‑I i latenna ìna Na kapelai:!”

44Nai idua gorombolang ung nipai oròngang sola: Yesu, pola: ho massalai:‑I.

Kamateangna Yesu

(Mrk. 15:33-41, Luk. 23:44-49, Yoh. 19:28-30)

45Na rara na làsuku kùlaꞌ, nasang i pangalanna lipu: to miluhali makarinning deaꞌ mulummu: sumòloꞌ kùlaꞌ. 46Tòna mulummu:‑mo sumòloꞌ ti kùlaꞌ, mikakoang musua: ti Yesu teꞌ, “Eli, Eli, lema sabaktani?” palleona, “PuangKu, PuangKu, aka pu U Mi palii:‑do?”

47Massàding to, pira-pira tau ung tèdeꞌ pai anto musua: moa teꞌ, “Ei, manghàngo‑Da nabi Elia.” 48Aranna‑mi besa nai tau to‑i se ung masàraꞌ mangala ung mène: lomoꞌ-lomoꞌ,*#27:48 ung mène: lomoꞌ-lomoꞌ dea‑mo bunga karang i laling sua: Malayu. na làbung i uhai ung nilaoko anggoroꞌ mihiaꞌ, màli: na pingàna:‑ing i sallengkeꞌ musandeanna sairang pang na pampaenung‑ing Yesu. 49Hampoꞌ musua: ti tau sintàna: teꞌ, “Hàni:! Hele‑ke se, bùruꞌa‑raka ti Elia mampasalamaꞌ‑I.”

50Mikeina‑mi ti Yesu pang massorongang pinanahanNa Na ola:‑ing mangkàtu.

51Tempo dea teng to, ihanang pisapaꞌ*#27:51 ihanang pisapaꞌ to, nikapang 2 deaꞌ 3 senti makammangna, patuna massapaꞌ Kaoneang Kamìnang Malìsong nai Kaoneang Malìsong, palleona, matantu teng ti tau ung mading mintama i Kaoneang Kamìnang Malìsong. Hele i Ibr. 9:3-5 pang 10:19-20. i laling Tamming Kabussùngang marèbaka lummu: nai iaho deaꞌ i hoiꞌ. Lino paranìning na ola:‑ing pidodaꞌ, mungku-mungku hatu mabika:, 52pang tuhangka ti kaburuꞌ. Boso: ti taunna Puang ung mate‑mo nipatuho: pole 53pang missòhong‑i se nai kaburuꞌ, tempona tuho:‑mo pole ti Yesu. Mintama‑i se i lipu: Yerusalem pang boso: tau ung mangita‑i se.

54Komandang kompi pang pasukang ung si mangkuyaꞌ Yesu miluhali mariaꞌ‑i se tungka manghele pidodaꞌ to pang nasang aka to ung jadi. Musuana‑mi se teꞌ, “Ìnang Anakàna‑da Puang ti Tau tee!”

55I anto, ara ho boso: bahine ung mihele nai karaona, dea‑mo bahine ung mangulaꞌ‑mo Yesu pang mallayani‑I na rara nai Galilea. 56Nai àlaꞌna‑i se to, ara Maria tu Magdala, Maria inanna Yakobus pang Yusup, pang inanna Yakobus pang Yohanes, anakàna Sebedeus.

Yesu nikaburuꞌ

(Mrk. 15:42-47, Luk. 23:50-56, Yoh. 19:38-42)

57Mangkonaia‑mo hengi, bùruꞌ ti besa tau ung sukiꞌ, dea‑mo tu Arimatea ung nikonai: Yusup. Tau to ung mangulaꞌ‑mo Yesu. 58Lumao i Pilatus mampalau hatang puntinna Yesu.*#27:57-58 Manuruꞌ aluku tu Yahudi, tau ung nihukung mate parallu nikaburuꞌ hang lìli:‑mi ti kùlaꞌ (Ul. 21:23). Na piparentanna‑ming Pilatus mangking nihengi‑ing. 59Na alanna‑mi Yusup ti hatang puntinna Yesu, na babaꞌi ihanang lenang ung hola:, 60pang na loling i laling liokoꞌ ung màli: nibabe, ung na boboko i mungku hatu. Na palloliinna‑mi hatu ung lammuꞌ ti babana kaburuꞌ to, màli: na palii:‑i.

61Hampoꞌ Maria tu Magdala pang Maria besa to, mesong‑i se i anto, i heleꞌna kaburuꞌ to.

Kaburuꞌna Yesu nikuyaꞌ

62I hingkoꞌna nai anto, tempo àlo kapillìheang, kapala-kapala imang pang tu Parisi lumao i Pilatus 63pang mangkonai: teꞌ, “Tuang, ki kalehai to tempona tuho: maang ti pumputangkasi: to, ara Na konai:‑i teꞌ, ‘Tòna liung‑mo itàlu àlona, Ku nipatuhoa pole.’ 64Deanna‑mo to, ki palau mangking u suo:‑i ti tau mangkuyaꞌ kaburuꞌ to deaꞌ itàlu àlona, mangking hang pakala‑i na pumanau pasikolaNa ti hatang puntinNa, màli: na pusua:‑i se mao i tau boso: teꞌ nipatuho:‑moDa nai kamateangNa. Pang putangkasi: ung tampakàna to, làbi kadetua‑da nai none: ung parrara.”*#27:64 ung parrara. Nitassereꞌ moa teꞌ pantangaꞌna kapala-kapala imang pang tu Parisi, ung mangkonai: teꞌ “putangkasi: ung parrara” dea‑mo Yesu mangkonai: kalaeNa Datu: Pipasalamaꞌ.

65Na sùmuinna‑mi Pilatus teꞌ, “Hedi: ti pumpukuyaꞌmu se e. Nao: se pang kuyaꞌ‑ko se belo:-belo: ti kaburuꞌ to.” 66Lumanna‑mi se i kaburuꞌ mampantiꞌ hatu pitanaꞌna, pang pantiꞌ to nitumbuꞌ, màli: na pumpukuyaꞌ to, leta:‑i se one: mangkuyaꞌ.

Currently Selected:

Matius 27: skx

Highlight

Copy